Koloshi 2

Nhlə yee ŋkīɛɛ lə nfə lə bəŋ bə Koloshi kələ lə ye nfɨ̀mə lə nəni gbaaŋ yu bəŋ, bə yu bəne bə Layodeshia maa bəne bə kimbemi bənhliŋ bbəŋ bə́ kə hlaa lə ŋəŋ ə mi go kə. 2 Nfə̀ nəni fo tɔ́ŋ ŋieeŋ bə ŋəbə lə yee ŋə tā, ə bə bumə yee bə dūŋ ə kinleki mə, bəŋkələ ba kinwaa bieŋ binhliŋ ye mbɛɛ duŋ lə i kələ, fo bə lə kələ dəŋ bieŋ bbɨŋ bi dùŋ kinələ ki Chu, nnu i duŋ yo Kleto. 3 Chu mà nəla nchu bufe bunhliŋ bə bieŋ bbɨŋ bəne kənə bəŋkələ kiih, ə duŋ ə Kleto mə. 4 N'yɔ̄ɔ fɨhŋ fo mbɛɛ ju lə nakə jaa bwo bə biyɔɔnə bi biwu binjənjə fihi bəŋ mu. 5 Bə kələ lə, maa ye nduŋ lə je nyɛɛkə ə bəŋ go nəni, n'yo bə bəŋ ə fiana mə. Ntɨ̀ŋ ye ŋŋə̀ŋ lə ye bə fə̀ bieŋ ə jé yinwaa mə, bə yìi tɔ́ŋ ə Kleto mə, ŋə tà gbaaŋ.

Bəne bə Kleto fwoo kwoo ə bəŋkɨnə binya kwáŋ

6 Ye bə tɨŋ lə jə Kleto Jisho lə i dùŋ Baba, yee bə dûhŋ kwaa ə wu mə nəni. 7 Bə tà gɛŋ, bə kò ə wu mə, bə lèmi ntakə ə kimbemi kieeŋ mə yəəŋ ye bə́ mà keeh'lə bəŋ, bə nə̀ kimbaafɛɛ bə Chu nfanfa. 8 Yee bə jə̂ bwɔɔ lə mbɛɛ kə jəə bufe bu yaŋ kwe bunya bu fihinə bwo bini bəŋ bə bwi lə bə chu bənfwa kə. Bufe buhŋ duŋ bbuŋ bu bə̀lə too wi mbɛɛ ŋkee bə bu bəfiana bbəŋ bə́ hlàah ə mbiŋ nu mə^ª. Bu duŋ nə bələ ye Kleto kiɛɛ lə kə. 9 Yee bə kə̂lə lə ye Kleto mà chu lə mbɛɛ ŋkee, duŋ fieŋ finhliŋ ffɨŋ wu Chu duŋ ə fi mə fie ə wu mə. 10 Bə kəna bieŋ binhliŋ ye bə buma lə ə Kleto mə. Ə wu kwoo ki bieŋ binhliŋ bbɨŋ bi kə̀nə muŋgeni bə bbɨŋ bi hlàah. 11 Ye bə mà bumə lə nəni, i nyieŋ bəŋ jó. N'yieŋ jó nu kə duŋ nə nnu bə́ nyìeŋ bə kwáŋ bwɔɔ nnu bə fwoo bwa wi gbo wi mbɛɛ kə. Nu lə nfə Kleto ye i mà nyieŋ lə nyaŋ gbo yiwaha. 12 Bwɔɔ nnu bə́ mà yii bəŋ ə njɔ, bə́ mà buhaŋ diih bəŋ bə Kleto. Chu baa fwoo dəŋ bəŋ yu tɔ́ŋ ŋŋəŋ bə mà yii ŋie ə wu mə fo mə lə fwoo bəŋ ə kpe mə bə muŋgeni mmuŋ i mà fwoo mwe Kleto ə kpe mə. 13 Bə mà hlaa duŋ bə hə kpee ə fiana mə yu bəŋkɨnə bə Chu bbɨŋ bə mà bwuŋ, ə duŋ bə́ kaani kə nyieŋ nə bəŋ jó bənhluŋ bieŋ bbɨŋ nyaŋ yeŋ nni go kìɛɛ kə. Fidiɛɛ, Chu fəə bə fiima bwo chu bəŋkee buhuŋ bəŋ bə Kleto. I laama nə yíwaha yaa yinhliŋ. 14 I gɔha fwoo bieŋ bbɨŋ bi kwò be ə Kiŋwaati ki bəŋkɨnə mə bbɨŋ bə́ bìeŋ kiaa. I jəə bieŋ bɨhŋ nini bweeni ə kiŋgwa go. 15 Kleto hlə kpee múŋga mu bieŋ binhliŋ bbɨŋ bi kə̀nə múŋga bə bbɨŋ bi hlàah, fwoo bi ə ŋwiŋ nte wɛɛŋ nə bi giaali, hlə kɨŋ bi ə kiŋgwa go.

Bəne bə Kleto yee bə́ wō ə duŋ fieŋ ffɨŋ i yɔ̀ɔ

16 Nəni, bə kə yee bə bêmi lə mbɛɛ ju baa yee i hlāah bəŋ ki bieŋ bbɨŋ bə dì, ləkə bbɨŋ bə ŋwì, ləkə lə bə chìlə bəŋkɨnə, ləkə chɔnɔ ki kpii wi fwii, ləkə lə bə shìlə bunte kə. 17 Bə́ fə̀ bieŋ bɨhŋ ə duŋ kwaa ye nchinchii fieŋ ffɨŋ fi mà duŋ bəmbwo, fieŋ fie kibɛɛ duŋ Kleto. 18 Bə kə bemi lə bəne bədi yee bə́ hlāah bəŋ, bə́ yɔ̀ɔ lə bə nyɔka je kə. Bəne bəhŋ duŋ bbəŋ bə́ yɔ̀ɔ lə yee bə bwɔ̄kwe bə go ŋieeŋ ye bə́ bwɔ̀lə, ə duŋ kə duŋ nə ə je nwaa mə kə. Bə́ yɔ̀ɔ dəŋ lə yee bə bwɔ̄kwe bə bənchinda bə Chu ye bə́ bwɔ̀lə. Bə́ yɔ̀ɔ lə bə́ kələ bieŋ yu bə́ ŋə̀ŋ bieŋ ə yó yibutuu mə. Bə́ wè bə bieŋ bbɨŋ bi bwò ə bufe bubə mə, kinuu ki mu ŋkələ hləŋ. 19 Bəmbini bie bəne gaa gbo bə Kwoo kkɨŋ ki dùŋ kie Kleto. Kleto duŋ nnu i nə̀ muŋgeni bə gbo wiih, wi hlə yee wi kō ye Chu bwɛɛlə lə yee wi kō. Kkə buma dəŋ ye gbo wi mbɛɛ mà bumə lə ə bichɔmənə bəŋ bə bigiini mə hlə yee bi nɨ̄ŋ yəəŋ. 20 Ye bə kpelə bə Kleto ə wɛɛ wi bəfiana bbəŋ bə́ hlàah ə mbiŋ nu mə, ə fə laha lə yee bə bāa bə dùhŋ kinduŋh yəəŋ ye bəne bə yaŋ mbiŋ nu nte lə? Bə baa bemi bəmbələ dɨŋ bəŋ bəŋkɨnə yulaha lə? 21 Bə́ ja pwɔ lə, “Mbɛɛ kə kənə ə fieŋ fɨhŋ go kə. Mbɛɛ kə mɔŋ nə fili jə kə. Mbɛɛ kə tuulə fɨhŋ go kə.” 22 Bieŋ bɨhŋ binhliŋ duŋ bbɨŋ bəne fə̀ bi kàh bu kanə, yulahalə bə́ bə̀lə bəŋkɨnə bbəŋ bəne chiee bələ ye bufe bubə nyìi. 23 Bəne ja yee bə́ ŋə̄ŋ lə bufe buŋkuntaŋ bwe ə bəŋkɨnə bəhŋ mə, ye bə nyìilə je nni bə́ yəə bəne lə yee bə chēe Chu ə jé yintiiŋ mə, ye bəmbwɔkwe ə duŋ kə duŋ nə maa ə je nwaa mə kə. Kwaalə, bieŋ bɨhŋ duŋ ə bi nakə chɨnə bənfwoo mbɛɛ ə bieŋ biwaha bbɨŋ nyaŋ nni go kìɛɛ mə kə.