Koloshi 1

Kiŋwaati kkɨŋ Pwɔɔ mà bieŋ bə kimbumə ki

Koloshi

Ə mi Pwɔɔ, mbɛɛ faŋnə Jisho Kleto ə kinhle ki Chu mə. Kkə bie bee Timɔti ŋgwoŋ ya. 2 Kiŋwaati kɨhŋ gəŋ bə bəŋ bəŋgwoŋ biaa bə Koloshi bbəŋ bə́ dùŋ bəne bə Chu bbəŋ bə́ lèmi ntakə ə Kleto mə. Chu Tah ya nyii tɔŋ liih linwaa bə bəŋ baa nə dəŋ tɔ́ŋ ŋəndə.

Pwɔɔ chèe Chu i nə̀ kimbaafɛɛ bə Chu bə bəne bə Koloshi

3 Bwɔɔ nnu kkə chèe Chu bə bəŋ bwɔɔ mənhliŋ, kkə nə̀ kwaa kimbaafɛɛ bə Chu Che Baba ya Jisho Kleto, 4 yulahalə kkə woo ki tɔ́ŋ ŋieeŋ ŋŋəŋ bə yiila ŋie ə Kleto Jisho mə, bə kinleki kkɨŋ bə kə̀nə bə bəne bənhliŋ bbəŋ bə́ dùŋ bə Chu. 5 Kkə kələ lə bə fə̀ nəni yulahalə bə kèe fwi ə duŋ ə fieŋ ffɨŋ Chu bwɛɛla chi yu bəŋ ə buh. Fieŋ fɨhŋ duŋ ffɨŋ bə mà hlaala wo ə die kichɛɛŋ ye mə, nni i dùŋ hlɨŋ nwaa. 6 Hlɨŋ ni mà bwoo ə bəŋ mə yəəŋ ye i mà bwòlə ə bəne bə yaŋ mbiŋ mənhliŋ mə, i gàanə kinduŋh ki bəne, baa i hlàamə i gə̀ŋ fwi fwi. Ə dəŋ yəəŋ ye fi mà kah bə bəŋ chɔɔ jə butuu bbuŋ bə mà wo hlɨŋ nwaa baa kələ bə kichɛɛŋ lə Chu nyiila tɔŋ linwaa bə bəne biih. 7 Bə mà woo hlɨŋ nih ə Ɛpafla kwáŋ nnu i dùŋ yo tɔŋ liaa, kkə nɨ̀ŋ bə wu ə fieŋ bəŋ fimwi. I duŋ mbɛɛ nimi Kleto, nnu i jəə dɔhɔ kiaa, i nɨ̀ŋ bə tɔŋ liih linhliŋ. 8 I yɔɔla kaa be ki kinleki kkɨŋ Fiana Chu fəə bə kə̀nə bə bəne. 9 Chɔɔ jə butuu bbuŋ kkə mà wo bwe kieeŋ nəni, kkə mà kə chee lə kwáŋ bənchee Chu bə bəŋ kə. Kkə chèe Chu kkə nòŋ lə Chu fiili bəŋ bə bufe bbuŋ bu fə ə bə kələ fieŋ ffɨŋ i kìɛɛ. Fɨhŋ lə kah ə bufe bunhliŋ mə bə bieŋ bbɨŋ Fiana wi fəə bə kələ. 10 Nəni ə bə hlə yee bə dūŋh kinduŋh kkɨŋ ki wuna bə Baba, ə duŋ ki kkɨŋ i lèki ba. Bwɔɔ nnu bə dùŋ nəni ə bə hlə yee bə nɨ̄ŋ nimi linwaa ə jé mə chili chili, bə kò bə gə̀ŋ fwi fwi ə fieŋ ffɨŋ bə kələ ki Chu mə. 11 Kkə chèe Chu dəŋ lə Chu nnu muŋga muŋkuntaŋ munhliŋ duŋ yo mwii, i nə bəŋ muŋgeni munhliŋ yee bə tâ gbo bwɔɔ mənhliŋ, bə kwàa tɔ́ŋ, bə gə̀ŋ fwi fwi ə fieŋ mə finhliŋ, bə tɨ̀ŋ, 12 bə nə̀ kimbaafɛɛ bə Tah ya. Ə wu nnu i mà fə kkə wunə bəmbwo kənə fieŋ ffɨŋ i mà bwɛɛ chi fie bə bəne bbəŋ bə́ dùŋ biih ə muŋkɨŋ mu kinchaa mə. 13 I mà fwoola be ə muŋgeni mu jɨbə mə, chi be ə muŋkɨŋ mu Ŋiaani nnu i dùŋ yo tɔŋ liih. 14 Ə Ŋiaani nu, nnu i kaah ə wu mə yah be ə ŋgə mə, ə duŋ kinlaamə nə yíwaha yaa.

Kleto duŋ kwoo ki bieŋ binhliŋ

15 Ŋiaani nu bu Chu kibɛɛ nnu kkə duŋ yo kə ŋəŋ nə ə wu go kə. Ə wu nnu i dùŋ kimbwee ki fwii ə bieŋ binhliŋ mə bbɨŋ bə́ mà fə. 16 Chu mà fə bieŋ binhliŋ kah ə wu kwáŋ, bieŋ bi buh bə bi kwe, bbɨŋ bə́ ŋə̀ŋ ə bi go, bə bbɨŋ bə́ dùŋ kə ŋəŋ nə ə bi go, maa dəŋ bənchinda biɛhɛŋ bbəŋ bə́ jàa ə fwee mə, ləkə bbəŋ bə́ kə̀nə muŋgeni, ləkə bəŋkuntaŋ, ləkə bbəŋ bə́ hlàah. Bieŋ bɨhŋ binhliŋ duŋ bbɨŋ Chu mà fə kah ə wu kwáŋ, bi duŋ yu wu. 17 I mà duŋna həmə bieŋ binhliŋ hlə yee bi dūŋ. Bieŋ binhliŋ duŋ ə wu kwáŋ, ə wu nnu i kə̀nə bieŋ binhliŋ bi hlə yee bi būmə duŋ ye bi duŋ lə. 18 I duŋ kwoo ki kimbumə ki bəne bə kimbemi kkɨŋ ki dùŋ gbo wiih. Ə duŋ wu nnu i mà chɔɔ kimbumə kɨhŋ. Ə duŋ wu mbɛɛ nnu fwii bənfu ə kpe mə, nnu mə yá baalə kpe kə, fo ə bieŋ binhliŋ mə ə yee i dūŋ ŋkafwi. 19 Bieŋ bɨhŋ duŋ nəni yulahalə Chu mà leka lə fieŋ finhliŋ ffɨŋ i duŋ fiih, yee fi dūŋ ə Ŋiaani mə. 20 Chu hlə fə kah ə Ŋiaani mə fo bieŋ binhliŋ ləkə bi kwe ləkə bi buh lə bumə chu dɨŋ bə wu Chu. I mà fə ə duŋ gbɛmi bə ŋgɔŋ mə Ŋiaani bəmbwo bə kindunshiiŋ bwɔɔ nnu i mà kpe yo ə kiŋgwa go.

21 Bə bəŋ, bə màa bə hlaa dūŋ bə hə gaha gbo ə Chu go, bə kənə munhlenə muŋ'waha ə wu mə, ye bə màa bə fə̄lə bieŋ biwaha. 22 Kwaalə, fidiɛɛ duŋ Chu fiima chu dɨŋ bwo buhuŋ bəŋ bəə wu ə gbo wi Ŋiaani nnu i mà chu mbɛɛ ŋkee. I mà fə fɨhŋ nini kah ə kpe yi mə, fo bə lə yee bə dūŋ wɛɛŋ ə wu Chu fwi, kə kənə yili ləkə gbenə kə. 23 Bə duŋ ə yee bə dūŋ nəni, ə duŋ lə bə bie bə gə̄ŋ fwi yu tɔ́ŋ ŋŋəŋ bə yìi ŋie ə wu mə, bə hə taa gɛŋ lemi ntakə ye duŋ ə fieŋ nakə nɛhiŋ bəŋ ə fieŋ ffɨŋ bə kèe fwi ə fi go kə, ffɨŋ bə mà woo ə hlɨŋ nwaa mə. Hlɨŋ nwaa ni, ə nni bə́ donta ye fidiɛɛ bə mbɛɛ mənhliŋ yaŋ kwe. Ə hlɨŋ nwaa ni nni mi Pwɔɔ ndùŋ ŋwuŋ nimi yu yi.

Nimi llɨŋ Chu mà nə bə Pwɔɔ

24 N'yu ntɨ̄ŋ fidiɛɛ ə bəŋgə bəŋŋ bbəŋ ŋ'wò bəhŋ mə yu bəŋ. Ntù bəŋgə bəhŋ nəni bəŋkaanə bəŋgə bbəŋ Kleto mà wo bie yu kimbumə ki bəne bə kimbemi kkɨŋ ki dùŋ gbo wiih. 25 Chu chiee mi lə n'yee nnɨ̄ŋ bə kimbumə ki bəne bə kimbemi, ndòntə die yi bə bəŋ ye i duŋ lə kiɛkiɛ. 26 Die ni duŋ nni i mà hlaa duŋ ə nələ mə bə ŋkaani bəne bənhliŋ bigoŋ kiŋaaŋkə, fidiɛɛ duŋ Chu nyiila bə bəne bbəŋ bə́ dūŋ biih. 27 Chu mà shaa mi bənfə lə bəne biih bəhŋ kələ lə, bəne bbəŋ bə́ dùŋ kə duŋ nə Bəjuu yá yi bwo kənə kiŋkuntaŋ gbaaŋ ki hlɨŋ nni i mà hlaa duŋ ni ə nələ mə. Hlɨŋ ni duŋ lə Kleto duŋ ə bəŋ mə. Nəni bə hlə yee bə kēe fwi bəŋkənə kiŋkuntaŋ. 28 Ə Kleto nunu nnu kkə dòntə kiih bə bəne bənhliŋ. Kkə kèeh bə́ bə bufe bunhliŋ bbuŋ Chu nə̀ be, baa nuulə bə́ bituŋ, fo kkə lə chi bə́ ə Chu fwi ə duŋ bə hə taa wunə ye bəne bə Kleto kənə lə bənduŋ. 29 Fiee fieŋ ffɨŋ njù fie, nnɨ̀ŋ bə muŋgeni munhliŋ mmuŋ Kleto nɨ̀ŋ bə mwi ə mi go.