Koloshi 4

Bəŋ bəche bikuu bbəŋ bə kə̀nə bənfwa, yee bə fə̂ bieŋ bə bə́ ə duŋ bi yəəŋ bə binwaa, bə kə̀lə lə bə kənə dəŋ Che Kwoo weŋ ə buh.

Keehnə ki həŋgbɔŋ

2 Bəŋ bənhliŋ yee bə chêe Chu bə gə̀ŋ fwi fwi kə fɨŋ nə kə. Bwɔɔ nnu bə chèe, yee bə yîi bufe mə, bə nə̀ kimbaafɛɛ bə Chu. 3 Yee bə chêe Chu bə be dəŋ lə Chu wɛ be wulə bə die yi, lə kkə dontə die nni i duŋ ə nələ mə ki Kleto. Fiee fieŋ ffɨŋ ndùŋ fie ə chəŋ munfwa mə yu fi. 4 Yee bə chêe Chu lə n'yee ndōntə ba yi wɛɛŋ wɛɛŋ gbaaŋ ye ŋkənə lə bəndontə. 5 Bwɔɔ nnu bə fə̀ bieŋ bə bəne bbəŋ bə́ dùŋ kə duŋ nə bə kimbemi, yee bə fə̂ bə bufe. Maa ə duŋ bwɔɔ nwɛhɛŋ nnu bə kənə bənfə fieŋ, bə ju lə bwɔɔ yo kə kaah kwe nya kə. 6 Yee biyɔɔnə bieeŋ bwɔɔ mənhliŋ dûŋ bində, bi jə̀njə ye kichibi lə, ə bə hlə yee bə kə̄lə bənchuu mbɛɛ mənhliŋ fieŋ ə je nwaa mə.

Cheenə

7 Tikiku lə yɔɔ bəŋ fieŋ finhliŋ kɨŋŋ. I duŋ ŋgwoŋ ya, i duŋ dəŋ tɔŋ liaa. Be bə wu nɨ̀ŋ bə Baba ye mbɛɛ mwi lə, i duŋ mbɛɛ nimi nnu i nɨ̀ŋ bə tɔŋ liih linhliŋ. 8 Fiee fieŋ ffɨŋ nfaŋna fie wu bə bəŋ yu fi, yulahalə mə lə bwo fə ə bə kələ ye kkə dùŋ lə, baa tahi go ŋieeŋ. 9 N'yu fāŋ wu bəə Onishimu nnu i dùŋ mbɛɛ kitɨŋ weŋ, i duŋ dəŋ ŋgwoŋ ya nnu i dùŋ tɔŋ liaa, i lema ə fieŋ fi Kleto bəŋ ntakə. Bə́ ya yɔɔ bəŋ fieŋ finhliŋ ffɨŋ fi kāh yaŋ. 10 Alishtaku nnu kkə duŋ bee wu yaŋ ə chəŋ munfwa mə yu chēe bəŋ. Maak ŋwa dɨŋ mahni Banaba yu chēe dəŋ bəŋ. Ə wu nnu bə mà kənə hlɨŋ yi. Ə mə lə bwo, bə tɨŋ jə wu. 11 Jisho nnu bə́ chèe lə Jushtu yu chēe dəŋ bəŋ. Ə she kwaa bəne bəhŋ bətɔh bbəŋ bə́ dùŋ Bəjuu bbəŋ kkə nɨ̀ŋ bə bə́ ə fieŋ bəŋ fimwi ə muŋkɨŋ mu Chu mə. Bə́ chɨ̀nə mi gbaaŋ, bə́ fə̀ tɔŋ lɨŋŋ də̀. 12 Ɛpafla nnu i duŋ dəŋ mbɛɛ ju kitɨŋ weŋ, nnu i nɨ̀ŋ bə Kleto Jisho yu chēe dəŋ bəŋ. I chèe Chu bwɔɔ mənhliŋ i hlè bəŋ gbaaŋ, i nòŋ lə Chu fə yee bə lēmi ntakə ye bəne bbəŋ bə́ taa bwo kələ ba fieŋ finhliŋ ffɨŋ Chu kìɛɛ kə naamə. 13 Ŋŋəŋna bə díi ŋəŋŋ lə i yu nɨ̄ŋ bə bəŋ gbaaŋ maa bəne bə Layodeshia bə bə́ Helapoli. 14 Lukaa nnu i ŋwùhuŋ yo bəne nnu i dùŋ mbweŋ ya tɔŋ bə Dema bie bə́ chēe dəŋ bəŋ. 15 Bə nə cheenə kɨŋŋ bə bəŋgwoŋ biaa bə kimbemi bə Layodeshia, maa dəŋ bə Ninfa maa bə kimbumə ki bəne bə kimbemi kkɨŋ ki bùmə ə wu chəŋ. 16 Bwɔɔ nnu bə cheela kiŋwaati kɨhŋ, bə faŋ ki bə kimbumə ki bəne bə kimbemi bə Layodeshia bə́ chee dəŋ, hlə ŋəŋ dəŋ lə bə́ faŋ chuu kiŋwaati kkɨŋ ki dùŋ kie bə bə́, bə chee. 17 Bə yɔɔ bə Alkipu lə i ju bəŋkaanə nimi llɨŋ Baba nəə ə kwáŋ ŋiih mə. 18 Cheenə kɨhŋ lə mbieŋ ŋgwəŋ Pwɔɔ bə kwaŋ wuŋŋ. Yee bə ŋôo lə n'yo ə chəŋ munfwa mə. Chu nyii tɔŋ liih linwaa bə bəŋ.