Filipi 3

Fieŋ fiŋkuntaŋ duŋ bəŋkələ Kleto

Bəŋgwoŋ, bənchu gəŋ kaanə, yee bə tɨ̂ŋ ə Baba mə. Mbieŋna bieŋ bə bəŋ, nduŋ ə nnakə fɨŋnə bəmbaa bieŋ nchù bəŋ bə bəŋ kə. Nfə̀ nəni bənfwoŋ bəŋ bu fwoŋnə. 2 Yee bə jə̂ bwɔɔ bə bəne bbəŋ bə́ fə̀ bieŋ biwaha, bə́ kpè ba kwaa lə yee bə́ kāalə go ŋə bəne.^ª Bəne bie lə bwí. 3 Ə be bbəŋ kkə kəna jó yí nyieŋnə yí chɛɛŋ chɛɛŋ, be bbəŋ kkə chèe bie Chu ye Fiana wi nyìilə, kkə wè ə duŋ yu Kleto Jisho. Kkə yiilə bufe ə bieŋ bi nyaŋ nni go mə kə. 4 Kwaalə, nduŋ ə ŋkənə dəŋ ŋgɨŋ yiinə bufe ə bimbini bie bieŋ mə. Ə duŋ lə mbɛɛ yo həmə nnu i hlè lə i kə̀nə ŋgɨŋ bənyii bufe ə bieŋ bi nyaŋ nni go mə, kəə ŋkənə ŋgɨŋ nnu i kò kah mbɛɛ mbini yo. 5 Ə bwo bwii joo nyaaŋ, bə́ nyieŋ mi jo. Nduŋ ŋwuŋ Bəishlael, ə kichəŋ ki Bɛnjamiŋ mə, ndùŋ ŋwuŋ Bəhiblu, ndùŋ mbwee Bəhiblu. Ə wɛɛ wi ŋkɨnə ya mə, ndùŋ ŋwuŋ Bəfalashii. 6 Bənchu ə wɛɛ wi kənənə ŋgɨŋ gbaaŋ bənfə fieŋ ə jé yí Bəjuu mə, mmàa nhlɔ̄ɔ wuh ə kimbumə ki bəne bə kimbemi dɨŋ. Ə wɛɛ wi bəŋkɨnə biaa mə ye duŋ ə mbɛɛ duŋ ntiiŋ, mmà ŋkə ŋkənə gbenə kə. 7 Kwaalə bieŋ bbɨŋ bi màa bi nhlaa dūŋ bieŋ bi mbɨŋ bə mi, ŋŋə̀ŋ bi fidiɛɛ lə ə bieŋ binya yu Kleto. 8 Bə kichɛɛŋ, ŋŋə̀ŋ bieŋ binhliŋ bi dùŋ bieŋ binya bə mi, yu fieŋ ffɨŋ fi kò kah bieŋ binhliŋ duŋ bəŋkələ Baba ŋgwəŋ Kleto Jisho kinwaa. Ŋgbee ə bieŋ binhliŋ mə yu wu. Ŋŋəŋna bi bi dùŋ ye bieŋ bi nyɛninə lə, fo mbɨŋ ŋgwəŋ lə yee i dūŋ Kleto, 9 ə bee wu kaanə leemə yee kkə dūŋ mbɛɛ mwi. Nlə mbaalə duŋ lə Chu jəə mi lə nduŋ ntiiŋ ə wu dí bələ je njəŋ nni i dùŋ ye ki bəŋkɨnə biaa kə. I jəə mi ə duŋ yu n'yiila tɔŋ ə Kleto mə. Bənduŋ ntiiŋ ə Chu dí bələ tɔŋ llɨŋ mbɛɛ yiila ə Kleto mə. 10 Fieŋ ffɨŋ ŋkìɛɛ fidiɛɛ duŋ lə ŋkələ Kleto gbaaŋ, ŋkənə muŋga mmuŋ i mà kənə mwe ye i mà fulə ə kpe mə. Ŋkiɛɛ dəŋ lə ŋ'wo bəŋgə ye i mà wolə, bənduŋ ye wu lə ə kpe yi mə, 11 fo ə je lə duŋ ə Chu fwoo dəŋ mi ə kpe mə.

Ndɨɨmə ŋkèe dɔhɔ kkɨŋ ŋgə̀ŋ kie

12 Ŋkə n'yɔɔlə nəni lə mbəna bieŋ bɨhŋ ləkə lə mbwiila kə. N'yu ŋkaani ndɨ̄ɨmə ə nhlə nlaa kwaŋ kənə ə bieŋ bie go, yu Jisho Kleto jəə mi ye mbɛɛ wi lə. 13 Bəŋgwoŋ, ŋkə ŋŋəŋ nə lə ŋkəna ə bieŋ bie go bə kwáŋ ŋəŋŋ kə. Kwaalə fieŋ fimwi ffɨŋ nfə̀ duŋ lə, nlaamə bieŋ bbɨŋ bi kaah, ndɨɨmə bəŋkənə ə duŋ bbɨŋ bi dùŋ fwi. 14 Ndɨ̀ɨmə ŋkèe kwaa dɔhɔ kkɨŋ ŋgə̀ŋ kie, bəŋkənə bikoonə bbɨŋ bi dùŋ ndii Chu nnu i dii mi lə mbiŋ bwo buh ye ndùŋ lə ə Kleto Jisho mə.

15 Be bənhliŋ bbəŋ kkə taa bie wunə ə kimbemi kiaa mə duŋ lə yee kkə hlē bieŋ bɨhŋ ə jé yɨhŋ mə. Kwaalə, ə bəŋ bədi yee bə hlē bieŋ chili chili, kəə duŋ ə Chu tɔhi bəŋ bimbini bie. 16 Fieŋ fiŋkuntaŋ duŋ kwaa lə, yee kkə kə̂nə ntakə ə duŋ ə fieŋ ffɨŋ kkə laana go.

17 Bəŋgwoŋ, yee bə jə̂ kinfɛhiŋ bə mi, baa kee dəŋ kinduŋh ki bəne bədi bbəŋ bə́ jə̀ kinfɛhiŋ bə be. 18 N'yɔ̄ɔ nəni yu ye mbàlə bən'yɔɔ bə bəŋ bwɔɔ mənhliŋ, mbaa n'yɔ̄ɔ fidiɛɛ bə bəŋ maa bə ndəŋ dí lə bəne kiŋaaŋkə bie həmə bbəŋ bə́ dùhŋ kinduŋh kkɨŋ ki nyìi lə bie bə́ lōh bə diɛɛnə kɨhŋ lə, Kleto mà kpee ə kiŋgwa go. 19 Bie bəne duŋ ə bə́ yá ləhə laa bə́ bu laanə. Té ŋəbə duŋ chu bə́. Bə́ wè bə bieŋ bbɨŋ bi dùŋ lə gbo lə yee wi bēe bə́. Munhlenə mubə dùŋ kwaa ə bieŋ bi mbiŋ nu mə. 20 Kkə dùŋ ŋkwo ya bəne bə mbiŋ nu buh mə. Ə duŋ həmə nnu kkə kè ba lə Nchuu Fwoo ya Baba Jisho Kleto yá no ə i hlə bwo. 21 Bwɔɔ nnu i yá bwo, ə i gaanə gbo waa wunya wuhŋ, ə wi fiimə chu ye gbo wiih wwuŋ wu kə̀nə kiŋkohi. I yá gaanə ə duŋ bə muŋga mwii mmuŋ i yá buhuŋ bieŋ binhliŋ mu yee i dūŋ ə bi bəŋ.