Filipi 4

Pwɔɔ nə keehnə bə bəne bə kimbemi bə Filipi

Nəni bəŋgwoŋ, n'yu nlēki bəŋ gbaaŋ mbaa ndùŋ bə ŋgɨŋ lə ŋŋəŋ ə bəŋ go. Ə bəŋ bbəŋ bə fə̀ ŋ'wò njənjə, bə baa duŋ dəŋ kinfwili kɨŋŋ ki muŋkɨŋ. Bəmbweŋ, yee bə lêmi kwaa ntakə ə Baba mə nəni.

2 N'yu ŋkɔ̄nɔ lə Ɛwodia bə Shintiki chu die mi ye bə́ duŋ lə bə ŋwuŋ bəə maani kpɛ ə Baba mə. 3 N'yu n'yɔ̄ɔ dəŋ bə wə nnu wə duŋ yo ba mbɛɛ ŋgwəŋ kintu nimi lə wə bu chɨnə bəkwɛɛ bəhŋ bə́ chu die mi. Ə bəne bbəŋ bə́ woo ŋgə bə mi ə nimi li hlɨŋ nwaa ki Jisho Kleto mə bəə Klɛmeŋ maa bəne bənhliŋ bbəŋ kkə màa kkə nɨ̄ŋ bə bə́. Bəne bəhŋ duŋ bbəŋ yíi ŋəbə ŋie ə kiŋwaati ki bəne bbəŋ bə́ kə̀nə kinduŋh ki kə kaa mə.

4 Yee bə tɨ̂ŋ bwɔɔ mənhliŋ ə Baba mə. Ye nhə n'yɔɔ lə, n'yu mbaa n'yɔ̄ɔ nchù bəŋ lə, yee bə tɨ̂ŋ ə Baba mə. 5 Yee bə nyîi fwɔ wi kindunshiiŋ bə mbɛɛ mənhliŋ, bə ŋòo dəŋ lə bwɔɔ Baba fiimənə bwo yo baha baha. 6 Bə kə yee bə kə̂h gbo ki fieŋ fidi kə. Yee bə chêe Chu bə fieŋ finhliŋ bə chì Chu fwi. Bwɔɔ nnu bə chèe yee bə bîi bieŋ bbɨŋ bə kìɛɛ bə wu, bə nə̀ kimbaafɛɛ bə wu nnu i fə̀ yo bi. 7 Ə yee bə fə̄ nəni, ə kindunshiiŋ kkɨŋ Chu nə̀ kie yee ki fwōŋ tɔ́ŋ ŋieeŋ bə bufe bweeŋ ye bə duŋ lə ə Kleto Jisho mə. Kindunshiiŋ kɨhŋ kah bufe bunhliŋ bu mbɛɛ ŋkee bəŋkələ.

8 Bəŋgwoŋ, bəŋkaanə, bieŋ bbɨŋ bi dùŋ lə yee bə hlē lə bieŋ bbɨŋ bi dùŋ chɛɛŋ, bə bieŋ bbɨŋ bi dùŋ bi kimbwɔkwe, maa bieŋ bbɨŋ bi dùŋ yəəŋ. Yee bə hlê ə duŋ bieŋ bbɨŋ bi dùŋ wɛɛŋ bə bieŋ bbɨŋ dùŋ ə bəne yee bə́ lēki maa bieŋ bbɨŋ tɔ́ŋ dì bəne yu bi. Ə bieŋ lə duŋ həmə bbɨŋ binwaa gəŋ kpee həŋgbɔŋ, ə bieŋ lə duŋ həmə bbɨŋ duŋ ə bəne yee bə́ dōhi, yee bə hlē ə duŋ ki bimbini bie bieŋ. 9 Yee bə fə̂ bieŋ bə bə̀lə ə duŋ kwaa kinlaanə kkɨŋ mmà nə kie bəŋ, ləkə ə bieŋ bbɨŋ bə mà wo bu wonə bə mi, ləkə bbɨŋ bə mà ŋəŋ bu ŋəŋ nə. Ə bə jə yee bə fə̄ nəni, ə Chu nnu i dùŋ yo Chu kindunshiiŋ duŋ bə bəŋ.

Pwɔɔ yee i tɨ̄ŋ ye bəne bə Filipi yìilə ŋgɨŋ ə wu mə

10 Baba fəə n'yee ntɨ̄ŋ gbaaŋ ye bə baalə nyii ŋgɨŋ weŋ ə mi mə ye bə màa bə bà lə bənyii. Ŋkələ wɛɛŋ lə bə maa bə kə̄nə ŋgɨŋ ŋgwəŋ, kwaalə bə jɨ̀nə ə duŋ je ye. 11 Ŋkə n'yɔ̄ɔ lə nəni lə njɨna fieŋ kə. Nlaana bənduŋ nfiila maa filaha ffɨŋ fi dùŋ. 12 Ŋkə̀lə ye mbɛɛ balə bənduŋ bwɔɔ nnu i jɨ̀nə, ŋkə̀lə dəŋ ye mbɛɛ bwò i dùŋ bwɔɔ nnu i kə̀nə gbaaŋ. Nhlə nlaanə fɨhŋ nini kələ ye duŋ ə nduŋ nfiila maa filaha ffɨŋ fi dùŋ, ləkə ndiee, ləkə ŋkə ndiee ləkə ŋkənə kiŋaaŋkə ləkə ə njɨnənə mə. 13 Ŋkə̀lə nfə bieŋ bɨhŋ binhliŋ nəni, ə duŋ bə muŋgeni mmuŋ Kleto nəə mi.

14 Kwaalə, maa ye n'yɔ̄ɔlə nəni, bə fəə kinwaakə gbaaŋ bənchɨnə mi ə bwɔɔ ŋgə ŋgwəŋ nu mə. 15 Bəŋ bəne bə Filipi, bə kələ lə ə mà duŋ bwɔɔ nnu mmà nno ə kitɨŋ kieeŋ ki Meshedonia mə ye mmà nchɔɔ lə bən'yɔɔ hlɨŋ nwaa ni bə bəŋ, kimbumə ki bəne bə kimbemi kidi mà kə buhuŋ mi lə yee kkə būhuŋ kwáŋ kə. Ə kwaa bəŋ. 16 Ə mà duŋ dəŋ bwɔɔ nnu mmà duŋ ə Teshalonika,^ª bə faŋ mi kinchɨnə, baa faŋ. 17 Ŋkə n'yɔ̄ɔ lə nəni lə ŋkiɛɛ lə yee bə fāŋ mi bieŋ kə. Ŋkèe gbaaŋ ə duŋ bikoonə bbɨŋ Chu nə bəŋ yu fieŋ ffɨŋ bə fə̀ bə mi. 18 Bə mà faŋna Ɛpaflɔditu bə nnə́ i bwo nə mi. N'yee ndūŋ fidiɛɛ ŋkə njɨnə fieŋ kə. Mmà ntɨŋna jə nnə́ ŋie ŋənhliŋ, ŋŋəŋ ŋə ŋaŋna kah ye mmàa nhlē lə. Nnə́ ŋəhŋ duŋ ntofi nnu bə fəə bə Chu, i tɨŋna jə ŋə, ŋie ŋə fū chee nwaa i lèki. 19 Chu ŋgwəŋ kə̀nə nchu ŋkuntaŋ nnu mə lə nə bəŋ kah ə Kleto Jisho mə fieŋ finhliŋ ffɨŋ bə jɨ̀nə. 20 Yee kkə fâŋ kiŋkuntaŋ bə Chu nnu i dùŋ yo Chu i baa duŋ Tah ya bwɔɔ mənhliŋ kə kaa. Yee fi Dûŋ lə.

Cheenə

21 Bə chee nə mi bəne bənhliŋ bə wɛɛŋ bbəŋ bə́ dùŋ bə́ Kleto Jisho. Bəŋgwoŋ biaa bbəŋ bə́ dùŋ fəŋ bə mi cheela dəŋ bəŋ. 22 Bəne bbəŋ bə́ dùŋ bə Chu bənhliŋ fəŋ nini bie bə́ chēe dəŋ bəŋ, gbɛntɛlɛ bə bbəŋ bə́ dùŋ bie ə kintɔŋ ki Kayisha mə.

23 Baba Jisho Kleto nyii tɔŋ liih linwaa bə bəfiana bieeŋ. Yee fi Dûŋ lə.