Filipi 2

Yee bə jə̂ kinfɛhiŋ ə Jisho Kleto go

Bə kə buhuŋ gbo bə Kleto nnu i fəə yo lə gbo ta bəŋ lə? Kinleki kiih kə fəə tɔ́ŋ ŋieeŋ də̀ kə lə? Bəŋ bə Fiana Wɛɛŋ kə bumə yee bə dūŋ fieŋ fimwi lə? Bə kə kənə dəŋ tɔ́ŋ ŋənwaa maa bə hlɨŋ yikwonə bə go ŋieeŋ lə? 2 Ye fi duŋ lə nəni, bə fə fo nlə ŋkaanə tɨŋ. Yee bufe bweeŋ dûŋ bumwi, kinleki kieeŋ dùŋ mwe, bə kə̀nə tɔŋ mwe baa kənə kinhle mwe. 3 Mbɛɛ kə yee i fə̂ fieŋ i hlè kwaa ə duŋ ki gbo wiih kə, ləkə lə yee i wê nya kə. Mbɛɛ yee i bwɔ̂kwe bə gbo wiih, i ŋə̀ŋ mbɛɛ ju fwi kah gbo wiih. 4 Mbɛɛ kə yee i fə̂ fieŋ ffɨŋ fi lə bwo bə mbɨŋ ə wu go kwaa kə. Yee i fə̂ ə duŋ ffɨŋ duŋ ə fi bwo bə mbɨŋ dəŋ ə bəne bədi go.

5 Kinhle kieeŋ kənə bənduŋ yəəŋ ye ki Kleto Jisho lə.

6 I mà duŋ fieŋ finhliŋ ffɨŋ Chu duŋ,

kwaalə, i nakə jəə fieŋ fie lə bəə Chu duŋ yəəŋ lə,

ə fieŋ ffɨŋ mə lə yee i kpē ba ə fi bəŋ kə,

7 i she dɔhɔ kie,

jə ə duŋ ki nfwa.

Bə́ bwee wu,

i dùŋ yəəŋ ye mbɛɛ ŋkee lə.

8 Bwɔɔ nnu i mà duŋ mbɛɛ ŋkee,

i bwɔkwe yee i wô bə Chu,

i bwo bemi bəŋkpe,

kpe ə kiŋgwa go kibɛɛ.

9 Ye i mà fələ nəni, Chu bihiŋ wu

chi wu ə dɔhɔ kkɨŋ ki kàh ki mbɛɛ mənhliŋ,

nə wu yii llɨŋ li kàh yíi ŋənhliŋ,

10 fo mbɛɛ mənhliŋ nnu i dùŋ buh

bə nnu i dùŋ kwe maa nnu i dùŋ ə shishɔ kwe,

bwɔɔ nnu i wò yii li Jisho le lə bɛŋ núh kwe,

11 ə mbɛɛ mənhliŋ yee i yɔ̄ɔ bə kijə kiih lə Jisho Kleto dùŋ Baba.

Bwɔɔ nnu bə́ fə̀ nəni ə kiŋkuntaŋ yee ki gə̄ŋ bə Tah Chu

Bə tə̀ yaŋ mbiŋ nte ye muntoola lə

12 Nəni bishiŋ bɨŋŋ bi tɔŋ, ye bə balə bəŋ'wo bə Chu bwɔɔ nnu ndùŋ bə bəŋ. Gbɛntɛlɛ fidiɛɛ ye nduŋ lə kə duŋ nə bə bəŋ, bə gəŋ fwi bə bieŋ bənfənə bbɨŋ bi dùŋ yu ki kinfukwoo kieeŋ. Yee bə fə̂ nəni, bə lɔ̀, bə nə̀nə. 13 Yee bə kə̂lə lə ə Chu nnu i nɨ̀ŋ ə bəŋ mə, i fə̀ lə yee bə lêki bənfə bieŋ bbɨŋ i lèki. Ə wu nnu i nə̀ dəŋ muŋgeni munfənə bieŋ bie.

14 Bwɔɔ nnu bə fə̀ fieŋ finhliŋ ffɨŋ bə fə̀, bə kə yee bə ŋwûunə, ləkə bə nòo noonə kə, 15 fo bə lə yee bə chāa, bə dùŋ gbenə hləŋ. Nəni, ə bə hlə yee bə dūŋ bwɔni bə Chu bbəŋ bə́ dùŋ gbenə hləŋ ə ŋkaani nnu i kə̀nə nu tɔ́ŋ ŋənyi i bèe bieŋ mə. Yaŋ ə mbiŋ nu mə bə tə̀ ye muntoola lə, 16 ye bə kənə lə ntakə^ª hlɨŋ nwaa nni i nə̀ kinduŋh ki kə kaa bə bəne. Ə yee bə fə̂ nəni, ə butuu bbuŋ Jisho Kleto yá fiimə bwo, ə n'yee ŋ'wē lə ŋkə nlələ lili linya ləkə nɨŋ nimi linya kə.

17 Ye bə yiilə tɔ́ŋ ə Chu mə, kəə ə ntofi nnu bə fəə bə wu. Maa ə duŋ dəŋ lə bə́ kaanə shoo mi ye mbihŋ lə, yiinə ə ntofi weŋ bəŋ, ə n'yee ŋ'wō njənjə ntɨ̀ŋ bə bəŋ bənhliŋ. 18 Nəni bə buhuŋ gbo bə mi yee kkə wô njənjə kkə tɨ̀ŋ.

Pwɔɔ yɔɔ ki Timɔti bə Ɛpaflɔditu

19 Ə Baba Jisho lə bemi, kəə ŋŋəŋna lə ə she bwɔɔ chɛɛ ə nfaŋ Timɔti ə bəŋ mə. Bwɔɔ nnu mə lə bwo fiimə chu dɨŋ, ə i yɔɔ mi ye bə dùŋ lə, ə tɔŋ lɨŋŋ hlə də. 20 Ŋkənə lə mbɛɛ ju ye wu nnu i kə̀nə ŋgɨŋ ə bəŋ mə ye ŋkə̀nə lə kə. 21 N'yɔ̄ɔ nəni, yu mbɛɛ mənhliŋ kə̀nə ŋgɨŋ ə duŋ bə gbo wiih, kə kee lə ki fieŋ ffɨŋ Jisho Kleto kìɛɛ kə. 22 Kwaalə, Timɔti duŋ nnu bə kələ lə i nyiila mbɛɛ nnu i dùŋ yo, ye i nɨŋna lə bə mi bəndontə hlɨŋ nwaa, kkə màa kkə nɨ̄ŋ bee wu yəəŋ ye ŋiaŋ bà lə bənɨŋ bə tili. 23 Fiee fieŋ ffɨŋ ŋŋəŋna fie lə ə she bwɔɔ chɛɛ ə nfaŋ ə duŋ wu. Fieŋ ffɨŋ ŋkaani ŋkēe duŋ lə ŋŋəŋ ləə bieŋ lə duŋ wɛɛ wuŋŋ ləhəŋ lə. 24 N'yìi bufe ə Baba mə lə ə she bwɔɔ chɛɛ, ə mi kibɛɛ mbwo ŋŋəŋ bəŋ.

25 Ŋŋəŋ lə fi fie kinwaakə lə nfaŋ chuu Ɛpaflɔditu dɨŋ bə bəŋ. I duŋ ŋgwoŋ ya, kkə nɨ̀ŋ bə wu ə butuu bə bushi ə die Chu bəŋ. Ə mbɛɛ weŋ hlɨŋ nnu bə mà faŋ lə i bwo yee i chɨ̄nə mi. 26 I ma kəna ŋgɨŋ gbaaŋ bəmbwo ŋəŋ dəŋ bəŋ bənhliŋ, tɔŋ nənə wu ye i ma wolə lə bə woo lə i yu gɔ̄ŋ. 27 Ə chɛɛŋ, i ma shiee gɔŋ jəŋ ə chu she chɛɛ lə i kpe. Kwaalə, Chu ma kwoo hlɨŋ bə wu. I ma kə kwoo kwaa hlɨŋ bə wu kə, i ma kwoo dəŋ bə mi lə Ɛpaflɔditu kə kpee baa yiinə ŋgə ju ə nnu ŋ'wò nu bəŋ kə.

28 Nəni, n'yee nhlē ba gbaaŋ lə nlə nfaŋ wu, fo bə baa ŋəŋ ə wu go, yee bə wō njənjə, ə tɔŋ lɨŋŋ nakə baa lə nə mi ŋgə gbaaŋ kə. 29 Bə tɨŋ jə wu ye bəne bə Baba lə bə kintɨŋ kinhliŋ. Bəne ye wu lə duŋ lə yee bə bwɔ̄kwe bə bə́. 30 N'yɔ̄ɔ nəni yulahalə ə ma she kwaa chɛɛ ə i maa kpe yu nimi li Kleto ye i ma nə lə gbo wiih bənfwoŋ mi ə dɔhɔ kieeŋ bəŋ.