Filipi 1

Kiŋwaati kkɨŋ Pwɔɔ mà bieŋ bə kimbumə ki

Filipi

Kiŋwaati kɨhŋ bieŋ mi Pwɔɔ bee Timɔti bbəŋ kkə dùŋ bəne bə nimi^ª bə Kleto Jisho. Kiŋwaati kɨhŋ gəŋ bə bəŋ bəne bbəŋ bə dùŋ bə Kleto Jisho bənhliŋ bə Filipi bə bəche bikuu bi kimbumə ki bəne bə kimbemi bə bəne bbəŋ bə́ chɨ̀nə bənfə ními ə kimbumə mə. 2 Chu Tah ya bə Baba Jisho Kleto nyii tɔŋ linwaa bə bəŋ, baa nə dəŋ bəŋ tɔ́ŋ ŋəndə.

Pwɔɔ nə kimbaafɛɛ bə Chu yu bəne bə Filipi

3 Bwɔɔ nnu nhlè kieeŋ bwɔɔ mənhliŋ, nnə̀ kwaa ə duŋ kimbaafɛɛ bə Chu ŋgwəŋ. 4 Mbà bənchee ə Chu ŋgwəŋ mə mənhliŋ bə bəŋ bənhliŋ, nchèe bə kintɨŋ, 5 yulahalə gbe jə ə butuu bu fwii go bwo bwii daŋ, bə mà buhaŋ gbo bə mi, yee kkə nɨ̄ŋ ə hlɨŋ nwaa bəŋ ki Jisho Kleto i gə̀ŋ fwi fwi. 6 Ŋkəla ba kinwaa lə, Chu nnu i mà chɔɔ yo nimi linwaa lɨhŋ ə bəŋ mə, mə lə gəŋ fwi gəŋ kaanə li butuu bbuŋ Jisho Kleto yá fiimə bwo. 7 Fi duŋ yəəŋ lə n'yee nhlē bəŋ bənhliŋ nəni, yulahalə bə dùŋ tɔŋ lɨŋŋ, kkə lèmi ə fieŋ bəŋ fimwi, ə duŋ fi ffɨŋ Chu koha be bə fi. Kkə lèmi ə fi bəŋ fidiɛɛ dəŋ ye kkə ba lə bənlemi fo ə bwɔɔ nnu ndùŋ ə chəŋ munfwa mə, ləkə bwɔɔ nnu njàa ntɨ̀ŋ ŋkɛ kichɛɛŋ ki hlɨŋ nwaa, nfə̀ yi i tà gɛŋ ntakə. 8 N'yɔɔ nəni ə duŋ Chu kə̀lə kinwaa lə ŋkə̀nə ŋgɨŋ weŋ gbaaŋ, nlèki bəŋ bənhliŋ bə kinleki ki Kleto Jisho.

9 Nchèe Chu lə kinleki kieeŋ yee ki kō ki gə̀ŋ fwi fwi, bə kə̀nə bufe bəntaalə bieŋ kinwaa. 10 Bwɔɔ nnu bə tàalə nəni, ə bə hlə yee bə shāa bbɨŋ bi nwaa bie gəŋ ŋkpee. Nəni, ə yáa ə dūŋ butuu bbuŋ Jisho Kleto yá fiimə bwo, ə yee bə dūŋ wɛɛŋ gbenə hləŋ. 11 Bə lə yee bə dūŋ nəni ə duŋ bə hə fiila bə bifənə bintiiŋ bbɨŋ bə kənə kah ə Jisho Kleto mə. Fɨhŋ lə fə ə kiŋkohi bə kindohi yee ki gə̄ŋ bə Chu.

Pwɔɔ dùŋ ə chəŋ munfwa mə, hlɨŋ Jisho gə̀ŋ kwaa fwi

12 Bəŋgwoŋ, ŋkiɛɛ lə bə kələ lə bieŋ bɨhŋ binhliŋ bbɨŋ bi chila bɨhŋ mi, bi chɨna bənfə lə hlɨŋ nwaa ki Jisho ko gəŋ fwi fwi. 13 Bieŋ bɨhŋ fəə bəne bə bicha bbəŋ bə́ fwòŋ kintɔŋ, maa bəne bənhliŋ kəla lə ndùŋ yaŋ ə chəŋ munfwa mə nəni yu Kleto. 14 Chəŋ munfwa nni ndùŋ ni ə yi mə, baala fə gbo tà bəŋgwoŋ biaa kiŋaaŋkə bəndontə die Chu ntakə, kə lɔɔ kə.

15 Ŋkələ lə bə́ bədi, bə́ dòntə ki Kleto nəni, bə́ dòntə ə duŋ bə́ lùhuŋ bimi, bə́ fɛ̀hiŋ gbo dəŋ bəŋkah mi. Kwaalə bədi dòntə ŋkwo bə́ bə munhlenə munwaa. 16 Bə mbini bəhŋ dòntə nəni yulahalə bə́ lèki mi, bə́ kə̀lə dəŋ lə ndùŋ yaŋ ə chəŋ munfwa mə nəni ə duŋ Chu nnu i chì mi fo nlə n'yee ntɨ̄ŋ ŋkɛ kichɛɛŋ ki hlɨŋ nwaa. 17 Bəmbini bie dòntə ki Kleto kwaa bə kijə bə kìɛɛ yíi ə bə́ go, bə́ fəə nəni yiinə ŋgə ə ŋgə nnu n'yu ŋ'wō nu yaŋ ə chəŋ munfwa mə. 18 Fimbini fie fieŋ kənə laha bənfə lə? Ə fo bə́ dòntə nəni bə́ chɔ̀ɔ bə́ fə̀ lee, ləkə bə́ dòntə bə kichɛɛŋ lee, ntɨ̀ŋ ŋkwo ŋgwəŋ ə ntɨŋ mə yulahalə ə fieŋ finhliŋ mə, bə́ dòntə ə duŋ ki Kleto.

19 Ə kwaa dəŋ nəni nnu nlə n'yee ntɨ̄ŋ, yulahalə ŋkə̀lə lə ye bə chèe lə Chu bə mi, Fiana Jisho Kleto baa i chɨ̀nə dəŋ mi, duŋ ə nfu kwoo. 20 Fieŋ ffɨŋ ŋkèe fwi ŋkè ba fi kinwaa duŋ lə, n'yá kə kənə giaali kə dududu. Nlə n'yee ŋkwāa kwaa ə duŋ tɔŋ kinwaa, fo fieŋ finhliŋ ffɨŋ nfə̀ bə gbo wuŋŋ, lə yee fi bīhiŋ kwaa Kleto buh fidiɛɛ dəŋ ye bwɔɔ mənhliŋ maa ə nlə nduŋ fa ləkə ŋkpe. 21 N'yɔ̄ɔ nəni yulahalə bə mi ə nlə nduŋ fa, kəə nduŋ bə Kleto, ə nlə ŋkpe, kəə ə mbɨŋ bə mi. 22 Kwaalə, ə duŋ lə nlə n'yee ndūŋ həmə, ə n'yee nfə̄ nimi llɨŋ li chɨ̀nə bəne kinwaakə. Ye bieŋ bɨhŋ duŋ lə bifwe nəni, ŋkə mbaa lə kələ ffɨŋ nlə nshaa jə kə. 23 N'yu nyɔ̄kɔ bu nyɔkɔnə ə bi mə. Nhə n'yee ŋkiɛɛ lə ŋgəŋ n'yee ndūŋ mi fɨŋŋ bee Kleto. Fimbini fie nwaa gbaaŋ kah bənduŋ fa. 24 Kwaalə, fieŋ fishaŋ gbaaŋ duŋ lə n'yee ndūŋ fa yu bəŋ. 25 Ye fi duŋ lə nəni, ŋkəla ba kə naamə lə, nlə n'yee ndūŋ fa nnɨ̀ŋ bə bəŋ bənhliŋ, fo bə lə yee bə kō bə gə̄ŋ fwi fwi, bə tɨ̀ŋ ye bə yìilə tɔ́ŋ ə Kleto mə. 26 Nəni, bwɔɔ nnu nlə nfiimə bwo ə yee kkə dūŋ bee bəŋ, ə yee bə wē gbaaŋ ki Kleto Jisho yu mi dəŋ.

Yee bə dûhŋ kinduŋh kkɨŋ Jisho Kleto kìɛɛ

27 Fieŋ ffɨŋ ŋkiɛɛ lə n'yɔɔ duŋ kwaa lə, yee bə dūŋh kinduŋh kkɨŋ hlɨŋ nwaa Kleto kìɛɛ. Yee bə dûhŋ nəni, ləkə nlə mbaa nfiimə mbwo ŋŋəŋ ə bəŋ go lee, ləkə nnakə mbwoo kə lee, ə n'yee ŋ'wō kwaa lə bə lema ntakə, bə kə̀nə tɔ́ŋ mwe, bə dùŋ fimwi mwi, bə jù ə fieŋ bəŋ fimwi ə kimbemi ki hlɨŋ nwaa mə. 28 Bə kə yee bə lɔ̂ bəne bbəŋ bə́ lòh bə bəŋ yu hlɨŋ nwaa ni kə. Ə bə duŋ kə lɔɔ bə́, ə fɨhŋ nyii bə́ lə Chu duŋ ə i fə ə bə fukwoo, kwaalə ə i laa bə́ bu laanə. 29 Yee bə kə̂lə lə Chu kə kohi bəŋ lə yee bə dūŋ bəne bə Kleto kwaa lə bə bemi bə wu. I koha dəŋ bəŋ lə bə wo ŋgə yu Kleto. 30 Bə buhaŋ gbo bə mi lə yee kkə jū ki hlɨŋ nih bənhliŋ nni bə mà ŋəŋ ye, ye njùlə yu yi, ə duŋ dəŋ yi nni bə wò ye lə n'yu ŋkāani ə yi go fidiɛɛ.