Luŋ 15

Yee mbɛɛ fə̂ fieŋ ffɨŋ fi nùaa dəŋ maani

Be bbəŋ kkə dùŋ bie ntakə kənə bəŋkwaa tɔ́ŋ bə gbenə kkɨŋ bəne bbəŋ bə́ dùŋ bəmbiaŋ gbe. Yee kkə fə̂ ə duŋ fieŋ ffɨŋ fi lə yee fi fə̄ go ŋiaa nwaa ə duŋ be kə. 2 Mbɛɛ mwi mwi ə be mə kənə bənju bənfə fieŋ ffɨŋ fi lə yee fi nūaa maani bənchɨnə wu lə kimbemi kiih kò. 3 Yee bə kə̂lə dəŋ lə Jisho Kleto kibɛɛ màa i dūŋ kə fəə bieŋ bbɨŋ bi nwaa wu kə. I màa i fə̄ fi gbeemə ye bə́ mà bieŋ mbɛɛ ju yɔ̄ɔ bə Chu lə,

“Bəntɔnɔ bbəŋ bəne tò bie wə bə bə́ mà gbee ə mi go.”

4 Kkə kə̂lə lə bieŋ binhliŋ bbɨŋ bə́ mà bieŋ ə Kiŋwaati ki Chu mə foo mà duŋ bəŋkeeh be mu, fo bi lə fə ə yee kkə lēmi ntakə, kkə tàhi go ŋiaa, ə kkə hlə yee kkə kēe fwi ə fieŋ ffɨŋ kkə yá bwo kənə go. 5 N'yu nōŋ lə Chu nnu i fə̀ yo bəne lèmi ntakə, baa fə go ŋə bəne tà, baa fə dəŋ yee bə dūŋ ə fieŋ bəŋ fimwi bə bəne bənhliŋ bbəŋ bə́ dùŋ ye Jisho Kleto nyìi lə, 6 fo bə duŋ mbuhuŋ, ə yee bə kōhi Chu nnu i dùŋ yo Chu bə Baba ya Jisho Kleto ə die bəŋ mi.

Bə jə mbɛɛ mənhliŋ yəəŋ ye Kleto mà jə lə bəŋ

7 Yee bə tɨ̂ŋ jə mbɛɛ mənhliŋ yəəŋ dəŋ ye Kleto tɨŋ lə jə bəŋ, fo kiŋkohi lə yee ki gə̄ŋ bə Chu. 8 N'yɔ̄ɔ bəŋ lə Kleto mà jəə gbo wiih ye mbɛɛ nimi Bəjuu bənyii bə́ lə, Chu bwò i yɔ̀ɔ kichɛɛŋ. I mà fə nəni bənfə lə bə́ bemi bəŋkaachi bbəŋ Chu mà kaachi bie bə bəche tili bəbə bwo wunə. 9 I mà fə dəŋ nəni fo bəne bbəŋ bə́ dùŋ kə duŋ nə Bəjuu lə yee bə́ kōhi dəŋ Chu yu hlɨŋ yi kwonə yyɨŋ Chu kwò bə bə́. Fɨhŋ fieŋ dùŋ ye bə́ mà bieŋ lə lə,

“Ye fi duŋ lə nəni, nlə n'yee ŋkôhi wə

ə bəne bbəŋ bə́ dùŋ kə duŋ nə ə Bəjuu mə.

N'yáa ntēe, ŋkòhi yii lo.”

10 Fi baa duŋ dəŋ bə́ bieŋna lə,

“Bəŋ bbəŋ bə dùŋ bie kə duŋ nə Bəjuu, yee bə́ wô njənjə bə bəne bə Chu.”

11 Fi baala duŋ dəŋ bə́ bieŋna lə,

“Bəne bbəŋ bə́ dùŋ bie kə duŋ nə Bəjuu, yee bə́ kôhi Baba.

Bitɨŋ binhliŋ, yee bi kôhi Baba.”

12 Ejaya mà baala yɔɔ dəŋ lə,

“Nchɔnɔ ji yá yi fu ə kichəŋ ki Jeshi mə,

ə duŋ mbɛɛ nnu i yá bwo yee i hlāah bitɨŋ

bi bəne bbəŋ bə́ dùŋ kə duŋ nə Bəjuu.

Ə duŋ ə wu mə nnu bitɨŋ binhliŋ yá yii bufe ə wu mə.”

13 Nnōŋ lə Chu nnu kkə kèe yo fwi ə wu go, i yiinə tɔ́ŋ ŋieeŋ bə kintɨŋ kinhliŋ maa kindunshiiŋ ye bə yìilə tɔ́ŋ ə wu mə, fo ə muŋga mu Fiana Wɛɛŋ mə, ə yee bə kēe kwaa ə duŋ fwi bwɔɔ mənhliŋ yu fieŋ ffɨŋ bə kə̀lə lə bə yá yi bwo kənə.

Fieŋ ffɨŋ fi mà fə Pwɔɔ bieŋ ə jé yyɨŋ i mà bieŋ ye mə

14 Bəŋgwoŋ bəŋŋ, mi kibɛɛ ŋkə̀lə wɛɛŋ lə bə bie bə fwɔ winwaa gbaaŋ, bə fiila bə bufe, bə kə̀lə dəŋ bənnə go ŋieeŋ keehnə. 15 Kwaalə, ə bieŋ bidi bəŋ duŋ mbieŋna tɔhi ba bi bə bəŋ. Mmà nfə nəni bəŋoo bəŋ, ə duŋ yu kinchɨnə kkɨŋ Chu nəə bə mi, 16 lə n'yee ndūŋ mbɛɛ nimi Kleto Jisho bə bəne bbəŋ bə́ dùŋ kə duŋ nə Bəjuu. Nfə̀ nimi lɨhŋ nəni ye che ntofi lə, nnɨ̀ŋ ə hlɨŋ nwaa Chu bəŋ, fo bəne bbəŋ bə́ dùŋ kə duŋ nə Bəjuu lə yee bə́ dūŋ ye ntofi nnu Chu bema wu, Fiana Wɛɛŋ mà bwɛɛla bə́ chi chili. 17 Nəni, nduŋ ə n'yee ŋ'wē bə nimi lɨŋŋ llɨŋ nnɨ̀ŋ bə Chu yulahalə ndùŋ ə Kleto Jisho mə. 18 Nduŋ ə mmɔŋ bən'yɔɔ ki fieŋ fidi chili kə, kahiŋ ffɨŋ Kleto fəə fi kah ə mi mə, lə bəne bbəŋ bə́ dùŋ kə duŋ nə Bəjuu yii tɔ́ŋ ə Chu mə. Bə́ mà yii tɔ́ŋ bələ bieŋ bbɨŋ mmàa n'yɔ̄ɔ maa bə bbɨŋ mmàa nfə̄. 19 Ə mà duŋ dəŋ bələ bieŋ bbɨŋ bi nyìi muŋga mu Chu bə bieŋ bi ŋɨŋ gəə bbɨŋ mmàa nfə̄ kah ə muŋga mu Fiana Chu mə. Nəni, chɔɔ jə ə Jelushalɛŋ gəŋ bwii wɛɛ wi Illilikuŋ, mmà ndiɛɛla gbo dəŋ dontə hlɨŋ nwaa ki Kleto mə. 20 Mmàa nfə̄ nəni, hlɔɔ njəŋ ŋkuntaŋ duŋ lə ndontə hlɨŋ nwaa ni ə duŋ bə bəne bbəŋ bə́ kə hlaa lə wo ki Kleto kə, fo n'ya kə no gəŋ n'yee ŋgə̄ŋ ŋ'wɛ̄ɛ ə kichili ki mbɛɛ ju bəŋ. 21 Mmàa nfə̄ fɨhŋ, mbə̀lə ə duŋ ye bə́ mà bieŋ lə lə,

“Bəne bbəŋ bə́ kə hlaa lə yɔɔ ba bə bə́ kiih kə,

yá yi ŋəŋ kichɛɛŋ kiih,

Bəne bbəŋ bə́ kə hlaa lə wo ba kiih kə, yá yi kələ wu.”

Ye Pwɔɔ mà dɔ bəŋgəŋ Luŋ

22 Ə gbɛŋ wuhŋ wwuŋ wi mà baŋ mi chá kiŋaaŋkə lə nnakə mbwoo lə kkə ŋəŋ nə kə. 23 Kwaalə, fidiɛɛ dɔhɔ ki nimi kidi baalə duŋ ə wɛ́ɛ ŋəhŋ mə kə. Nəni ye mmàa nshī lə ŋkìɛɛ ə bigoŋ mə lə mbwo kkə ŋəŋ nə, 24 ye nhlè lə, ŋkə̀lə ba lə bee bəŋ yá yi ŋəŋ nə bwɔɔ nnu n'yá ŋkah lə n'yu ŋgə̄ŋ ə Spɛŋ. Nhlè dəŋ lə bə lə chɨnə mi ə gbɛŋ wuŋŋ mə bəŋgəŋ bwii mə, bwɔɔ nnu kkə ŋɔɔna chɛɛ, ŋ'woo njənjə ə bəŋ mə. 25 Kwaalə, fidiɛɛ n'yu ŋgə̄ŋ ə Jelushalɛŋ bəŋgəŋ nɨŋ nimi bə bəne bbəŋ bə́ dùŋ bə Chu. 26 Ŋgəŋ mə yu bəne bə kimbemi bə Meshedonia maa bə Akeya, bə́ maa bə́ lēki bənchuŋkə chɨnə bəne bbəŋ bə́ dùŋ bə Chu bənjɨnənə mə Jelushalɛŋ. 27 Ə ma leki bə́ bənfə nəni, ə duŋ ba kichɛɛŋ lə bə́ kənə bənfə fieŋ fidi bə bə́ lə, yulahalə bə́ bbəŋ bə́ dùŋ kə duŋ nə Bəjuu kəna dəŋ kinhləmə kkɨŋ ki chɨ̀nə bəfiana bəbə kkɨŋ ki dùŋ ki Bəjuu, kəə bə́ kənə dəŋ bənchɨnə Bəjuu bə bieŋ bi yaŋ kwe, bbɨŋ Chu hləma bə́ mu. 28 Nəni, bwɔɔ nnu nlə ŋkaanə bə nimi lɨhŋ, ə ŋŋəŋ lə fieŋ ffɨŋ bə́ chuuŋkə fie lɛɛla ə kwáŋ ŋə Bəjuu mə, ə nhlə no həmə, ŋkah je ə bəŋ kwuŋ ə kkə ŋəŋ nə, ə nhlə gəŋ ə Spɛŋ. 29 Ŋkələ lə bwɔɔ nnu n'yá mbwo ə bəŋ mə, n'yáa mbwō bə kindunshiiŋ ki Kleto ə bəŋ mə kkɨŋ ki yiila.

30 Bəŋgwoŋ, ŋkwī kwáŋ bə bəŋ ə yii li Baba ya Jisho Kleto mə maa bə kinleki ki Fiana Wɛɛŋ, bə yiinə mi kkə bumə yee kkə chêe ntakə bə Chu ə mi bəŋ, 31 fo n'yá nfu ə kwáŋ ŋə bəne bbəŋ bə́ dùŋ kə duŋ nə bəne bə kimbemi ə Judia. Yee kkə chêe Chu dəŋ lə, bəne bbəŋ bə́ dùŋ bə Chu bemi nimi llɨŋ ŋgəŋ nnɨŋ le ə Jelushalɛŋ, 32 ə duŋ lə Chu lə mbemi ə yee mbwō ə bəŋ mə ŋ'wo njənjə, ə tɔŋ lɨŋŋ də ə bəŋ mə. 33 Chu nnu i dùŋ yo Chu kindunshiiŋ yee i dūŋ bə bəŋ bənhliŋ. Yee fi Dûŋ lə.