Luŋ 14

Mbɛɛ kə hlaa lə mbɛɛ ju kə

Yee bə jə̂ bəne bbəŋ bə́ dùŋ bə kimbemi ki wɛɛɛ ə bəŋ go. Bəŋ bə bə́ kə yee bə nôo noonə bə bə́ mbini bie bəne ki bieŋ bbɨŋ bə́ hlè lə ə bi kiyəyəŋ bənfə kə. 2 Mbɛɛ ju yo həmə nnu kimbemi kiih lə duŋ lə yee i dī fieŋ finhliŋ. Kwaalə mbɛɛ ju nnu kimbemi kiih duŋ wɛɛɛ dì kwaa wu fiih ə duŋ bichiŋ bbɨŋ bə kwì bu kwinə. 3 Mbɛɛ nnu i dì fieŋ finhliŋ gbo kə chɛŋ nə, i kə yee i nyɛ̂hiŋ mbɛɛ nnu i dùŋ kə chɛŋ nə gbo kə. Mbɛɛ nnu i chɛ̀ŋ gbo kə yee i hlâa mbɛɛ nnu i dì fieŋ finhliŋ, gbo kə chɛŋ nə, i kaalə nhlaa wi bu kaalənə, yulahalə Chu jə̀ bə́ bənhliŋ. 4 Ə wə nyəhə nnu wə hlàa ŋwuŋ nimi mbɛɛ ju lə? Ə kənə che kwoo wi bəmbwo ŋəŋ ləə mbɛɛ nimi wi yo lema yəəŋ lii i gbee ə gbe mə lə. Mə lə lemi fa, yulahalə Baba duŋ ə i noo wu fa, ə i lemi kinwaa kə.

5 Mbɛɛ ju yo dəŋ həmə nnu i jə̀ lə joo ŋəndi ŋie ŋəŋkuntaŋ kah ŋəndi. Mbɛɛ ju jə̀ ŋkwo wi lə joo ŋənhliŋ duŋ yəəŋ. Fieŋ ffɨŋ fi dùŋ, duŋ kwaa lə mbɛɛ kə kə̀nə naamənə dududu ə kinhle kiih mə bə fieŋ ffɨŋ i lèmi ə fi bəŋ kə. 6 Mbɛɛ nnu i jə̀ lə joo ŋəndi ŋie ŋəŋkuntaŋ i fə̀ nəni bənnə kiŋkohi bə Baba. Mbɛɛ nnu i dì bieŋ binhliŋ, i dì dəŋ bənnə kiŋkohi bə Baba, ye i fə̀ lə i nə̀ kimbaafɛɛ bə Chu. Mbɛɛ nnu i chɛ̀ŋ gbo bəndi fieŋ finhliŋ, i chɛ̀ŋ dəŋ gbo bənnə kiŋkohi bə Baba, i nə̀ dəŋ kimbaafɛɛ bə Chu. 7 Yee kkə kə̂lə lə ə mbɛɛ lə duŋ ŋkee, kəə ə wu nnu i kə̀nə gbo wiih kə. Ə mə lə kpe bu kpenə, kəə ə wu nnu i kə̀nə gbo wiih kə. 8 Ə kkə lə duŋ bəŋkee, kəə kkə duŋ bə Baba, ə kkə kpe, kəə kkə duŋ ba dəŋ bə Baba. Nəni, ləkə ə kkə lə duŋ bəŋkee, ləkə kkə kpee, kəə ə kənə kwaa Baba be. 9 Fiee fieŋ ffɨŋ Kleto mà kpe fu fie ə kpe mə yee i dūŋ ŋkee. I mà fə nəni fo mə lə yee i dūŋ Baba bəne bənhliŋ bbəŋ bə́ bie bəŋkee, maa bbəŋ bə́ kpee. 10 Nəni, ə duŋ yulaha ffɨŋ wə hlàa mwaa kaalə nhlaa wi lə? Ə duŋ dəŋ yulaha ffɨŋ wə nyɛ̄hiŋ mwaa lə? Yee bə kə̂lə lə be bənhliŋ yá yi lemi ə Chu fwi, ə i hlaah be. 11 Ə duŋ fieŋ ffɨŋ bə́ bieŋna lə,

“Mi wu Baba n'yɔ̄ɔ lə, ye n'yo lə ŋkee,

mbɛɛ mənhliŋ yá yi bɛŋ núh ə mi fwi,

ə mbɛɛ mənhliŋ yá yee i yɔ̄ɔ bə kijə kiih lə ndùŋ Chu.”

12 Fi hlə yee fi dūŋ lə mbɛɛ mwi mwi ə be mə kənə bəmbwo lemi ə Chu fwi yɔɔ ye fwɔ wiih mà duŋ.

Mbɛɛ kə yee i fə̂ fieŋ ffɨŋ ə duŋ ə maani kaka gbe bu gbenə kə

13 Nəni, mbɛɛ kə hlaa lə mbɛɛ bə mbɛɛ kaalə nhlaa bu kaalənə kə. Fieŋ ffɨŋ kkə duŋ lə yee kkə fə̄ duŋ lə bwɔɔ nnu mbɛɛ fə̀ fieŋ, i jə bwɔɔ lə maani kə bwo bɨnə ə fi bəŋ ləkə gbe bu gbe nə kə. 14 Ŋkə̀lə gbaaŋ, mbèmi ye mbɛɛ Baba Jisho lə fieŋ fidinə fidi hləŋ həmə ə fi kwaŋ ffɨŋ fi dùŋ kə chaalə. Kwaalə, ə mbɛɛ ju lə ja yee i ŋə̄ŋ lə fieŋ fidinə fidi fie ffɨŋ fi dùŋ kə chaalə, kəə fi lə yee fi dūŋ kwaa lə bə wu. 15 Ə wə di fieŋ ffɨŋ fi bìhi mwaa, kəə wə kə nyii lə kinleki bə wu kə. Wə kə tookwaŋ lə fieŋ ffɨŋ wə dì fə mwaa nnu Kleto mà kpe yu wu, lə i gbe kə. 16 Nəni, wə kə tookwaŋ lə fieŋ finwaa ffɨŋ wə fə̀ fiimə ja bwo chu fieŋ ffɨŋ bə́ lə yee bə́ yɔ̄ɔ lə ə fiwaha kə. 17 Yee bə kə̂lə lə muŋkɨŋ mu Chu duŋ nə ki bieŋ bidinə bə bieŋ biŋwinə kə. Ə ki fieŋ ffɨŋ fi dùŋ bəŋkənə fwɔ wintiiŋ bə wi kindunshiiŋ maa bəŋkənə kintɨŋ kkɨŋ ki fù ə Fiana Wɛɛŋ mə. 18 Ə mbɛɛ yee i nɨ̄ŋ bə Kleto ə je ni mə, kəə duŋ ə Chu wo njənjə bə wu, ə bəne yee bə́ dōhi dəŋ wu. 19 Yee kkə bə̂lə bieŋ bbɨŋ bi bwò ə duŋ bi kindunshiiŋ maa bbɨŋ bi chɨ̀nə be bəŋ'wɛɛ bə mbɛɛ bə mbɛɛ.

20 Bə kə yee bə bîhi nimi li Chu yu bieŋ bidinə kə. Ə chɛɛŋ lə bieŋ bidinə binhliŋ duŋ binchaa, kwaalə ə wə di fieŋ ffɨŋ duŋ ə fi fə mbɛɛ ju gbe, kəə ə fieŋ fiwaha ffɨŋ wə fəə. 21 Ə fieŋ finwaa bənɨhŋ kə diee nyaŋ, ləkə bəŋwi mbihŋ, ləkə bənfə maa laha ffɨŋ duŋ ə fi fə ə mwaa gbe bu gbenə. 22 Ə tɔŋ lo bemi ə fieŋ fidi mə, wə cheekwaŋ, yee bə kə̂lə kwaa bəŋ bəə Chu bəfwe. Kintɨŋ kiŋkuntaŋ dùŋ bə mbɛɛ nnu i kə baa lə duŋ bə kinhle kkɨŋ duŋ ə yee i hlāah gbo wiih kə, yulahalə i fə̀ fieŋ ffɨŋ i fwɔ̀ŋ lə fi duŋ yəəŋ. 23 Kwaalə, mbɛɛ nnu i dì fieŋ fidi i nàamə, kəə i yo ba ə ŋgə mə, yulahalə i yu fə̄ fieŋ fidi ffɨŋ tɔŋ llɨŋ i yìi le ə Chu mə bèmi lə bə fi kə. Yee bə kə̂lə lə fieŋ finhliŋ ffɨŋ mbɛɛ mənhliŋ lèmi ə fi bəŋ i hlè lə ə finwaa, kəə ə fiwaha.