Luŋ 13

Yee kkə wô bə bəne bbəŋ bə́ kə̀nə muŋgeni munhlaahnə

Mbɛɛ mənhliŋ duŋ lə yee i wô bə bəne bbəŋ bə́ kə̀nə muŋgeni munhlaahnə, yulahalə muŋgeni mundi hləŋ həmə mmuŋ mu duŋ kə bwoo ə Chu kwuŋ. Bbəŋ bə́ hlāah bie ə Chu nnu i chiee bə́. 2 Fi hlə duŋ lə ə mbɛɛ lə nyii kwoo kintaabə bə bəne bbəŋ bə́ kə̀nə muŋgeni munhlaahnə, kəə mbɛɛ yo nyìi ə duŋ bə bəne bbəŋ Chu chiee. Bəne bbəŋ bə́ nyìi kwoo kintaabə dìi ə duŋ ŋgə ə bə́ fí. 3 Yee bə kə̂lə lə bəne bbəŋ bə́ hlàah mbiŋ nu duŋ nnu bəne bbəŋ bə́ kə̀nə bie fwɔ winwaa lɔ̀ lə bə́ kə. Ə bbəŋ bə́ kə̀nə bie fwɔ wiwaha bbəŋ bə́ lɔ̀ bə́. Ə wə kiɛɛ lə yee wə dûŋ kə lɔɔ mbɛɛ nnu i kə̀nə muŋgeni munhlaahnə, yee wə fə̂ fieŋ finwaa, ə i hlə yee i dōhi wə. 4 Mbɛɛ nnu i hlàah bəne nɨ̀ŋ ə duŋ bə Chu, lə bəne yee bə́ dūŋ kinwaakə. Kwaalə, ə yee wə fə̄ fieŋ fiwaha, ə wə hlə yee wə lɔ̄ wu, yulahalə muŋgeni mmuŋ bə́ nəə wu bən'yii bəne ə ŋgə mə duŋ nə mu nya kə. Ə mbɛɛ nimi Chu nnu i nyìi tɔŋ li Chu llɨŋ li fwēe bə bəne bbəŋ bə́ fə̀ bieŋ biwaha. 5 Nəni bə duŋ lə yee bə bwɔ̂kwe bə bəne bbəŋ bə́ hlàah kitɨŋ, ə kə duŋ nə kwaa yu bə lɔ̀ tɔŋ li Chu llɨŋ li fwèe kə. Yee bə bwɔ̂kwe dəŋ bə bə́ fo fieŋ fidi lə nakə duŋ nə ffɨŋ fi lə yee fi hlāah biwɛɛ bieeŋ kə. 6 Fiee fieŋ ffɨŋ fi fə̀ bə chuuŋkə kiŋwaati, yulahalə bəne bbəŋ bə́ kə̀nə muŋgeni munhlaahnə nɨ̀ŋ ə duŋ bə Chu, bə́ nəə bwɔɔ bə́ kiɛkiɛ ə nimi le mə. 7 Yee bə nə̂ fieŋ finhliŋ ffɨŋ bə kənə bənnə mbɛɛ mənhliŋ. Ə duŋ kiŋwaati ki chuuŋkənə, bə chuuŋkə. Ə duŋ bənhluŋ bieŋ bbɨŋ bə kənə bənhluŋ, bə hluŋ. Ə duŋ mbɛɛ nnu bə kənə bənlɔ wu, bə lɔ. Ə duŋ nnu duŋ ə bə nə wu kimbwɔkwe, bə nə.

Yee bə lêki go ŋieeŋ

8 Mbɛɛ kə kənə dəŋ fie dududu bə maani ju, kahiŋ fie nni i dùŋ kinleki. Yee bə kə̂lə lə, ə mbɛɛ leki mbɛɛ ju, kəə i chiee bəŋkɨnə bənhliŋ. 9 Bəŋkɨnə bə Chu bbəŋ bə́ yɔ̀ɔ bie lə,

“Wə kə lâa kpɛɛ mbɛɛ,

wə kə jîi lə mbɛɛ,

wə kə yêe buyi,

wə kə gêe díi bə fieŋ fi mbɛɛ ju kə,”

maa dəŋ ŋkɨnə nwɛhɛŋ, bə́ buhaŋ ə ŋkɨnə nu mə, nnu i yɔ̀ɔ yo lə,

“Yee wə lêki mbɛɛ nnu i dùhŋ ə wə tɨŋ ye wə lèki lə gbo wo.”

10 Ə mbɛɛ yee i lêki mbɛɛ ju, ə i nakə baala yee i fə̂ fieŋ fiwaha bə wu kə dududu. Nəni ə mbɛɛ lèki mbɛɛ ju, kəə i chiee bəŋkɨnə bənhliŋ.

11 Yee bə fə̂ bieŋ bɨhŋ nəni, bə kə̀lə ye bwɔɔ fidiɛɛ nu dùŋ lə. Bwɔɔ wuna bə bəŋ bəŋənə. Bə ŋənə yulahalə bwɔɔ nnu Chu lə fwoo be yo chəkə chəkə kah ye i mà duŋ lə bwɔɔ nnu kkə mà hlaa yii yo tɔ́ŋ ə Jisho Kleto mə. 12 Jɨbə kie ki kā, kibweenə kie ki chāa ki bwō. Kkə lɛɛ tələ fwɔ wi jɨbə, kkə jə ə duŋ fwɔ wi kinchaa ye bieŋ bi ntɨmə lə. 13 Yee kkə dûŋ kinduŋh kkɨŋ ki kə̀nə kiŋkohi ye bəne bbəŋ bə́ jàa bushi. Bə kə yee bə dî, bə ŋwì, bə fə̀ ye bwí lə kə. Bə kə yee bə ŋwî mbihŋ mə kwò bəŋ kə. Bə kə yee bə wâali maa bə fwɔ wi nyɛninə kə. Bə kə yee bə kpə̂nə bikpənini bə lùhuŋ bimi kə. 14 Bə jə ə duŋ fwɔ wi Baba Jisho Kleto ə bəŋ go. Bə kə nə̂ə je dududu lə nyaŋ ni go fə lə yee bə fə̂ bieŋ biwaha bbɨŋ i kìɛɛ kə.