Luŋ 12

Bə nə go ŋieeŋ bə Chu

Bəŋgwoŋ, ye Chu kwòlə hlɨŋ bə be, n'yu ŋkwī bəŋ kwáŋ lə, bə nə go ŋieeŋ bə Chu ye bieŋ bi tofinə bbɨŋ bi kaani biŋkee bbɨŋ bi dùŋ wɛɛŋ bbɨŋ Chu bema. Yɨhŋ lə jé yintiiŋ yyɨŋ bə lə yee bə chēe Chu ə yí mə. 2 Bə kə yee bə bə̂lə bieŋ bbɨŋ bəne bə yaŋ mbiŋ nte fə̀ kə. Bə tukwaŋ yee Chu nə̄ bəŋ munhlenə munfwɔ, yee mu gāanə bəŋ. Ə yee bə fə̄ nəni, ə bə hlə kələ bəntaalə mənte kələ fieŋ ffɨŋ Chu kìɛɛ, ffɨŋ fi dùŋ finwaa, ə duŋ ffɨŋ Chu bema fi, fi nwaa wu gbaaŋ gəŋ kpee həŋgbɔŋ.

3 Mi ye mbɛɛ nnu Chu mà shaa wu, ŋkiɛɛ lə n'yɔɔ bə bəŋ bənhliŋ lə, mbɛɛ kə yee i hlê ki mbili wi lə, i dùŋ fieŋ fidi kah fieŋ ffɨŋ i dùŋ fie. Yee mbɛɛ hlê ki mbili wi ə je ntiiŋ mə. Yee mbɛɛ hlê i bə̀lə kifɛhinə ki kimbemi kkɨŋ Chu nəə wu. 4 Kkə kələ lə mbili mbɛɛ duŋ mwi, i kə̀nə wɛ́ɛ chili chili, wɛ́ɛ ŋie kə̀nə ními chili chili. 5 Ə li dəŋ yəəŋ ye kkə dùŋ. Maa ye kkə duŋ lə dəŋ kiŋaaŋkə, kkə duŋ mbili mwi ə Kleto mə. Mbɛɛ ju hləŋ nnu i dùŋ ə wu kwáŋ. 6 Kkə kə̀nə nnə chili chili bələ kinchɨnə kkɨŋ Chu nəə bə be, kkə hlə yee kkə nɨ̄ŋ bə li. Ə nnə li mbɛɛ lə duŋ lə, i yɔ̀ɔ hlɨŋ Chu, yee i yɔ̂ɔ i bə̀lə kifɛhinə ki kimbemi kkɨŋ Chu nəə wu. 7 Ə nnə li mbɛɛ duŋ lə, yee i nɨ̂ŋ bə bəne, yee i nɨ̂ŋ bə bə́. Ə ŋkwo mbɛɛ lə duŋ lə, yee i kêeh bəne, yee i kêeh. 8 Ə nnə li mbɛɛ lə duŋ lə, yee i tâhi tɔ́ŋ ŋə bəne, yee i tâhi. Ə nnə li mbɛɛ lə duŋ lə, yee i nə̂ bəne bieŋ, i wɛ kwáŋ ŋiih. Ə ŋkwo mbɛɛ lə duŋ lə, i duŋ ŋkafwi bə bəne, yee i dûŋ ŋkafwi bə tɔŋ liih linhliŋ. Ə mbɛɛ duŋ nnu nnə liih duŋ lə, yee i kwô hlɨŋ bə bəne, yee i kwô hlɨŋ i wò njənjə.

Kinleki ki kichɛɛŋ

9 Kinleki kieeŋ kənə bənduŋ ki kichɛɛŋ. Yee bə lôh bə fieŋ fiwaha, bə lèmi ə duŋ ə fieŋ finwaa bəŋ. 10 Yee bə lêki go ŋieeŋ bə tɔ́ŋ ŋənhliŋ ye bwɔni bə kpɛ lə. Yee bə nə̂ kiŋkohi bə bəne bədi kah go ŋieeŋ.^ª 11 Bə kə yee bə dûŋ fɛɛ bə fieŋ fidi kə. Yee bə nɨ̂ŋ nimi li Chu bə ŋgɨŋ bwɔɔ mənhliŋ. 12 Yee bə wô njənjə bə fieŋ ffɨŋ bə kèe fwi ə fi go, bə kə̀lə lə bə yá yi kənə fi. Yee bə kwâa tɔ́ŋ ə bəŋgə mə. Yee bə chêe Chu bwɔɔ mənhliŋ. 13 Yee bə chɨ̂nə bəne bə Chu bənjɨnənə. Bə tɨ̀ŋ jə bəne bə bwonə ə chə́ŋ yeeŋ mə, bə fwòŋ bə́ kinwaakə.

14 Yee bə nôŋ lə Chu hləmə bəne bbəŋ bə́ hlɔ̀ɔ wuh ə bəŋ dɨŋ. Yee bə nôŋ ə duŋ kinhləmə ə bə́ bəŋ. Bə kə yee bə nôŋ lə kida bwo ə bə́ bəŋ kə. 15 Yee bə tɨ̂ŋ bə bəne bbəŋ bə́ tɨ̀ŋ, bə jùuli bə bəne bbəŋ bə́ jùuli. 16 Yee bə dûŋ fieŋ fimwi. Bə kə yee bə wê kə. Yee bə kwô bishiŋ bə bəne bətənə. Bə kə yee bə jə̂ lə bə kələ bieŋ kah ye bə kələ lə kə.

17 Bə kə yee bə chûu yiwaha bə yiwaha kə. Yee bə kə̂nə kinhle bənfə ə duŋ bieŋ bbɨŋ bəne bənhliŋ ŋə̀ŋ lə ə binwaa. 18 Ə je lə duŋ mu, ye bə ŋə̀ŋ lə, bə ju bənduŋ ə kindunshiiŋ mə bə bəne bənhliŋ. 19 Bəmbweŋ bəŋŋ bə tɔ́ŋ, bə yá kə mɔŋ nə bənchuu fie waha kə dududu. Bə tukwaŋ Chu nyii tɔŋ liih llɨŋ li fwēe bə bə́. Ə fi ffɨŋ bə́ mà bieŋna lə,

“Ə mi nnu n'yá nchuu fie, ə mi nnu n'yá nnə bikoonə bibə.

Ə mi nnu n'yá mbwo hluŋ bə́.

Fɨhŋ lə n'yɔɔ Baba Chu.”

20 Fieŋ ffɨŋ duŋ ə yee bə fə̄, duŋ ffɨŋ bə́ bieŋna ə Kiŋwaati ki Chu mə lə, “Ə duŋ lə jəbulə yi jìi mbɛɛ nnu i dùŋ yo kə diee njənə bə wə, wə nə wu fieŋ i di. Ə ntɔntɔ yu ŋɨ̄ŋ wu, wə nə wu fieŋ i ŋwi. Ə wə fə nəni, ə gbo wi beenə duŋ ə wu fi.” 21 Bə kə tookwaŋ lə yiwaha kɨŋ bəŋ kə. Yee bə kɨ̂ŋ yiwaha bə bieŋ binwaa.