Luŋ 11

Chu kə nɨhŋ nə bəne biih bə Ishlael dududu kə

N'yu baa bīi ləə, Chu nɨhŋna bəne biih lə? Ə lə kə kpa! Mi kibɛɛ ndùŋ mbɛɛ nnu Ishlael. Ndùŋ ŋiaŋ ə Ablahaŋ chəŋ, nfù ə kichəŋ ki Bɛnjamiŋ mə. 2 Chu kə nɨhŋ nə bəne biih bbəŋ i mà shaa ə kaani kə. Nhle lə bə kələ fieŋ ffɨŋ Kiŋwaati ki Chu yɔ̀ɔ ki Elaja, ye i mà dee bə Chu ki fieŋ ffɨŋ bəne Bəishlael mà fəə lə? 3 I màa i dē i yɔ̀ɔ bə Chu lə,

“Baba, bə́ jiila kaa bəne bwo bə hlɨŋ,

hlaki táŋ ŋo ŋə ntofi.

Ə kwaa mi nnu n'yu ŋkaani, bie bə́ bə̄lə dəŋ lə bə́ kaanə bə mi.”

4 I màa i dē nəni, Chu chuu bə wu lə ləhəŋ lə? I chuu bə wu lə,

“Nchiee bəne bbəŋ bə́ dùŋ bəŋŋ bənchuku fumanyaaŋ (7,000),

bbəŋ bə́ kə hlaa lə bɛŋ núh ə Baal fwi nnu i dùŋ maami nnu bə́ chèe yo bə wu.”

5 Ə lə dəŋ yəəŋ ye fi duŋ ə bwɔɔ fidiɛɛ nu bəŋ. Bəne bədi bie həmə Ishlael chɛɛ bbəŋ bə́ shiee bbəŋ Chu shaala yu tɔŋ linwaa. 6 Ə fi duŋ lə i mà shaa bə́ yu tɔŋ linwaa, kəə ə kə duŋ nə yu nimi lidi llɨŋ bə́ mà nɨŋna kə. Ə màa duŋ lə ə yu nimi lidi llɨŋ bə́ mà nɨŋna, ə fi hə baa duŋ lə ə tɔŋ linwaa kə.

7 Fieŋ ffɨŋ n'yɔ̄ɔ duŋ lə laha lə? Fi duŋ lə bəne Bəishlael kiŋaaŋkə mà kə duŋ nə ntiiŋ ə Chu fwi ye bə́ mà kiɛɛ lə kə. Ə màa kwaa bəne bbəŋ Chu mà shaa bbəŋ bə́ mà kənə je duŋ nə ntiiŋ ə wu fwi. Kwaalə, Chu fə tɔ́ŋ ŋə bəne bbəŋ bə́ she bie ta bwo ba nəni. 8 Fɨhŋ duŋ ye bə́ mà bieŋ lə lə,

“Chu mà fəə bə́ jɨkə jɨkə,

díi ŋəbə nakə yee ŋə ŋə̄ŋ ə bieŋ go kə,

bituŋ bibə nakə yee bi wō bieŋ kə.

Bə́ ba nəni bwo bwii daŋ.”

9 Daafi mà yɔɔla dəŋ lə,

“Chu fə̀ biləə bbɨŋ bə́ dì bə́ wò njənjə

la bə́ ye chwáani lə,

baa kwo bə́ ye choo ki tuulənə lə.

Bi chu fieŋ ffɨŋ duŋ ə bə́ bɨnə gbe ə fi bəŋ,

Ə fi hlə duŋ bikoonə bi fwɔ́ ŋəbə.

10 Chu fə díi ŋəbə baŋ fo bə́ lə nakə baa lə yee bə́ ŋə̄ŋ ə bieŋ go kə.

I fə dəŋ lə binhlaŋ bibə kɔ ba lə.”

11 Nhlə n'yee mbīi ləə ye bəne Bəishlael mà bɨnə lə gbe nəni mà duŋ bə bu ba həmə həkwe lə? Ə lə nəni kə! Yiwaha yyɨŋ bə́ mà fəə mà kaka bwo chuu ə duŋ bə kinfukwoo ə bəne bbəŋ bə́ dùŋ kə duŋ nə Bəishlael, fo bəne Bəishlael lə yee bə́ lūhuŋ bimi. 12 Ə fi duŋ lə yiwaha yyɨŋ bə́ mà fə ye mà kaka bwo chuu ə duŋ bə kiŋkuntaŋ yaŋ kwe, ŋgbe nnu bə́ mà gbe yo mà kaka bwo chuu ə duŋ bə kiŋkuntaŋ ə bəne bbəŋ bə́ dùŋ kə duŋ nə Bəishlael, kəə kiŋkuntaŋ kkɨŋ ki yá duŋ bwɔɔ nnu bəne Bəishlael bənhliŋ yá bemi Kleto yá duŋ ləhəŋ lə?

Bəne bbəŋ bə́ dùŋ kə duŋ nə Bəishlael, kə yee bə́ tūu kɔŋ bə bəne Bəishlael kə

13 Ŋkiɛɛ lə n'yɔɔ fidiɛɛ ə duŋ bə bəŋ bəne bbəŋ bə́ dùŋ bie kə duŋ nə Bəishlael kə. Ye ndùŋ lə mbɛɛ faŋnə Jisho yu bəne bbəŋ bə́ dùŋ kə duŋ nə Bəishlael, nhlə n'yee njə̄ nimi lɨŋŋ lɨhŋ lə ə fieŋ fiŋkuntaŋ. 14 Nfə̀ nəni fo Bəjuu biaa lə yee bə lūhuŋ bimi, fi tùu ə bə́ go, ə bədi ə bə́ mə bwo fukwoo. 15 Ə yee fi dūŋ lə bwɔɔ nnu Chu mà nɨhŋ bəne Bəishlael, fɨhŋ fə bəne bədi ə mbiŋ nu mə fiimə chu fieŋ fimwi bə Chu, kəə bwɔɔ nnu i yá fiimə tɨŋ jə bə́, ə yee fi dūŋ ləhəŋ lə? Fi yá duŋ ye bwɔɔ nnu mbɛɛ kpe lə fiimə chu. 16 Ə mbɛɛ lə hlaa kpa buniɛŋ bu fwii nə bə Chu, kəə buniɛŋ bwe bunhliŋ chu duŋ bu Chu. Ə gɛŋ ŋə tiɛɛ lə duŋ ŋə Chu, kəə nyáŋ yí tiɛɛ kie lə duŋ dəŋ yí Chu.

17 Kwaalə, fi duŋ lə nyáŋ yí tiɛɛ kidi duŋ bə́ mà shwa tələ hlə jə ə duŋ bəŋ bbəŋ bə́ dùŋ tiɛɛ ki Olif ki nji, bwo baha ə tiɛɛ ki Olif kkɨŋ bə́ dɔ bu dɔnə ə dɔhɔ kkɨŋ nyáŋ yidi ye mà fu, fo bə lə yee bə kə̄nə dəŋ ŋgwiŋ mməŋ mə fù ə tiɛɛ kie go, 18 kəə bə kənə lə bəntuu kɔŋ bə nyáŋ yé kə. Ə yee bə tūu kɔŋ bə bə́, yee bə ŋōo lə bə duŋ nyáŋ. Ə kə fəə bəŋ lə gɛŋ ŋie hlə yee ŋə dūŋ kə. Ə fə gɛŋ ŋie lə yee bə dūŋ həmə. 19 Duŋ ə mbɛɛ ju ə bəŋ mə ja yɔɔ lə, “Bə́ mà shwa tələ nyáŋ yé lə bə́ jə baha chuu ə duŋ mi mu lə.” 20 Ə chɛɛŋ. Bə́ mà shwa tələ bə́ yulahalə bə mà kə kənə kimbemi kə. Bə dùŋ həmə ntakə yu tɔ́ŋ ŋŋəŋ bə yiila ə Kleto mə. Nəni, bə kə yee bə wô gbo kə. Yee bə dûŋ nɨŋ nɨŋ. 21 Yee bə́ kə̂lə lə ye Chu mà duŋ lə kə biaa lə nyáŋ yí tiɛɛ kkɨŋ bə́ dɔɔ, kəə duŋ dəŋ ə i biaa lə bəŋ kə. 22 Bə kee ŋəŋ lə Chu kənə tɔŋ linwaa gbaaŋ baa kənə dəŋ tɔŋ linloh. I lòh bə bəne bbəŋ bə́ gbè, kwaalə i nyìi tɔŋ linwaa bə bəŋ ə bə ba yee bə bə̄lə je yi. Ə nakə duŋ nə nəni, ə i yá shwa dəŋ bəŋ lɛɛ tələ. 23 Ə duŋ dəŋ lə bəne Bəishlael gaana yee bə kə̄nə kimbemi, ə Chu jə chi chuu bə́ dɨŋ baha ə tiɛɛ kie go, yulahalə Chu kənə muŋga bənfə lə. 24 Yee bə kə̂lə lə, ə bə duŋ nyáŋ yyɨŋ bə́ mà shwa ə tiɛɛ ki Olif go kkɨŋ ki kò ə duŋ nji, bwo baha bə yyɨŋ bə́ dɔɔ bu dɔnə, ə duŋ fieŋ ffɨŋ duŋ ə fi nakə duŋ nə lə kə, kəə duŋ ə bə́ nakə baa lə jə chuu dɨŋ nyáŋ yyɨŋ yí duŋ yí tiɛɛ kkɨŋ bə́ dɔɔ bu dɔnə, yyɨŋ bə́ mà shwaa bwo baha chuu ə tiɛɛ kie go kah nəni bu kahnə lə?

Chu yá kwo hlɨŋ bə bəne bənhliŋ bə Ishlael

25 Bəŋgwoŋ, ŋkiɛɛ lə bə kələ kichɛɛŋ kkɨŋ ki dùŋ ə nələ mə, fo bə lə nakə jaa yee bə wō gbo lə bə kə̀lə bieŋ gbaaŋ. Fi duŋ lə kwoo kintaabə bwoo ə bəne bədi bə Ishlael mə. Bə́ lə yee bə́ tā kwaa bikuu nəni gəŋ bwii bwɔɔ nnu bəne bənhliŋ bbəŋ bə́ dùŋ kə duŋ nə Bəishlael bbəŋ bə́ dùŋ lə bə lɛɛ ə kintu ki bəne bə Kleto mə yá lɛɛ. 26 Bwɔɔ nnu fi yá kah nəni, bəne bənhliŋ Bəishlael yá hlə fukwoo. Ə duŋ fi ffɨŋ bə́ bieŋna Chu yɔ̀ɔ lə,

“Mbɛɛ nnu i yá fwoo bəne ə ŋgə mə yá fu ə Jayɔŋ.

I yá fwoo fwɔ wiwaha ə kichəŋ ki Jekɔb mə.

27 Kɨhŋ lə tɨmə kkɨŋ n'yá nə bə bə́

bwɔɔ nnu n'yá njə no bə yíwaha yibə.”

28 Ə wɛɛ wi hlɨŋ nwaa Chu mə duŋ bəne Bəishlael dì lə njənə bə Chu yu bəŋ. Bəŋgəŋ ə buwɛɛ bu shaanə bbuŋ Chu mà shaa bə́, mà duŋ bəne Bəishlael dùŋ dəŋ tɔŋ liih yu ŋkɨnə nnu i mà nə bə bəche tili bəbə. 29 Yee fi dûŋ lə yulahalə ə Chu nə nnə bə mbɛɛ, ə i nakə baa lə jə chuu li kə, ə mə chee mbɛɛ, i kə baa lə tukwaŋ ə wu go kə. 30 Ye bəŋ bəne bbəŋ bə́ dùŋ kə duŋ nə Bəishlael mà hlaalə duŋ kə yee bə wō Chu, kwaalə fi fie fidiɛɛ i kwoo ba hlɨŋ bə bəŋ yulahalə bəne Bəishlael wò lə wu kə, 31 ə dəŋ yəəŋ ye bə́ duŋ lə dəŋ kə woo Chu fidiɛɛ fo hlɨŋ yi kwonə yyɨŋ i kwò ye lə fə ə i kwo hlɨŋ bə bə́. 32 Fieŋ ffɨŋ fi dùŋ, duŋ lə, Chu yiila bəne bənhliŋ ə munfwa mu bikuu bintaabə mə, fo mə lə kwo hlɨŋ bə bə́ bənhliŋ.

Kiŋkohi yee ki dūŋ bə Chu

33 O, bə kee ŋəŋ, kiŋkuntaŋ kkɨŋ ki dùŋ ki Chu dùŋ ŋkokə, bufe bwii dùŋ dəŋ ŋkokə, bieŋ bbɨŋ i kə̀lə, i kə̀lə dəŋ bi kinwaa! Mbɛɛ duŋ ə i kələ je nni i kàalə bənhlaa mu kə. Mbɛɛ duŋ ə i kələ je nni i fə̀ bieŋ biih ə yi mə kə. 34 Fi duŋ bə́ bieŋna ə Kiŋwaati ki Chu mə lə,

“Mbɛɛ hləŋ həmə nnu i kə̀lə fieŋ ffɨŋ Baba hlè lə?

Lii ə nyəhə nnu duŋ ə i keeh wu lə?

35 Ə nyəhə həmə nnu i nəə Chu fieŋ

fo Chu lə chuu wu lə?”

36 Bieŋ binhliŋ fù ə wu kwáŋ. Bieŋ binhliŋ kàh ə kwáŋ ŋiih mə, bieŋ binhliŋ duŋ yu wu. Yee Kiŋkohi dûŋ bə wu bwɔɔ mənhliŋ kə kaa. Yee fi Dûŋ lə.