Luŋ 10

Bəŋgwoŋ, fieŋ ffɨŋ ŋkiɛɛ bə tɔŋ lɨŋŋ linhliŋ, bə Chu cheenə ŋgwəŋ bə Chu duŋ lə, bəne bəŋŋ bə Ishlael bəhŋ yá fukwoo. 2 Fieŋ ffɨŋ ŋkə̀lə, ffɨŋ nduŋ ə n'yɔɔ duŋ lə, bə́ kə̀nə tɔŋ liŋkuntaŋ ə Chu mə. Kwaalə bə́ kə kələ jé yintiiŋ yyɨŋ duŋ ə yee bə́ bə̄lə wu ə yí mə kə. 3 Ye bə́ duŋ lə kə kələ je nni Chu bwò i jə̀ lə mbɛɛ duŋ ba ntiiŋ ə wu fwi, bə́ hlə yee bə́ kīɛɛ bənchi yibə jé, bə́ kə baa lə nə go ŋəbə bəmbələ mbini ye je nni Chu jə ye mbɛɛ lə i dùŋ ntiiŋ ə wu fwi. 4 Ye Kleto mà bwolə ba, je bəŋkɨnə nni bəne màa bə́ bə̄lə bənduŋ ntiiŋ ə Chu fwi hlə ka, fo bənduŋ ntiiŋ ə Chu fwi fidiɛɛ duŋ bən'yii tɔŋ ə Kleto mə.

Kinfukwoo bwoo yu mbɛɛ mənhliŋ

5 Mushe mà bieŋna ki je duŋnə ntiiŋ ə Chu fwi nni i bə̀lə ə duŋ bəŋkɨnə lə, “Mbɛɛ nnu i fə̀ ye bəŋkɨnə yɔ̀ɔ lə, lə yee i dūŋh yu i chì bəŋkɨnə bie binhliŋ.” 6 Kwaalə ki je nni mbɛɛ lə yee i dūŋ ntiiŋ ə Chu fwi, bə̀lə ə duŋ tɔŋ llɨŋ i yiila ə wu mə. Bə́ bieŋna lə,

“Wə kə yee wə bîi ə tɔŋ lo go ləə, ə nyəhə nnu mə lə biŋ buh lə?”

(Fi duŋ lə ə nyəhə nnu mə biŋ buh gəŋ bwɔ bwo bə Kleto lə.)

7 Ləkə lə,

“Wə kə yee wə bîi ə tɔŋ lo go ləə, ə nyəhə nnu mə lə bwɔ ə ke lə?”

(Fi duŋ lə ə nyəhə nnu mə bwɔ gəŋ ə ke gəŋ biŋ bwo bə Kleto ə kpe mə lə.)

8 Kwaalə, fɨhŋ yɔ̀ɔ lə ləhəŋ lə? Fi yɔ̀ɔ lə,

“Die Chu ye baha baha ə wə go.

I ye ə biwu bwo go, maa ə tɔŋ lo mə.”

Ə yi nni kkə bie kkə dōntə ki n'yii tɔŋ ə Jisho mə. 9 Ə wə yɔɔ bə kijə ko lə Jisho dùŋ Baba, bemi ə tɔŋ lo mə lə Chu mà fwoola wu ə kpe mə, ə wə yá fukwoo. 10 Fi duŋ lə mbɛɛ bemi bə tɔŋ liih Chu hlə jə wu lə mə lə bə gbenə kə. Ə mbɛɛ yɔɔ bə kijə kiih ə Chu hlə fwoo wu.

11 Kiŋwaati ki Chu yɔ̀ɔ lə,

“Mbɛɛ nwɛhɛŋ nnu i bema yo bə wu, mə kənə giaali kə.”

12 Yee bə kə̂lə lə kichili hləŋkə mu bə ŋwuŋ Bəjuu maa bə mbɛɛ nnu i dùŋ kə duŋ nə ŋwuŋ Bəjuu kə. Baba nnu i dùŋ yo Baba bəne bənhliŋ dùŋ kwaa mwi. I bwò i wɛ̀ kwáŋ ŋiih nə kiŋkuntaŋ bə mbɛɛ mənhliŋ nnu i dè bə wu. 13 Fi duŋ ye bə́ mà bieŋ ə Kiŋwaati ki Chu mə lə,

“Mbɛɛ mənhliŋ nnu i dè, i chèe yii li Baba,

yá yi fukwoo.”

14 Kwaalə ə duŋ ə bəne jaa ləhəŋ hlə yee bə́ dē bə wu bə́ kaani kə yii lə tɔŋ ə wu mə lə? Ə duŋ dəŋ ə bə́ jaa ləhəŋ hlə yii tɔŋ ə wu mə bə́ kaani kə hlaa lə wo kiih lə? Ə duŋ ə bə́ jaa ləhəŋ hlə wo, mbɛɛ keehnə kaani kə duŋ nə nnu mə lə dontə kiih bə bə́ lə? 15 Ə duŋ ə bəne jaa ləhəŋ hlə gəŋ yee bə́ dōntə bə́ kaani kə faŋnə bə́ lə? Fi duŋ bə́ bieŋna lə,

“Wuh ŋə bəne bbəŋ bə́ bà bəmbwo bə hlɨŋ nwaa, nwaa gbaaŋ.”

16 Kwaalə, ə bəne Bəishlael bənhliŋ bbəŋ bə́ bema hlɨŋ nwaa ni kə. Dəŋ yəəŋ ye Kiŋwaati ki Ejaya mbɛɛ hlɨŋ Chu mà yɔɔlə lə,

“Baba, ə nyəhə nnu i bema hlɨŋ nni kkə dòntə lə?”

17 Fi hlə yee fi dūŋ lə, bənyii tɔŋ ə Kleto mə fu ə fieŋ ffɨŋ mbɛɛ hə wo go. Fieŋ ffɨŋ mbɛɛ hə wo fù ə ffɨŋ bə́ dòntə ki Kleto. 18 Nhlə n'yee mbīi ləə, bə́ mà kə woo kə lə? Chɛɛŋ bə́ mà woo. Kiŋwaati ki Chu yɔ̀ɔ lə,

“Díe yibə gəŋna ə mbiŋ mənhliŋ mə,

biyɔɔnə bibə gəŋna bwii ə bənchi bə mbiŋ mənhliŋ mə.”

19 Mbaa mbīi ləə, ə chu duŋ lə bəne Bəishlael mà woo, bə́ nakə woo kinwaa kə lə? Mushe mà hlaala yɔɔ lə Chu yu yɔ̄ɔ lə,

“Nlə nfə ə yee bə lūhuŋ bimi,

bəne bə kitɨŋ kinya fə ə yee tɔŋ lō bəŋ bə bəne bə kitɨŋ ki nfili.”

20 Ejaya baa yɔɔ ntakə bə bə́ kə lɔɔ kə, lə Chu yɔɔla lə,

“Bəne bbəŋ bə́ màa bə́ dūŋ kə kiɛɛ lə mi, ŋəŋna ə mi go.

Nnyiila gbo wuŋŋ bə bəne bbəŋ bə́ mà kə bə bīi lə mi kə.”

21 Kwaalə ki bəne Bəishlael Chu mà yɔɔla lə,

“Joo ŋənhliŋ mmàa ndūŋ kwaa nshì nnɛ̀hiŋ kwáŋ ŋəŋŋ bəntɨŋ jə bəne

kwaalə bə́ tà bikuu bibə, bə́ gə̀ŋ ə jə́ yibə mə.”