Luŋ 9

Chu mà shaala bəne Bəishlael lə yee bə́ dūŋ bəne biih

Fieŋ ffɨŋ n'yɔ̄ɔ fɨhŋ lə kichɛɛŋ ye mbɛɛ Kleto lə. Ŋkaalə lə yo kə. Biwɛɛ bɨŋŋ bèmi kah ə Fiana Wɛɛŋ mə lə ŋkaalə lə yo kə. 2 N'yu n'yɔ̄ɔ lə n'yo bə hlɨŋ yi kwonə gbaaŋ maa bə kinlogo kkɨŋ ki dùŋ kə kaa ə tɔŋ lɨŋŋ go, 3 yu bəŋgwoŋ bə kitɨŋ bbəŋ bee bə́ kə̀nə ŋgɔŋ cha mi. Nhlə n'yee ŋkīɛɛ gbaaŋ dəŋ lə kida bwo ə mi go, ga gbo ə ŋga mə dəŋ bee Kleto yu bə́. 4 Bəne bəhŋ duŋ bəne Bəishlael bbəŋ Chu mà jə bə́ fə lə yee bə́ dūŋ bwɔni biih, nyii kiŋkuntaŋ kiih bə bə́, nə tɨmə bə bə́, nə bəŋkɨnə biih ə bə́ kwáŋ, nyii bə́ ye duŋ ə yee bə́ chēe Chu, kaa bəŋkaachi bə bə́. 5 Bəne bəhŋ dùŋ bəne bbəŋ bətili bəbə mà duŋ bəne bə Chu bə kichɛɛŋ. Nchuu Fwoo nnu Chu mà kaachi yo mà bwo ye mbɛɛ ŋkee lə, bə́ bwee wu ə duŋ ə kichəŋ ki bəne bəhŋ mə. Yee kkə nə̂ kindohi bwɔɔ mənhliŋ ki kə kaa bə Nchuu Fwoo nnu i duŋ Chu nnu i kə̀nə yo muŋga ə bieŋ binhliŋ bəŋ. Yee fi Dûŋ lə.

6 Fi kə duŋ nə lə fieŋ ffɨŋ Chu mà kaachi laa nya kə, yulahalə ə bəne bənhliŋ bə Ishlael bbəŋ bə́ dùŋ bwɔni bə Ishlael bə kichɛɛŋ kə. 7 Kwaalə ə duŋ dəŋ ə bwɔni bbəŋ bə́ fù ə Ablahaŋ go bənhliŋ duŋ bwɔni biih kə. Kwaalə fi duŋ ye Chu mà yɔɔ bə Ablahaŋ lə,

“Ə Ayjik nnu i yá chi yii li kichəŋ ko fa.”

8 Fɨhŋ fieŋ nyìi lə ə kə duŋ nə bwɔni bbəŋ bə́ fù ə Ablahaŋ go bənhliŋ bbəŋ bə́ dùŋ bwɔni bə Chu kə. Ə bwɔni bbəŋ Chu mà kaachi Ablahaŋ mu bbəŋ bə́ jə̀ lə bə́ duŋ bwɔni bə Ablahaŋ. 9 Bwɔɔ nnu Chu mà fə ŋkaachi nu i yɔɔ lə,

“Ə yáa ə dūŋ ye fidiɛɛ lə, ə kigoŋ kkɨŋ ki bwō kie mə,

ə n'yá nfiimə bwo, ə Sheela kənə ŋiaŋ nyo.”

10 Ə kə duŋ nə kwaa fɨhŋ kə. Fieŋ ye fɨhŋ mà chila dəŋ Lebeka nnu che bwɔni biih màa mwi ə duŋ kwaa Ayjik che bətah biaa. 11-12 Maa ye bə́ mà chu bwo bwee lə bə maŋ bəhŋ, bə́ mà chu bwo fə fieŋ finwaa ləkə fiwaha, duŋ Chu mà yɔɔla bə mahni bə́ lə,

“Ŋwucha yáa i nɨ̄ŋ bə ŋiaŋ wɛ.”

Chu mà yɔɔ nəni bənyii lə i shàa mbɛɛ i bə̀lə kinshaa kiih. I shàa lə ə duŋ yu nimi lidi llɨŋ mbɛɛ nɨŋna kə, i shàa i bə̀lə ye wu Chu kìɛɛ lə. 13 Fi duŋ dəŋ ye bə́ bieŋna lə,

“Nlèki Jekɔb, nlòh bə Ɛshawo.”

Chu fə̀ ə duŋ fieŋ ffɨŋ i lèki

14 Ye fi duŋ lə nəni, duŋ ə kkə baa yɔɔ lə ləhəŋ lə? Ə chu duŋ lə Chu fə̀ lə fwɔ wintiiŋ kə lə? Ə lə kə! 15 Chu mà yɔɔla bə Mushe lə,

“Ŋkwò hlɨŋ bə mbɛɛ nnu nlèki,

njùuli bə mbɛɛ nnu nlèki.”

16 Nəni, Chu shàalə mbɛɛ i bə̀lə ye mbɛɛ ŋkee lèki lə, ləkə ə nimi llɨŋ mbɛɛ nɨŋna go kə. I shàa ə duŋ yu i kə̀nə hlɨŋ yi kwonə bə bəne. 17 Fɨhŋ nini duŋ kwaa ye bə́ mà bieŋ ə Kiŋwaati ki Chu mə, ye Chu mà yɔɔ bə Fɛlɔ Ŋkɨŋ nnu Ijip lə,

“Mmà mbihaŋ wə ye Ŋkɨŋ ə duŋ yu kinhle kɨhŋ lə

nlə nnyìi muŋga muŋŋ ə wə go,

ə bəne gəŋ bə yii lɨŋŋ ə mbiŋ mənhliŋ mə.”

18 Fɨhŋ nini nyìilə Chu kə̀nə hlɨŋ yi kwonə bə mbɛɛ wi nnu i kìɛɛ lə yee i kwō hlɨŋ, i nə̀ kwoo kintaabə bə mbɛɛ nnu i kìɛɛ lə i ta kwoo.

19 Mbɛɛ ju duŋ ə i bii bə mi ləə, “Ə fi lə duŋ nəni ye fi fie lə, Chu baa lo bə bəne yulaha lə? Mbɛɛ yo həmə nnu duŋ ə i nɨhŋ fieŋ ffɨŋ Chu lèki lə yee fi dūŋ lə nyəhə lə?” 20 Mbɛɛ kə yee i bîi nəni kə. Ə mbɛɛ nwɛhɛŋ nnu duŋ ə yee i nōo noonə bə Chu lə? Duŋ ə mbɛɛ mwee fieŋ bu mweenə bə mbiŋ, ə fi fiimə bii bə wu ləə, “Wə mwee mi nəni yulaha lə?” 21 Mbɛɛ nnu i mwèe bikaŋ kənə muŋgeni mmuŋ duŋ ə i jə kimɔ ki mbiŋ kie mwee bieŋ mu chili chili, fidi duŋ ffɨŋ fi kə̀nə nimi linwaa, fidi kə̀nə nimi linya. 22 Ə yəəŋ ye Chu fə̀. I mà kiɛɛ lə i nyii tɔŋ liih llɨŋ li fwèe bə bəne, baa fə lə bəne kələ muŋga mwii. Kwaalə i kwaala tɔŋ bə bəne bbəŋ bə́ mà fə tɔŋ fwee wu ə duŋ bbəŋ bə́ mà duŋ bəmbwo laa bə́ bu laanə. 23 I mà fə nəni bənyii kiŋkuntaŋ kiih kishaŋ kkɨŋ ki dùŋ ki bəne bbəŋ i kwò hlɨŋ ə bə́ bəŋ. Bəne bəhŋ duŋ bbəŋ i mà bwɛɛla kaa ə kaani lə bə́ yá yi kənə kiŋkuntaŋ kie. 24 Ə be bəne bie kibɛɛ bbəŋ i diila, ə kwaa Bəjuu kə. Bəne bbəŋ bə́ dùŋ bie kə duŋ nə Bəjuu duŋ dəŋ həmə. 25 Ə dəŋ fi ffɨŋ Chu yɔ̀ɔ ə kiŋwaati ki mbɛɛ hlɨŋ wi Hoshia mə lə,

“Bəne bbəŋ bə́ mà kə duŋ nə bəne bəŋŋ kə,

nlə n'yee nchēe bə́ lə ‘Bəne bəŋŋ.’

Bbəŋ mmàa ndūŋ bie kə leki,

nchēe bə́ lə ‘Tɔŋ lɨŋŋ.’”

26 “Həmə ə dɔhɔ kie mə kkɨŋ Chu màa i bā kie bən'yɔɔ bə bəne bie lə,

‘Bə dùŋ nə bəne bəŋŋ kə’,

bə́ yáa bə́ chēe ba bə́ lə,

‘Bwɔni bə Chu ŋkee.’”

27 Ejaya mbɛɛ hlɨŋ Chu màa i dē dəŋ gbaaŋ ki bəne Bəishlael, i yɔ̀ɔ lə,

“Maa ye bəne Bəishlael ŋaŋ lə

ye choo yi nɔ mə lə,

bbəŋ bə́ yá fukwoo yá duŋ kwaa chɛɛ.

28 Fi duŋ lə Chu yá yi ja buhla lɛɛ ŋgə

ə mbiŋ mənhliŋ mə cha mi bwo kaa fieŋ finhliŋ bu kaa nə.”

29 Wu Ejaya mà hlaala yɔɔ ba lə,

“Ə màa nakə duŋ nə lə Baba Chu nnu i kə̀nə yo Muŋgeni Munhliŋ

nakə biaa lə bwɔni ə kichəŋ kiaa mə,

ə kkə hə chu dəŋ ye kibalaki ki Shɔdɔŋ,

bə ye ki Gɔmɔla lə.”

Bəne bə Ishlael nɨhŋ je nni bəne kənə bəmbələ mə bənduŋ ntiiŋ ə Chu fwi

30 Ye fi duŋ lə nəni, kkə yɔɔ lə ləhəŋ lə? Duŋ ə kkə yɔɔ lə bəne bbəŋ bə́ dùŋ kə duŋ nə Bəjuu bbəŋ bə́ màa bə́ dūŋ kə joo bənduŋ ntiiŋ ə Chu fwi bie fidiɛɛ ntiiŋ ə Chu fwi yu tɔŋ llɨŋ bə́ yiila le ə wu mə. 31 Kwaalə, bəne Bəishlael bbəŋ bə́ màa bə́ jū bənduŋ ntiiŋ ə Chu fwi bələ je nni bəŋkɨnə kìɛɛ, bə́ mà kə hlaa lə bwo duŋ ntiiŋ ə wu fwi kə. 32 Ə màa yulaha lə? Ə màa yulahalə bə́ mà kə bələ je nni bə́ duŋ lə bə́ yii tɔŋ ə duŋ ə Chu mə kə. Bə́ màa bə́ hlē lə fieŋ ffɨŋ fi fə̀ mbɛɛ dùŋ ntiiŋ ə Chu fwi dùŋ nimi lidi llɨŋ mbɛɛ yo fəə. Bə́ fə nəni hlə daka ə tə llɨŋ bəne dàka ə li bəŋ. 33 Tə lɨhŋ duŋ llɨŋ bə́ bieŋna ki li lə,

“Bə kee ŋəŋ, n'yu nchī tə ə kibalaki ki Jayɔŋ mə,

ə duŋ libwaa llɨŋ li lə yee li fə̄ bəne bɨ̀nə ə li bəŋ.

Ə duŋ libwaa llɨŋ bəne lə yee bə́ gbē ə li bəŋ.

Kwaalə, ə mbɛɛ lə yii tɔŋ ə wu mə, ə i yá nakə kənə gbo wi beenə kə.”