Luŋ 8

Bənduhŋ bələ ye Fiana Wɛɛŋ kìɛɛ lə

Kəə fi fie lə, fidiɛɛ mbɛɛ nnu i yo bəə Jisho Kleto duŋ ə i baa lɛɛ ə ŋgə mə kə, 2 duŋ ə i yá baa bwo lɛɛ kə, yulahalə ŋkɨnə Fiana Chu nnu i nə̀ yo kinduŋh bə bəne bbəŋ bə́ bie bəə Jisho Kleto, i fwoola be ə kwáŋ ŋə ŋkɨnə nnu i dùŋ yo yiwaha bə kpe. 3 Chu fəə ba fieŋ ffɨŋ ŋkɨnə mà kə kənə muŋgeni munfənə kə. Ŋkɨnə mà kə kənə muŋgeni kə, ə fə kifɛɛ ki nyaŋ mbili mbɛɛ ŋkee. Fieŋ ffɨŋ Chu fəə duŋ lə i mà faŋna Ŋiaani, i bwo ye mbɛɛ ŋkee lə nnu i fə̀ yíwaha fo mə lə bwuŋ yiwaha. Ə li ye Chu bwùŋ muŋgeni mu yiwaha yi mbɛɛ ŋkee. 4 I mà fə nəni fo bieŋ biyəəŋ bbɨŋ ŋkɨnə kìɛɛ lə yee bi dūŋ kkə hə fəə bi, be bbəŋ kkə dùŋ bie bələ ye Fiana Chu kìɛɛ lə, ə kə duŋ nə ye nyaŋ mbili kìɛɛ lə kə. 5 Bəne bbəŋ bə́ dùŋ, bə́ bə̀lə ye nyaŋ mbili bə́ kìɛɛ lə, bwò bə́ yìi bufe bubə ə duŋ ə bieŋ bbɨŋ nyaŋ mbili bə́ kìɛɛ go, bbəŋ bə́ dùŋ bie, bə́ bə̀lə ə duŋ ye Fiana Chu kìɛɛ lə, bəmbini bie bəne bwò bə́ yìi bufe bubə ə duŋ ə bieŋ bbɨŋ Fiana Chu kìɛɛ mə. 6 Ə mbɛɛ lə yii bufe bwii ə duŋ ə nyaŋ mbili mə, kəə i yá yi kpe. Kwaalə ə mbɛɛ lə yii bufe bwii ə duŋ ə Fiana Chu mə, kəə i yá yi kənə kinduŋh bə kindunshiiŋ. 7 Ye fi duŋ lə nəni mbɛɛ nnu i yìi bufe ə duŋ ə bieŋ bbɨŋ nyaŋ mbili wi kìɛɛ mə, i lòh bə Chu. Mbini yo mbɛɛ wò lə ə duŋ bə ŋkɨnə Chu kə. Ə duŋ kichɛɛŋ lə duŋ ə yee i wō kə. 8 Mbɛɛ nnu i dùŋ i bə̀lə ye mbili wi kìɛɛ lə, duŋ ə yee i fə̄ fieŋ ffɨŋ fi dùŋ lə Chu yee i wō njənjə wi kə.

9 Kwaalə bə duŋ nə ŋkwo weŋ bəne bbəŋ bə́ dùŋ bə bə̀lə ye nyaŋ mbili kìɛɛ lə kə. Bə bə̀lə ə duŋ ye Fiana kìɛɛ lə, ə duŋ lə Fiana Chu dùŋ ə bəŋ mə. Ə duŋ lə mbɛɛ yo həmə nnu i dùŋ kə kənə Fiana Kleto, kəə i dùŋ nə mbɛɛ Kleto kə. 10 Ə Kleto lə duŋ ə bəŋ mə, maa dəŋ lə go ŋieeŋ yá yi kpe yu yiwaha, bəfiana bieeŋ bie fa yulahalə bə bie ntiiŋ ə Chu fwi. 11 Ə duŋ lə Fiana wi nnu i mà fwoo yo Jisho ə kpe mə yo ə bəŋ mə, kəə wu nnu i mà fwoo yo Jisho Kleto ə kpe mə yá nə dəŋ kinduŋh bə go ŋieeŋ ŋŋəŋ ŋə yá kpe. I yá nə kah ə Fiana wi mə nnu i dùŋ yo ə bəŋ mə.

12 Nəni bəŋgwoŋ bəŋŋ, kkə bie bə fieŋ fi fənə, fieŋ fɨhŋ kə duŋ nə bənduŋ bələ ye mbili ya kìɛɛ lə kə. 13 Ə duŋ lə bə bie bə dūŋ bə bə̀lə ye bəmbili bieeŋ kìɛɛ lə, kəə bə yá yi kpe. Kwaalə ə bə lə tukwaŋ lə Fiana Chu fə lə bə jii fwɔ́ ŋəŋ'waha ŋŋəŋ bəmbili bieeŋ kìɛɛ ŋie, kəə bə yá yi kənə kinduŋh. 14 Bəne bənhliŋ bbəŋ bə́ dùŋ bə bə̀lə ye Fiana Chu kìɛɛ lə, ə bwɔni bə Chu. 15 Chu mà kə nəə bəŋ ə duŋ fiana munfwa nnu mə lə fə ə bə chu dɨŋ yee bə dūŋ ə nɨŋ mə kə. I mà nə bəŋ Fiana nnu i dùŋ lə yee i fə̄lə yee bə dūŋ bwɔni biih. I hlə yee i fə̄ kkə chèe wu lə, “Aba^ª, Tah.” 16 Fiana nu kibɛɛ bə fiana ya bèmi kah lə kkə dùŋ bwɔni bə Chu. 17 Ə duŋ lə kkə dùŋ bwɔni bə Chu, kəə duŋ ə kkə di bishələ, bishələ bɨhŋ duŋ bi Chu. Be bə Kleto lə bumə di bi ə duŋ lə kkə bie kkə wō ŋgə ye Kleto mà wo lə, ə kkə bwo kənə dəŋ kiŋkuntaŋ kkɨŋ ki dùŋ kiih.

Kintɨŋ kkɨŋ ki yá duŋ ki bwɔni bə Chu

18 Ŋkələ kinwaa lə ŋgə nnu kkə wò nu fidiɛɛ, kə bwii lə dududu nnu duŋ ə yee bə́ fɛ̄hiŋ bə kinjənjə kkɨŋ ki yá duŋ kiaa kə. 19 Fieŋ finhliŋ ffɨŋ Chu mà fəə kè ntakə bwɔɔ nnu Chu yá nyii bə bwɔni bbəŋ bə́ dùŋ biih. 20 Fi duŋ lə bieŋ bbɨŋ Chu mà fəə mà jaa chu bieŋ binya. Bi mà kə choo bieŋ binya yu bi mà leka nəni kə. Ə màa ə kinleki ki Chu mə ye i mà hle lə yee bi dūŋ nəni. Kwaalə bi kèe kwaa ə duŋ fwi, bi kə̀lə lə, 21 butuu budi bwe həmə bbuŋ Chu yá yi fwoo bi ə bi fukwoo ə chəŋ munfwa mə nni i dùŋ lə bi binhliŋ kənə bəmbwo fwɔ. I yá fwoo bi nəni, ə yee bi kə̄nə ə duŋ kinwaa ki bwɔni bə Chu. 22 Kkə kələ lə bieŋ binhliŋ bbɨŋ Chu mà fəə bie bi kwīni ə kinlogo mə bwo bwii fidiɛɛ ye kpɛ nnu i gbe lə te.

23 Ə kə duŋ nə kwaa bieŋ bbɨŋ Chu mà fəə bii mboŋ bbɨŋ bi dùŋ ə kinlogo kie mə kə. Be bbəŋ kkə kə̀nə bie Fiana ye kwoo ki fieŋ fi fwii lə ffɨŋ Chu nəə bə be, kkə kwìni dəŋ bulə bulə ye kkə kèlə ntakə lə Chu fə lə yee kkə dūŋ bwɔni biih. Fɨhŋ nini lə kinyah kkɨŋ i yá yah go ŋiaa ŋənhliŋ ə kwáŋ ŋə ŋgə mə. 24 Ə fɨhŋ fieŋ ffɨŋ kkə kèe fwi, kkə kə̀lə lə kkə yá yi kənə fieŋ ffɨŋ Chu mà fwoola be yu fi. Kwaalə fieŋ ffɨŋ mbɛɛ kèe fwi ə fi go lə i yá yi kənə fi, ə dùŋ fi duŋna wu fwi ə fi nakə baa lə duŋ lə ə fieŋ ffɨŋ i kàani i kè fi bu ke nə kə. Ə nyəhə nnu i dùŋ ə yee i bāa i kèe fwi bə fieŋ fidi bəmbwo kənə ə duŋ fi hə duŋna wu fwi lə? 25 Kwaalə ə yee kkə kēe fwi ə fieŋ go, kkə kə̀lə lə kkə yá yi bwo kənə ə duŋ kkə kə ŋəŋ nə dəŋ maa ə fi go kə, ə kkə kwaa tɔ́ŋ yee kkə kē.

26 Fiana Wɛɛŋ dəŋ hlə yee i chɨ̄nə be ə biaŋnə kiaa mə, ye kkə dùŋ lə kə kələ bənchee Chu, ye kkə dùŋ lə bənchee. Fiana yo kibɛɛ kɔ̀nɔ Chu yu be bəne bə Chu. I kɔ̀nɔ wu ə jé yyɨŋ duŋ ə mbɛɛ ŋkee nakə yɔɔ lə kə. 27 Chu nnu i bà yo bənfwiilə tɔ́ŋ ŋə bəne, i bà bəŋkələ kinhle ki Fiana Wɛɛŋ, yulahalə Fiana bwo yee i bā bəŋkɔnɔ Chu ki bəne bbəŋ bə́ dùŋ bə Chu, ə jé yyɨŋ Chu lèki mə.

28 Kkə kələ lə Chu nɨ̀ŋ ə bieŋ binhliŋ mə. I fə̀ bi, bi gə̀ŋ ə jé yinwaa mə bə bəne bbəŋ bə́ lèki wu, bbəŋ i diila bələ fieŋ ffɨŋ i kìɛɛ yu bə́. 29 Bəne bbəŋ Chu mà kəla kaa ə kaani, duŋ i mà bwɛɛla chi chili lə bə́ yá yi gaanə chu ye Ŋiaani lə, fo Ŋiaani nu lə yee i dūŋ ŋkafwi ə bəmaani mə, bə́ duŋ kiŋaaŋkə. 30 Bəne bbəŋ i mà bwɛɛla bie chi chili nəni, i hlə bwo dii bə́. Bəne bbəŋ i mà dii bie, duŋ i mà jəə lə bə́ lə bə́ gbenə kə. Bəmbini bəhŋ bbəŋ i mà jə bie lə bə́ lə bə́ gbenə kə, duŋ i mà fəə lə bə́ lɛɛ ə kiŋkuntaŋ kiih mə.

Mbɛɛ nnu i duŋ ə i baa fə be fieŋ fidi lə nyəhə lə?

31 Ye bieŋ bɨhŋ kiɛkiɛ duŋ lə nəni, ə duŋ ə kkə baa yɔɔ lə ləhəŋ lə? Ye Chu yo lə ba ə wɛɛ waa mə, mbɛɛ nnu i dùŋ ə i baa fə be fieŋ fidi duŋ nyəhə lə? 32 Ə wu Chu nnu i mà duŋ kə gee díi bə Ŋiaani, kwaalə i nə wu, i kpe yu be bənhliŋ, kəə duŋ ə i nakə nəə be bieŋ binhliŋ kəənə bəŋ lə? 33 Ə nyəhə mu nnu duŋ ə yee i bāa i kìɛɛ nhlaa bə bəne bbəŋ Chu mà shaala lə? Chu duŋ nnu i jə̀ yo bəne lə bə́ hləŋkə bə gbenə kə. 34 Mbɛɛ yo mu nnu duŋ ə i baa yii be ə ŋgə mə lə? Kleto Jisho mà kpee, i fu ə kpe mə, bwo fidiɛɛ yee i dūŋ ə kwaŋ wi Chu wi diee mə, i kɔ̀nɔ Chu yu be. 35 Mbɛɛ nnu i dùŋ ə i baa ga be bə Kleto, lə i kə baa lə yee i lēki be lə nyəhə lə? Duŋ ŋgə, ləkə kinlogo, ləkə wuh ŋŋəŋ bəne hlɔ̀ɔ ə be dɨŋ, ləkə jəbulə, ləkə kindende, ləkə gbo wiŋwinə, ləkə kpe, duŋ ə bi ga be lə? 36 Fi duŋ kwaa ye bə́ bieŋna, bəne bədi yɔ̀ɔ bə Chu lə,

“Kkə dùŋ ə kpe jə joo ŋənhliŋ yu wə.

Bəne ŋə̀ŋ be lə kkə dùŋ ye shɔ́ŋ yyɨŋ bə lə gəŋ nyieŋ ə nyieŋ mə.”

37 Ə lə kə dududu, ə bieŋ bɨhŋ mə binhliŋ, kkə dùŋ bəne bbəŋ kkə kɨ̀ŋ ə ŋkɨŋ mə ə je muŋgeni mu Kleto mə nnu i lèki yo be. 38 Ŋkələ wɛɛŋ lə, kpe ləkə kinduŋh, ləkə dɨŋ bənchinda biɛhɛŋ, ləkə bəfiana bbəŋ bə́ hlàah, ləkə bieŋ bi fidiɛɛ, ləkə bbɨŋ bi yá bwo duŋ, ləkə bieŋ bbɨŋ bi kə̀nə múŋga, 39 ləkə bbɨŋ bi dùŋ ə buh, ləkə bbɨŋ bi dùŋ ə ke, ləkə maa ə duŋ filaha ə kimɔ ki bieŋ binhliŋ mə bbɨŋ Chu mà fə, ə duŋ nnu fidi ə bi mə hləŋ ffɨŋ duŋ ə fi ga be bə kinleki ki Chu kkɨŋ i kə̀nə ə be mə yu Kleto Jisho Baba ya kə.