Luŋ 7

Ŋkɨnə kənə muŋgeni ə mbɛɛ bəŋ kwaa bwɔɔ nnu i kaani ŋkee

Bəŋgwoŋ bəŋŋ, ŋkiɛɛ lə n'yɔɔ fɨhŋ bə bəŋ ye bəne bbəŋ bə́ kə̀lə ŋkɨnə. Bə kə kələ lə ŋkɨnə kənə muŋgeni ə mbɛɛ bəŋ bwɔɔ nnu i kàani fa lə? 2 Kkə jə kinyii ə biah go. Ŋkɨnə bwò i kwàa kpɛ ə nyimi go kwaa bwɔɔ nnu nyimi kaani fa. Kwaalə ə nyimi lə kpe, kəə kpɛ yo fwoo ə ŋkɨnə nnu i mà buhuŋ yo wu bəə nyimi. 3 Nəni ə mə lə gəŋ jə nyo ju nyimi kaani fa, ə bə́ hlə chee wu lə kpɛ kiwaali. Kwaalə ə nyimi lə duŋ duŋ kpe, kəə kpɛ yo fwoo ə ŋkɨnə yo mə. Ə mə lə gəŋ bah nyo ju, ə i baa duŋ kpɛ kiwaali kə.

4 Ə lə yəəŋ dəŋ bəŋgwoŋ ye bə kpe bwo bə́ ga gbo bə bəŋkɨnə, kàh ə gbo wi Kleto mə nnu bə́ mà bweeni yo ə kiŋgwa go. Bə kpee nəni fo bə lə yee bə dūŋ bəne bə mbɛɛ ju chili. Mbɛɛ yo lə nnu bə́ mà fwoo yo ə kpe mə, fo kkə lə yee kkə dūŋh, kkə fə̀ ə duŋ bieŋ bbɨŋ bi nwaa Chu. 5 Bwɔɔ nnu kkə mà kaani kkə dùhŋ bələ ye go ŋiaa kìɛɛ lə, bəŋkɨnə màa bə́ bā bəŋɛhiŋ go ŋiaa ŋŋəŋ ŋə fwì bənfə yiwaha, ŋə fə̀ kkə nɨ̀ŋ bieŋ bbɨŋ bi bwò ə duŋ bə kpe ə be go. 6 Kwaalə, fidiɛɛ kkə fwoo ə bəŋkɨnə mə kpe gah gbo bə bəŋkɨnə bbəŋ bə́ màa bə́ kwāa be. Kkə fwoo fo kkə lə yee kkə nɨ̄ŋ ə kinduŋh kifwɔ mə kkɨŋ ki dùŋ ki Fiana Wɛɛŋ, ə kə baa lə duŋ ə jé yí bəŋkɨnə bəko bbəŋ bə́ mà bieŋna kə.

Ŋkɨnə fə̀ kkə kə̀lə bieŋ biwaha

7 Duŋ ə kkə yɔɔ lə laha ki ŋkɨnə lə? Fi duŋ lə ŋkɨnə duŋ fieŋ fiwaha lə? Ə lə kə! Ə màa nakə duŋ nə yu bəŋkɨnə, ə nhə nakə kələ fieŋ fiwaha kə. Ŋkɨnə hə nakə yɔɔlə lə, “Mbɛɛ kə gee díi bə fieŋ fi mbɛɛ ju kə,” Ə nhə nakə kələ lə ŋge díi lə fieŋ fiwaha kə. 8 Nəni yiwaha hlə nimi kah ə ŋkɨnə kwe nɛhiŋ díi ŋəŋge ə mi bəŋ ə jé mə chili chili. Ə ŋkɨnə hə nakə duŋ nə, ə yiwaha hə nakə kənə muŋgeni kə. 9 Mmàa nhlaa ndùŋ, ə duŋ ŋkɨnə kaani kə bwoo. Kwaalə, ə chu lə ŋkɨnə bwo, yiwaha jaka, nhlə ŋkpe. 10 Bəŋkɨnə bie kibɛɛ bbəŋ bə́ mà duŋ lə bə́ bwo bə kinduŋh, bə́ kaka bwo ə duŋ bə kpe ə mi go. 11 Fi duŋ lə, yiwaha hlə kənə je ə bəŋkɨnə bəhŋ bəŋ fihi mi, yi nimi bə́ kwe hlə jii mi. 12 Nəni bəŋkɨnə duŋ fieŋ fi wɛɛŋ, fieŋ ffɨŋ bəŋkɨnə yɔ̀ɔ duŋ fieŋ fi wɛɛŋ, fi dùŋ yəəŋ, fi dùŋ dəŋ finwaa. 13 Fɨhŋ duŋ fidiɛɛ lə fieŋ finwaa mà kaka bwo chuu ə duŋ bə kpe ə mi go lə? Ə lə kə! Ə màa yiwaha yyɨŋ yi mà nimi ə fieŋ finwaa dɨŋ bwo bə kpe ə mi go, fo kkə lə ŋəŋ lə yiwaha lə yiwaha, fi nyìee ə duŋ ə fieŋ ffɨŋ bəŋkɨnə yɔ̀ɔ fie lə yiwaha bee ba gbaaŋ.

Nyɨmə ə mbɛɛ go

14 Kkə kələ lə bəŋkɨnə lə fieŋ ffɨŋ fi fù ə Chu mə. Kwaalə ndùŋ ŋkwo ŋgwəŋ mbɛɛ ŋkee, ŋkə̀nə nyaŋ go, bə́ taala mi ye nfwa yiwaha lə. 15 Nfə̀ lə fieŋ ŋkə̀lə fieŋ ffɨŋ nfə̀ fie kə, yulahalə fieŋ ffɨŋ ŋkìɛɛ lə nfə ə fi ffɨŋ nfə̀ kə. Ŋkaka ja fə ə duŋ fieŋ ffɨŋ nlòh fie bə fi. 16 Mbwò nja fə fieŋ ə duŋ kə duŋ nə ffɨŋ ŋkìɛɛ fie kə, ə chu duŋ lə mbemi kah bə kichɛɛŋ lə ŋkɨnə lə fieŋ finwaa. 17 Ye fi fie lə nəni, kəə ə kichɛɛŋ lə ə baa duŋ mi nnu nfə̀ fieŋ fie kə. Ə yiwaha yyɨŋ yi dùŋ ye ə mi mə yyɨŋ yi fə̀ fi. 18 Ŋkələ lə fieŋ finwaa duŋ nə ə mi mə kə. Fi duŋ dəŋ lə, fieŋ finwaa duŋ nə ə ŋgɔŋ məŋŋ mə kə. Ndùŋ duŋ ŋkənə hlɔɔ bənfə fieŋ finwaa, kwaalə ŋkə ŋkaa lə mu bənfə fi kə. 19 Fieŋ finwaa ffɨŋ ŋkìɛɛ lə nfə, ə fi ffɨŋ nfə̀ kə. Fieŋ fiwaha ffɨŋ ŋkə ŋkiɛɛ lə fie lə nfə kə, ə fi ffɨŋ nlə bu kaka fə fi. 20 Ye njàlə nfə fieŋ ə duŋ ffɨŋ ŋkə ŋkiɛɛ lə fie kə, kəə ə baa duŋ mi nnu nfə̀ fieŋ fie kə. Ə fə yiwaha yyɨŋ yi dùŋ ye ə mi mə.

21 Ye fi fie lə nəni, ŋŋəŋna lə ə ŋkɨnə ba lə bwɔɔ nnu ŋkìɛɛ lə nfə fieŋ finwaa, fi chəkə bənfə duŋ fiwaha. 22 Ə tɔŋ lɨŋŋ mə, ŋ'wò njənjə bə ŋkɨnə Chu gbaaŋ. 23 Kwaalə nduŋ duŋ ŋŋəŋ lə ŋkɨnə ju yo ə mi mə. Mbini yo ŋkɨnə tɨmə ntɨmə bə nnu i dùŋ yo ə kinhle kɨŋŋ mə, i fə̀ nchù nfwa ŋkɨnə yiwaha nnu i dùŋ yo ə mi mə. 24 Fiŋkpi ye mi lə! Ə nyəhə nnu i dùŋ ə i fwoo mi ə nyaŋ ni go nni i bwò ye bə kpe lə? 25 Kimbaafɛɛ ki Chu nnu i dùŋ yo ə i chɨnə mi kah ə Jisho Kleto Baba ya mə!

Ye fi duŋ lə nəni, ndùŋ fidiɛɛ nfwa bəŋkɨnə bə Chu ə kinhle kɨŋŋ mə. Kwaalə ndùŋ nfwa bəŋkɨnə bəwaha ə nyaŋ nni mi go mə.