Luŋ 6

Mbɛɛ nnu i buhaŋ ba bə Kleto duŋ i kpee ga gbo bə yiwaha

Ye fi fie lə nəni, duŋ ə kkə yɔɔ lə ləhəŋ lə? Fidiɛɛ duŋ lə kkə ba yee kkə fə̄ yíwaha kkə gə̀ŋ fwi fwi fo kinleki ki Chu bə bəne lə yee ki ŋāŋ ki gə̀ŋ dəŋ fwi fwi lə? 2 Duŋ ə yee fi dūŋ lə kə! Ə duŋ ə kkə kpe ga gbo bə yíwaha baa jaa ləhəŋ hlə yee kkə dūŋ ə yíwaha ye mə lə? 3 Bə kə kələ lə be bənhliŋ bbəŋ bə́ mà yii bie be ə njɔ buhuŋ bə Jisho Kleto, duŋ bə́ mà yii nəni buhuŋ be bə kpe yi lə? 4 Bə́ mà yii be ə njɔ nəni fi hlə yee fi dūŋ lə bə́ buhaŋ ba be bə wu ə kpe yi mə diih, fo ye Kleto mà fulə ə kpe mə ə muŋga mu Tili muŋkuntaŋ mə, ə kkə hlə yee kkə dūŋ ə kinduŋh kifwɔ mə.

5 Yee fi dûŋ lə yulahalə ə kkə duŋ mbuhuŋ bə Kleto ə kpe nni i duŋ yi mə, kəə naamənə hləŋkə lə kkə yá yi bumə dəŋ ə kinfu ki kpe nni i dùŋ yi mə kə. 6 Kkə kələ lə go ŋiaa ŋŋəŋ ŋə dùŋ fwɔ wiko duŋ wwuŋ bə́ bweeni ə kiŋgwa go bə Kleto, fo bə́ lə gɔhɔ laa gbo wwuŋ wi dùŋ we wi yiwaha, lə dùŋ ə kkə baa yee kkə dūŋ bənfwa ə kwáŋ ŋə yiwaha mə kə, 7 yulahalə mbɛɛ bwo ə mə kpe, kəə i fwoo ə yiwaha kwáŋ. 8 Ye kkə kpe lə bə Kleto, kəə kkə bema lə kkə lə yee kkə dūŋh dəŋ bə wu, 9 yulahalə kkə kə̀lə lə ye Chu mà fwoolə Kleto ə kpe mə, duŋ dəŋ ə Kleto baa bwo kpe kə. Kpe baalə kənə muŋga ə wu bəŋ kə. 10 Kpe nni i mà kpe ye, i mà kpee ga gbo bə yíwaha cha mi fi ka nəni. Kinduhŋ kkɨŋ i kə̀nə kie fidiɛɛ duŋ kwaa kkɨŋ ki dùŋ bə Chu. 11 Nəni bəŋ dəŋ kənə bəŋəŋ dəŋ bə go ŋieeŋ lə bə kpee ga gbo bə yíwaha, bə duŋ fidiɛɛ bə bə̀lə ye Chu kìɛɛ lə, ye bə bie lə mbuhuŋ bə Jisho Kleto.

12 Nəni bə kə baa lə bemi lə yiwaha yee yi kə̄nə muŋgeni ə go ŋieeŋ bəŋ bənfə lə yee bə kə̄nə doo bənfə fieŋ ffɨŋ ŋgɔŋ mieeŋ kìɛɛ lə yee bə fə̄ kə. 13 Bə kə nəə go ŋieeŋ je lə yee yiwaha jə̂ bikəllə ə go ŋieeŋ go ye bieŋ biih bi nimi bənfə bieŋ biwaha mu kə. Bə́ nə go ŋieeŋ ə duŋ bə Chu ye bəne bbəŋ bə́ fwoola ba bə́ ə kpe kwáŋ nə bə́ kinduŋh. Bə́ nə dəŋ bikəllə bieeŋ bə Chu ye bieŋ biih bi nimi bənfə bieŋ bintiiŋ mu. 14 Yiwaha kə duŋ nə bə mbaa kənə dəŋ muŋga ə bəŋ bəŋ kə, yulahalə bə dùŋ nə ə bəŋkɨnə kwe kə. Bə dùŋ ə duŋ ə kinleki ki Chu dɨŋ.

Mbɛɛ nnu i buhaŋ bə Kleto duŋ nfwa ə fwɔ wintiiŋ mə

15 Ye fi fie lə nəni, ə duŋ ə kkə yɔɔ lə ləhəŋ lə? Yee kkə fə̂ ə duŋ yíwaha fidiɛɛ yulahalə kkə duŋ nə ə bəŋkɨnə kwe, kkə dùŋ ə duŋ ə kinleki ki Chu mə lə? Ə lə kə! 16 Bə kə kələ lə ə mbɛɛ ju lə nə gbo wiih lə yee i wō bə mbɛɛ ju ye nfwa lə, kəə duŋ ə yee i dūŋ kwaa nfwa mbɛɛ nnu i wò yo bə wu lə? Ə mbɛɛ lə nə gbo wiih ə duŋ bə yiwaha, kəə i dùŋ nfwa yiwaha. Ə yi bwo ə duŋ bə kpe. Ə mbɛɛ lə nə gbo wiih lə yee i wō bə Chu, ə yee fi dūŋ lə, i dùŋ ə duŋ nfwa Chu. Ə fi fə ə yee i kə̄nə ə duŋ fwɔ wintiiŋ. 17 Kwaalə, kimbaafɛɛ dùŋ bə Chu yulahalə fwii fwii bə mà hlaa duŋ bənfwa bə yiwaha, fidiɛɛ bə bema bə tɔ́ŋ ŋieeŋ ŋənhliŋ bə fieŋ ffɨŋ kinlaanə kkɨŋ bə́ mà nə bə bəŋ nyìi lə. 18 Bə dùŋ bə́ fwoola bəŋ ə yiwaha kwáŋ, bə choo bənfwa bə fwɔ wintiiŋ. 19 N'yɔ̄ɔ fɨhŋ ye mbɛɛ ŋkee lə, yulahalə bəŋ bəne bəŋkee kə̀lə lə bieŋ gəŋ fwi kə. Yee bə kə̂lə lə ə mà duŋ fwii bə màa bə nə̄ bikəllə bi go ŋieeŋ bə bieŋ bi yili bə yíwaha chili chili ye bənfwa lə. Yee bə nə̂ ba go ŋieeŋ fidiɛɛ ə duŋ bə bieŋ bintiiŋ bənduŋ bəne bənchaa. 20 Bwɔɔ nnu bə mà duŋ bənfwa bə yiwaha, fwɔ wintiiŋ mà kə kənə fieŋ bənfə bə bəŋ kə. 21 Ye bə mà duŋ lə nəni, mbɨŋ nnu bə mà kənə ə bieŋ bɨhŋ mə bbɨŋ gbo bee bəŋ ə mbee mə fidiɛɛ duŋ laha lə? Bieŋ bie binhliŋ kpee kwaa ə duŋ bə kpe. 22 Kwaalə fidiɛɛ ye fi fie lə lə bə́ fwoola bəŋ ə kwáŋ ŋə yiwaha mə bə chu duŋ bənfwa bə Chu, duŋ lə mbɨŋ nu mu duŋ lə, bə bie bə chū ə duŋ bəne bə wɛɛŋ. Kihəŋgbɔŋ ki mu duŋ kinduŋh ki kə kaa. 23 Yee bə kə̂lə lə bikoonə bi yiwaha lə kpe, kwaalə kinduŋh ki kə kaa lə nnə llɨŋ Chu nə̀ nya bə bəne bbəŋ bə́ buma bə Jisho Kleto nnu i dùŋ yo Baba ya.