Luŋ 5

Kinjənjə kkɨŋ kkə kə̀nə yulahalə Chu mà jəə lə kkə lə bə gbenə kə

Fidiɛɛ ye Chu jə lə be lə kkə hləŋ kə bə gbenə, yu tɔŋ llɨŋ kkə yiila le ə wu mə, kkə hlə yee kkə dūŋ ə kindunshiiŋ mə bə wu yu fieŋ ffɨŋ Baba ya Jisho Kleto fəə. 2 Ə fə wu kkə hlə kənə je bənlɛɛ ə kinleki ki Chu kkɨŋ kkə dùŋ kɨhŋ ə ki mə fidiɛɛ, yu tɔŋ llɨŋ kkə yiila le ə wu mə. Kkə hlə yee kkə wō kinjənjə ye kkə kèelə fwi, kkə kə̀lə lə kkə yá yi kənə ə kiŋkuntaŋ ki Chu go. 3 Ə kwaa lə nəni kə, kkə wò kinjənjə dəŋ ə bəŋgə biaa mə bbəŋ kkə ŋə̀ŋ, yulahalə kkə kə̀lə lə bəŋgə fə̀ mbɛɛ i kə̀lə bəŋkwaa tɔŋ. 4 Tɔŋ li kwaanə bwò li fə̀ Chu dòhi mbɛɛ lə i wuna. Ə Chu dohi mbɛɛ lə i wuna, ə mbɛɛ yo yee i kēe kwaa ə duŋ fwi ə fieŋ go, i kə̀lə lə i yá yi bwo kənə fi. 5 Fieŋ ffɨŋ kkə kèe fwi ə fi go duŋ ə fi nakə kaah kwe kə, yulahalə Chu ŋòŋ kinleki kiih gbaaŋ ə tɔ́ŋ ŋiaa mə, kah ə Fiana Wɛɛŋ mə nnu i nəə bə be. 6 Fɨhŋ duŋ lə, bwɔɔ nnu kkə mà kaani kkə dùŋ nnu duŋ ə kkə nakə chɨnə go ŋiaa, Kleto mà bwoo ə bwɔɔ bəŋ yəəŋ, kpe yu be bəne bbəŋ bə́ dùŋ kə kələ Chu kə. 7 Ə chɛɛŋ lə fi duŋ ntakə bə mbɛɛ bəŋkpe yu mbɛɛ ju nnu i dùŋ kə kənə gbenə, ə duŋ ə mbɛɛ ju dəŋ mɔŋ ba bəŋkpe yu mbɛɛ nwaa ju kə. 8 Kwaalə, Chu mà nyii kinleki kiih bə be ə je nni i dùŋ ye lə, ə mà duŋ bwɔɔ nnu kkə mà kaani bəne bəwaha, Kleto kpe yu be. 9 Fidiɛɛ ə bwɔɔ nu bəŋ, ŋgɔŋ miih fəə Chu jəə be lə kkə hləŋ kə bə gbenə, kəə i yá yi gəŋ fwi bənfwoo be ə tɔŋ li Chu mə llɨŋ li fwèe bə bəne. 10 Fɨhŋ duŋ lə, ə mà duŋ bwɔɔ nnu kkə mà kaani yo bəne bbəŋ bə́ dùŋ kə diee jənə bə Chu, kpe Ŋiaani lɛhiŋ be bə Chu, kəə duŋ ə i gəŋ fwi fidiɛɛ fwoo be bə kinduŋh kiih ye i mà lɛhiŋ lə be bə Chu. 11 Ə kwaa yu fɨhŋ fi kkə wò kinjənjə yu fi kə. Kkə wò kinjənjə dəŋ bə Chu yu Baba ya Jisho Kleto nnu i lɛhaŋ yo be bə Chu.

Fieŋ ffɨŋ Adaŋ mà bwo bə fi maa ffɨŋ Kleto mà bwo bə fi

12 Ye yiwaha mà kah'lə ə mbɛɛ mwi go bwo yaŋ kwe, kpe kah ə yiwaha go bwo, kpe hlaamə nəni gəŋ ə mbɛɛ mənhliŋ go, yulahalə mbɛɛ mənhliŋ mà fəə yiwaha. 13 Chu mà chu bwo nə ŋkɨnə yiwaha mà duŋna ə mbiŋ nte. Kwaalə ə bəŋkɨnə nakə duŋ nə kə, ə bə́ nakə yee bə́ gɔ̄ɔ bigaa bi yíwaha yyɨŋ bəne fə̀ kə. 14 Gbe jə ə bwɔɔ Adaŋ bəŋ bwo bwii ə bwɔɔ Mushe bəŋ mà duŋ kpe kənə muŋgeni ə bəne bəŋ bənhliŋ, maa bə bbəŋ bə́ fə̀ yíwaha maa bbəŋ bə́ dùŋ kə fəə dəŋ ye Adaŋ nnu i mà bwuŋ yo ə duŋ ŋkɨnə kə. Adaŋ mà duŋ ə je ji mə ye Kleto mà duŋ lə bəmbwo bwo. 15 Kwaalə nnə llɨŋ Chu nəə le bə bəne nya duŋ nə ye yiwaha yyɨŋ Adaŋ mà fə ye kə. Ə duŋ lə bəne kiŋaaŋkə mà kpee yu yiwaha yi mbɛɛ mwi, kəə ə chɛɛŋ lə tɔŋ linwaa li Chu maa nnə liih llɨŋ li mà bwoo yu tɔŋ linwaa li mbɛɛ mwi ə duŋ Jisho Kleto, li yá bwo ə bəne go kiŋaaŋkə, ŋaŋ kah bu kahnə. 16 Fieŋ ffɨŋ nnə li Chu llɨŋ Chu mà nə le nya mà kə duŋ nə yəəŋ ye yíwaha yyɨŋ mbɛɛ mwi yo mà bwo bə yí kə. Yiwaha yi mbɛɛ mwi bwoo ə duŋ bə nhlaa ə bəne bənhliŋ bəŋ hlə yii bə́ ə ŋgə mə. Kwaalə nnə li Chu lɨhŋ mà bwo ə yíwaha yí bəne kiŋaaŋkə dɨŋ, li fə̀ Chu jə̀ bə́ lə bə́ lə bə́ gbenə kə. 17 Ə duŋ lə yiwaha yi mbɛɛ mwi mà fəə kpe yee i kə̄nə muŋgeni ə mbɛɛ mənhliŋ bəŋ yu mbɛɛ mwi yo, kəə bəne bbəŋ bə́ tɨŋna jə kinleki kiŋkuntaŋ ki Chu, maa nnə llɨŋ li dùŋ kinjə kkɨŋ Chu jəə chuu bəne nya lə bə́ duŋ ntiiŋ, bə́ yá kənə kinduŋh gbaaŋ yu mbɛɛ mwi nnu i dùŋ yo Jisho Kleto. 18 Nəni, ye yiwaha yi mbɛɛ mwi mà bwolə bə ŋgə ə bəne bənhliŋ bəŋ, ə lə yəəŋ dəŋ ye fwɔ wi mbɛɛ mwi wintiiŋ fəə Chu jə̀ bəne lə bə́ hləŋkə bə gbenə kə, ə bə́ bənhliŋ kənə kinduŋh. 19 Fi duŋ lə, ye mbɛɛ mwi mà ta lə kwoo bə Chu, fɨhŋ fə bəne kiŋaaŋkə yee bə́ dūŋ bəne bəwaha, ə duŋ dəŋ ye mbɛɛ mwi mà wolə bə Chu, fi fə Chu jə bəne kiŋaaŋkə lə bə́ duŋ ntiiŋ ə wu fwi. 20 Chu mà nə bəŋkɨnə bənfə lə fo yíwaha lə ŋaŋ. Kwaalə ye yíwaha ŋàŋ lə, ə lə dəŋ ye kinleki ki Chu kkɨŋ ki dùŋ tɔŋ linwaa bə bəne yee ki ŋāŋ ki gə̀ŋ fwi fwi. 21 Yee fi dûŋ lə fo ye yiwaha kə̀nə lə muŋgeni ə bəne bəŋ bə́ kpè ə ŋkpe mə, ə lə dəŋ ye kinleki ki Chu kə̀nə li muŋgeni ə bəne bəŋ, bə kàh ə kinjə kkɨŋ Chu jə kie bəne lə bə́ dùŋ ntiiŋ ə wu fwi bəmbwo nə bə́ kinduŋh ki kə kaa yu Jisho Kleto Baba ya.