Luŋ 4

Ablahaŋ duŋ kinfɛhiŋ ki mbɛɛ nnu Chu jə̀ lə mə gbenə hləŋ

Duŋ ə kkə yɔɔ lə Ablahaŋ che kichəŋ kiaa mà ŋəŋna lə ləhəŋ ki diɛɛnə kie lə? 2 Ə duŋ lə Chu mà jəə Ablahaŋ lə mə gbenə hləŋ kə, ə duŋ yu nimi linwaa llɨŋ i mà fə, kəə duŋ ə yee i tūu kɔŋ yu fi. Kwaalə, i kə kənə fieŋ dududu ffɨŋ duŋ ə yee i tūu kɔŋ ə Chu fwi kə, 3 yu Kiŋwaati ki Chu yɔ̀ɔ lə,

“Ablahaŋ mà yiila tɔŋ ə Chu mə,

Chu hlə jə wu lə i duŋ mbɛɛ ntiiŋ.”

4 Mbɛɛ nnu i nɨ̀ŋ bə́ hlùŋ wu, bwɔɔ nnu i nɨ̀ŋ bə́ hlùŋ wu, ə bə́ nakə jəə lə bikoonə biih duŋ kwaa ye nnə llɨŋ bə́ nə wu kə. Ə bə́ jə lə ə bikoonə biih bbɨŋ i kə̀nə bəŋkənə. 5 Kwaalə, ə mbɛɛ duŋ nnu i kə nɨŋ nə fieŋ, i yìi ə duŋ tɔŋ ə Chu nnu i jə̀ yo bəne bbəŋ bə́ dùŋ bəwaha lə bə́ lə bə gbenə ə wu fwi kə, kəə Chu jəə mbɛɛ yo lə i dùŋ ntiiŋ ə wu fwi yu tɔŋ llɨŋ i yiila le ə wu mə. 6 Daafi dəŋ mà yɔɔla lə, kintɨŋ kiŋkuntaŋ duŋ ki bəne bbəŋ Chu jəə lə bə́ duŋ ntiiŋ ə wu dí ə kə duŋ nə yu nimi llɨŋ bə́ nɨŋna kə. 7 I mà yɔɔla lə,

“Kintɨŋ kiŋkuntaŋ dùŋ bə bəne bbəŋ Chu laama nə ba gbenə kibə,

kəə yíwaha yibə.

8 Kintɨŋ kiŋkuntaŋ dùŋ bə mbɛɛ nnu Chu duŋ kə baa lə

gɔɔ gaa kiih ki yiwaha kə.”

9 Ye fi duŋ lə nəni, kəə kintɨŋ kiŋkuntaŋ kɨhŋ duŋ kwaa bə bəne bbəŋ bə́ nyieŋna bə́ jó lə? Lii ki duŋ dəŋ bə bbəŋ bə́ kaani jó kə nyieŋ nə lə? Kkə hə yɔɔla lə, “Tɔŋ llɨŋ Ablahaŋ mà yii le ə Chu mə mà fəə Chu jə wu lə i dùŋ mbɛɛ ntiiŋ.” 10 Chu mà jə Ablahaŋ lə i duŋ mbɛɛ ntiiŋ ə duŋ bwɔɔ nwɛhɛŋ lə? Ə mà duŋ bə́ hə nyieŋna wu jo, lii i kaani kpaa kintuulə lə? Ə mà duŋ i kaani kpaa kintuulə. Bə́ mà kə nyieŋ nə wu jo kə. 11 Bə́ mà nyieŋ wu jo ye kinyii bənyii lə i duŋna mbɛɛ ntiiŋ, yu tɔŋ llɨŋ i mà yii le ə Chu mə bwɔɔ nnu i mà kaani kpaa kintuulə. Nəni Ablahaŋ hlə duŋ che bəne bənhliŋ bbəŋ bə́ yiila tɔ́ŋ ə Chu mə bə́ kaani kə nyieŋ nə bə́ kə, fo Chu lə jə dəŋ bə́ lə bə́ duŋ bəne bə ntiiŋ ə wu fwi. 12 I duŋ dəŋ che bəne bbəŋ bə́ nyieŋna bə́ jó, ə kə duŋ nə lə bə́ nyieŋna bə́ jó. Ə yu bə́ jəə wuh ŋiih ə tɔŋ llɨŋ i mà yii le ə Chu mə bə́ hlə nyieŋ wu jo.

Ablahaŋ mà kənə fieŋ ffɨŋ Chu mà kaachi ə duŋ yu tɔŋ llɨŋ i mà yii le ə Chu mə

13 Ŋkaachi nnu Chu mà kaachi Ablahaŋ lə wu bə bwɔni biih yá yi di kiŋkaa ki mbiŋ nu mà kə duŋ nə yu Ablahaŋ màa i chī bəŋkɨnə kə. Ə màa yu tɔŋ llɨŋ i mà yii le ə Chu mə, Chu hlə jə wu lə i duŋ ntiiŋ ə wu fwi. 14 Ə màa duŋ lə bəne bbəŋ bə́ yá kənə fieŋ ffɨŋ Chu mà kaachi duŋ kwaa bəne bbəŋ bə́ fə̀ ye bəŋkɨnə kìɛɛ lə, kəə tɔ́ŋ ŋən'yiinə ə Chu mə kənə lə mbɨŋ kə, ə ŋkaachi nnu Chu mà kaachi yo duŋ dəŋ nya. 15 Fieŋ ffɨŋ fi dùŋ, duŋ lə bəŋkɨnə ba bənfə tɔŋ fwèe Chu bə bəne, yulahalə ə ŋkɨnə lə nakə duŋ nə, ə fieŋ fidi nakə duŋ nə lə mbɛɛ bwuŋna ŋkɨnə kə. 16 Fi hlə yee fi dūŋ lə, ŋkaachi nu bə̀lə ə duŋ tɔŋ llɨŋ i mà yii le ə Chu mə fo ə lə duŋ tɔŋ linwaa llɨŋ Chu nyiila wu, ə fieŋ ffɨŋ i mà kaachi fie kənə bənduŋ ə kichəŋ kiih mə kinhliŋ, ə kə duŋ nə bə bəne bbəŋ bə́ lèmi ə bəŋkɨnə bəŋ kwaa kə. Ə bə bəne bbəŋ bə́ yiila dəŋ tɔŋ ə Chu mə yəəŋ ye Ablahaŋ mà yii lə, yulahalə Ablahaŋ mà duŋ tah ya be bənhliŋ bbəŋ kkə dùŋ bie bəne bə Chu. 17 Fɨhŋ nini duŋ ye bə́ mà bieŋ Chu yɔ̄ɔ bə Ablahaŋ lə,

“Nfəə lə yee wə dūŋ che bitɨŋ kiŋaaŋkə.”

I duŋ tah ya ə Chu fwi. Ə duŋ Chu nnu Ablahaŋ mà yii tɔŋ ə wu mə. Ə wu nnu i fə̀ bəne bbəŋ bə́ kpee bə́ fìimə bə́ chù. Ə baa duŋ dəŋ wu nnu i fə̀ bieŋ bbɨŋ bi mà kə hlaa lə duŋ yee bi dūŋ. 18 Ablahaŋ màa i kēe kwaa fwi, i kə̀lə lə i yá yi kənə fieŋ ffɨŋ Chu mà kaachi, maa ye i mà duŋ lə ba nnu duŋ ə i nakə baa lə kee fwi ki fieŋ kə. Kwaalə, i yii kwaa tɔŋ ə Chu mə hlə ja bwo yee i dūŋ, “Che bitɨŋ kiŋaaŋkə,” dəŋ ye Chu mà kaalə chi bə wu lə,

“Bəne bwo yá yi duŋ nəni gbɛɛɛ.”

19 Ə mà duŋ Ablahaŋ gəŋ bigoŋ gbi, kwaalə i nakə biaŋnə bə tɔŋ llɨŋ i mà yii le ə Chu mə kə, maa ye i mà ŋəŋ lə gbo wiih lə i chu duŋ ye ŋwuŋ ŋkpi lə, i ŋə̀ŋ dəŋ lə bwɔɔ kimbwee ki kpɛɛ Sheela mà kaah. 20 I mà kə chɔɔ lə bəŋkənə naamənə kə fo mə lə nakə jaa kənə tɔ́ŋ fwe ə ŋkaachi nnu Chu mà kaachi yo wu mu kə. Tɔŋ llɨŋ i mà yii le ə Chu mə mà taa gəŋ fwi, yee i fāŋ kwaa ə duŋ kiŋkuntaŋ bə Chu. 21 I mà bema bə tɔŋ liih linhliŋ lə Chu kənə muŋgeni bənfə fieŋ ffɨŋ i mà kaachi. 22 Fiee fieŋ ffɨŋ fi mà fə Chu hlə jə lə i dùŋ mbɛɛ ntiiŋ. 23 Kwaalə, die ye lə, “Chu mà jə wu nəni,” duŋ bə́ mà kə bieŋ nə ə duŋ bə Ablahaŋ kwaa kə. 24 I dùŋ dəŋ yu be. Chu nnu kkə yìi yo tɔ́ŋ ə wu mə yá jə dəŋ be nəni. Ə wu nnu i mà fwoo yo Jisho Baba ya ə kpe mə. 25 Jisho lə nnu bə́ mà nə yo, i kpe yu yíwaha yaa. Chu fwoo wu ə kpe mə fo mə lə jə lə kkə lə bə gbenə kə.