Luŋ 3

Chu lèmi ba kwaa ə kichɛɛŋ bəŋ

Ye fi duŋ lə nəni, Bəjuu kàh bəne bədi bə fieŋ fidi lə? Mbɨŋ yo həmə nnu i dùŋ lə yee bə́ nyīeŋ jó yí bəne lə? 2 Eee, Bəjuu yii kàh ba bəne bədi ə jé mə kiŋaaŋkə. Fi fwii duŋ lə, Chu mà nəə die yi ə kwáŋ ŋəbə mə. 3 Duŋ ə bə́ yɔɔ lə ye bəne bədi ə bə́ mə màa bə dūŋ lə kə lèmi ba ə die ye bəŋ kə, kəə fimbini fie lə fə ə Chu nakə yee i baa i lèmi ba ə die ye bəŋ kə lə? 4 Duŋ ə fi duŋ lə kə! Maa ye bəne bənhliŋ duŋ lə bə yo kaalənə, Chu lèmi kwaa ə duŋ ə kichɛɛŋ bəŋ, ye fi duŋ bə́ bieŋna lə,

“Chu, bwɔɔ nnu wə yɔ̀ɔ, die wa ba ba yəəŋ.

Wə bà bəŋ'wu nhlaa wa.”

5 Kwaalə ə fwɔ waa wwuŋ wi dùŋ kə duŋ nə ntiiŋ wwuŋ wi chɨ̀nə bənfə lə fwɔ wi Chu winwaa yee wi nyīee wɛɛŋ, kəə duŋ ə kkə yɔɔ lə ləhəŋ lə? Ə duŋ ə kkə yɔɔ lə Chu fə̀ lə yəəŋ bənlɛɛ ŋgə ə be go kə lə? Mbīi nəni ə duŋ ye mbɛɛ ŋkee bwò lə i bìi. 6 Ə duŋ ə fi duŋ nəni kə! Ə fi duŋ nəni, ə Chu hlə fə ləhəŋ bəmbwo hlaah mbiŋ lə? 7 Kwaalə ə duŋ lə ŋkaalə yo bwò i fə̀ kichɛɛŋ ki Chu nyìee ki gə̀ŋ ə duŋ fwi fwi ki bwò bə kiŋkohi ə yii liih go, bə́ hlə yee bə́ bāa bə́ hlàah mi lə ndùŋ mbɛɛ waha yulaha lə? 8 Ə duŋ lə fi duŋ nəni ə kkə nakə yɔɔlə lə, “Fi nwaa lə yee kkə fə̄ yíwaha fo bieŋ binwaa lə yee bi bwō lə?” Biyɔɔnə bɨhŋ duŋ bbɨŋ bəne bwò bə́ bìhi yíi ŋiaa mu, bə́ yɔ̀ɔ lə ə yɔɔ be. Bie bəne yá bənə ŋgə bə́ nnu bə́ duŋ lə bə́ bənə.

Mbɛɛ ntiiŋ hləŋkə

9 Ə duŋ ə kkə yɔɔ ba lə ləhəŋ fidiɛɛ lə? Be Bəjuu, kkə yii kàh bəne bədi lə? Maa fəhəŋ lee! Kkə ŋəŋna ba lə Bəjuu maa bəne bbəŋ bə́ dùŋ kə duŋ nə Bəjuu kə duŋ ə kwáŋ ŋə muŋga mu yiwaha mə. 10 Fieŋ fɨhŋ duŋ ye bə́ bieŋna lə lə,

“Mbɛɛ ntiiŋ hləŋ həmə maa mwi.

11 Mbɛɛ bufe hləŋ həmə,

mbɛɛ hləŋ həmə nnu i kìɛɛ Chu.

12 Bəne bənhliŋ bwuŋna binhlaŋ bibə ə Chu go.

Bə́ bənhliŋ choo ba bieŋ binya.

Mbɛɛ hləŋ həmə nnu i fə̀ fieŋ ffɨŋ fi dùŋ ntiiŋ, maa dəŋ mwi.

13 Bə́ waala bəntɔntɔ bəbə chi yə ye jə́ŋ yí bəŋkpi lə.

Bə́ dùŋ bəne bə ŋəniini.

Biyɔɔnə bbɨŋ bi fù ə bə́ jə duŋ ə bi jii mbɛɛ ye cha fihlɨɨlə lə.

14 Kida bə biyɔɔnə biwaha yiila ə bə́ jə́.

15 Wuh ŋəbə duŋ chəkə chəkə bənjii mbɛɛ.

16 Bə́ ba bəmbihi bieŋ,

bə́ bwò bə bəŋgə ə bidɔhɔ mə binhliŋ bbɨŋ bə́ gə̀ŋ ə bi mə.

17 Bə́ kə̀lə lə fieŋ fi kinduŋh ki shiiiŋ kə.

18 Bə́ lɔ̀ lə Chu ə tɔ́ŋ ŋəbə go kə.”

19 Kkə kəla fidiɛɛ lə fieŋ ffɨŋ bəŋkɨnə yɔ̀ɔ, bə́ yɔ̀ɔ bə bəne bbəŋ bə́ dùŋ ə bəŋkɨnə kwe, fo mbɛɛ lə nakə kənə fieŋ dududu ffɨŋ mə lə dɨɨmə yɔɔ kə ye mbɛɛ mənhliŋ ə mbiŋ nu mə yá lemi lə ə Chu fwi təŋ kwoo kiih. 20 Yee bə kə̂lə lə, mbɛɛ hləŋ həmə nnu Chu yá jə lə i dùŋ ntiiŋ ə wu fwi yulahalə i fə̀ fieŋ ffɨŋ bəŋkɨnə kìɛɛ, yulahalə bəŋkɨnə fə̀ bəne kə̀lə bieŋ biwaha bbɨŋ bə́ fə̀.

Je nni Chu jə̀ mbɛɛ lə duŋ ntiiŋ ə yi mə

21 Kwaalə, fidiɛɛ duŋ Chu nyiila je nni mbɛɛ lə duŋ ntiiŋ ə wu fwi. Je ye kənə lə fieŋ bənfə bə bəŋkɨnə kə. Je ye duŋ nni Kiŋwaati ki bəŋkɨnə bə Mushe maa Biŋwaati bi bəne bə hlɨŋ Chu màa bi fwɔ̄ŋ. 22 Je nni Chu jə̀ lə mbɛɛ duŋ ntiiŋ ə yi mə, duŋ nni i bə̀lə tɔŋ llɨŋ mbɛɛ yiila ə Jisho Kleto mə. Chu fə̀ fɨhŋ bə mbɛɛ mənhliŋ nnu i yiila tɔŋ ə Kleto mə, yulahalə bə Chu mbɛɛ ju hləŋ kə nnu i duŋ chili. 23 Ye mbɛɛ mənhliŋ fə̀lə yiwaha hlə yee i dūŋ je nyɛɛkə ə kiŋkuntaŋ ki Chu go. 24 Kwaalə, Chu nyiila tɔŋ linwaa bə bəne bənnə bə́ nnə li jənə bə́ lə bə́ lə bə gbenə kə. Fɨhŋ mà kah ə Kleto Jisho kwáŋ nnu i mà yah yo bəne ə ŋgə mə. 25 Chu mà nəə wu ye ntofi bənfə gbɛmi bə ŋgɔŋ miih. Gbɛmi wuhŋ dùŋ bə bəne bənhliŋ bbəŋ bə́ yiila tɔŋ ə wu mə. I mà fə gbɛmi wuhŋ bənyii lə wu Chu duŋ mbɛɛ ntiiŋ, yulahalə wu Chu màa i kwāa biwɛɛ bu kwaanə bə yíwaha yibə yyɨŋ bə́ màa bə́ fə̄ fwii. 26 Fieŋ fɨhŋ mà duŋ bənyii ə bwɔɔ nnu bəŋ lə wu Chu kibɛɛ duŋ mbɛɛ nnu i fə̀ bieŋ ntiiŋ, ə duŋ dəŋ wu nnu i jə̀ mbɛɛ nnu i yìi tɔŋ ə Jisho mə lə i dùŋ mbɛɛ nnu i dùŋ gbenə hləŋ. 27 Ye fi duŋ lə nəni, fieŋ fidi fie fi kaani həmə ffɨŋ duŋ ə yee kkə wē yu fi lə? Fieŋ həmə hləŋ kə! Fi hləŋkə yulaha lə? Duŋ ə fi duŋ yu nimi lidi llɨŋ kkə nɨ̀ŋ lə? Ə lə kə! Ə yee kkə wē yu bieŋ bbɨŋ kkə nɨ̀ŋ ye bəŋkɨnə kìɛɛ lə? Yeh! Fi lèmi ə duŋ ə tɔŋ llɨŋ kkə yiila ə Jisho mə. 28 Ə li ye fi duŋ. Kkə chèe lə Chu jə̀ mbɛɛ lə mə gbenə hləŋ ə duŋ yu tɔŋ llɨŋ mbɛɛ yo yiila ə Jisho mə, ə kə duŋ nə yu i fə̀ fieŋ ffɨŋ bəŋkɨnə kìɛɛ kə. 29 Lii lə Chu duŋ kwaa Chu Bəjuu lə? I duŋ nə dəŋ Chu bəne bbəŋ bə́ dùŋ kə duŋ nə Bəjuu lə? Eee, i duŋ dəŋ Chu bəne bbəŋ bə́ dùŋ kə duŋ nə Bəjuu, 30 ye Chu duŋ lə kwaa mwi, ə wu nnu i yá jə bəne bbəŋ bə́ nyieŋna jó yibə lə bə́ gbenə hləŋ kə, ə duŋ kwaa yu tɔ́ŋ llɨŋ bə́ yiila ə Kleto mə kwaa yəəŋ ye i jə̀lə bəne bbəŋ bə́ dùŋ kə nyieŋ nə bə́ jó lə bə gbenə hləŋ ə duŋ dəŋ yu tɔ́ŋ llɨŋ bə́ yiila ə Kleto mə. 31 Fɨhŋ duŋ lə kkə lɛɛ tələ bəŋkɨnə yu tɔŋ llɨŋ kkə yiila le ə Kleto mə lə? Je hləŋ kə, duŋ ə yee fi dūŋ lə kə! Fi duŋ lə yee kkə lêmi ə bəŋkɨnə bəŋ.