Luŋ 2

Chu yáa i hlāah mbɛɛ i bə̀lə ye fwɔ wiih duŋ

Nəni kələ lə wə dəŋ lə bə kinlaamə nə kə, wə nnu wə hlàah yo mbɛɛ ju maa ə duŋ wə nyəhə. Ye wə hlàah'lə wu, wə yìi ə duŋ kwoo ko ə ŋgə mə, yulahalə wə nnu wə hlàah yo mbɛɛ ju, wə fə̀ dəŋ ə duŋ fieŋ ffɨŋ i fə̀ fie. 2 Kkə kələ lə, ə Chu lə lɛɛ ŋgə ə bəne bbəŋ bə́ fə̀ bieŋ bɨhŋ go, kəə i lɛ̀ɛ i bə̀lə kichɛɛŋ. 3 Nəni wə nnu wə hlàah bəne bbəŋ bə́ fə̀ bimbini bie bieŋ, bələh wə kibɛɛ fə̀ dəŋ bi, wə hlè lə wə yá yi fukwoo ə kwáŋ ŋə nhlaa Chu mə lə? 4 Lii wə ŋə̀ŋ nə lə Chu kənə tɔŋ linwaa bə bəne gbaaŋ, i kwàa tɔŋ gbaaŋ, i dùŋ dəŋ shiiiŋ gbaaŋ lə? Wə ŋə̀ŋ nəni wə jə̀ lə ə fieŋ fi nya lə? Kələ lə tɔŋ linwaa li Chu ə wə mə nyìi lə wə gaanə tɔŋ lo.

5 Kwaalə ye wə nɨhŋna lə bəŋgaanə tɔŋ lo, wə fə̀ fi tà kwaa fi gə̀ŋ fwi fwi, wə yìinə ə duŋ bəŋgə ə wə fi, bbəŋ bə́ yá duŋ butuu bbuŋ Chu yá nyii biwɛɛ biih bbɨŋ bi fwèe ə bwɔɔ nnu i yáa i hlāah bəne bənhliŋ ə jé yí kiyəyəŋ mə. 6 Chu yá yi hluŋ mbɛɛ mwi mwi i bə̀lə ye fwɔ wiih duŋ. 7 Bəne bbəŋ bə́ kwàa tɔ́ŋ ə nimi linwaa mə, bə́ kìɛɛ ə duŋ kiŋkuntaŋ bə kinyohi maa kinduŋh ki kə kaa, i yá yi nə kinduŋh ki kə kaa bə bə́. 8 Kwaalə bəne bbəŋ bə́ kèe kwaa ə duŋ bikuu bibə, bə́ nɨ̀hŋ bəŋ'wo kichɛɛŋ, bə́ fə̀ ə duŋ bieŋ biwaha, Chu yá yi nyii biwɛɛ binlo bə bəŋgə bə bə́. 9 Ŋgə ŋkuntaŋ bə kinlogo yá yi duŋ bə mbɛɛ mənhliŋ nnu i fə̀ yiwaha chɔɔ jə ə Bəjuu go gəŋ bwii ə bəne bbəŋ bə́ dùŋ kə duŋ nə Bəjuu go. 10 Kwaalə, kiŋkuntaŋ bə kinyohi maa kindunshiiŋ yá yi duŋ bə bəne bbəŋ bə́ fə̀ fwɔ́ ŋənwaa chɔɔ jə ə Bəjuu go gəŋ bwii ə bəne bbəŋ bə́ dùŋ kə duŋ nə Bəjuu go. 11 Fi yá yi duŋ nəni yulahalə Chu nyìi lə kichili kə.

12 Bəne bənhliŋ bbəŋ bə́ fə̀ yiwaha bbəŋ bə́ dùŋ kə kənə bəŋkɨnə bə Mushe, bə́ lɛɛ ə ŋgə mə maa ye bə́ duŋ lə kə kənə bəŋkɨnə kə. Bəne bənhliŋ bbəŋ bə́ fə̀ yiwaha bə́ dùŋ ə bəŋkɨnə kwe, duŋ ə bə́ yá hlaah bə́ bələ bəŋkɨnə bie. 13 Yee fi dûŋ lə yulahalə Chu yá jəə mbɛɛ lə i duŋ ntiiŋ ə wu fwi yulahalə i wò fieŋ ffɨŋ bəŋkɨnə yɔ̀ɔ kə. I yáa i jə̄ mbɛɛ yo lə i duŋ ntiiŋ ə duŋ bwɔɔ nnu wu dəŋ yu fə̄ fieŋ ffɨŋ bəŋkɨnə kìɛɛ.

14 Ə bəne bbəŋ bə́ dùŋ kə duŋ nə Bəjuu bbəŋ bə́ dùŋ bəŋkɨnə hləŋ ja yee bə́ fə̄ bieŋ bə munhlenə mubə ə duŋ bieŋ bbɨŋ bəŋkɨnə kìɛɛ, kəə bə́ chu dùŋ bəŋkɨnə ə bə́ kwáŋ maa ye bə́ duŋ lə kə kənə bəŋkɨnə bbəŋ Chu mà nə bə Bəjuu kə. 15 Fimbini fie nyìi lə fieŋ ffɨŋ bəŋkɨnə kìɛɛ Chu bieŋna fi ə tɔ́ŋ ŋəbə go. Biwɛɛ bibə bèmi kah dəŋ bə fimbini fie. Bwɔɔ nnu bə́ fə̀ fieŋ fiwaha, bíwɛɛ bibə hlàah bə́. Bwɔɔ nnu bə́ fə̀ fieŋ finwaa, bi fwɔ̀ŋ bə́. 16 Bieŋ bɨhŋ yá duŋ butuu bbuŋ Chu yáa i hlāah bieŋ bbɨŋ bəne bənhliŋ fə̀ ə nələ mə. I yáa i hlāah i kàh ə Jisho Kleto mə, ye hlɨŋ nwaa nni ndòntə ye nyìi lə.

Bəjuu wè bə bəŋkɨnə

17 Wə nnu wə chèe yo gbo wo lə ŋwuŋ Bəjuu, wə chì kwoo ə bəŋkɨnə bə Mushe bəŋ, wə wè lə wə dùŋ mbɛɛ Chu, 18 ə duŋ bə́ laana wə bəŋkɨnə bəhŋ, wə kə̀lə dəŋ fieŋ ffɨŋ Chu kìɛɛ, wə kə̀lə dəŋ fieŋ finwaa ba gbaaŋ. 19 Wə kə̀lə kinwaa lə ə wə nnu wə nyìi bəne bəmbandii je, wə dùŋ dəŋ mɔɔ ki bəne bbəŋ bə́ dùŋ ə jɨbə mə, 20 ə dùŋ wə mbɛɛ nnu wə làanə bənfili, ə dùŋ wə nnu wə kèeh bəne bbəŋ bə́ dùŋ kə kələ bieŋ ye muŋiaa lə, wə fə̀ nəni yulahalə bəŋkɨnə nəə wə bufe bunhliŋ maa kichɛɛŋ. 21 Wə nnu wə làanə yo bəne nəni, wə làanə lə dəŋ gbo wo kə lə? Wə nnu wə dòntə lə mbɛɛ kə yee buyi, wə fə̀ ləhəŋ ŋkwo wa lə? 22 Wə nnu wə yɔ̀ɔ yo lə nyimi mbɛɛ ləkə kpɛɛ mbɛɛ kə nɔŋ nə bə mbɛɛ ju kə, wə dùŋ nnu wə dùŋ kə fəə dəŋ nəni lə? Wə nnu wə nɨ̀hŋ yo bu nɨhŋnə bieŋ bi bəcheh, wə yì lə bieŋ ə chə́ŋ yí ntofi yí bəcheh mə lə? 23 Wə nnu wə jə̀ yo gbo bə bəŋkɨnə bə Chu, wə nə̀ lə Chu giaali bwɔɔ nnu wə gbè bəŋkɨnə bie kə lə? 24 Ə fieŋ ffɨŋ bə́ bieŋna lə, “Bəne bbəŋ bə́ dùŋ bie kə duŋ nə Bəjuu bwò yee bə́ bīhi yii li Chu, ə fə̀ fwɔ weeŋ bəŋ Bəjuu.”

25 Bənyieŋ jo mbɛɛ duŋ bə mbɨŋ^ª, ə duŋ lə mbɛɛ yo yu fə̄ fieŋ ffɨŋ bəŋkɨnə yɔ̀ɔ. Kwaalə, ə duŋ lə wə yii gbè bəŋkɨnə, kəə nyieŋ jo wa nnu bə́ nyieŋ yo wə yo ə waalə bə́ kaani kə nyieŋ nə wə jo kə. 26 Ə duŋ lə mbɛɛ yu kāani kə nyieŋ nə jo kə, bələh i fə̀ fieŋ ffɨŋ bəŋkɨnə yɔ̀ɔ, ə bə́ nakə jəə lə bə́ nyieŋna wu maa ye i kaani lə kə nyieŋ nə jo lə? 27 Nəni, bəne bbəŋ bə́ kàani kə nyieŋ nə bə́ jó kwaalə bə́ chì bəŋkɨnə, bə́ yá fə ə bə́ yii bəŋ Bəjuu ə ŋgə mə bbəŋ bə́ kə̀nə bie bəŋkɨnə bbəŋ bə́ mà bieŋ, ə duŋ bə́ mà nyieŋna jó yeeŋ, kwaalə bə gbè chuu bəŋkɨnə bie. 28 Yee bə kə̂lə lə ŋwuŋ Bəjuu shaŋ duŋ nə nnu i nyìee yaŋ go kə. Fieŋ fishaŋ fi nyieŋnə jo kə duŋ nə fieŋ ffɨŋ bə́ ŋə̀ŋ bweenə ə nyaŋ mbili go kə. 29 Ŋwuŋ Bəjuu kibɛɛ dùŋ ə duŋ ə tɔŋ go. Nyieŋ jo kibɛɛ dùŋ ə duŋ ə tɔŋ go, ə duŋ nfə Fiana Chu, ə kə duŋ nə fieŋ ffɨŋ fi bə̀lə ə duŋ bəŋkɨnə bbəŋ bə́ bieŋna bu bieŋ nə kə. Mbini yo mbɛɛ ə kòhi ə duŋ Chu wu. Ə kòhi lə ə duŋ bəne wu kə.