Luŋ 1

Kiŋwaati kkɨŋ Pwɔɔ mà bieŋ bə kimbumə ki

Luŋ

Ə mi Pwɔɔ, mbɛɛ nimi Jisho Kleto. Chu mà diila mi lə n'yee ndūŋ mbɛɛ faŋnə Jisho. I chi mi lə n'yee ndōntə hlɨŋ nwaa Chu. 2 Hlɨŋ nwaa ni duŋ nni Chu mà kaachi bəne mu i kàh ə bəne biih bə hlɨŋ mə. Ye fi duŋ bə́ bieŋna ə Kiŋwaati kiih ki Wɛɛŋ mə. 3 I duŋ ki Ŋiaani nnu i mà chu mbɛɛ ŋkee, bə́ bwee wu ə kichəŋ ki Ŋkɨŋ Daafi mə. 4 Baba ya Jisho Kleto duŋ nnu Chu mà nyii kah ə Fiana Wɛɛŋ mə lə ə Ŋiaani nnu i kə̀nə muŋga ye i mà fwoo lə wu ə kpe mə.^ª 5 Ə fə Jisho Kleto Chu hlə shaa mi fə lə n'yee ndūŋ mbɛɛ wi faŋnə, fo nlə nfə ə bəne bə bitɨŋ bənhliŋ bbəŋ bə́ dùŋ kə duŋ nə Bəjuu yii tɔ́ŋ ə wu mə, yee bə́ wô ə duŋ bə wu bə́ kòhi yii liih. 6 Bəŋ dəŋ duŋ ə kintu ki bəne bbəŋ Chu diila lə bə duŋ bəne bə Jisho Kleto.

7 Mbīeŋ kiŋwaati kɨhŋ bə bəŋ bənhliŋ bbəŋ bə dùŋ tɔŋ li Chu bbəŋ bə́ dùŋ ə Luŋ, bbəŋ i diila lə yee bə dūŋ bəne bbəŋ bə́ dùŋ biih.

Chu Tah ya bə Baba Jisho Kleto nyii bəŋ tɔŋ linwaa baa nə bəŋ tɔ́ŋ ŋəndə.

Pwɔɔ yee i kə̄nə kinhle bənla gbɛŋ ə bəne bə Luŋ kwuŋ

8 Ŋkiɛɛ lə nhlaa nə kimbaafɛɛ bə Chu ŋgwəŋ yu bəŋ bənhliŋ, kah ə Jisho Kleto mə, yu mbiŋ mənhliŋ yu yɔ̄ɔ ki tɔ́ŋ ŋŋəŋ bə yiila ə wu mə. 9 Chu nnu nnɨ̀ŋ yo wu dɨŋ bə tɔŋ lɨŋŋ linhliŋ ə hlɨŋ nwaa ki Ŋiaani bəŋ, i lèmi ə kidɨŋ ki nhlaa ŋgwəŋ mə lə n'yee mba bənhle bəŋ bwɔɔ mənhliŋ ə Chu cheenə ŋgwəŋ mə. 10 Bwɔɔ nnu nchèe Chu nnòŋ lə ə je lə duŋ ə mbwo ŋəŋ bəŋ fidiɛɛ, ə Chu lə bemi, 11 yulahalə nlèki gbaaŋ bəŋəŋ ə bəŋ go fo nlə nə bəŋ nnə li Fiana, ə li fə ə yee bə dūŋ ntakə. 12 Fi duŋ lə, kkə tahi go ŋiaa, tɔ́ŋ ŋŋəŋ bə yii ŋie ə Chu mə ŋə tahi mi, ə lɨŋŋ tahi ŋieeŋ. 13 Bəŋgwoŋ, ŋkiɛɛ lə bə kələ lə ŋkaala chi chá kiŋaaŋkə lə nlə mbwo ə bəŋ mə, bwɔɔ nnu ŋkaachi lə fieŋ fidi bu baŋ mi. Ŋkiɛɛ lə mbwo fo nlə mbwo bənə sháŋ yí kimbemi yidi ə bəŋ mə yəəŋ ye mbənə lə ə bəne bədi mə bbəŋ bə́ dùŋ kə duŋ nə Bəjuu. 14 Nimi li bəne bənhliŋ lɨhŋ duŋ ə mi fi, ləkə bəne bbəŋ bə́ dùŋ ə kitɨŋ kinchaa mə, ləkə bbəŋ bə́ kaani ə nji, ləkə bəne bbəŋ bə́ kə̀nə bufe, ləkə bbəŋ bə́ kaani bənfili. 15 Nəni fieŋ fie dò mi hədɨŋ gbaaŋ lə ŋkeeh hlɨŋ nwaa ni bə bəŋ maa bə bbəŋ bə́ dùŋ ə Luŋ.

Muŋga mu hlɨŋ nwaa Chu

16 Yee bə kə̂lə lə gbo beelə mi ki diɛɛnə ki hlɨŋ nwaa Chu kə, yulahalə ə həmə nnu muŋga mmuŋ Chu fwòo mbɛɛ mənhliŋ nnu i yìi tɔŋ ə wu mə dùŋ. Hlɨŋ ni hlaa gəŋ ə duŋ ə Bəjuu mə, i hlə bwo gəŋ ə bəne bbəŋ bə́ dùŋ kə duŋ nə Bəjuu. 17 Fɨhŋ duŋ lə hlɨŋ nwaa ni nyìi je nni Chu jə̀ mbɛɛ lə i dùŋ ntiiŋ ə wu fwi. Fɨhŋ nini chɔɔ gəŋ kpee həŋgbɔŋ ə tɔŋ llɨŋ mbɛɛ yìi ə wu mə. Ə fieŋ ffɨŋ bə́ bieŋna lə,

“Mbɛɛ ntiiŋ yá yi duŋ yu tɔŋ llɨŋ i yiila ə wu mə kənə kinduŋh.”

Biwɛɛ fwèe Chu bə bəne bəŋ bə́ dùŋ kə fəə bieŋ ntiiŋ kə

18 N'yɔ̄ɔ nəni bən'yɔɔ lə biwɛɛ bi Chu bà bənfwee gbaaŋ bə bəne bbəŋ bə́ nɨ̀hŋ wu bə́ fə̀ bieŋ bbɨŋ bi dùŋ kə duŋ nə ntiiŋ, fwɔ́ ŋəbə ŋəŋ'waha nyìi lə kichɛɛŋ ki die Chu kə. 19 Bi fwèe nəni yu fieŋ ffɨŋ bəne kə̀lə ki Chu ma nyieela wɛɛŋ fidiɛɛ, yulahalə wu Chu mà nyiila fi bə bə́. 20 Chɔɔ jə həmɛɛ ye Chu mà fə mbiŋ nu, duŋ muŋga mwii mmuŋ mu bà kə kaa bə ye wu Chu dùŋ, duŋ nnu bəne ŋəŋna baa kələ ə bieŋ bbɨŋ i mà fə mə, maa ye bəne duŋ lə kə ŋəŋ nə dəŋ ə wu go kə. Nəni je kə baa lə duŋ mu nni bə́ lə ja dɨɨmə yee bə́ yɔ̄ɔ lə bə́ kə kələ Chu kə.

21 Maa ye bə́ kə̀lə lə Chu nəni, bə́ kòhi lə wu ye Chu kə, ləkə nə kimbaafɛɛ bə wu kə. Munhlenə mubə choo munya. Bikuu bibə biŋɨmə yiila ə duŋ bə jɨbə. 22 Bə́ yɔ̀ɔ lə bə́ bie bə bufe, bə́ kaka dùŋ binfili. 23 Bə́ shee bənchee Chu kiŋkuntaŋ nnu i dùŋ kə kpee, bu kaka yee bə́ chēe chuu ə duŋ bə bəmaami bbəŋ bə́ fə̀ bə kwáŋ bə́ bu bəne bbəŋ dùŋ ə bə́ kpe, bə munyini maa nyáŋ yyɨŋ yí jàa ə wuh bəŋ, bə yyɨŋ yí kpà gbo kwe.

24 Ye fi duŋ lə nəni, Chu bu tukwaŋ ə bə́ go lə yee bə́ fə̄ ə duŋ bieŋ bbɨŋ tɔ́ŋ ŋəbə kìɛɛ ə duŋ bieŋ bi nyɛninə, bə́ fə̀ nəni bə go ŋəbə mbɛɛ bə mbɛɛ, hlə yee bə́ nə̄ giaali bə go ŋəbə. 25 Bə́ fiila kichɛɛŋ ki Chu chuu ə duŋ yo kaalənə, yee bə́ chēe bə́ nɨ̀ŋ ə duŋ bə bieŋ bbɨŋ Chu mà fəə, kahiŋ bənchee Chu maa bənɨŋ ə duŋ bə wu Mbɛɛ Fənə yo. Ə duŋ wu nnu bə́ kənə bəŋkohi bwɔɔ mənhliŋ kə kaa. Yee fi Dûŋ lə. 26 Ye bə́ fə̀lə nəni, Chu tùkwaŋ ə bə́ go, gbo tà bə́ bənfə bieŋ bimbee gbo. Bəkwɛɛ nɔ̀ŋ bə bəkwɛɛ, ə duŋ Chu mà kə fəə bəkwɛɛ lə yee bə́ fə̄ nəni kə. 27 Ə dəŋ yəəŋ ye bənəə shiee je nni Chu mà fə lə yee bə́ nɔ̄ŋ bə bəkwɛɛ, gbo tà bə́ bənɔŋ ə duŋ bə bənəə bədi. Bənəə fə̀ bieŋ bi mbee gbo bə bənəə bədi. Ye bə́ fə̀lə nəni, bə́ hlə yee bə́ jə̄ ŋgə ə bikuu bibə bəŋ ə duŋ bikoonə bi fwɔ́ wubə wuwaha.

28 Ye bəne bie nalə kə ŋəŋ nə lə fi duŋ yəəŋ bəŋkələ Chu, Chu bu tukwaŋ ə bə́ go lə yee bə́ kə̄nə bufe bu nfili, bə́ hlə yee bə́ fə̄ bieŋ bbɨŋ bə́ dùŋ kə kənə bənfə. 29 Tɔ́ŋ ŋəbə hlə yii bə bieŋ biwaha chili chili. Bə́ bèe bieŋ, bə́ gè díi, bə́ kə̀nə tɔ́ŋ ŋəŋ'waha, bə́ lùhuŋ bimi bə bəne, bə́ jìi bəne, bə́ jù nyɨmə, bə́ fìhi fihinə, bə́ kèe bəne bə díi ŋəŋ'waha, bə́ dù dunə, 30 bə́ bìhi yíi ŋə bəne, bə́ lòh bə Chu, bə́ kə̀nə kintɔŋ, bə́ bikuu, bə́ kə̀nə kiŋ'we, bə́ dàna bieŋ, bə́ tà bikuu bə bətili maa bə bəmahni. 31 Bə́ dùŋ bənfili kə lèmi ə díe yibə bəŋ kə. Bə́ fɨ̀hɨŋ bəne bədi, kə kwòo hlɨŋ bə bəne kə. 32 Bə́ fə̀ nəni bə́ kə̀lə kwaa lə Chu kaala chi dəŋ lə mbɛɛ nnu i fə̀ bieŋ bɨhŋ kənə bəŋkpe. Kwaalə, bə́ fə̀ kwaa bə́ gə̀ŋ fwi fwi, baa fwɔŋ bəne bbəŋ bə́ fə̀ dɨŋ bie bieŋ.