Luŋ 16

Cheenə

Ŋkiɛɛ lə nyii bəŋ jəŋ butə ya ji nni yii liih duŋ lə Fwɛɛbe lə bə kələ wu. I chɨ̀nə ə nimi li Chu mə ə kimbumə ki bəne bə kimbemi ki Shiŋklia mə. 2 Bwɔɔ nnu mə lə bwo, bə jə wu ye mbɛɛ Baba lə ə je nni i dùŋ ə je bəne bə Chu mə. Ə duŋ lə fieŋ fidi fie həmə ffɨŋ i kìɛɛ lə bə chɨnə wu bə fi, bə chɨnə, yee bə kə̂lə lə i chɨna bəne kiŋaaŋkə, chɨnə dəŋ maa mi.

3 Bə chee nə mi Plishilia bə Akwila. Ə bəne bbəŋ kkə buma bee bə́ ə nimi li Jisho Kleto mə. 4 Bə́ taala kpe bə́ yu mi. Bə́ dùŋ bəne bbəŋ ə kə duŋ nə kwaa mi nnu nduŋ nlə n'yee nnə̄ bə́ kimbaafɛɛ kə. Bibumə bi bəne bə bimbemi bi bəne bbəŋ bə́ dùŋ kə duŋ nə Bəjuu bənhliŋ bie bə nə̄ dəŋ bə́ kimbaafɛɛ. 5 Bə chee nə dəŋ kimbumə ki bəne bə kimbemi kkɨŋ ki bùmə ə bə́ chəŋ. Bə chee nə dəŋ Epanetu mbweŋ tɔŋ lə ncheela wu. I mà duŋ mbɛɛ nnu fwii bənduŋ mbɛɛ Kleto ə kitɨŋ ki Ɛshia mə. 6 Bə chee nə dəŋ Meeli nnu i mà nɨŋna dəŋ gbaaŋ ə bəŋ mə. 7 Bə chee nə dəŋ Andulniku bə Junia bbəŋ bə́ dùŋ bəne bə kitɨŋ kɨŋŋ, kkə nɨŋna dəŋ ə chəŋ munfwa mə bə bə́. Ə bəne bbəŋ bə́ kə̀lə ə kintu ki bəne bə faŋnə bə Jisho mə. Ə màa bə́ bbəŋ bə́ mà hlaa yii tɔŋ ə Kleto mə bə mi. 8 Bə chee dəŋ Ampliatu mbweŋ ŋgwəŋ tɔŋ nnu bee wu duŋ buhuŋ ə Baba mə. 9 Bə chee Ulbanu nnu i duŋ mbuhuŋ bee bə́ ə nimi li Kleto mə, chee dəŋ Shitaki nnu i duŋ mbweŋ ŋgwəŋ tɔŋ. 10 Bə chee nə Apele. Ə mbɛɛ nnu nyiila lə i lema bə Kleto ntakə. Bə chee dəŋ bəne bə Alishtobulu chəŋ. 11 Bə chee dəŋ Hɛlɔdiɔŋ mbɛɛ ŋgwəŋ kitɨŋ, chee dəŋ bəne bbəŋ bə́ dùŋ mbuhuŋ bə Baba, bbəŋ bə́ dùŋ ə kichəŋ ki Nashishu mə.

12 Bə chee dəŋ Tilfana bə Tilfosha. Ə bəkwɛɛ bbəŋ bə́ nɨ̀ŋ nimi li Baba. Bə chee Pelshi nnu i duŋ tɔŋ lɨŋŋ. Ə kpɛ nnu i nɨŋna dəŋ nimi li Baba gbaaŋ. 13 Bə chee Lufu nnu Baba mà shaa ye mbɛɛ wi lə, chee dəŋ mahni nnu njə̀ lə i duŋ dəŋ nəh. 14 Bə chee Ashiŋklitu bə Fligɔŋ maa Helma maa Patoloba maa Helma, maa bəŋgwoŋ biaa bee bəŋ bbəŋ bə́ dùŋ bə bə́. 15 Bə chee Filologu bə Julia, chee Neliyu bə maani kpɛ. Bə chee dəŋ Olimpa bə bəne bbəŋ bə́ dùŋ bə Baba Chu bbəŋ bə́ dùŋ bə bə́. 16 Bə chee go ŋieeŋ, yohi yohinə ki bəne bə Chu. Bimbumə bi bəne bə kimbemi bə Kleto binhliŋ bie bə́ chēe dəŋ bəŋ.

Keehnə ki həŋgbɔŋ

17 Bəŋgwoŋ, n'yu ŋkɔ̄nɔ bəŋ bu kɔnɔnə lə bə jə bwɔɔ ki bəne bbəŋ bə́ bwò bə kiŋga, bə́ bìhi bəŋ bə kinlaanə kkɨŋ ki nòo kinlaanə kkɨŋ bə́ mà laanə kie bəŋ mu. Yee bə lɔ̂ bəne bəmbini bie bu lɔnə. 18 Yee bə kə̂lə lə bəmbini bie bəne nɨ̀ŋ nə ə duŋ bə Baba ya Kleto kə. Bə́ nɨ̀ŋ ə duŋ yu té ŋəbə. Bə́ jə díe yí njənjə yyɨŋ yí duŋ fihinə, bə́ fìhi bəne bbəŋ bə́ dùŋ kə kələ fieŋ. 19 Ye bəne bənhliŋ wòlə kieeŋ lə bə duŋ ba bəne bbəŋ bə́ wò fieŋ bə́ fə̀ fi, nhlə n'yee ŋ'wō njənjə bə bəŋ. Kwaalə ŋkiɛɛ lə yee bə dūŋ bəne bəŋkələ bieŋ bələ ə duŋ fieŋ finwaa, kə yii lə kwáŋ ə fieŋ fiwaha mə.

20 Ə she kwaa bwɔɔ chɛɛ ə Chu nnu i dùŋ yo Chu kindunshiiŋ gbee Hlaata, ə bə diɛŋ ə wu bəŋ bə wuh. N'yu nnōŋ lə Baba ya Jisho Kleto nyii tɔŋ liih linwaa yee li dûŋ bə bəŋ. 21 Timɔti nnu kkə nɨ̀ŋ bee wu ə fieŋ bəŋ fimwi yu chēe dəŋ bəŋ. Lushiyu bə Jashiŋ maa Shoshipata bbəŋ bə́ dùŋ bəne bəŋŋ bə kitɨŋ, bie bə́ chēe dəŋ bəŋ. 22 Mi Teltiyu nnu Pwɔɔ yɔ̄ɔ mbīeŋ kiŋwaati kɨhŋ, ncheela dəŋ bəŋ ə yii li Baba bəŋ. 23 Gayu nnu mi Pwɔɔ nnɔ̀ŋ ə wu chəŋ, nnu bimbumə bi bəne bə kimbemi bənhliŋ bumə mu cheela dəŋ bəŋ. Elashtu nnu i duŋ ŋwuŋ kilinə kpo ə kibalaki kɨhŋ mə, bə ŋgwoŋ ya nnu yii liih duŋ Kwatu cheela dəŋ bəŋ. 24 [Baba ya Jisho Kleto nyii tɔŋ linwaa bə bəŋ bənhliŋ, yee li dūŋ bə bəŋ. Yee fi Dûŋ lə.]^ª

Yee kkə nə̄ kiŋkohi bə Chu

25 Kiŋkohi duŋ bə Chu. Ə wu nnu i dùŋ ə i fə lə yee bə tā gbo, bə bə̀lə ye hlɨŋ njəŋ nwaa nni n'yɔ̀ɔ. Hlɨŋ nwaa ni duŋ nni mmaa ndōntə ki Jisho Kleto. I màa i dūŋ ye fieŋ finələnə ffɨŋ bə́ mà nəla daaŋkə, fidiɛɛ bə́ nyiila fi bə be. 26 Finələnə fɨhŋ duŋ fidiɛɛ bə nyiila. Bieŋ bbɨŋ bəne bə hlɨŋ bə Chu mà bieŋ fəə fi fwoo bweenə ə bitɨŋ binhliŋ mə. Chu nnu i dùŋ yo bwɔɔ mənhliŋ, ə wu nnu i yɔ̀ɔ lə bə́ nyii bə bitɨŋ binhliŋ fo bə́ lə yii tɔ́ŋ ə wu mə yee bə wō bə wu. 27 Kiŋkohi yee ki dūŋ bwɔɔ mənhliŋ bə Chu nnu ə duŋ yo kwaa wu nnu i dùŋ ŋkələ bieŋ, kah ə Jisho Kleto mə. Yee fi Dûŋ lə.