Nimi 27

Bə́ faŋ Pwɔɔ ə Luŋ

Ə chulə bə́ bwɛɛla lə bee Pwɔɔ lɛɛ ə chəŋ nni njɔ mə bəŋgəŋ ə kitɨŋ ki Itali mə, bə́ hlə nə Pwɔɔ bə bəne bə munfwa bədi ə kwáŋ ŋə Juliyo mə nnu i duŋ kwoo ki kintu ki bəne bə bicha bə Ŋkɨŋ nnu Luŋ. 2 Bee bə́ lɛɛ ə chəŋ nni njɔ mə nni i mà no Adalamitiuŋ nni i mà duŋ lə yee i jāa i lēmi ə nɔ kpɛɛli, ə wɛɛ wi Ɛshia mə. Alishtaku mbɛɛ nnu Teshalonika, ə kitɨŋ ki Meshedonia mə mà duŋ dəŋ bə be. Bee bə́ hlə yee kkə gə̄ŋ. 3 Butuu fu wu, kkə bwii Shidɔŋ, Juliyo nyii kinleki bə Pwɔɔ, tukwaŋ ə wu go lə i gəŋ yee i dūŋ bəə bədɔɔ biih ə bweenə fo bə́ lə yee bə́ chɨ̄nə wu bə fieŋ ffɨŋ i kìɛɛ. 4 Kkə hlə fiimə lɛɛ chuu ə chəŋ nni njɔ ye mə, ə chulə kkə gəŋ, kifwuŋ baŋ be fwi, kkə hlə yee kkə kə̄ə baha ə Shayplu go kitɨŋ ki nɔ mə kintekinte, ki baŋ be. 5 Lə kkə le nɔ nnu i dùŋ yo baha ə kitɨŋ ki Shilishia bə kitɨŋ ki Panfilia go, kkə bwii ə kibalaki ki Mila, ə kitɨŋ ki Lishia mə. 6 Kwoo ki kintu ki bəne bə bicha bie ŋəŋ chəŋ nni njɔ nni həmə i noo Aleshandia i gə̄ŋ ə Itali, i fwoo be yii chuu ə mbini ye mə. 7 Kkə no həmə, yee kkə jāa nəni wɛɛɛ wɛɛɛ ə joo mə kiŋaaŋkə, kkə fə nəni chɔ hlə gəŋ bwii baha ə kwili li Shinidu. Ye kifwuŋ kie mà nalə kə bemi lə kkə gəŋ fwi ntiiŋ, kkə hlə gah kəə kah ə Shalmuni dɔhɔ kkɨŋ ki lɛ̀ɛ gəŋ ə njɔ ə kitɨŋ kie mə. 8 Kkə she yee kkə kə̄ə kkə kāh ŋgwiŋ mie kpɛɛli kpɛɛli, kkə fə nəni chɔ hlə gəŋ fu ə dɔhɔ kkɨŋ bə́ chèe lə Biwu bi Ŋgwiŋ Mənshiiŋ, mməŋ mə dùŋ baha ə kibalaki ki Lashia go.

9 Ye kkə mà kɛhiŋ lə bwɔɔ mə je gbaaŋ, Butuu buŋkuntaŋ bu Kinlaamə nə Yíwaha hə kaah, ə duŋ bwɔɔ kifwuŋ kintaabə, Pwɔɔ nə keehnə bə bəne bə chəŋ nni njɔ ye mə lə, 10 “Bətah bəŋŋ, ŋŋəŋ lə chɔɔ jə fəŋ gəŋ fwi gbɛŋ waa wuhŋ lə bee, ə kinla duŋ həmə ə kə duŋ nə ki bieŋ bi chəŋ nni njɔ kwaa kə, bəne lə kpe dəŋ.” 11 Kwaalə, che kwoo ki bəne bə bicha nakə baa lə wo yo Pwɔɔ kə, wo ŋkwo wi ə duŋ kwoo ki chəŋ nni njɔ bə che chəŋ nni njɔ ye. 12 Ye bikpɛɛli bi nɔ yo mà nalə kə nwaa lə bənduŋ həmə bwɔɔ kifwuŋ kintaabə kie, mbɛɛ mənhliŋ hlə yee i fwɔ̄ŋ lə ə nwaa lə bə́ gəŋ fwi, ju lə duŋ ə bə́ fu ə ŋgwiŋ mə Fonik həkpa lə, nnu i dùŋ ə kitɨŋ ki Klɛt kie mə, kɛhiŋ bwɔɔ yo həmə. Ki həkpa ki ŋgwiŋ kie màa ki kēe je muŋwa bə je munhlili wɛɛ wwuŋ kitaŋ gəŋ chɨŋ.

Kifwuŋ tu chəŋ nni njɔ

13 Fwee kidi no yee ki bīŋ je munhlili nəni wɛɛɛ, bəne bə chəŋ nni njɔ yee bə́ hlē lə bə́ bəna fieŋ ffɨŋ bə́ kìɛɛ fie. Bə́ bwa bəŋgooli bə chəŋ nni njɔ ye, i hlə yee i gə̄ŋ ə njɔ, i gəŋ kwaa kpɛɛli kpɛɛli ə Klɛt yo go. 14 Kifwuŋ kintaabə kkɨŋ bə́ chèe lə, “Ki wɛɛ wi kwaŋ məə wwuŋ kitaŋ bɛɛ mə,” ki bu no həmə ə kitɨŋ kie mə bwɔ gəŋ njɔ. 15 Ye ki bwɔ lə, ki tɨŋ gbo ə chəŋ nni njɔ ye go je nakə baa lə duŋ bəŋgəŋ ə ki go kə, Bə́ tukwaŋ ə chəŋ nni njɔ ye go, kifwuŋ kie tu yi yee ki gə̄ŋ bə yi. 16 Kkə hlə yee kkə gə̄ŋ kwaa, gəŋ kah ə je munhlili ə kitɨŋ kidi kitənə mə ə ŋgwiŋ mə kintekinte kkɨŋ bə́ chee lə Cawda. Kitɨŋ kie baŋ kifwuŋ kie, kkə hlə yee kkə dɨ̄ɨmə bəntuuli kikpɔŋkɔ ə chəŋ nni njɔ ye mə. 17 Kkə bini kwaa chəŋ nni njɔ ye bə gi fo mə lə nakə hlaki, ə chu lə yee kkə gə̄ŋ kkə lɔ̀ lə chəŋ nni njɔ ye lə gəŋ tɨŋ gbo baha ə kitɨŋ ki Libia go ə bintu bi choo bi həmə njɔ. Bə́ hlə hlili kindu ki fwee kie, tukwaŋ ə chəŋ nni njɔ ye go yee i gə̄ŋ ə yi kwaŋ. 18 Ye kifwuŋ kie màa ki tālə ki gə̄ŋ fwi fwi, lə butuu fu wu, bə́ chɔɔ bənfwoo bəntiɛ ə chəŋ nni njɔ ye mə, bə́ lɛ̄ɛ ə njɔ. 19 Bu baa fu wu, bəne bə chəŋ nni njɔ ye mə fwoo bieŋ bi chəŋ nni njɔ ye mə, bə́ lɛ̄ɛ ə njɔ bə́ kwáŋ ŋəbə. 20 Joo kiŋaaŋkə bwo kah kkə kə ŋəŋ nə ə ŋwiŋ go ləkə ə muntoola go kə, kifwuŋ kie tɨ̄ŋ kwaa gbo ki gəŋ fwi fwi ə kə duŋ nə ki chɛɛ kə, kkə hlə kələ lə ŋkwo ya kaa ba.

21 Ye bəne mà duŋ lə joo kiŋaaŋkə fieŋ kə diee, Pwɔɔ bwo ja lemi bə́ fwi yɔɔ lə, “Bətah bəŋŋ, ə bə́ maa wo mi lə kkə ba ə Klɛt, ə kkə maa baa kənə ŋgə nu bə kinla kɨhŋ nəni kə. 22 Kwaalə, n'yu ŋkɔ̄nɔ lə bə kwaa tɔŋ, yulahalə mbɛɛ ju ə bəŋ mə lə laa kə, ə la kwaa chəŋ nni njɔ ye. 23 N'yɔ̄ɔ nəni yulahalə Chu nnu i kə̀nə yo mi, nnu nchèe yo, hə faŋna nchinda wi daŋ ə butuu mə bwo lemi baha ə mi tɨŋ, 24 yɔɔ bə mi lə, ‘Pwɔɔ, wə kə lɔɔ kə. Wə kənə bəŋgəŋ nlemi ə Ŋkɨŋ nnu Luŋ fwi. Kee ŋəŋ, Chu nyiila kinleki ə wə mə fə lə mbɛɛ ju ə kintu ki bəne bbəŋ bəə bə́ duŋ bie ə chəŋ nni njɔ ni mə lə laa kə.’ 25 Nəni, bətah, bə kwaa tɔ́ŋ. N'yiila tɔŋ ə Chu mə lə fieŋ ffɨŋ i yɔ̀ɔ bə mi lə duŋ yəəŋ dəŋ ye i yɔɔlə. 26 Ye fi duŋ lə nəni, chəŋ nni njɔ kənə bəŋgəŋ tɨŋ gbo ə kitɨŋ kidi go ə ŋgwiŋ mə kintekinte.”

27 Lə yee ə dūŋ joo yuufi ə nchɔ na kifwuŋ kie kaani ki fiinə bə be ə nɔ nnu Adia mə.^ª Ə bwo duŋ ye butuu kintekinte lə, bəne bbəŋ bə́ nɨ̀ŋ bie ə chəŋ nni njɔ ye mə gbe bənhle lə ləkə bə́ hə chu bwii baha həkpa. 28 Bə́ fɛhiŋ kinduumə ki ŋgwiŋ mie bə gbi ə duŋ bə́ kwaala fieŋ fidi ə wi go, ŋəŋ lə ə bəntaŋ mbwɛɛnfie. Bə́ baŋ gəŋ fwi baa fɛhiŋ, ŋəŋ lə mə bwiila bəntaŋ yuufi ə nchɔ bətiŋ. 29 Bə́ lɔ lə ə duŋ ə chəŋ nni njɔ ye gəŋ tɨŋ gbo ə ŋəmbwaa go, bə́ hlə hlɨhɨŋ bəŋgooli bənua ə ŋgwiŋ mə ə chəŋ nni njɔ ye dɨŋ, bə́ chēe Chu lə butuu wu kwaa lə. 30 Bəne bbəŋ bə́ nɨ̀ŋ ə chəŋ nni njɔ ye mə hlə yee bə́ kīɛɛ lə bə́ lɔ fu ə chəŋ nni njɔ ye mə, bə́ hlili kikpɔŋkɔ kie ə nɔ mə, bə́ chɔɔ bə́ fə̄lə bə́ kīɛɛ lə bə́ hlɨhɨŋ bəŋgooli wɛɛ wi fwi wi chəŋ nni njɔ ye mə ə njɔ. 31 Pwɔɔ yɔɔ bə che kwoo ki bəne bə bicha bie bə bəne biih lə, “Ə bəne bəhŋ lə chɔɔ mɔŋ bənlɔ fu ə chəŋ nni njɔ ni mə, ə mbɛɛ ju ə bəŋ mə nakə fwoo kwoo kə.” 32 Bəne bə bicha bie hlə kaalə gi ŋŋəŋ bə́ mà kwaa ŋie kikpɔŋkə kie mu ə chəŋ nni njɔ ye go, tukwaŋ ə chəŋ nni njɔ ye go yee i lə̄əŋkə i gə̄ŋ.

33 Ə chulə butuu kpee kwe, Pwɔɔ kɔnɔ bəne bənhliŋ lə bə́ di bieŋ, i yɔɔ lə, “Daŋ fəə joo yuufi ə nchɔ na ye bə bie ə nɨŋ mə, fieŋ kə lɛɛ lə ə bəŋ jə kə. 34 Nhlə yee ŋkɔ̄nɔ kwaa lə bə́ di fieŋ, gbo weeŋ chu nte. Duŋ ə shana fwee mi la ə mbɛɛ fi kə.” 35 Ye i yɔɔlə nəni, i hlə jə kibele, nə kimbaafɛɛ bə Chu, gaa yee i dī ə bəne bənhliŋ fwi. 36 Bə́ hlə kwaa tɔ́ŋ bənhliŋ di. 37 Be bənhliŋ mà duŋ ə chəŋ nni njɔ ye mə mbɛɛ mbɛɛ, gi fwe bə gbifumanyaaŋ ə nchɔ buhlɔ (276). 38 Bəne bənhliŋ di fiili, bə́ hlə fwoo gɨŋ ŋə bəjaa ŋŋəŋ ŋə mà duŋ ə chəŋ nni njɔ ye mə, lɛɛ ə nɔ mə bənfə lə i yaalə.

Chəŋ nni njɔ hlaki

39 Lə butuu wu, kpaa le nyiee, bəne bbəŋ bə́ màa bə́ nɨ̄ŋ bie ə chəŋ nni njɔ ye mə nakə kələ dɔhɔ kie kə. Kwaalə, bə́ ŋəŋ ə nchi ŋgwiŋ go nnu i gə̀ŋ bwii ə choo bəŋ, ŋəŋ lə duŋ ə bə́ ju lɛɛ gəŋ bə chəŋ nni njɔ ye ə ŋgwiŋ mie həkpa lə. 40 Bə́ kaalə bəŋgooli bie bə bwɔ gəŋ ə nɔ yo mə, hlooli dəŋ gi ŋŋəŋ bə́ mà kwaa ŋie ə bitənə bbɨŋ bə́ fii bie chəŋ nni njɔ ye mu, hlə bihiŋ dəŋ kindu ki fwee ki fwi kie, fwee lɛɛ mə yee ki yə̄ə chəŋ nni njɔ ye i gə̄ŋ ə nchi yo mə. 41 Kwaalə, ye i gəŋ lə, i gəŋ tɨŋ gbo ə kintu ki choo kie go mə njɔ. Wɛɛ wi chəŋ nni njɔ wi fwi we lɛɛ mə nakə baa lə nənə kə. Ŋgwiŋ hlə yee mə tɨ̄ŋ gbo ə wɛɛ wi dɨŋ we go wi hlāki.

42 Bəne bə bicha hlə yee bə́ kīɛɛ lə bə́ jii bəne bə chəŋ munfwa bie bənhliŋ fo ju ə bə́ mə lə nakə noo kiini fu lɔ kə. 43 Kwaalə, che kwoo ki bəne bə bicha bie kiɛɛ lə i fwoo Pwɔɔ, hlə looŋkə lə bə́ kə fəə nəni kə, yɔɔ wu fiih lə bəne bbəŋ bə́ kələ bəŋkiini ŋgwiŋ hlaa tee ə njɔ, kiini fu həkpa, 44 ə bədi bie bəne yee bə́ bə̄lə ə bəwama bəŋ ləkə ə biŋkə bi chəŋ nni njɔ ye bəŋ. Ə nəni nnu kkə mà jaa kkə hlə fu həkpa nyɛkii.