Nimi 26

Pwɔɔ təŋ kwoo kiih ə Ŋkɨŋ Aglipa fwi

Ŋkɨŋ Aglipa hlə yɔɔ bə Pwɔɔ lə, “Ə dɔhɔ ko fidiɛɛ bən'yɔɔ bə biwu bwo.” Pwɔɔ hlə tuuli kwáŋ hə buh, chɔɔ bəntəŋ kwoo kiih, yɔɔ lə, 2 “Jaaki, ŋŋəŋna lə n'yo bə hla nwaa gbaaŋ bənlemi təŋ kwoo kɨŋŋ ə wə fwi daŋ yu bieŋ binhliŋ bbɨŋ Bəjuu bwɛ̀ɛ ə mi go. 3 N'yɔ̄ɔ fɨhŋ nəni, yulahalə wə kə̀lə too wi kitɨŋ ki Bəjuu kinwaa maa binoonə bbɨŋ bə́ kə̀nə. Nəni, n'yu ŋkɔ̄nɔ lə wə wələ shiiiŋ wə wo fieŋ ffɨŋ nlə n'yɔ̄ɔ.

4 Bəjuu bənhliŋ kələ fwɔ wuŋŋ chɔɔ jə ŋkaani. Bə́ kə̀lə ye mmaa ndūŋ ə kitɨŋ kiaa mə maa ə Jelushalɛŋ. 5 Bə́ kə̀lə kinwaa dəŋ lə ə kaani fwoo màa ndūŋ mbɛɛ ə kintu ki Bəfalashii mə, ə duŋ kintu kkɨŋ ki tà ə fieŋ fi Chu mə kah bidi bie binhliŋ. Fɨhŋ lə fieŋ ffɨŋ ə bə́ lə leki bən'yɔɔ, ə bə́ bemi lə ə chɛɛŋ. 6 Nlēmi fəŋ fidiɛɛ ə nhlaa nu bəŋ, yulahalə ŋkèe fwi ŋkə̀lə ŋkaachi Chu nnu i mà kaachi bə bəche tah biaa. 7 Ŋkaachi nu duŋ nnu bichəŋ biaa bi yuufi ə nchɔ bifwe bie kè ye bə́ chèe Chu ntakə ə butuu bə bushi. Jaaki, ə yu ŋkaachi nu nnu Bəjuu kənə nhlaa bə mi. 8 Mbii bə wə maa bə bəne bənhliŋ ləə ə fə laha ffɨŋ bə́ ŋə̀ŋ fi tà bəmbemi lə duŋ ə Chu fwoo mbɛɛ ə kpe mə lə?

9 Mi kibɛɛ mmaa nhlē lə ŋkənə bənfə fieŋ finhliŋ bənləhə laa yii li Jisho nnu Nashalit. 10 Fɨhŋ duŋ fieŋ ffɨŋ mmàa nfə̄ ə Jelushalɛŋ. Mmà njəə muŋgeni ə bəche ntofi bəŋkuntaŋ bəŋkuntaŋ kwáŋ ŋkwò bəne bbəŋ bə́ dùŋ bə Chu kiŋaaŋkə, nfwàŋ ə chəŋ munfwa mə. Ə kwaa fɨhŋ kə. Bwɔɔ nnu fi mà bwo duŋ lə bə́ jii bə́, nfwɔŋ dəŋ. 11 Mmàa nnə̄ bə́ ŋgə bwɔɔ mənhliŋ ə chə́ŋ yí cheenə Chu mə yinhliŋ, ŋkaŋ lə yee bə́ yɔ̄ɔ díe yiwaha ki mbɛɛ nu Jisho. Tɔŋ fwèe mi bə bə́ gbaaŋ, nhlɔ̀ɔ wuh ə bə́ dɨŋ, ŋgəŋ bwii ə bibalaki bi bitɨŋ bidi mə.

Pwɔɔ baa yɔɔ ye i mà gaanə bənduŋ mbɛɛ Kleto

12 Nhlə ja n'yee ŋgə̄ŋ ə Damashku, ə duŋ bəche ntofi bəŋkuntaŋ bəŋkuntaŋ hə bieŋna kiŋwaati, nə mi muŋgeni. 13 Jaaki, nhlə n'yee ŋgə̄ŋ, lə ə bwo duŋ ye hlɨŋ bushi lə, nduŋ duŋ ŋəŋ ye kinchaa kidi lala bwo buh ki tə̄ kah kitaŋ, bwɔ bwo ə mi go bə bəne bbəŋ bee bə́ həə kkə jāa bie. 14 Be bənhliŋ gbe həkwe, ŋ'wo ye die bii bə mi ə die yi Hiblu mə lə, ‘Shɔl, Shɔl, wə hlɔ̀ɔ wuh ə mi dɨŋ nəni yulaha lə? Wə fə̀ nəni, wə kwùŋ ə duŋ gbo wo, ye naŋ nimi nnu i kwùŋ lə gbo wiih ə tələ ki tili go.’ 15 Mbii ləə, ‘Ə wə nyəhə lə Baba?’ I chuu lə, ‘Ə mi Jisho, ə mi wu nnu wə hlɔ̀ɔ yo wuh ə wu dɨŋ. 16 Ja lemi fa. Fieŋ ffɨŋ fi fə lə nfu ə wə go duŋ lə mbwaa wə ye mbɛɛ ŋgwəŋ nimi lə, yee wə dôntə bieŋ bbɨŋ wə ŋəŋna daŋ bə bbɨŋ ŋkaani nhlə n'yii wə. 17 Nlə nfwoo wə ə kwáŋ ŋə Bəjuu mə maa bəne bbəŋ bə́ dùŋ kə duŋ nə Bəjuu, ə bə́ bbəŋ nlə nfaŋ wə ə bə́ mə. 18 Wə lə gəŋ wɛ díi ŋəbə, fwoo bə́ ə jɨbə mə, chi bə́ ə kinchaa mə, ə bə́ fu ə kwáŋ ŋə muŋga mu hlaata mə, duŋ bə Chu, ə bə́ yii tɔ́ŋ ə mi mə, ə Chu laamə nə yíwaha yibə. Ə bə́ yá hlə kənə wɛɛ ə dɔhɔ ki bəne bbəŋ i mà fə lə bə́ duŋ biih.’

19 Jaaki, ye fi mà duŋ lə nəni, mmà ŋkə nɨhŋ nə bənfə ba ye i yɔɔ lə bə mi ə buh kə. 20 Nhlə ŋgbe jə bəndontə ə Damashku, bwo gəŋ ə Jelushalɛŋ. Njāa ə kitɨŋ ki Judia mə kinhliŋ maa bitɨŋ binhliŋ bbɨŋ bi dùŋ kə duŋ nə bi Bəjuu, n'yɔ̀ɔ bə bə́ lə bə́ fii tɔ́ŋ ŋəbə, bə́ chu chuu bə Chu, yee bə́ fə̂ ə duŋ bieŋ bbɨŋ bi nyìi lə bə́ gaana. 21 Ə yu fieŋ fɨhŋ nəŋ ffɨŋ fi mà fə Bəjuu hlə kwo mi ə chəŋ ntofi mə bə́ kīɛɛ lə bə́ jii. 22 Kwaalə, Chu chɨnə mi bwo bwii daŋ. Nhlə n'yee nlēmi fəŋ ndōntə dəŋ bə bəne bəŋkuntaŋ bəŋkuntaŋ maa bətənə bətənə. Fieŋ ffɨŋ ndòntə fie ə fi dəŋ ffɨŋ Mushe bə bəne bə hlɨŋ Chu màa bə yɔ̄ɔ lə fi yá yi bwo duŋ. 23 Bə́ màa bə́ yɔ̄ɔ lə Nchuu Fwoo nnu Chu kaachi yo kənə bəŋgəŋ wo ŋgə, ə i duŋ mbɛɛ nu fwii bənfu ə kpe mə, nyii kinchaa bə Bəjuu maa bəne bbəŋ bə́ dùŋ kə duŋ nə Bəjuu.”

24 Ye Pwɔɔ màa i tə̄ŋ lə kwoo kiih i gə̄ŋ, Feshto ja nyieemi wu bu nyieeminə yɔɔ lə, “Pwɔɔ wə yu gbēja ə ŋgbe mə. Kinlaanə ko kiŋkuntaŋ kɨhŋ fəə wə chu gbeja bu gbenə.” 25 Pwɔɔ chuu bə Feshto lə, “Ŋgbè lə ja kə ŋwuŋ ŋkuntaŋ. Fieŋ ffɨŋ n'yɔ̄ɔ duŋ kichɛɛŋ, n'yɔ̄ɔ ə bufe buŋŋ mə. 26 N'yɔ̄ɔ bə Ŋkɨŋ wɛɛŋ nəni, yulahalə i kə̀lə bieŋ bɨhŋ nini, bi ma kə kaah ə nələ mə kə, fidi hləŋ ffɨŋ i duŋ kə kələ kə. 27 Jaaki, wə bema fieŋ ffɨŋ Biŋwaati bi bəne bə́ hlɨŋ Chu yɔ̀ɔ lə? Ŋkə̀lə lə wə bema.” 28 Ŋkɨŋ Aglipa bii bə Pwɔɔ ləə, “Wə hlē lə duŋ ə wə fii mi chuu mbɛɛ Kleto ə bwɔɔ ŋkwoo nu bəŋ nəni lə?” 29 Pwɔɔ chuu lə, “Fo ə bwɔɔ ŋkwoo lee, ləkə bwɔɔ ndiɛɛ lee, Chu cheenə ŋgwəŋ duŋ lə, ə kə baa kwaa wə kə. Mbɛɛ mənhliŋ nnu i dùŋ fəŋ daŋ nnu i wō ye n'yɔ̄ɔ lə i gaanə dəŋ i chu ye mi lə, kwaalə, mə jɨnə kwaa ə duŋ fíaŋ yɨhŋ.”

30 Ŋkɨŋ ja fa, mbɛɛ ŋkɨnə bə Belni maa bəne bbəŋ bə́ mà shii bie bəə bə́ bələ wu. 31 Bə́ fu, yee bə́ yɔ̄ɔ bə́ bə́ lə, “Mbɛɛ nu kə fəə fieŋ ffɨŋ duŋ ə bə́ jii wu ləkə bə́ yii wu ə chəŋ munfwa mə kə.” 32 Ŋkɨŋ Aglipa yɔɔ bə Feshto lə, “Ə hə nakə duŋ nə lə mbɛɛ nu hə noŋna nhlaa wi lə i gəŋ ə Ŋkɨŋ nnu Luŋ fwi, ə bə́ hə tukwaŋ ə wu go.”