Pwɔɔ jə nhlaa wi gəŋ fwi ə Ŋkɨŋ nnu Luŋ kwuŋ
25
Lə ə bwo duŋ joo tɔh ye Feshto mà chɔɔ bənhlaah wɛɛ wi kitɨŋ ki Judia, i ja ə Kashalia biŋ ə Jelushalɛŋ. 2 Bəche ntofi bəŋkuntaŋ bəŋkuntaŋ bə bikuu bi Bəjuu bə kitɨŋ hlə bwo ŋəŋ wu mə, chi nhlaa nnu bə́ kənə yo bə Pwɔɔ ə wu fwi, bə́ kɔnɔ wu lə, 3 i nyii kwaa tɔŋ linwaa bə bə́, fə bə́ faŋ Pwɔɔ i bwo ə Jelushalɛŋ. Bə́ màa bə́ fə̄ nəni, bə́ hə bwɛɛla lə bə́ lə lee gba jii wu ə je. 4 Feshto chuu bə bə́ lə, “Pwɔɔ yo ə chəŋ munfwa mə ə Kashalia, mi kibɛɛ nlə nfiimə nchu mə ə joo ŋəhŋ mə. 5 Bəne bbəŋ bə́ kənə muŋgeni mu nhlaahnə bədi ə bəŋ mə bələ mi ə Kashalia, bə́ yɔɔ fieŋ ffɨŋ i biha ə duŋ mə, ə duŋ lə fieŋ fie mu.”6 Feshto bwo duŋ bə bə́ gəŋ bwii ye joo nyaaŋ ləkə yuufi lə, hlə fiimə chu dɨŋ ə Kashalia. butuu fu wu, i gəŋ shii ə chəŋ nhlaa mə, yɔɔ lə bə́ bwo bə Pwɔɔ. 7 Ye Pwɔɔ bwiilə, Bəjuu bbəŋ bə́ hə no bie ə Jelushalɛŋ bwɔ bwo həmə, hlə lemi kaa wu kunə, yee bə́ bwɛ̄ɛ bieŋ ə wu go kiŋaaŋkə ə kə duŋ nə bi nyieenə kə. Kwaalə, fieŋ mà kə duŋ nə fi yɔɔnə ffɨŋ fi nyìi lə i fəə fidi kə. 8 Pwɔɔ təŋ kwoo kiih yɔɔ lə, “Ŋkə gbee ŋkɨnə bə Bəjuu kə dududu, ləkə ki chəŋ ntofi, ləkə ki Ŋkɨŋ nnu Luŋ kə.” 9 Kwaalə, Feshto kiɛɛ lə i fə lə Bəjuu leki wu, i hlə bii bə Pwɔɔ ləə, “Wə leki bəmbiŋ ə Jelushalɛŋ fo mi kibɛɛ nlə nhlaah nhlaa wa mə ə bieŋ bɨhŋ mə lə?” 10 Pwɔɔ chuu lə, “Nlemi fəŋ ə ŋkɔlɔ nhlaa Ŋkɨŋ nnu Luŋ mə. Ə duŋ fəŋ nnu bə́ hə duŋ bənhlaah nhlaa ŋgwəŋ. Wə kibɛɛ kəla wɛɛŋ lə ŋkə daa fieŋ bə Bəjuu kə. 11 Ə fi lə duŋ lə ŋgbee ŋkɨnə, bə lə ndaa fieŋ ffɨŋ duŋ ə bə́ jii mi, ə nnakə nnɨhŋ nə bəŋkpe kə. Kwaalə, ə duŋ lə bieŋ bbɨŋ bə́ bwɛɛ bie ə mi go ləə bi kaalənə yo, kəə mbɛɛ hləŋ nnu duŋ ə i nə mi ə kwáŋ ŋə Bəjuu bəhŋ mə. Nlə ŋkɔnɔ lə nhlaa ŋgwəŋ gəŋ fwi ə Ŋkɨŋ nnu Luŋ kwuŋ.” 12 Feshto wo nəni, bəə bəne biih bbəŋ bə́ hlàah bənhlaa yɔɔ toto. I hlə yɔɔ bə Pwɔɔ lə, “Ye wə kɔnɔ lə ba lə nhlaa wa lə gəŋ ə Ŋkɨŋ nnu Luŋ kwuŋ, kəə wə lə gəŋ mə.”
Feshto jaŋ Ŋkɨŋ Aglipa ki nhlaa Pwɔɔ
13 Ə bwo duŋ ə bwɔɔ ju bəŋ ə fɨhŋ dɨŋ, Ŋkɨŋ Aglipa bə Belniª la Feshto kpuuni ə Kashalia bəncheemə bə wu. 14 Ə chulə bə́ duŋna mə ə joo mə kiŋaaŋkə, Feshto ja jaŋ Ŋkɨŋ ki nhlaa Pwɔɔ yɔɔ lə, “Mbɛɛ ju yo fəŋ nnu Feli mà she ə chəŋ munfwa mə, 15 ə chulə ŋgəŋ ə Jelushalɛŋ, bəche ntofi bəŋkuntaŋ bəŋkuntaŋ bə bəne bbəŋ bə́ hlàah kitɨŋ ki Bəjuu yəkə nhlaa wi ə mi fwi lə n'yɔ̄ɔ lə i gbee nhlaa.” 16 N'yɔ̄ɔ bə bə́ lə, “Fwɔ wi bəne bə Luŋ kə bemi lə bə́ kaalə lə mbɛɛ gbee nhlaa bə́ kaani kə nəə je lə mbɛɛ yo lemi ə ŋkɔlɔ mə ə bəne bbəŋ bəə bə́ kənə nhlaa fwi təŋ kwoo kiih ə bieŋ bbɨŋ bə́ bwɛ̀ɛ bie ə wu go kə.” 17 Ə chulə bə́ bwo fəŋ, nnakə ŋkɛhiŋ bwɔɔ kə. Butuu fu wu, ŋgəŋ shii ə chəŋ nhlaa mə n'yɔɔ bə́ bwo bə mbɛɛ yo. 18 Ə chulə bəne bbəŋ bəə bə́ kə̄nə bie nhlaa yo lemi fa nakə nyii lə gbenə kkɨŋ nhə nhlē kie lə ə duŋ ə bə́ yɔɔ ə wu go. 19 Bə́ kaka yee bə́ yɔ̄ɔ ə duŋ bieŋ bi noonə ə wu go ki jé yyɨŋ bə́ chee Chu mə maa ki mbɛɛ ju nnu bə́ chèe lə Jisho nnu i mà kpe yo ba, kwaalə Pwɔɔ lemi kwaa lə i yo həmə. 20 Ye mmà nduŋ lə kə kələ ye nduŋ ə nlɛɛ ə bieŋ bɨhŋ mə, nhlə bii bə Pwɔɔ ləkə mə lə kiɛɛ lə i biŋ ə Jelushalɛŋ bə́ hlaah nhlaa wi ki bieŋ bɨhŋ lə? 21 I chuu lə mə lə ba ə chəŋ munfwa mə, ə Ŋkɨŋ nnu Luŋ nnu duŋ ə i kaalə nhlaa wi. Nhlə yɔɔ lə bə́ yii wu mu chəŋ yee bə́ kē, gəŋ bwii bwɔɔ nnu n'yá nfaŋ wu bə Ŋkɨŋ nnu Luŋ. 22 Aglipa wələ nəni, yɔɔ bə Feshto lə, “Mi kibɛɛ nleki lə ŋ'wo bieŋ bbɨŋ ə mbɛɛ yo jə.” Feshto chuu lə, “Wə ya fu wo mbwaa.”
23 Butuu fu wu, Aglipa bə Belni ja yee bə́ bwō bə kiŋkuntaŋ. Bə́ bəə bəche bikuu bi bəne bə bicha maa bəne bəŋkuntaŋ bəŋkuntaŋ bə kibalaki kie mə jaa bwo lɛɛ ə chəŋ gbuuŋ ye mə. Feshto hlə yɔɔ bə́ bwo bə Pwɔɔ. 24 Ye bə́ bwo lə bə wu, Feshto yɔɔ lə, “Ŋkɨŋ Aglipa bə bəne bənhliŋ bbəŋ bə́ dùŋ fəŋ, bə́ ŋəŋ mbɛɛ nu. Ə mbɛɛ nnu Bəjuu bənhliŋ bwò bə́ kɔ̀nɔ mi yaŋ maa ə Jelushalɛŋ yu wu, bə́ gɛ̀ɛmə, bə́ yɔ̀ɔ lə nu lə mbɛɛ nnu duŋ ə i duŋ fa kə. 25 Ŋkə ŋəŋ nə lə i fəə fieŋ ffɨŋ bə́ lə jii wu kə. Ye i ma kɔnɔ lə lə nhlaa wi yo gəŋ fwi ə Ŋkɨŋ nnu Luŋ kwuŋ, nhlə ŋəŋ lə nlə nfaŋ wu bə wu. 26 Kwaalə ŋkə kələ ba fieŋ ffɨŋ nlə mbieŋ bə Ŋkɨŋ che kwoo ŋgwəŋ yu wu kə. Nəni, nhlə chi wu ə bəŋ fwi fidiɛɛ gbɛntɛlɛ wə Ŋkɨŋ Aglipa, lə bə́ kee ə nhlaa wi yo mə, fo nlə ŋkələ fieŋ ffɨŋ nduŋ ə mbieŋ. 27 Ŋŋəŋna lə fi kə duŋ nə yəəŋ lə nfaŋ mbɛɛ chəŋ munfwa bə Ŋkɨŋ ŋkaani kə nyii lə fieŋ ffɨŋ bə́ yɔ̄ɔ fie ə wu go lə i gbee kə.”