Nimi 24

Bə́ chi nhlaa Pwɔɔ ə Feli fwi

Joo bwii tiŋ, Anania che kwoo ki bəche ntofi, bə bəne bədi bə hlaahnə kitɨŋ, maa Tetulu nnu i laana bəŋkɨnə, bwɔ gəŋ ə Kashalia. Bə́ hlə gəŋ ŋəŋ Feli ŋwuŋ hlaahnə, bə́ chi nhlaa bə́ ki Pwɔɔ ə wu fwi. 2 Bə́ chee Pwɔɔ, Tetulu gbe bən'yɔɔ bieŋ ə wu go, yɔɔ bə Feli lə, “Ŋwuŋ ŋkuntaŋ, kindunshiiŋ duŋna ə kitɨŋ kɨhŋ mə bwo bwii fidiɛɛ, ə duŋ yu bihlaahnə bwo binwaa, biŋgaanə binwaa kiŋaaŋkə duŋna ə kitɨŋ kɨhŋ mə ə kwáŋ ŋo mə. 3 Bəne bənhliŋ bie bə́ wō njənjə gbaaŋ bə́ baa bə́ tɨ̀ŋ jə bihlaahnə bwo ə bidɔhɔ binhliŋ mə bwɔɔ mənhliŋ. 4 Ŋkə ŋkiɛɛ lə lə ŋkɛhiŋ bwɔɔ wa gbaaŋ kə, nnoŋ lə wə wələ kwaa chɛɛ, wə wo fieŋ ffɨŋ kkə lə yɔɔ. 5 Kkə ŋəŋna lə mbɛɛ nu yo bə fieŋ. I jàa i nɛ̀hiŋ bəŋgə ə Bəjuu mə yaŋ mbiŋ mənhliŋ nu mə. Ə duŋ dəŋ wu che kwoo ə kimɔ kkɨŋ bə́ chee lə ki Nashalit. 6-7 I mà kiɛɛ dəŋ lə i bihi chəŋ ntofi kkə kwo wu.^ª 8 Ə wə bii bieŋ bə mbɛɛ nu, ə wə wo ki bieŋ bbɨŋ kiɛkiɛ bbɨŋ kkə yɔɔ bie kiih.” 9 Ye Tetulu yɔɔlə nəni, Bəjuu fwɔŋ, dohi lə bieŋ bɨhŋ binhliŋ lə chɛɛŋ.

Pwɔɔ təŋ kwoo kiih ə Feli fwi

10 Mbɛɛ hlaahnə yo ma bə Pwɔɔ lə i yɔɔ. I hlə yɔɔ lə, “Ŋkələ lə wə hlaah'la bənhlaa ə kitɨŋ kɨhŋ mə bigoŋ kiŋaaŋkə. Nhlə n'yee ŋ'wō njənjə bənlemi təŋ kwoo kɨŋŋ ə wə fwi. 11 Ə wə lə bii dəŋ, ə wə wo lə joo kə kaah yuufi ə nchɔ fwe ye mma mbiŋ ə Jelushalɛŋ bəŋgəŋ chee Chu kə. 12 Bəjuu nakə ŋəŋ nə ye nnoo noonə bee mbɛɛ kə, bə nakə ŋəŋ nə dəŋ ye mbweemə bəne ə chəŋ ntofi mə ləkə ə chəŋ cheenə Chu mə, ləkə ə dɔhɔ kidi ə kibalaki mə kə. 13 Bə́ lə bə fieŋ fidi dududu ffɨŋ fi nyìi lə mà nfəə ə bieŋ bbɨŋ bə́ bwɛ̀ɛ bie ə mi go kə. 14 Mbema fɨhŋ ə wə fwi lə, nchèe Chu bəche tah biaa mbə̀lə Je nni bə́ chèe lə i duŋ waha. Mbemi ə duŋ bieŋ binhliŋ bbɨŋ bi duŋ ə Kiŋwaati ki bəŋkɨnə bə Mushe mə maa bə bbɨŋ bi dùŋ ə Biŋwaati bi bəne bə hlɨŋ Chu mə. 15 Ŋkee kwaa fwi ə Chu mə dəŋ yəəŋ ye bə kee lə, lə bəne bənhliŋ bənwaa bə bəwaha yá yi fu ə kpe mə. 16 Nəni, nhlə n'yee njū ba bwɔɔ mənhliŋ bənduŋ kinduŋh kinwaa ə Chu fwi maa bə bəne, fo fieŋ lə duŋ nə ffɨŋ fi lə hlaah mi ə tɔŋ lɨŋŋ go kə.

17 Fidiɛɛ duŋna bigoŋ kiŋaaŋkə ye mmà she Jelushalɛŋ, nfiimə bwo chu həmə nnə̀ kpo bə bəne bəŋŋ bə kitɨŋ, maa bənfə ntofi. 18 Fiee fieŋ ffɨŋ bə́ ma ŋəŋ mi ə chəŋ ntofi mə nfə̀, ə duŋ ŋ'wiila kwoo kɨŋŋ. Bəne ləkə kikpuŋ mà kə duŋ nə həmə kə. 19 Bəjuu bədi bə Ɛshia mà duŋ həmə, bə́ hə kənə bənduŋ fəŋ bən'yɔɔ wə fieŋ ffɨŋ bə́ kə̀nə yu mi, ə duŋ lə fieŋ fidi fie həmə. 20 Ə kə duŋ nə nəni, bəne bəŋ hə yɔɔ fieŋ ffɨŋ bə́ ma ŋəŋna lə ŋgbee bwɔɔ nnu mma lemi ə bəne bbəŋ bə́ hlàah kitɨŋ fwi, 21 kahiŋ fieŋ fi mmaa n'yɔ̄ɔ fie bə die ntaabə bə bə́ lə, n'yo ə bə́ fwi ə bwɔɔ yo bəŋ yu nhlaa yulahalə mbema lə bəŋkpi yá yi fu ə kpe mə.”

22 Ye Pwɔɔ yɔɔlə nəni, Feli wələ nəni, i duŋ mbɛɛ nnu i kə̀lə ba Je Baba, i hlə kəə nhlaa yo yɔɔ lə, “Bwɔɔ nnu Lishia che kwoo ki bikuu bi bəne bə bicha lə bwɔ bwo, ə nhlə kaalə nhlaa weŋ.” 23 I hlə yɔɔ lə kwoo ki kimɔ ki bəne bə bicha kidi jə gəŋ yii Pwɔɔ ə chəŋ munfwa mə, yee bə́ fwôŋ wu. Kwaalə, bə́ bu nə kwaa wu je, tukwaŋ lə bədɔɔ bii bwò bə́ chɨ̀nə wu.

Feli kəə nhlaa Pwɔɔ ə bigoŋ bəŋ bifwe

24 Lə joo ŋəndi kah, Feli bə kpɛɛ Dushila nnu i mà duŋ kpɛ Bəjuu bə́ bwo. Feli gəŋ chee Pwɔɔ i bwo, bə́ wələ fieŋ ffɨŋ i yɔ̄ɔ ki n'yii tɔŋ ə Jisho Kleto mə. 25 Bwɔɔ nnu i màa i yɔ̄ɔ ye ə duŋ ə mbɛɛ duŋ ŋwuŋ nwaa, bə ye duŋ ə mbɛɛ fwoŋ kwoo kiih, maa ye Chu yá hlaah bəne, Feli wo nəni, fi lɔhiŋ wu. I hlə yɔɔ bə Pwɔɔ lə, “Duŋ ə yee wə gə̄ŋ fidiɛɛ, bwɔɔ nnu nlə kənə bwɔɔ ə nhlə mbaa chee wə.” 26 I màa i yɔ̄ɔ nəni, i hlē lə ləkə Pwɔɔ lə kɔ wu tələ. I hləə i baa i chēe Pwɔɔ bwɔɔ mənhliŋ bə́ bəə wu yɔ̄ɔ yo. 27 Dəŋ nəni, bigoŋ bifwe taa. Lə bə́ chi Polshiu Feshto ə kiŋkaa ki Feli bəŋ, Feli kiɛɛ lə i fə Bəjuu yee bə́ lēki wu, hlə chi ba Pwɔɔ ə chəŋ munfwa ye mə.