Nimi 23

Pwɔɔ tɨŋ díi ə bəne bbəŋ bə́ hlàah kitɨŋ go, yɔɔ lə, “Bəŋgwoŋ bəŋŋ, ə kinduŋh kɨŋŋ mə bwo bwii daŋ, mbà bənfə dəŋ ə duŋ bieŋ bbɨŋ ŋkə̀lə lə bi duŋ yəəŋ ə Chu fwi, fieŋ hləŋ həmə ffɨŋ fi kɔ̀kɔ mi ə biwɛɛ bɨŋŋ mə kə.” 2 Anania nnu i mà duŋ yo che kwoo ki bəche ntofi yɔɔ bə bəne bbəŋ bə́ màa bə́ lēmi bie baha ə Pwɔɔ tɨŋ lə bə́ kɔɔ wu bə fiŋkɔɔ ə biwu go. 3 Pwɔɔ chuu bə wu lə, “Chu lə kɔɔ dəŋ wə. Wə bu kimbɔɔ kkɨŋ bə wuha bə́ mbiŋ ki wuunə buuu kwaa yaŋ go. Wə shiila fo lə wə yu hlāah mi bələ ye bəŋkɨnə duŋ, wə baa wə bwūŋ bəŋkɨnə bie bən'yɔɔ lə bə́ kɔɔ mi lə?” 4 Bəne bbəŋ bə́ mà lemi bie baha ə Pwɔɔ tɨŋ bii bə wu ləə, “Wə tō che kwoo ki bəche ntofi Chu lə?” 5 I chuu lə, “Bəŋgwoŋ bəŋŋ, nhə ŋkə ŋkələ lə i duŋ che kwoo ki bəche ntofi kə. Bə́ bieŋna lə,

‘Mbɛɛ kə yɔɔ lə die waha ki mbɛɛ nnu i hlàah bəne kə.’”

6 Bwɔɔ nnu Pwɔɔ mà ja chiini ŋəŋ lə bəne bədi bbəŋ bə́ mà duŋ bie həmə mà duŋ Bəshadushii bədi duŋ Bəfalashii, i hlə yɔɔ bə die ntaabə bə bəne bbəŋ bə́ màa bə́ hlāah bie mə lə, “Bəŋgwoŋ bəŋŋ, ndùŋ ŋwuŋ Bəfalashii, nduŋ ŋwa Bəfalashii. Nduŋ fəŋ yu nhlaa yulahalə ŋkèe ə duŋ fwi, ŋkə̀lə lə bəŋkpi yá yi fu ə kpe mə.” 7 Ye i yɔɔlə nəni, Bəshadushii bə Bəfalashii hlə ja chɔɔ bəŋgbee kikpuŋ, shiinə kie bu ga. 8 Bə́ màa bə́ kpə̄nə nəni, yulahalə Bəshadushii màa bə́ yɔ̄ɔ lə bəŋkpi yá fwoo ə kpe mə kə, baa yɔɔ dəŋ lə fieŋ fidi duŋ nə həmə lə bənchinda bə Chu ləkə fiana kə. Kwaalə, Bəfalashii bemi lə bieŋ bɨhŋ binhliŋ bie. 9 Kpənənə kie ta həmə bu tanə, bəne bədi bbəŋ bə́ kèeh bəŋkɨnə bə́ mà duŋ ə kichəŋ ki Bəfalashii mə bə́ ja fa, lemi ntakə bə biyɔɔnə bie, yɔɔ lə, “Kkə kə ŋəŋ nə fieŋ fiwaha ffɨŋ mbɛɛ nu fəə kə. Ə lə duŋ ti fiana ju ləkə nchinda Chu nnu i yɔɔla bə wu.” 10 Kpənənə kie ə bwɔɔ ju bəŋ kiɛɛ lə ki bwo chu nyɨmə, che kwoo ki bikuu bi bəne bə bicha lɔ lə ləkə bə́ lə bu shwa Pwɔɔ həmə ə wɛ́ɛ mə. I hlə yɔɔ lə bəne bə bicha bwɔ gəŋ həmə, bə́ faa Pwɔɔ ə kwáŋ ŋəbə mə, biŋ chu bə wu ə bə́ kwuŋ.

11 Lə yee ə dūŋ ə butuu, Baba bwo lemi baha ə Pwɔɔ tɨŋ, yɔɔ bə wu lə, “Kwaa tɔŋ. Ye wə yɔɔlə bə bəne kɨŋŋ yaŋ ə Jelushalɛŋ, ə dəŋ yəəŋ ye wə lə yɔɔ li ə Luŋ.”

Bəne bədi dɔ bənjii Pwɔɔ

12 Butuu fu wu, Bəjuu bədi bumə chuŋ, kaŋ lə bə́ lə diee ləkə ŋwi dəŋ fieŋ bə́ kaani kə jii lə ba Pwɔɔ. 13 Bəne bbəŋ bə́ mà chuŋ, kaŋ muŋkaŋ mà kaah mbɛɛ mbɛɛ mbwɛɛnya. 14 Bə́ hlə gəŋ ə bəche ntofi bəŋkuntaŋ bəŋkuntaŋ kwuŋ, maa bəne bəhlaahnə kitɨŋ, yɔɔ bə bə́ lə, “Kkə kaŋna muŋkaŋ lə kkə lə yii lə fieŋ ə jə, kkə kaani kə jii lə ba Pwɔɔ kə. 15 Fidiɛɛ, bəŋ bə bəne bənhliŋ bbəŋ bə́ hlàah kitɨŋ bə faŋ hlɨŋ bə che kwoo ki bikuu bi bəne bə bicha chɔɔ fihi wu lə, i faŋ Pwɔɔ i bwɔ bwo bəŋ fwi, lə bə kīɛɛ lə bə baa kee nhlaa wi yo kinwaa. Nəni, ə kkə hlə lee wu ə je, bwɔɔ nnu bə́ lə yee bə́ bwɔ̄ bə wu, ə kkə hlə jii wu i kaani mə je.”

16 Ye bə́ mà chuŋ lə nchuŋ ye nəni, ŋwa jəŋ butə Pwɔɔ nyo wo, hlə gəŋ ə kwili li bəne bə bicha le mə, yɔɔ bə Pwɔɔ. 17 I hlə chee che kwoo ki kintu ki bəne bə bicha kidi yɔɔ bə wu lə, “Jə hlɔŋ ŋiaŋ nyo nu wə gəŋ bə wu ə che kwoo ki bikuu bi bəne bə bicha go, i yu kə̄nə fieŋ fidi bən'yɔɔ bə wu.” 18 I hlə jə wu, gəŋ bə wu ə che kwoo ki bikuu bi bəne bə bicha kwuŋ, yɔɔ bə wu lə, “Pwɔɔ mbɛɛ chəŋ munfwa nnu i chee mi, yɔɔ bə mi lə njə hlɔŋ ŋiaŋ nyo nu mbwo bə wu ə wə go, lə i yu kə̄nə fieŋ fidi bən'yɔɔ bə wə.” 19 Che kwoo yo hlə kənə wu ə kwaŋ go, bəə wu wa gbo, i bii bə wu ləə, “Ə duŋ laha ffɨŋ wə kənə bən'yɔɔ mi lə?” 20 Hlɔŋ ŋiaŋ nyo yo chuu lə, “Bəjuu bədi bwɛɛla chi lə bə́ lə baa yɔɔ ə wə faŋ Pwɔɔ lə i bwo ə bəne bbəŋ bə́ hlàah kitɨŋ fwi mbwaa, lə bə́ kīɛɛ lə bə́ baa kee nhlaa wi yo kinwaa, bə́ fə̄ nəni bə́ chɔ̄ɔ bə́ fīhi wə ə nfihi mə. 21 Wə kə bemi kə, yulahalə bəne bie bbəŋ bə́ kah mbɛɛ mbɛɛ mbwɛɛnya bbəŋ bə́ leela wu ə je, bə́ kaŋna lə bə́ lə diee fieŋ ləkə bəŋwi fieŋ bə́ kaani kə hlaa lə jii Pwɔɔ kə. Bə́ bie fidiɛɛ bə́ hə bwɛɛla go, yee bə́ kē ba ə duŋ fieŋ ffɨŋ wə lə yɔɔ.” 22 Che kwoo ki bikuu bi bəne bə bicha yo hlə yɔɔ lə hlɔŋ ŋiaŋ nyo yo gəŋ, nuulə wu bituŋ lə bwɔɔ nnu mə gəŋ, i kə fəə lə mbɛɛ ju kələ lə i yɔɔla fieŋ fie bə wu kə.

Bə́ faŋ Pwɔɔ ə Kashalia ə Feli ŋwuŋ hlaahnə kwuŋ

23 Che kwoo ki bikuu bi bəne bə bicha yo hlə chee bikuu bi bintu bi bəne bə bicha bəfwe yɔɔ bə bə́ lə, “Bə buhuŋ bəne bə bicha gi fwe (200) bə bikwuŋ gbifumanyaaŋ (70) maa bəne bə gɔ́ŋ gi fwe (200), bwɔɔ nnu ə lə duŋ bitaŋ fumayuufi ə butuu, bə gəŋ ə Kashalia. 24 Bə buhuŋ dəŋ bikwuŋ yu Pwɔɔ, bə jə gəŋ bə wu ə Feli nnu i dùŋ yo ŋwuŋ hlaahnə, fieŋ kə fəə wu ə je kə.” 25 Ye i yɔɔlə nəni, i hlə bieŋ kiŋwaati kɨhŋ, yɔɔ lə:

26 “Ə mi Klawdiyu Lishia. Mbīeŋ kiŋwaati kɨhŋ bə wə ŋwuŋ ŋkuntaŋ hlaanə Feli. Ncheela wə. 27 Bəjuu ma kwoo mbɛɛ nu bə́ kīɛɛ lə bə́ jii wu. Ŋ'wo lə i duŋ ŋwuŋ nnu Luŋ, bee bəne bə bicha hlə lɛɛ həmə faa jə wu ə bə́ kwáŋ. 28 Nhlə yee ŋkīɛɛ bəŋ'wo fieŋ ffɨŋ bə́ bwɛ̄ɛ fie ə wu go, nhlə bwɔ bə wu ə bəne bəbə bbəŋ bə́ hlàah kitɨŋ kwuŋ. 29 Ə chulə bə́ keela, bə́ ŋəŋ lə bieŋ bbɨŋ bə́ bwɛ̀ɛ bie ə wu go duŋ kwaa noonə ki bəŋkɨnə bəbə, i kə fəə fieŋ fidi ffɨŋ bə́ lə jii wu ə jii mə ləkə yii wu ə chəŋ munfwa mə kə. 30 Ə chulə mbɛɛ ju bwo yɔɔ bə mi lə Bəjuu bədi hə chuŋna bənjii mbɛɛ nu, nhlə faŋ wu bə wə cha mi. Nhə yɔɔla dəŋ bə bəne bbəŋ bə́ bwɛ̀ɛ bie bieŋ ə wu go lə bə́ bwo ŋəŋ ə duŋ wə, yɔɔ fieŋ ffɨŋ bə́ kənə bə wu.”

31 Bəne bə bicha bie hlə fə kwaa ye che kwoo bə́ yɔɔ lə, jə Pwɔɔ ə butuu, gəŋ bwii bə wu ə Antipati. 32 Butuu fu wu, bəne bə bicha bbəŋ bə́ màa bə́ jāa bie bə wuh she Pwɔɔ ə kwáŋ ŋə bəne bbəŋ bə́ màa bə́ jāa bie ə bikwuŋ bəŋ lə bə́ gəŋ bə wu fwi, hlə fiimə chu dɨŋ ə kwili libə mə. 33 Bə́ hlə gəŋ bwii ə Kashalia, hlə nə kiŋwaati kie bə ŋwuŋ hlaahnə yo baa nə dəŋ Pwɔɔ ə kwáŋ ŋiih mə. 34 I jə kiŋwaati kie chee, hlə bii ləə Pwɔɔ fu wɛɛ wɛhɛŋ leee. Lə i wo lə Pwɔɔ duŋ ŋwuŋ nnu Shilishia, 35 i hlə yɔɔ bə wu lə, “Nlə ŋ'wələ nhlaa wa bwɔɔ nnu bəne bbəŋ bə́ kə̀nə bie hlaa yo lə bwii fəŋ.” I hlə yɔɔ lə bə́ jə Pwɔɔ bə́ gəŋ chi wu ə kintɔŋ ki Hɛlɔ mə, yee bə́ fwōŋ wu.