Nimi 22

“Bətah bə bəŋgwoŋ, bə wələ wo ntaŋ kwoo kɨŋŋ ə bəŋ fwi.” 2 Lə bə́ wo ye i yɔ̄ɔ ə duŋ ə díe yibə yí Bəhiblu mə, bə́ kpe də shiiiŋ. Pwɔɔ yɔɔ lə, 3 “Nduŋ ŋwuŋ Bəjuu, bə́ mà bwee mi ə Taashu ə kitɨŋ ki Shilishia mə, kwaalə bə́ koo mi fəŋ ə Jelushalɛŋ, nlaanə kiŋwaati ə Gamalia kwáŋ. I mà shiee keeh mi bə bəŋkɨnə bə bəche tah biaa, nhlə n'yee nlēmi ə fieŋ fi Chu bəŋ ntakə dəŋ ye bəŋ bənhliŋ bbəŋ bə́ dùŋ bie fəŋ daŋ. 4 Mmàa mbā bənhlɔɔ wuh ə bəne dɨŋ bbəŋ bə́ bə̀lə Je Baba, nfə̀ bə́ jìi bə́, ŋkwò bəkwɛɛ bə bənəə nfàŋ ə chəŋ munfwa mə. 5 Fɨhŋ lə fieŋ ffɨŋ che kwoo ki bəche ntofi bə bəne bbəŋ bə́ hlàah kitɨŋ kə̀lə wɛɛŋ. Ə bə́ bbəŋ bə́ mà nə mi biŋwaati lə ŋgəŋ bə bi ə bəŋgwoŋ bbəŋ bə́ dùŋ ə Damashku. Nhlə n'yee ŋgə̄ŋ bəŋgəŋ kwo mbwò bə bəne bbəŋ bə́ bə̀lə Je Baba, ŋkwàa, mbwò bə bə́ ə Jelushalɛŋ lə bə́ nə bə́ ŋgə.

Pwɔɔ yɔɔ ye i mà jaa lə hlə yii tɔŋ ə Jisho mə

6 Ə chulə nchu ŋgə̄ŋ baha ə Damashku dəŋ ye hlɨŋ bushi lə, kinchaa kidi kiŋkuntaŋ bu lala bwo buh, hlili ə mi go. 7 Ŋgbe həkwe, ŋ'wo ye die yɔɔ bə mi lə, ‘Shɔl, Shɔl, wə hlɔ̀ɔ wuh ə mi dɨŋ nəni yulaha lə?’ 8 Mbii ləə, ‘Baba, ə wə nyəhə lə?’ Die ye chuu lə, ‘Ə mi Jisho nnu Nashalit, ə mi wu nnu wə hlɔ̀ɔ yo wuh ə wu dɨŋ.’ 9 Bəne bbəŋ bə́ mà duŋ bie bə mi mà ŋəŋna ə kinchaa kie go, kwaalə bə́ nakə woo die mbɛɛ nnu i yɔ̄ɔ yo bə mi kə. 10 Mbaa bii ləə, ‘Baba, nfə ləhəŋ lə?’ I chuu bə mi lə, ‘Ja fa, wə lɛɛ gəŋ ə Damashku, bə́ lə yɔɔ bə wə mə nimi linhliŋ llɨŋ Chu bwɛɛla chi lə wə nɨŋ.’ 11 Ə chulə nnoo həmə, kinchaa kie fə mbandii, bəne bbəŋ kkə màa kkə jāa bie bə bə́ hlə chɛchɛ jə mi, lɛɛ gəŋ bə mi ə Damashku.

12 Mbɛɛ ju mà duŋ həmə ə Damashku, yii liih duŋ lə Anania, i màa i bwɔ̄kwe bə Chu, i chì bəŋkɨnə biaa, Bəjuu bənhliŋ bbəŋ bə́ màa bə́ dūŋ həmə dòhi wu. 13 I bwo ŋəŋ mi, lemi baha ə mi tɨŋ hlə yɔɔ bə mi lə, ‘Shɔl ŋwa nəh, baa yee wə ŋə̄ŋ ə bieŋ go.’ Ə bwɔɔ yo bəŋ nəni, nhlə nchu ŋəŋ ə bieŋ go, nhlə ŋəŋ dəŋ ə wu Anania go. 14 I yɔɔ bə mi lə, ‘Chu bəche tah biaa ma shaala wə lə wə kələ fieŋ ffɨŋ i kìɛɛ, bələh wə ŋəŋ ə Ŋwuŋ wi Nimi kiyəyəŋ go, wo biyɔɔnə bbɨŋ bi fù ə wu jə. 15 Wə lə duŋ mbɛɛ nnu wə lə yee wə dōntə kiih, wə yɔ̀ɔ bə bəne bənhliŋ fieŋ ffɨŋ wə ŋəŋna bə ffɨŋ wə woo. 16 Ye fi duŋ lə nəni fidiɛɛ, wə baa ke laha lə? Ja fa bə́ yii wə ə njɔ, wii yíwaha yo, yee wə nôŋ bə Baba.’

Pwɔɔ yɔɔ ye Jisho mà faŋ wu ə bəne bbəŋ bə́ dùŋ kə duŋ nə Bəjuu mə

17 Nja chu dɨŋ ə Jelushalɛŋ, lə n'yee nchēe Chu ə chəŋ ntofi mə, fieŋ ye yobutuu lə kwo mi. 18 Ŋŋəŋna ə Baba go ə fieŋ fie mə, i yɔɔ bə mi lə, ‘Fə chichii wə kee fu yaŋ ə Jelushalɛŋ chəkə yulahalə bəne bə yaŋ duŋ ə bə́ bemi fieŋ ffɨŋ wə yu kēeh kɨŋŋ kə.’ 19 Nchuu bə wu lə, ‘Baba, bə́ kələ kpee ba lə mmàa mbā bənlɛɛ ə chəŋ cheenə Chu mə, ŋkwò bəne bbəŋ bə́ yiila tɔ́ŋ ə wə mə, ŋkwùŋ bə́. 20 Bwɔɔ nnu bə́ màa bə́ jīi Shitifiŋ nnu i màa i dōntə yo ko bə bəne, mmà nduŋ ba həmə nfwɔ̄ŋ. Ə mi nnu bəne bə jiinə bie wu mà fwoo bindu bibə, nə bə mi, ŋkənə.’ 21 Baba baa yɔɔ bə mi lə, ‘No fəŋ, yulahalə nlə faŋ wə je nyɛɛkə ə bəne bbəŋ bə́ dùŋ kə duŋ nə Bəjuu mə.’”

22 Ye Pwɔɔ màa i yɔ̄ɔ lə bəne bie wə̄lə, lə biyɔɔnə bɨhŋ fu ə wū jə, bə́ chɔɔ bəŋgɛɛmə buh gbaaŋ, bə́ yɔ̄ɔ lə, “Bə́ laa dɨŋ nu mbɛɛ ə mbiŋ nu mə bu laanə. Ə kə duŋ nə mbɛɛ nnu duŋ ə i duŋ fa kə.” 23 Bə́ gɛ̄ɛmə nəni, bə́ chāhi bindu bibə hə buh, bə́ lɛ̄ɛ luu hə buh. 24 Che kwoo ki bikuu bi bəne bə bicha hlə yɔɔ lə bəne bə bicha bie jə gəŋ bə Pwɔɔ ə kwili libə mə, lə bwɔɔ nnu bə́ gəŋ bə́ hloo wu, bə́ bii wu bieŋ, lə i yɔɔ fieŋ ffɨŋ fi fə fie maa yee Bəjuu gɛ̀ɛ wu nəni. 25 Bə́ hlə gəŋ kwaa wu, ja lə bie bə́ hlōo wu, Pwɔɔ bii bə che kwoo ki kintu ki bəne bə bicha kidi kkɨŋ ki mà lemi kie həmə ləə, “Ŋkɨnə yii bèmi lə bə́ kwuŋ mbɛɛ nnu Luŋ bə́ kaani kə hlaa lə nhlaa wi kə lə?” 26 Kwoo ki kintu ki bəne bə bicha kie wo nəni, i hlə gəŋ ŋəŋ che kwoo bə́, bii bə wu ləə, “Wə kiɛɛ bəmɔŋ ə duŋ laha lə? Kələ lə mbɛɛ nu lə ŋwuŋ nnu Luŋ.” 27 Che kwoo yo wo nəni, hlə gəŋ ŋəŋ Pwɔɔ bii bə wu ləə, “Yɔɔ mi dəŋ, wə duŋ ŋwuŋ nnu Luŋ lə?” I bemi. 28 Che kwoo yo yɔɔ bə wu lə, “Mmà ntɔŋna kpo kiŋaaŋkə, nhlə n'yee ndūŋ ŋwuŋ nnu Luŋ.” Pwɔɔ chuu bə wu lə, “Nduŋ fɨŋŋ mbwee nnu Luŋ kibɛɛ.” 29 Bəne bbəŋ bə́ mà duŋ bie lə bə́ bii bieŋ bə wu hlə tu wuh ə wu dɨŋ cha mi. Che kwoo bə́ yo lɔ dəŋ yulahalə i mà yɔɔla lə, bə́ kwaa Pwɔɔ ə duŋ ŋwuŋ nnu Luŋ.

Pwɔɔ təŋ kwoo kiih ə bəne bbəŋ bə́ hlàah kitɨŋ ki Bəjuu fwi

30 Che kwoo yo yee i kīɛɛ ba bəŋkələ fieŋ ffɨŋ Bəjuu bwɛ̄ɛ fie ə Pwɔɔ go. Lə bu fu wu, i yɔɔ bə́ hlooli Pwɔɔ, i chee bəche ntofi bəŋkuntaŋ bəŋkuntaŋ maa bəne bənhliŋ bbəŋ bə́ hlàah kitɨŋ, bə́ bwo, i chi Pwɔɔ ə bə́ fwi.