Nimi 21

Pwɔɔ gəŋ ə Jelushalɛŋ

Bee Pwɔɔ cheemə bə bə́, hlə ja həmə le ə chəŋ nni njɔ mə ntiiŋ, bwii Kosh. Lə butuu fu wu, kkə gəŋ Lɔd, kkə ja həmə, gəŋ ə Patala. 2 Ye kkə bwii lə həmə, kkə ŋəŋ chəŋ nni njɔ ji i gə̄ŋ ə Fonishia, kkə lɛɛ mə yee kkə gə̄ŋ. 3 Lə kkə ŋəŋ Shayplu, kkə she wu kwaŋ məə kah gəŋ fu ə Taya, kitɨŋ ki Shilia dɔhɔ kkɨŋ chəŋ nni njɔ mà duŋ bənfwoo bieŋ. 4 Kkə kiɛɛ bəne bə kimbemi, duhŋ bə bə́ joo fumanyaaŋ. Fiana Wɛɛŋ fə bə́ keeh Pwɔɔ lə i kə mɔŋ nə bəŋgəŋ ə Jelushalɛŋ kə. 5 Bee bə́ nɔŋ, lə butuu bwaa bwo wunə bu nonə, kkə hlə jə je. Bə́ bənhliŋ bə bəkwɛɛ bəbə maa bwɔni, chii be bwo fu ə kibalaki kie mə gəŋ bwii ə nɔ həkpa, kkə bɛŋ núh kwe bə bə́, chee Chu hlə cheemə. 6 Kkə lɛɛ ə chəŋ nni njɔ mə, bə́ chu dɨŋ ə bə́ kwuŋ.

7 Kkə no Taya, jə je gəŋ fu ə Tolimayi. Bee bəŋgwoŋ bə kimbemi cheemə, nɔŋ butuu bumwi. 8 Butuu fu wu, kkə ja gəŋ fu ə Kayishaliya, gəŋ ə chəŋ Filip mə nnu i maa i jāa i dòntə die Chu, bee bə́ nɔŋ. Filip nu mà duŋ mbɛɛ ə kintu ki bəne bə fumanyaaŋ bbəŋ bə́ mà shaa bie mə. 9 I mà kənə bwɔni bəkwɛ bənua, bbəŋ bə́ kaani kə kələ bənəə kə, bə́ màa bə́ bā bəndontə bəne bieŋ bbɨŋ bə́ wò ye Chu yɔ̀ɔ. 10 Kkə duŋ həmə joo kiŋaaŋkə, mbɛɛ ju nnu i màa i bā bəndontə bieŋ bbɨŋ i wò ye Chu yɔ̀ɔ hlə ja ə Judia bwɔ bwo həmə yii liih duŋ lə Agabu. 11 I ja bwo ŋəŋ be, jə kicha ki Pwɔɔ, wu Agabu kwaa wuh ŋiih bə bibweenə biih, hlə yɔɔ lə, “Fiana Wɛɛŋ yɔɔ lə ə li nnu Bəjuu bə Jelushalɛŋ yá kwaa mbɛɛ nnu i kə̀nə nu kicha kɨhŋ, nə wu ə kwáŋ ŋə bəne bbəŋ bə́ dùŋ kə duŋ nə Bəjuu.” 12 Kkə wo nəni, be bə bəne bənhliŋ bbəŋ bə́ mà duŋ həmə yee kkə kɔ̄nɔ Pwɔɔ lə i kə gəŋ nə ə Jelushalɛŋ kə. 13 I chuu lə, “Fɨhŋ lə laha ffɨŋ bə fə̄ nəni lə? Bə kə kələ lə bə dē nəni bə nɛ̄hiŋ tɔŋ lɨŋŋ kə lə? Ŋkə bwɛɛ lə kwaa bənlɛɛ ə munfwa mə ə Jelushalɛŋ kə. Mbwɛɛla dəŋ bəŋkpe mə yu yii li Baba Jisho.” 14 Ye je mà nalə kə baa lə duŋ bənfə lə i gaanə kinhle kiih, kkə hlə wii, bwo yɔɔ kwaa lə, “Fi duŋ kwaa ye Baba kìɛɛ lə.”

15 Joo kah, kkə buhuŋ bieŋ biaa, yee kkə bīŋ ə Jelushalɛŋ. 16 Bəne bə kimbemi bədi bə Kayishaliya biŋ bwo jə be kkə gəŋ ə Nashɔŋ chəŋ dɔhɔ kkɨŋ kkə mà duŋ bənɔŋ mu. Nashɔŋ nu mà duŋ mbɛɛ nnu Shayplu, i mà duŋ mbɛɛ ə bəne bbəŋ bə́ mà hlaala yii tɔ́ŋ ə Jisho mə.

Pwɔɔ la Jɛŋ kpuuni bə bəche kimbumə ki bəne bə kimbemi

17 Ye kkə mà bwiilə ə Jelushalɛŋ, bəne bə kimbemi bə həmə tɨŋ jə be kinwaakə. 18 Butuu fu wu, bee Pwɔɔ la Jɛŋ kpuuni, bəche kimbumə mà duŋ dəŋ həmə bənhliŋ. 19 Pwɔɔ cheemə bə bə́, hlə nachɛ bə́ fieŋ finhliŋ ffɨŋ Chu mà fəə bə bəne bbəŋ bə́ dùŋ kə duŋ nə Bəjuu kah ə nimi liih mə llɨŋ i màa i nɨ̄ŋ. 20 Bə́ wo nəni, hlə chɔɔ yee bə́ fāŋ kindohi bə Chu. Kwaalə, bə́ ja bwo yɔɔ bə Pwɔɔ lə, “Ŋwa nəh ya, kee ŋəŋ ye Bəjuu mà yiilə tɔ́ŋ ə Jisho mə ə bənchuku mə. Kwaalə, bie bə́ kaani bə́ lèmi ntakə ə bəŋkɨnə bə Mushe bəŋ, 21 bə́ yɔɔla bə bə́ ye wə jàa wə làanə Bəjuu bbəŋ bə́ dùŋ ə bitɨŋ bidi mə lə bə́ tukwaŋ ə bəŋkɨnə bə Mushe go, yɔɔ lə bə́ kə yee bə́ nyīeŋ jó yí bwɔni bəbə kə, bə lə, bə́ kə yee bə bə̂lə too wi kwili kə. 22 Ye fi duŋ lə lə bə́ kəla lə wə bwoo, duŋ ə kkə fə ləhəŋ fidiɛɛ lə? 23 Kkə lə yɔɔ wə fieŋ ffɨŋ wə fə. Kkə kənə bəne fəŋ bənua bbəŋ bə́ mà chi tɨmə bə Chu. 24 Jə bə́, bəə bə́ gəŋ giaali go ŋieeŋ, ə wə hluŋ fieŋ finhliŋ ffɨŋ bə́ kənə bənhluŋ fo bə́ lə kɔɔ bikuu bibə. Ə wə fə nəni, ə bəne bənhliŋ hlə kələ lə wə yii chì dəŋ bəŋkɨnə bə Mushe, ə bieŋ binhliŋ bbɨŋ bə́ yɔ̀ɔ ko nakə duŋ nə chɛɛŋ kə. 25 Ki bəne bə kimbemi bbəŋ bə́ dùŋ kə duŋ nə Bəjuu duŋ kkə mà shiila bieŋ kiŋwaati faŋ bə bə́ lə bə́ kə yee bə́ dī biləə bbɨŋ bə́ tofa bəcheh mu kə. Bə́ kə yee bə́ dî ŋgɔŋ mə nyaŋ kə. Bə kə yee bə́ dî nyaŋ nni bə́ kaani kə nyieenə lə ŋgɔŋ fu ə yi go kə. Bə́ kə yee bə́ wâali kə.” 26 Nəni, Pwɔɔ hlə jə bəne bie, butuu fu wu bə́ gəŋ giaali go ŋəbə. Pwɔɔ hlə gəŋ ə chəŋ ntofi mə, gəŋ yɔɔ butuu bbuŋ joo ŋə ŋgiaalinə gbo yá bwo kah, ə bə́ hlə fə bəntofi ə bə́ go mbɛɛ mwi mwi.

Bə́ faa Pwɔɔ ə chəŋ ntofi mə

27 Lə joo ŋie chu gəŋ ka ŋŋəŋ ŋə mà duŋ ŋie fumanyaaŋ, Bəjuu bədi bbəŋ bə́ mà fu ə Ɛshia ŋəŋ Pwɔɔ ə chəŋ ntofi mə, hlə bweemə kintu ki bəne kie lə, bə́ kwo wu, 28 bə́ kpēe liwili bə́ yɔ̄ɔ lə, “Bəne bə Ishlael, bə chɨnə be. Ə mbɛɛ nu nnu i jàa i kèeh bəne bieŋ biwaha ə bidɔhɔ binhliŋ mə ki kitɨŋ kiaa bə bəŋkɨnə bə Mushe maa ki chəŋ ntofi ni. I kaana jə bəne bbəŋ bə́ dùŋ kə duŋ nə Bəjuu, bwo bə bə́ ə chəŋ ntofi ni mə fəŋ, bihi be dɔhɔ kiwɛɛŋ kɨhŋ.” 29 Bə́ mà yɔɔ nəni, yulahalə bə́ mà ŋəŋna Pwɔɔ jàa ə kibalaki kie mə bəə Tolofimu mbɛɛ nnu Ɛfɛshu. Bə́ hlē lə Pwɔɔ lɛɛla bə wu ə chəŋ ntofi mə. 30 Liwili le fə kibalaki kie kinhliŋ nənə, bəne lə̄lə bə́ bwō həmə. Bə́ shaŋ kənə Pwɔɔ, kpa fu bə wu ə chəŋ ntofi ye mə, cha mi, bə́ hlə baŋ biwulə bi fwíih ŋie. 31 Bə́ hlə yee bə́ kīɛɛ lə bə́ jii Pwɔɔ, hlɨŋ ye lɛɛ ə bituŋ bi che kwoo ki bikuu bi bəne bə bicha bə Luŋ, lə ki Jelushalɛŋ kinhliŋ kie ki hlāamə. 32 I bu ja cha mi, jə bəne bə bicha bə bikuu bidi bi bintu bi bəne bə bicha, bəə bə́ lələ bwɔ həmə. Ə chulə bəne bie ŋəŋna bə bicha bie go, maa che kwoo ki bikuu bi bicha duŋ mə, bə́ hlə wii bəŋkwuŋ Pwɔɔ. 33 Che kwoo ki bə bicha bie hlə kwo Pwɔɔ, yɔɔ lə bə́ kwaa wu bə fiaŋ fie. I bii bə bə́ ləə, “Nu lə nyəhə lə? Ə duŋ laha ffɨŋ i biha lə?” 34 Bə́ gbe bənfe həmə, bəŋ gɛɛmə fɨhŋ, bilii gɛɛmə filii. I nakə baa lə wo ba ləə ə laha ffɨŋ fi hə duŋ lə. I hlə yɔɔ lə bə́ jə Pwɔɔ bə biŋ bə wu ə bəne bə bicha kwuŋ. 35 Bəne bə bicha bie hlə jə wu, ə chulə yee bə́ bīŋ ə je nni bə́ mà wɛɛ bikpəni buwɛɛnə, bə́ bu kaka tu Pwɔɔ ə ntumə ye kimɔ kie màa ki fɨŋkə lə ə wu dɨŋ. 36 Ki bə̄lə nəni ki gɛ̄ɛmə, ki yɔ̄ɔ lə, “Bə́ laa wu ə nlaamə.”

Pwɔɔ təŋ kwoo kiih

37 Lə bə́ chu gəŋ bənlɛɛ ba bə Pwɔɔ ə kwili li bəne bə bicha bie kwuŋ, i kɔnɔ che kwoo ki bikuu bi bicha bie lə, “Ə duŋ ə n'yɔ̄ɔ fieŋ bə wə lə?” Lə i wo nəni, i bii bə Pwɔɔ ləə, “Wə yii wò die yi Bəglik lə? 38 Ə kə duŋ nə wə ŋwuŋ nnu Ijip nnu i mà chɔɔ yo bidiɛɛni bə bikuu bi kitɨŋ ə bwɔɔ ju bəŋ, kpa kintu ki bəne bibwa binua (4,000) bbəŋ bə́ màa bə jīi bəne, bə́ gəŋ yee bə́ dūŋ ə nji bəə bə́ kə lə?” 39 Pwɔɔ chuu lə, “Nduŋ ŋwuŋ Bəjuu, bə́ mà bwee mi ə Taashu ə kitɨŋ ki Shilishia mə, Taashu duŋ nə kibalaki ki nyieenə kə. Butee wə, nə kwaa mi je n'yɔ̄ɔ bə bəne bəhŋ.” 40 Che kwoo ki bikuu bi bəne bə bicha hlə nə je lə i yɔɔ. Pwɔɔ hlə lemi ye bə́ mà wɛɛlə bikpəni bie, chɨlə bəne bə kwáŋ. Bə́ wii bə kikpuŋ kie, i yɔɔ bə bə́ ə díe yí Hiblu mə, yɔɔ lə: