Nimi 20

Pwɔɔ gəŋ Meshedonia maa Glee

Diɛɛnə kkɨŋ ki mà duŋ kie ə Ɛfɛshu ka, Pwɔɔ dii kintu ki bəne bə kimbemi, keeh bə́ hlə cheemə bə bə́ yee i gə̄ŋ ə Meshedonia. 2 I gəŋ yee i jāa ə wɛ́ɛ ŋie mə, i shìi go ŋə bəne bə kimbemi mə ntakə, hlə le gəŋ ə Glee, 3 duŋ həmə kii tɔh. I hlə no həmə lə mə lə gəŋ lɛɛ ə chəŋ nni njɔ mə gəŋ ə Shilia, i hlə wo lə Bəjuu leela wu ə je. I hlə ŋəŋ lə finwaa lə i fiimə chu dɨŋ ə je ni Meshedonia mə. 4 I màa i jāa bə Shopata ŋwa Pilu nnu Beliya, maa Alishtaku bə Shekundu nnu Teshalonika, maa Gayu nnu Delbi, maa Timɔti, maa Tikiku bə Tolofimu bbəŋ bə́ mà duŋ bəne bə Ɛshia. 5 Bəne bəhŋ hlə gəŋ fwi yee bə́ kē be bə Pwɔɔ ə Towa. 6 Chɔnɔ ki kibele kkɨŋ bə́ kə yii lə jɔ mə kə kah, kkə lɛɛ ə chəŋ nni njɔ mə ə Filipi, kkə jə joo tiŋ chili bə́ ə Towa, bee bə́ duŋ həmə joo fumanyaaŋ.

Pwɔɔ baa la gbɛŋ ə kimbumə ki Towa mə

7 Lə ə bwo duŋ butuu bu fwi ə kibumwe go, kkə bumə ə kidaŋ bəŋ bəŋgaa kibele. Ye Pwɔɔ mà duŋ lə bəno həmə ye bu fu wu lə, i hlə gbe bən'yɔɔ bə bə́, yɔɔ gəŋ bwii ə butuu kintekinte. 8 Bee bə́ mà duŋ ə chəŋ ni nte nni buh mə, bimɔɔ dō mu kiŋaaŋkə. 9 Hlɔŋ ŋiaŋ nyo ju nnu yii liih mà duŋ lə Yutiku i mà shiila ə fiwulə bəŋ. I gbe bənɔŋ kinɨŋ, ye Pwɔɔ màa i yɔ̄ɔ lə i gə̄ŋ fwi fwi. Lə kinɨŋ chɔɔ bə gɔ wu gbaaŋ, i ja mə fu bwo gbe yaŋ kwe, həmə mà duŋ ə ncháŋ shɔ bəŋ chɔɔ jə kwe. Bəŋgəŋ jə wu mà chu duŋ i kpee. 10 Pwɔɔ hlili gəŋ gbe ə wu bəŋ, kwaamə wu yɔɔ bə bəne lə, “I yo ŋkeeh, bə kə bii lə kə.” 11 Pwɔɔ fiimə biŋ chu ə chəŋ ni nte nni buh ye mə, gaa kibele di, baa chɔɔ bən'yɔɔ, hlə yɔɔ hləŋ hləŋ butuu wu i hlə no. 12 Bəne gəŋ jə hlɔŋ ŋiaŋ nyo yo kwələ bə wu ə chəŋ i duŋ ŋkee, tɔ́ŋ də bə́ gbaaŋ.

Pwɔɔ nə keehnə bə bəche kimbumə bə Ɛfɛshu

13 Kkə lɛɛ ə chəŋ nni njɔ mə, gəŋ Asho, ye Pwɔɔ mà bwɛɛlə lə kkə lə chili wu həmə. I mà yɔɔ nəni, yulahalə i mà kiɛɛ lə i jaa kwe. 14 I kwo be ə Asho, kkə hlə jə wu ə chəŋ nni njɔ mə, bee bə́ gəŋ fu ə Mitiliŋ. 15 Kkə no həmə ə chəŋ nni njɔ mə, bu fu wu, kkə bwii baha ə Kiyo, kahiŋ, bu baa fu wu, kkə bwii ə Shamo, baa kahiŋ, bu baa fu wu, kkə lɛɛ ə Miletu. 16 Kkə màa kə jāa nəni, kkə kə̀ə bu kəənə ə Ɛfɛshu yulahalə Pwɔɔ mà kə kiɛɛlə lə i kɛhiŋ bwɔɔ ə Ɛshia kə. I màa i gə̄ŋ chichii ləkə duŋ ə i duŋ ə Jelushalɛŋ butuu bu Chɔnɔ ki Pɛntikɔ mə.

17 Ye kkə lɛɛ lə ə Miletu, Pwɔɔ faŋ hlɨŋ bə bəche kimbumə ki bəne bə kimbemi bə Ɛfɛshu lə bə́ bwo ŋəŋ wu mə. 18 Lə bə́ bwo, i yɔɔ bə bə́ lə, “Bə kə̀lə ye fwɔ wuŋŋ mà duŋ bə bəŋ chɔɔ jə butuu bu fwii bbuŋ mmà mbwo diɛŋ gbu ə shishɔ yi Ɛshia mə. 19 Mmà bwɔɔkwe bə gbo wuŋŋ, nnɨŋ bə Chu bə ndəŋ dí. Ŋŋəŋ dəŋ ə bəŋgə go ə jé mə kiŋaaŋkə ye Bəjuu màa bə́ hlɔ̄ɔ wuh ə mi dɨŋ. 20 Bə bie bə kə̄lə dəŋ ye mmà ŋkeeh bəŋ ə ŋwiŋ nte, njàa ŋkèeh dəŋ ə chə́ŋ chə́ŋ. Mmà kə nələ fieŋ fidi ffɨŋ duŋ ə fi chɨnə bəŋ kə. 21 Mmàa n'yɔ̄ɔ kwaa ə duŋ fieŋ fimwi bə Bəjuu maa bə bəne bbəŋ bə́ dùŋ kə duŋ nə Bəjuu kə, n'yɔ̀ɔ lə bə́ fii tɔ́ŋ ŋəbə chu bə Chu, yii tɔ́ŋ ə Baba ya Jisho Kleto mə. 22 Fidiɛɛ bə wələ wo, n'yu gə̄ŋ ə Jelushalɛŋ ə duŋ ye Fiana Wɛɛŋ yɔɔ bə mi, ŋkə ŋkələ fieŋ ffɨŋ fi lə fə mi mə kə. 23 Fieŋ ffɨŋ ŋkələ duŋ kwaa lə bidɔhɔ binhliŋ bbɨŋ ŋkàh ə bi mə, duŋ Fiana Wɛɛŋ yɔ̀ɔ kwaa bə mi lə munfwa bə bəŋgə bie bi kē mi fwi. 24 Kwaalə, ŋŋəŋnə lə kinduŋh kɨŋŋ lə fieŋ kə, kahiŋ lə ŋkaa nimi llɨŋ Baba Jisho mà nə le bə mi li dùŋ lə yee ndōntə hlɨŋ yi nwaa ki tɔŋ linwaa llɨŋ Chu nyiila bə bəne biih.

25 Fidiɛɛ, bə wələ wo, ŋkələ lə mbɛɛ ju hləŋ ə bəŋ mə nnu bee bə́ ma duŋ, ndòntə ki muŋkɨŋ mu Chu nnu i kə baa lə ŋəŋ ə bushi buŋŋ go kə. 26 Nhlə n'yee n'yɔ̄ɔ bə bəŋ daŋ lə ə mbɛɛ ju ə bəŋ mə lə la fidiɛɛ, kəə nlə bə kwáŋ həmə kə, 27 yulahalə mma kə nələ bən'yɔɔ bəŋ fieŋ finhliŋ ffɨŋ Chu kìɛɛ kə. 28 Bwɔɔ nnu bə she, yee bə fwôŋ bikuu bieeŋ maa kintu ki bəne bə kimbemi bbəŋ bə́ dùŋ ye shɔ́ŋ lə, bbəŋ Fiana Wɛɛŋ chiee bəŋ ə bə́ bəŋ. Bə dùŋ bənfwoŋ shɔ́ŋ bə kimbumə ki bəne bə Chu kkɨŋ i mà taŋ bə ŋgɔŋ mə Ŋiaani. 29 Ŋkələ kpee lə bwɔɔ nnu nlə ntu gbu, ə bəkuula bwo lɛɛ ə kintu kieeŋ mə, kə shaalə mbɛɛ nnu bə́ lə kwo kə. 30 Bəne bədi lə fu maa ə bəŋ mə, bə́ fihi kintu ki bəne bə kimbemi, bə́ kpà bə́ chù bə bə́ ə kintu kibə mə. 31 Nəni, yee bə jə̂ bwɔɔ, bə ŋoo lə ə bigoŋ bitɔh mə mmàa ŋkēeh bəŋ bənhliŋ ə butuu maa ə bushi bə ndəŋ dí.

32 N'yu nnə̄ bəŋ fidiɛɛ ə kwáŋ ŋə Chu mə maa ə die yi nni i dùŋ ki kinchɨnə ki Chu bə bəne biih. Die ni duŋ ə i fə ə yee bə kō, fo bə lə kənə dɔhɔ ə wɛɛ wwuŋ Chu mà chiee bəne bbəŋ i fəə lə ə biih. 33 Mmàa ndūŋ kə kənə ŋgɨŋ kpo wi mbɛɛ ləkə kindu ki mbɛɛ kə. 34 Bə kələ kinwaa lə ə kwáŋ ŋəŋŋ ŋŋəŋ ŋə maa ŋə nɨ̀ŋ fieŋ finhliŋ ffɨŋ bee kintu kɨŋŋ kìɛɛ. 35 Ə bieŋ binhliŋ mə mmà nnyiila bə bəŋ lə mbɛɛ kənə bənɨŋ ba gbaaŋ i hlə yee i chɨ̄nə bəne bə ŋgə, i ŋòo ye Baba Jisho màa i yɔ̄ɔ lə lə, ‘Kintɨŋ kiŋkuntaŋ dùŋ ki mbɛɛ nnu i nə̀ bunənə, kah mbɛɛ nnu i jə̀ bujənə.’”

36 Ye Pwɔɔ kaanə lə yɔɔ nəni, bəə bə́ bənhliŋ hlə bɛŋ núh kwe, chee Chu. 37 Bə́ ja buu ndəŋ yee bə́ dē, bə́ kukə Pwɔɔ bə́ yōhiŋ wu lə bə́ she. 38 Fieŋ ffɨŋ fi mà fə lə yee bə́ dē ba gbaaŋ nəni, duŋ yu die nni Pwɔɔ mà yɔɔ ye lə bə́ baalə ŋəŋ ə bushi bwii go kə. Bə́ hlə chii wu gəŋ bwii ə dɔhɔ kkɨŋ mə lə lɛɛ ə chəŋ nni njɔ mə.