Nimi 19

Pwɔɔ gəŋ ə Ɛfɛshu

Ə mà duŋ bwɔɔ nnu Apolo mà duŋ ə Kɔlɛŋ, Pwɔɔ jə je nni mə nte nte ə wɛ́ɛ ŋŋəŋ i màa i jāa ŋie mə, bwii Ɛfɛshu. Ye i bwii lə həmə, i ŋəŋ kintu ki bəne bə kimbemi bədi, 2 bii bə bə́ ləə, “Fiana Wɛɛŋ mà bwoo ə bəŋ mə bwɔɔ nnu bə mà yii tɔŋ ə Jisho mə lə?” Bə́ chuu lə, “Kkə kə hlaa lə wo lə fieŋ fidi fie ye Fiana Wɛɛŋ lə kə.” 3 Pwɔɔ bii ləə, “Ə fi duŋ nəni, kəə bə́ mà yii bəŋ ə njɔ yulaha lə?” Bə́ chuu lə, “Bə́ mà yii be ə njɔ bələ ye Jɔɔŋ màa i dōntə.” 4 Pwɔɔ hlə yɔɔ bə bə́ lə, “Jɔɔŋ màa i yīi bəne ə njɔ, bənyii lə bə́ fiila tɔ́ŋ ŋəbə, i màa i yɔ̄ɔ lə bə́ bemi ə duŋ mbɛɛ nnu i yu bwō yo ə wu dɨŋ, mbɛɛ nnu i yɔ̀ɔ yo kiih lə Jisho.” 5 Bəne bie wo ye Pwɔɔ yɔɔlə nəni, bə́ hlə yii bə́ ə njɔ ə duŋ ba ə yii li Baba Jisho bəŋ. 6 Pwɔɔ chi kwaŋ ə bə́ bəŋ, Fiana Wɛɛŋ bwo ə bə́ mə. Bə́ hlə ja yee bə́ yɔ̄ɔ díe yyɨŋ bə́ duŋ kə kələ kə, bə́ yɔ̀ɔ dəŋ bə bəne bieŋ bbɨŋ bə́ wò ye Chu yɔ̄ɔ. 7 Bəne bie mà duŋ ye yuufi ə nchɔ bəfwe lə.

8 Pwɔɔ hlə yee i dūŋ kwaa ə Ɛfɛshu, i gə̀ŋ ə chəŋ cheenə Chu mə ə kii bəŋ tɔh, i yɔ̀ɔ bə bəne mə kə lɔɔ kə. Bəə bə́ nòo noonə, i jù lə bə́ bemi fieŋ ffɨŋ i yɔ̀ɔ ki muŋkɨŋ mu Chu. 9 Bəne bədi ta bikuu nɨhŋ bəmbemi, hlə yee bə́ yɔ̄ɔ náami ŋəŋ'waha ə bəne dí ki Je Baba. Pwɔɔ she bə́, jə kintu ki bəne bə kimbemi, bəə bə́ gəŋ ba ə duŋ ə chəŋ keehnə nni Tayilanu mə, bə́ yɔɔ bə bə́ həmə ə joo mə ŋənhliŋ. 10 Pwɔɔ fə nəni ə bigoŋ bəŋ bifwe. Nəni, Bəjuu maa Bəglik bənhliŋ bə kitɨŋ ki Ɛshia kie mə wo die Baba.

Bəne bə Shkefa yee bə́ fɛ̄hiŋ Pwɔɔ

11 Pwɔɔ yee i dūŋ, Chu fə̀, i fə̀ bi fənə biŋkpee gbo ə duŋ bbɨŋ bi ŋɨŋ gəə. 12 Bə́ jə fieŋ fi wu go ye nshɛŋkɛ kindu lə, ləkə kindu kiih ki nimi, gəŋ tuu ə mbɛɛ jəŋ go, i ŋwunə bu ŋwunənə, ə duŋ nnu i kə̀nə fiana yili ə wu go, i fu.

13 Bəjuu bədi mà duŋ bbəŋ bə́ màa bə́ bā bənjaa bə́ fwoo bəfiana bəyili ə bəne go, ja yee bə́ jū bənchee yii li Baba Jisho bənfwoo bəfiana bie. Mbɛɛ ja yee i yɔ̄ɔ bə bəfiana bəyili bie lə, “Nfwoo wə ə yii li Jisho nnu Pwɔɔ dòntə yo bəŋ.” 14 Bəne bbəŋ bə́ màa bə́ mɔ̄ŋ bie fieŋ fie mà duŋ fumanyaaŋ, ə màa bwɔni bə Shikefa nnu i dùŋ che kwoo ki bəche ntofi Bəjuu. 15 Fiana yili yo duŋ duŋ bii bə bə́ ləə, “Ŋkələ Jisho, ŋkələ dəŋ Pwɔɔ, bə́ dùŋ ŋkwo weŋ bə nyəhə lə?” 16 Mbɛɛ nnu fiana yili mà duŋ yo ə wu mə hlə gbe ə bəne bie bəŋ, gɔhɔ bə́ kwe, bə́ bwaalə fu mu mbɛɛ yo chəŋ bə́ duŋ bichi bindende bə bibiaa go.

17 Bəjuu bə Bəglik bənhliŋ bbəŋ bə́ mà duŋ bie ə Ɛfɛshu wo fieŋ fie, yee bə́ lɔ̄. Bəne hlə yee bə́ kōhi yii li Baba Jisho gbaaŋ. 18 Bəne kiŋaaŋkə bbəŋ bə́ mà duŋ bie ba bəne bə kimbemi bwò bə́ yɔ̀ɔ wɛɛŋ bieŋ bi jɨbə bbɨŋ bə́ màa bə́ fə̄. 19 Bədi kiŋaaŋkə bbəŋ bə́ màa bə́ fə̄ nfíŋ, buhuŋ biŋwaati bibə bi nfíŋ, bə́ bwò bə bi, bə́ tɔ̀ŋ ə bəne dí. Bə́ fa kpo wi biŋwaati bie binhliŋ, wi fu kpo wi bichu bibwa mbwɛɛnshiŋ (50,000).^ª 20 Nəni, bieŋ bɨhŋ fə die Baba yee i lɛ̄ɛ ə tɔŋ ŋə bəne mə bə muŋgeni, i kò i gə̀ŋ kwaa fwi fwi.

Bəne chɔɔ bidiɛɛni ə Ɛfɛshu

21 Ə bwo chu bwɔɔ nnu dɨŋ, Pwɔɔ ŋəŋ lə mə gəŋ ə Jelushalɛŋ, bwɔɔ nnu mə lə yee i gə̄ŋ, mə lə kah ə wɛ́ɛ ŋə Meshedonia bə ŋə Akeya mə. I baa yɔɔ lə, “Bwɔɔ nnu nlə gəŋ bwii ə Jelushalɛŋ, ŋkənə bəŋgəŋ dəŋ gəŋ bwii ə Luŋ.” 22 I hlə hlaa faŋ bəne bəfwe, Timɔti bə Elashtu bbəŋ bə́ chɨ̀nə wu, bə́ gəŋ fwi ə Meshedonia. I she baa duŋ ə Ɛshia chɛɛ.

23 Ə bwo duŋ dəŋ ə bwɔɔ yo bəŋ, bidiɛɛni duŋ duŋ gbe ə Ɛfɛshu ki Je Baba ə kə duŋ nə bi chɛɛ kə. 24 Che mbih jo ju mà duŋ həmə, yii liih duŋ lə Demitiyu, i màa i bīh bieŋ bbɨŋ bi bù chəŋ ntofi chu nnu bə́ chèe lə Atemi.^ª Nimi lɨhŋ màa li nə̄ kpo bə bəne bbəŋ bə́ màa bə́ bīh bie jó ə kə duŋ nə wu chɛɛ kə. 25 Demitiyu hlə buhuŋ bəne bbəŋ bə́ màa bə́ bīh bie jó bənhliŋ maa bəne bbəŋ bə́ màa bə́ nɨ̄ŋ bie dɨŋ lɨhŋ nimi, bə́ bumə. I yɔɔ bə bə́ lə, “Bəŋgwoŋ, bə kələ lə nimi lɨhŋ duŋ llɨŋ kkə kò kpo ə li go. 26 Bə bie bə ŋə̄ŋ bə wò fieŋ ffɨŋ fimbweŋ fɨhŋ lə Pwɔɔ fə̀ fɨhŋ. I jàa i yɔ̀ɔ lə bəcheh bbəŋ bə́ fə bu fənə bə kwáŋ kə duŋ nə bəcheh kə. I fəə nəni, fii bufe bu bəne kiŋaaŋkə yaŋ Ɛfɛshu, i yu fīi dəŋ bu bəne bə Ɛshia bənhliŋ bə́ bèmi bə wu. 27 Ŋŋəŋ lə nimi liaa lɨhŋ lə kənə yii liwaha. Ə fɨhŋ kwaa kə, chəŋ ntofi chu ŋkuntaŋ kpɛ Atemi lə bwo chu fieŋ finya. Ə fi lə duŋ lə nəni, kəə ə giaali bə chu ŋkuntaŋ nunu nnu bə́ bwɔ̀ yo kwe bə wu ə Ɛshia kiɛkiɛ, mbiŋ mənhliŋ bwɔ̀kwe dəŋ bə wu.”

28 Lə bəne bie wo nəni, tɔ́ŋ fi bə́ ə nfi mə. Bə́ hlə chɔɔ bə́ gɛ̄ɛmə, bə́ yɔ̄ɔ lə, “Atemi nnu Ɛfɛshu dùŋ chu ŋkuntaŋ.” 29 Kibalaki kie kinhliŋ hlaamə. Kimbumə ki bəne kkɨŋ ki hə bumə kie hlə biŋ ə Gayu bəə Alishtaku go, ə màa bəne bə Meshedonia bbəŋ bə́ màa bə́ jāa bə Pwɔɔ, kpa gəŋ bə bə́ ə chəŋ kimbumə bə́ nyieenə mə. 30 Pwɔɔ kiɛɛ bənlɛɛ gəŋ ə kimɔ kie fwi, bəne bə kimbemi nɨhŋ. 31 Bəne bədi bəŋkuntaŋ bəŋkuntaŋ bə həmə bbəŋ bə́ kənə kitɨŋ kie bbəŋ bə́ mà duŋ bədɔɔ biih, baa faŋ hlɨŋ bə wu bə́ kɔ̄nɔ wu lə i kə mɔŋ nə bu mɔŋnə lə i diɛŋ gbu həmə kə. 32 Kimɔ kkɨŋ ki mà bumə kie həmə hlaamə bəŋgɛɛmə bu gɛɛmənə. Bədi gɛ̄ɛmə fɨhŋ, bədi gɛ̄ɛmə filii. Bəne kiŋaaŋkə mà kə kələ dəŋ fieŋ ffɨŋ bə́ mà bumə fie həmə yu fi kə. 33 Bəjuu bie hlə jə Alekshanda ə kimɔ ki bəne kie mə hlaa wu fwi, bəne bədi ŋəŋ lə bə́ hlē lə i kəla ki fieŋ fie. I hlə yee i chɨ̄lə bəne bə kwáŋ bənhlaa kah bə gbo wiih. 34 Bwɔɔ nnu bəne bie mà kələ lə Alekshanda lə ŋwuŋ Bəjuu, bə́ kaanə gɛɛmə bu gɛɛmənə gəŋ fwi fwi ye die mbɛɛ mwi lə, yɔɔ lə, “Atemi nnu Ɛfɛshu dùŋ chu ŋkuntaŋ.” Bə́ gɛɛmə nəni, gəŋ bwii ye bəntaŋ bə bwɔɔ bəfwe lə.

35 Ŋwuŋ bieŋnə nnu həmə ə kibalaki kie mə bwo chɨlə bə́, bə́ de shiiiŋ. I bii bə bə́ ləə, “Bəne bə Ɛfɛshu, mbɛɛ ju hləŋ fəŋ Ɛfɛshu nnu i jɨmə lə ə kənə be chəŋ ntofi chu Atemi maa tə li chu llɨŋ li mà gbe le ə buh lə? 36 Ye mbɛɛ duŋ lə kə duŋ nə həmə nnu duŋ ə i noo fɨhŋ kə, ə bə́ hə də ba shiiiŋ, kə yoonfə nəni kə. 37 Bə bwoo bə bəne bəhŋ fəŋ bə́ kə yee fieŋ fidi ə chə́ŋ yí bəcheh mə kə, ləkə bən'yɔɔ naami liwaha ə chu ya kpɛ nu go kə. 38 Ə Demitiyu bə bəne biih lə kənə nhlaa fəŋ bə mbɛɛ ju, kəə butuu bunhlaa bwe həmə bbuŋ duŋ ə bə́ gəŋ ŋəŋ bəne bə hlaanə bənhlaa, ə bəə bə́ hlaa. 39 Ə duŋ lə fieŋ fidi fie həmə ffɨŋ fi kah fɨhŋ, kəə duŋ ə bə́ kee fi ə duŋ ə shiinə ki bəche kwili mə. 40 N'yɔ̄ɔ nəni, yulahalə ŋŋəŋna lə fieŋ fi daŋ fɨhŋ lə yii be ə ŋgə mə lə kkə chɔɔla bidiɛɛni. Ə fi duŋ nəni, Ə kkə nakə kənə fieŋ fintiiŋ ffɨŋ kkə chuu kə.” 41 Ye i yɔɔlə nəni, i hlə yɔɔ kimɔ kie hlaamə.