Nimi 18

Pwɔɔ gəŋ Kɔlɛŋ

Ə chu bwɔɔ nnu dɨŋ, Pwɔɔ ja Ateŋ gəŋ ə kibalaki ki Kɔlɛŋ mə. 2 Ye i gəŋ lə mə, bəə ŋwuŋ Bəjuu ju bənə nnu yii liih duŋ lə Akwila, bə́ mà bwee wu ə Pwɔntu. Akwila bəə kpɛɛ Plishilia màa bə́ kaani bə́ kwələ bwo ə Itali, yulahalə Klawdiyu Ŋkɨŋ nnu Luŋ mà laŋna lə Bəjuu bənhliŋ no həmə. Pwɔɔ hlə la bə́ kpuuni, 3 ə chulə i ŋəŋ ye bə́ bwɛ̄ɛ bwá ŋŋəŋ bə́ lù bichaŋ mu, ə duŋ dəŋ nimi llɨŋ wu Pwɔɔ màa i dūŋh yu li, i hlə yee i dūŋ həmə, bəə bə́ nɨ̀ŋ. 4 Ə bwo wunə ə joo ŋə bunte mə ŋənhliŋ, i gəŋ ə chəŋ cheenə Chu mə, i yɔ̀ɔ bə Bəjuu maa Bəglik həmə, i jù bənfə lə bə́ bemi fieŋ ffɨŋ i kèeh.

5 Bwɔɔ nnu bə Shila bəə Timɔti mà ja ə Meshedonia bwo, Pwɔɔ hlə jə bwɔɔ wi kiɛkiɛ i dòntə ə duŋ die Chu, i nyìi bə Bəjuu lə Nchuu Fwoo nnu Chu mà kaachi yo lə Jisho. 6 Kwaalə, Bəjuu bie ja yee bə́ nɨ̄hŋ fieŋ ffɨŋ i yɔ̄ɔ fie, bə́ tò wu. I hlə chahi bindu biih yɔɔ bə bə́ lə, “Yee kpe yeŋ dùŋ ə kwáŋ ŋieeŋ mə. Ŋkənə lə kwáŋ həmə kə. Chɔɔ jə ə bwɔɔ nu bəŋ, nlə n'yee ŋgə̄ŋ ə duŋ ə bəne bbəŋ bə́ dùŋ kə duŋ nə Bəjuu mə.” 7 I hlə she bə́ həmə, fu gəŋ yee i dūŋ bə mbɛɛ ju nnu i duŋ kə duŋ nə ŋwuŋ Bəjuu, mbɛɛ yo màa i bwɔ̄kwe bə Chu. Yii liih mà duŋ lə Titiyu Jushtu, kwili liih duŋ baha ə chəŋ cheenə Chu go. 8 Klishpu che kwoo ə chəŋ cheenə Chu bə bəne bənhliŋ bbəŋ bə́ dùŋ ə wu chəŋ yii tɔ́ŋ ə Baba mə. Bəne bə Kɔlɛŋ kiŋaaŋkə yee bə́ wō ye Pwɔɔ dōntə ki Jisho, bə́ bèmi, bə́ hlə yee bə́ yīi bə́ ə njɔ.

9 Lə ə bwo chu butuu budi ə butuu, Baba yɔɔ bə Pwɔɔ ə fieŋ fidi mə ye yobutuu lə, “Wə kə yee wə lɔ̂ kə, yee wə dôntə kwaa die njəŋ wə gə̀ŋ bə yi. Wə kə wîi lə kə, 10 yulahalə n'yo bə wə, mbɛɛ hləŋ həmə nnu dùŋ ə i fə fieŋ fidi bə wə. Bəne bəŋŋ bie ə kibalaki kɨhŋ mə kiŋaaŋkə.” 11 Nəni, Pwɔɔ hlə duŋ həmə kigoŋ kimbɨŋ bə kiŋkə, i kêeh bəne die Chu.

12 Ye Pwɔɔ màa i dūŋ lə həmə, lə Galio bwo duŋ mbɛɛ ŋkɨnə nu wɛɛ wi Akeya mə, Bəjuu buhuŋ gbo kwo gəŋ bə wu ə chəŋ nhlaa mə, 13 yɔɔ bə Galio lə, “Mbɛɛ nu yu jū bənfii bəne lə yee bə́ chēe Chu ə je ji mə chili ə kə duŋ nə ye ŋkɨnə kiɛɛ lə kə.” 14 Pwɔɔ chu ja waalə i yu yɔ̄ɔ, Galio ja yɔɔ bə Bəjuu bie lə, “Bəjuu, bə́ wo, ə fieŋ ffɨŋ hə duŋ fieŋ fidi fiwaha ffɨŋ mbɛɛ nunu fəə, ləkə ŋkɨnə ju i bwuŋna, ə nhə ŋkwaa tɔŋ wələ fieŋ ffɨŋ bə yɔ̄ɔ. 15 Kwaalə, ye fieŋ fɨhŋ duŋ lə lə ə noonə ki díe bə yíi maa bəŋkɨnə bieeŋ, bə́ bwɛɛ bəŋ bəŋ. Ə duŋ nhlaa dɨŋ fɨhŋ fieŋ kə.” 16 Ye i yɔɔlə nəni, i hlə kohiŋ bə́, bə́ fu ə chəŋ nhlaa ye mə. 17 Bə́ bənhliŋ hlə ja bumə ə Shoshtəni go nnu i mà duŋ yo che kwoo ə chəŋ cheenə Chu mə, hlə kwuŋ wu ə chəŋ nhlaa ye fwi. Galio nakə kənə bwɔɔ ki fieŋ fɨhŋ kə.

Pwɔɔ chu dɨŋ ə Antiyɔk

18 Ə chu bwɔɔ nnu dɨŋ, Pwɔɔ baa duŋ ə Kɔlɛŋ bə bəne bə kimbemi ə joo mə kiŋaaŋkə, hlə ja she bə́ bəə Plishilia maa Akwila lɛɛ ə chəŋ nni njɔ mə bəŋgəŋ Shilia. Bənja bə́ ə Shiŋklia ə dɔhɔ kkɨŋ bə́ mà lɛɛ kie ə chəŋ nni njɔ mə, Pwɔɔ ŋwi kwoo kiih yu muŋkaŋ mmuŋ i mà kaŋ bə Chu. 19 Lə yee bə́ gə̄ŋ, gəŋ bwii ə Ɛfɛshu, Pwɔɔ she bə Plishilia bə Akwila həmə, gəŋ wu fii ə duŋ ə chəŋ cheenə Chu Bəjuu mə, i yɔ̄ɔ bə Bəjuu mu. 20 Bə́ kɔnɔ wu lə i baa duŋ bə bə́ ə joo mə kiŋaaŋkə, i nɨhŋ. 21 Kwaalə, ye i màa i nōlə, i yɔɔ bə bə́ lə, “N'yá yi nfiimə bwo ə bəŋ mə ə Chu lə bemi.” Ye i yɔɔlə nəni, i hlə lɛɛ ə chəŋ nni njɔ mə no ə Ɛfɛshu.

22 Chəŋ ni njɔ ye gəŋ bwii ə Kashalia, Pwɔɔ fu, biŋ gəŋ chee kimbumə ki bəne bə kimbemi bə Jelushalɛŋ, hlə ja bwɔ gəŋ Antiyɔk. 23 I duŋ həmə bwɔɔ kah chɛɛ, hlə baa ja yee i jāa i gə̄ŋ ə wɛ́ɛ ŋə Galeshia bə ŋə Fligia mə, i shìi go ŋə bəne bə kimbemi bə həmə.

Apolo dontə die Chu ə Ɛfɛshu

24 Ŋwuŋ Bəjuu ju ja bwo ə Ɛfɛshu yii liih duŋ lə Apolo, bə́ mà bwee wu ə Aleshandia. I mà duŋ mbɛɛ nnu i kə̀lə biyɔɔnə, i kə̀lə dəŋ Kiŋwaati ki Chu gbaaŋ. 25 Bə́ mà keeh'la wu ye Je Baba nyìi, i hlə yee i fī bu finə bə keehnə ki Jisho, i kèeh bəne yəəŋ. Kwaalə, i mà kələ kwaa ə duŋ fieŋ ffɨŋ Jɔɔŋ màa i dōntə i yìi bəne ə njɔ. 26 Ye i mà bwo lə ə Ɛfɛshu, i hlə gbe bəŋkeeh bəne ə chəŋ cheenə Chu mə i kə lɔɔ kə. Plishilia bə Akwila wo ye i keeh lə nəni, hlə jə wu, gəŋ baa nachɛ wu ye Je Chu nyìi lə.

27 Apolo ja hle lə mə lə le gəŋ ə wɛɛ wi Akeya mə. Bəne bə kimbemi bə Ɛfɛshu chɨnə wu, bieŋ kiŋwaati bə kintu ki bəne bə kimbemi bə Akeya, fwɔŋ lə bwɔɔ nnu mə lə bwii bə́ tɨŋ jə wu. I gəŋ bwii həmə, chɨnə bəne bə kimbemi nfanfa, bəne bəhŋ duŋ bbəŋ Chu mà nyii bə́ tɔŋ linwaa, fə bə́ yii tɔ́ŋ ə Jisho mə. 28 I nòo binoonə bə Bəjuu wɛɛŋ ə kə duŋ nə bi chɛɛ kə, i gbà i jə̀ bə́, i nyìi ə Kiŋwaati ki Chu mə lə Jisho duŋ Nchuu Fwoo nnu Chu mà kaachi.