Nimi 17

Pwɔɔ bə Shila gəŋ ə Teshalonika

Pwɔɔ bə Shila hlə yee bə́ gə̄ŋ, gəŋ kah ə bibalaki bi Anfipoli bə Apolonia mə, le gəŋ bwii ə Teshalonika. Ə duŋ chəŋ cheenə Chu Bəjuu duŋ həmə. 2 Pwɔɔ gəŋ lɛɛ ə chəŋ cheenə Chu mə ye fwɔ wiih màa wi dūŋ, i yɔ̄ɔ bə bəne bə həmə ə bibumwi mə bitɔh, i nyìi bieŋ binhliŋ ə Kiŋwaati ki Chu mə. 3 I nyìi, i nàchɛ lə Nchuu Fwoo nnu Chu mà kaachi yo mà kənə bəmbwo ŋəŋ ə bəŋgə go, fiimə fu chuu ə kpe mə. Jisho nnu i dôntə yo kii lə Nchuu Fwoo yo. 4 Bəne bədi wo nəni, bemi bələ Pwɔɔ bə Shila. Bəglik bədi bbəŋ bə́ kòhi Chu maa bəkwɛɛ bəŋkuntaŋ bəŋkuntaŋ bədi bemi dəŋ kiŋaaŋkə. 5 Kwaalə, Bəjuu bədi hlə yee bə́ lūhuŋ bimi bə Pwɔɔ bəə Shila, buhuŋ bəne bədi bənya bbəŋ bə́ jɨɨŋkə bəə bə́ bumə chɔɔ bidiɛɛni ə kibalaki kie mə. Bə́ hlə bwulə gəŋ bwu chəŋ Jashɔŋ lə bə́ kiɛɛ lə bə́ fwoo bə Pwɔɔ bə Shila nə bə bəne ə bweenə. 6 Ə chulə bə́ kiɛɛla hləŋ, hlə kpa jə Jashɔŋ bə bəne bə kimbemi bədi gəŋ bə bə́ ə bəche kwili fwi, bə́ gɛ̄ɛmə bə́ yɔ̄ɔ lə, “Bəne bəhŋ lə bbəŋ bə́ jàa bə́ chɨ̀ŋ mbiŋ nu kwe, bə́ bwoo bwii ba fəŋ, 7 Jashɔŋ tɨŋ jə bə́ chi ə wu chəŋ. Bə́ bənhliŋ bwùŋ bəŋkɨnə bə Ŋkɨŋ nnu Luŋ, bə́ yɔ̄ɔ lə Ŋkɨŋ ju yo həmə nnu yii liih duŋ lə Jisho.” 8 Bəche kwili bə bəne wo nəni, gbe bənfɛɛnfɛ ə nfɛɛnfɛ mə. 9 Bə́ hlə kaŋ Jashɔŋ bə bəne bə kimbemi nə kpo lə ə fi baa duŋ lə bu duŋ nə, ə bə́ nakə baa lə chuu bə́ kpo we kə. Bə́ hlə tukwaŋ ə bə́ go bə́ gəŋ.

Pwɔɔ bə Shila gəŋ ə Beliya

10 Ə chulə jɨbə gbee, bəne bə kimbemi jə Pwɔɔ bəə Shila faŋ yee bə́ gə̄ŋ ə kibalaki ki Beliya mə. Ye bə́ lɛɛ lə həmə, bə́ gəŋ ə chəŋ cheenə Chu Bəjuu mə. 11 Bəjuu bə həmə mà duŋ bəne bbəŋ bə́ kə̀lə bieŋ kah bə Teshalonika bie, yulahalə bə́ mà tɨŋna jə keehnə kie bə kinhle, yee bə́ fwīilə Kiŋwaati ki Chu ə joo ŋənhliŋ mə bəŋəŋ kələ ləə bieŋ bbɨŋ Pwɔɔ kêeh bie bə́ mu lə kichɛɛŋ lə. 12 Bə́ hlə bemi die Chu gbaaŋ. Bəkwɛɛ bəŋkuntaŋ bəŋkuntaŋ kiŋaaŋkə bbəŋ bə́ mà duŋ Bəglik maa bənəə kiŋaaŋkə bbəŋ bə́ mà duŋ dəŋ Bəglik bemi. 13 Kwaalə, Bəjuu bə Teshalonika bwo wo lə Pwɔɔ gəŋna yee i dōntə die Chu ə Beliya, Bə́ hlə gəŋ dəŋ həmə, bweemə kimbumə ki bəne kie ki gbe bəŋkiɛɛ bidiɛɛni. 14 Bəne bə kimbemi hlə yɔɔ bə Pwɔɔ cha mi lə i gəŋ ə nɔ həkpa. Kwaalə, Shila bə Timɔti she ə Beliya. 15 Bəne bbəŋ bə́ mà gəŋ bənchii Pwɔɔ, gəŋ bwii Ateŋ hlə she wu. Ə chulə yee bə́ chū dɨŋ, Pwɔɔ faŋ bə́ lə bə́ gəŋ yɔɔ Shila bə Timɔti lə bə́ ju ba bəmbələ wu mə chəkə.

Pwɔɔ yee i dūŋ ə Ateŋ

16 Pwɔɔ hlə yee i kē Shila bə Timɔti ə Ateŋ. Ə chulə yee i jāa həmə, i ŋəŋ lə kibalaki kie yiila bə bəcheh. Fi nɛhiŋ tɔŋ liih. 17 I hlə gəŋ ə chəŋ cheenə Chu Bəjuu mə, yɔɔ bə bə́ maa bəne bbəŋ bə́ dùŋ kə duŋ nə Bəjuu bbəŋ bə́ màa bə́ chēe Chu dəŋ mu. I baa i yɔ̀ɔ dəŋ ə joo mə ŋənhliŋ ə ŋwiŋ nte bə bəne bbəŋ bə́ màa bə́ bā bəmbwo həmə. 18 Bəne bə keehnə bədi bbəŋ bə́ chèe bə́ lə Epikolia maa bbəŋ bə́ chèe lə Shitoyik hlə ja ki bwo dəŋ bənoo noonə bəə Pwɔɔ. Ye Pwɔɔ màa i dōntə lə ki Jisho maa bənfu ə kpe mə, bədi hlə yee bə́ bīi ləə, “Kinfili kɨhŋ gbee kikpuŋ lə laha chəə lə?” Bədi yɔ̀ɔ fibə lə, “Fi nyiee ə waalə i dòntə ki bəcheh bə bəne bədi.” 19 Nəni, bə́ hlə jə Pwɔɔ bəə bə́ gəŋ ə shiinə kkɨŋ bə́ chèe lə Aleyopagu mə,^ª yɔɔ bə wu lə, “Kkə kiɛɛ lə kkə baa wo keehnə ko kifwɔ kkɨŋ wə yu bwō kɨhŋ bə ki lə ki duŋ lə ləhəŋ lə? 20 Wə yɔ̄ɔ bieŋ bidi bbɨŋ kkə mà kə hlaa lə wo kə. Nəni, kkə kiɛɛ lə kkə kələ kinuu ki mu kie.” 21 (Bəne bə Ateŋ maa bəbwonə bə həmə bə́ màa bə́ bā ŋkwo bə́, bə́ shìi bə́ wə̀lə ə duŋ bieŋ bifwɔ, bə́ yɔ̀ɔ ki bi.)

22 Pwɔɔ hlə lemi fwi ə shiinə ki Aleyopagu kie mə, yɔɔ lə, “Bəne bə Ateŋ, ŋŋəŋna lə ə jé mə yinhliŋ bə́ bwɔ̀kwe gbaaŋ bə bəcheh. 23 N'yɔ̄ɔ nəni, yulahalə mmaa njâa yaŋ ə kibalaki kieeŋ kɨhŋ mə, ə chulə n'yee ŋkēe bidɔhɔ bbɨŋ bə́ chèe bəcheh həmə, ŋŋəŋ taŋ li ntofi lidi llɨŋ bə́ bieŋna mu go lə, ‘Bə chu nnu bə́ duŋ kə kələ.’ Chu nnu bə chèe yo, nnu bə́ dùŋ yo kə kələ, ə wu nnu nlə ndontə bə bəŋ fidiɛɛ. 24 Chu nu duŋ nnu i mà fə yo mbiŋ nu bə bieŋ binhliŋ bbɨŋ bi dùŋ ə wu mə. Ə wu Ŋkɨŋ buuli bə shishɔ, i nɔŋ nə ə chə́ŋ yí bəntofi yyɨŋ bəne wɛ̀ɛ mə kə. 25 I jɨ̀nə lə fieŋ fidi ffɨŋ i kèe lə mbɛɛ nɨŋ yu wu, yulahalə ə wu nnu i fə̀ bəne bənhliŋ ŋɔ̀ɔni, bə́ dùŋ fa, bə́ kə̀nə fieŋ finhliŋ ffɨŋ bə́ kìɛɛ. 26 I mà fəə bichəŋ bi bəne binhliŋ chili chili fu ə mbɛɛ mwi mə bi dùŋ ə mbiŋ nu mə. I mà chu bwo fə nəni, duŋ i mà bwɛɛla bwɔɔ nnu bə́ lə duŋ həmə, maa jú ŋə bidɔhɔ bbɨŋ bə́ yáa bə́ dūŋ ə bi mə. 27 I mà fə nəni fo bəne lə yee bə́ mɔ̄mɔ bə́ kìɛɛ wu ləə duŋ ə bə́ wo, ŋəŋ ə wu go lə. Kwaalə, Chu kə duŋ nə dəŋ je nyɛɛkə ə mbɛɛ ju go ə be mə kə. 28 Fɨhŋ duŋ dəŋ yəəŋ ye mbɛɛ ju mà yɔɔlə lə,

‘Ə wu nnu i fə̀ kkə hləə kkə dūŋ, kkə jàa,

kkə dùŋ dəŋ ye kkə duŋ lə.’

Mbɛɛ weŋ cháh ju mà hlaala yɔɔ dəŋ lə,

‘Kkə duŋ bwɔni biih.’

29 Ye kkə duŋ lə bwɔni bə Chu nəni, kkə kə hlee lə Chu bu fieŋ ffɨŋ mbɛɛ bwɛɛla bə bufe bwii, ləkə mbih bə chwaa ki kpo, ləkə nfə bə tə kə. 30 Ə mà duŋ bwɔɔ nnu bəne mà kaani yo ə jɨbə mə, bə́ fə bieŋ biwaha bɨhŋ, Chu chèekwaŋ mu. Kwaalə, i yu yɔ̄ɔ fidiɛɛ lə bəne bənhliŋ fii tɔ́ŋ ŋəbə. 31 Bə́ gaanə yulahalə i chiee butuu bbuŋ i yá hlaah mbiŋ mənhliŋ bələ kichɛɛŋ. I bwaa mbɛɛ wi nnu i yáa i hlāah. Fɨhŋ nini duŋ i nyiila bə bəne bənhliŋ lə ə chɛɛŋ ye i mà fwoo lə mbɛɛ yo ə kpe mə.”

32 Ye Pwɔɔ yɔɔlə nəni, bə́ wo ye i yɔ̄ɔ ki nfu ə kpe mə, bəne bədi gbe bənshaa wu bu shaanə. Bədi yɔ̄ɔ fibə lə, “Kkə kiɛɛ lə kkə baa bwo wo ki fieŋ ffɨŋ wə yu yɔ̄ɔ fie.” 33 Nəni, Pwɔɔ hlə fu she bə́. 34 Kwaalə, bəne bədi bemi fieŋ ffɨŋ i màa i yɔ̄ɔ fie, bə́ bələ wu. Mbɛɛ ju mə mà duŋ Dionishu i mà duŋ mbɛɛ ə shiinə ki Aleyopagu mə, ju duŋ kpɛ yii liih duŋ lə Damali maa bə bəne bədi dəŋ.