Nimi 16

Timɔti lɛɛ ə kintu ki Pwɔɔ mə bəə Shila

Pwɔɔ jaa gəŋ bwii ə kibalaki ki Delbi, hlə no ə ki mə gəŋ ə ki Lishta mə. Mbɛɛ kintu Jisho ju mà duŋ həmə ə Lishta yii liih duŋ lə Timɔti, mahni duŋ kpɛ Bəjuu, ə duŋ dəŋ ŋwuŋ kimbemi, kwaalə tili mà duŋ ŋwuŋ nu Glik. 2 Timɔti nu mà duŋ mbɛɛ nnu bəne bənhliŋ bə kimbemi bə Lishta maa bə Ikɔniyuŋ màa bə́ dōhi wu. 3 Pwɔɔ kiɛɛ lə i jə wu lə bəə wu jaa, hlə nyieŋ wu jo.^ª I mà nyieŋ wu jo nəni, yulahalə Bəjuu bənhliŋ bbəŋ bə́ dùŋ ə wɛ́ɛ ŋie mə mà kəla kpee lə che Timɔti duŋ ŋwuŋ nnu Glik. 4 Bə́ hlə yee bə́ jāa, bə́ gə̀ŋ ə bibalaki mə, ye bə́ màa bə jāa lə bə́ yɔ̀ɔ bə bəne bə kimbemi bəŋkɨnə bbəŋ bəne bə faŋnə bə Jisho maa bəche bimbumə bi Jelushalɛŋ mà shii bemi lə yee bə́ chī. 5 Nəni, bimbumə bi bəne bə kimbemi bie hlə yee bi kō bi gə̂ŋ fwi fwi ə kimbemi mə. Bəne yiinə ə bə́ go joo ŋənhliŋ.

Fieŋ ye yobutuu lə bwo ə Pwɔɔ mə ə Towa

6 Pwɔɔ bə kimɔ kiih ja lə bie bə́ gə̄ŋ dontə die Chu ə bidi bi Ɛshia mə, Fiana Wɛɛŋ nɨhŋ. Bə́ hlə jaa kah ə duŋ ə je nni wɛ́ɛ ŋə Fligia bə ŋə Galeshia mə. 7 Ə chulə bə́ gəŋna bwii baha ə kitɨŋ ki Mishia go yee bə́ kīɛɛ bənlɛɛ gəŋ ə bidi bi Bitinia mə, Fiana Jisho baa nɨhŋ. 8 Nəni, bə́ hlə kah ə kitɨŋ ki Mishia mə, le gəŋ ə kibalaki ki Towa. 9 Lə yee ə dūŋ ə butuu, fieŋ fidi ye yobutuu lə bwo ə Pwɔɔ mə. I ŋəŋ ə fieŋ fie mə mbɛɛ ju nu Meshedonia i lema i kɔ̄nɔ wu lə, “Butee, le bwo yaŋ ə Meshedonia wə bwo chɨnə be.” 10 Ye fieŋ fie bwo lə ə Pwɔɔ mə nəni, bee bə́ ^ª hlə ŋəŋ lə Chu mà nyiila be lə kkə gəŋ dontə hlɨŋ nwaa yi ə kitɨŋ ki Meshedonia mə. Cha mi, kkə hlə bwɛɛ gbo bəŋgəŋ mə.

Lidia yii tɔŋ ə Jisho mə ə Filipi

11 Kkə ja ə Towa, le ntiiŋ ə chəŋ nni njɔ mə, fu ə Shamutele. Bu fu wu kkə gəŋ fwi gəŋ fu ə Niapoli. 12 Kkə ja həmə jaa gəŋ bwii ə Filipi, ə duŋ kibalaki kiŋkuntaŋ ə wɛɛ wi fwi wi Meshedonia mə.^ª Kibalaki kɨhŋ mà kənə nahlala nnu Luŋ muŋgeni ə ki bəŋ. Kkə duŋ həmə ə joo mə. 13 Lə yee ə bwō duŋ ə bunte mə, kkə fu ə kibalaki kie mə, gəŋ ə ŋgwiŋ həkpa kkə hlē lə ə həmə nnu dɔhɔ ki Bəjuu ki cheenə Chu duŋ ə ki duŋ. Ye kkə gəŋ lə, bəkwɛɛ bədi mà buma həmə, kkə shii yee kkə yɔ̄ɔ bə bə́. 14 Kpɛ ju mà duŋ həmə nnu i màa i wə̄lə dəŋ yii liih duŋ lə Lidia, i màa i kōhi Chu. I mà fu ə kibalaki ki Tayatila mə, nnu i màa i tāa bindu bidi, bbɨŋ bi duŋ ye bige lə, bi tàchuŋ. Baba wɛ tɔŋ liih, i bemi fieŋ ffɨŋ Pwɔɔ màa i yɔ̄ɔ. 15 Bə́ gəŋ yii wu bə bəne bə wu chəŋ ə njɔ, i hlə kɔnɔ be yɔɔ lə, “Butee, ə bə ŋəŋna lə n'yiila tɔŋ lɨŋŋ linhliŋ ə Baba mə, bə bwo kwaa kkə gəŋ duŋ ə mi chəŋ.” I baa i fɨ̄hɨŋ be nəni, hləŋ hləŋ kkə bemi gəŋ.

Bə́ fwaŋ Pwɔɔ bə Shila ə chəŋ munfwa mə ə Filipi

16 Ə bwo duŋ butuu budi bbuŋ kkə màa kkə gə̄ŋ ə dɔhɔ ki cheenə Chu mə, kkə bənə bə ŋiaŋ kpɛ ju ə duŋ nfwa. I mà kənə fiana ju ə wu go, nnu i fə̀ mbɛɛ i dùŋ ŋwuŋ fonə nche. Bəne bbəŋ bə́ mà kənə ŋiaŋ kpɛ yo màa bə́ bə̄nə kpo ə wu go gbaaŋ yu i màa i yɔ̄ɔ bieŋ bbɨŋ bi yá duŋ. 17 Ə chulə ŋiaŋ kpɛ yo ŋəŋ be bee Pwɔɔ go, i hlə yee i bə̄lə be i gɛ̄ɛmə, i yɔ̄ɔ lə, “Bəne bəhŋ duŋ bəne bə nimi bə Chu nnu i dùŋ yo Kwoo ki Bieŋ Binhliŋ, bə́ nyìi je nni duŋ ə bə jaa ə yi mə ə bə hlə fukwoo.” 18 I fə nəni gəŋ bwii ə joo mə kiŋaaŋkə, fi lo Pwɔɔ go, i fiimə nyieemi fiana yo yɔɔ lə, “N'yɔ̄ɔ bə wə ə yii li Jisho Kleto bəŋ, fu ə ŋiaŋ nu mə.” I bu fu ə wu mə ə bwɔɔ yo bəŋ.

19 Bəne bbəŋ bə́ kənə bie nfwa yo ŋəŋ lə je bə́ kpo kaa ba, bə́ kwo Pwɔɔ bə Shila kpa gəŋ bə bə́ ə bəche kitɨŋ fwi ə ŋwiŋ nte. 20 Ye bə́ gəŋ lə bə bə́, bə́ chi bə́ ə bənahlala bə Luŋ fwi bbəŋ bə́ hlàah bənhlaa yɔɔ lə, “Bəne bəhŋ lə Bəjuu, bie bə́ nə̄ ŋgə ə kibalaki kiaa mə. 21 Bə́ kèeh bəne fwɔ wwuŋ bəŋkɨnə biaa duŋ kə bemi kə. Kkə duŋ bəne bə Luŋ, duŋ ə yee kkə bə̄lə fwɔ we kə.” 22 Kimɔ ki bəne kkɨŋ ki mà duŋ kie həmə fwɔŋ bə́, biŋ ə Pwɔɔ bə Shila go. Bəne bbəŋ bə́ hlaah bie bənhlaa hlə shwaŋ bindu ə Pwɔɔ bə Shila go, yɔɔ lə bə́ hloo bə́. 23 Bə́ shi hloo bə́ gbaaŋ, jə bə́ gəŋ yii ə chəŋ munfwa mə, yɔɔ bə mbɛɛ nnu i fwòŋ yo chəŋ munfwa ye lə i fwoŋ bə́ kinwaa. 24 Ye i wo lə nəni, i hlə jə bə́ gəŋ fwaŋ baa ə chəŋ munfwa nni nte ye mə kibɛɛ, fwaŋ wuh ŋəbə bə biwili.

25 Lə yee ə bwō duŋ ye butuu kintekinte lə, Pwɔɔ bə Shila chēe bə́ shēeni bə́ dōhi Chu, bəne bə chəŋ munfwa wə̄lə, 26 shishɔ duŋ duŋ gbe bənənə bə muŋga, chəŋ munfwa ye nənə gəŋ bwii ə kichili go. Cha mi, fwíih ŋie ŋənhliŋ wɛɛmə, fíaŋ ye hloonə ə bəne bə chəŋ munfwa bie go bənhliŋ. 27 Mbɛɛ nnu i màa i fwōŋ yo chəŋ munfwa ye ŋənə, ŋəŋ lə fwíih ŋie, ŋie yə, i hlə yee i hlē lə bəne bə chəŋ munfwa bie lɔɔ fu kaa. I bwa hlo ə bwaali mə lə i jii gbo wiih mu. 28 Pwɔɔ nyieemi gbaaŋ yɔɔ lə, “Wə kə jii lə gbo wo kə. Kkə bie fəŋ bənhliŋ.”

29 Mbɛɛ nnu i màa i fwōŋ yo chəŋ munfwa ye dii mbɛɛ bwo bə mɔɔ, i lələ lɛɛ mu chəŋ, gəŋ gbe ə Pwɔɔ bə Shila fwi i nə̄nə bə nɨŋ. 30 I ja jə bə́, fu bə bə́ bweenə, bii bə bə́ ləə, “Bətah, ə duŋ ə nfə ləhəŋ nhlə fukwoo lə?” 31 Bə́ chuu bə wu lə, “Yii tɔŋ lo ə Baba Jisho mə, wə bə bəne bwo bə wə chəŋ yá hlə fukwoo.” 32 Bə́ dontə hlɨŋ ki Baba bə bəne bənhliŋ bə wu chəŋ. 33 I jə bə́ həmə ə butuu dəŋ, wii bibia bibə. Cha mi, bə́ hlə yii wu bə bəne biih bənhliŋ bə wu chəŋ ə njɔ. 34 I hlə jə bə́, bəə bə́ biŋ ə wu chəŋ, i nə bə́ biləə bə́ di. Bəne bənhliŋ bə wu chəŋ hlə yee bə́ lēki lə bə́ yiila tɔ́ŋ ə Chu mə.

35 Butuu fu wu, nahlala nnu Luŋ nnu i hlàah yo bənhlaa faŋ bəne bə bicha lə bə́ gəŋ yɔɔ bə mbɛɛ nnu i fwoŋ yo chəŋ munfwa ye lə i fwoo bəne bie yee bə́ gə̄ŋ. 36 Mbɛɛ nnu i fwòŋ yo chəŋ munfwa ye hlə gəŋ ŋəŋ Pwɔɔ mu, yɔɔ bə wu lə, “Nahlala faŋna hlɨŋ lə nfwoo bəŋ, lə yee bə́ gə̄ŋ ə kindunshiiŋ mə.” 37 Kwaalə, Pwɔɔ yɔɔ bə bəne bə bicha bie lə, “Bə́ ma hloo be ə ŋwiŋ nte bə́ kaani kə nhlaa lə be, ə duŋ kkə duŋ dəŋ bəne bə Luŋ, bə́ baa fwaŋ dəŋ be ə chəŋ munfwa mə, yee bə́ yɔ̄ɔ fidiɛɛ lə bə́ fwoo be dɨŋ dɨŋ lə ləhəŋ lə? Ə duŋ ə fi duŋ lə kə. Ə lə bwo ba nahlala yo fəŋ ə i hlə fwoo be.”

38 Bəne bə bicha bie fiimə chu dɨŋ gəŋ yɔɔ bə nahlala nu Luŋ yo ye Pwɔɔ yɔɔ lə. Lə bə́ wo lə bə Pwɔɔ bə Shila duŋ dəŋ bəne bə Luŋ, bə́ hlə yee bə́ lɔ̄. 39 Bə́ bwo kwi kwáŋ bə bə́, fwoo bə́ ə chəŋ munfwa ye mə, chii bə́, kɔnɔ bə́ lə bə́ no həmə ə kibalaki kie mə. 40 Pwɔɔ bə Shila fu ə chəŋ munfwa ye mə, gəŋ ə Lidia chəŋ, bəne bə kimbemi dūŋ mu, bə́ nə bə́ keehnə hlə no həmə.