Nimi 15

Bəne bə kimbemi shii shiinə ə Jelushalɛŋ

Bəne bədi ja ə Judia, bwɔ bwo ə Antiyɔk, bə́ keeh bəne bə kimbemi lə duŋ ə Chu fwoo mbɛɛ bə́ kaani kə nyieenə wu jo ye bəŋkɨnə bə Mushe yɔɔ lə kə. 2 Pwɔɔ bə Banaba nɨhŋ keehnə kie bu nɨŋnə, bəə bəne bie she bə́ nōo noonə kkɨŋ ki dùŋ kə duŋ nə kinyieenə kə. Lə fi kah bəŋ, kimbumə ki bəne bə kimbemi bə Antiyɔk bie bwa bə Pwɔɔ bə Banaba maa bəne bə kimbemi bədi, faŋ lə bə́ biŋ ə Jelushalɛŋ gəŋ ŋəŋ bəne bə faŋnə bə Jisho bə bəche kimbumə ki bəne bə kimbemi bə həmə, lə bə́ yii biwu ə diɛɛnə kie mə.

3 Nəni, kimbumə ki bəne bə kimbemi bə Antiyɔk hlə faŋ bə́, bə́ jāa bə́ kāh ə wɛ́ɛ ŋə Fonishia bə ŋə Shamalia mə bə́ yɔ̀ɔ bə bəne bə kimbemi bə həmə lə bəne bbəŋ bə́ dùŋ kə duŋ nə Bəjuu gaana tɔ́ŋ ŋəbə. Bəne bənhliŋ wo nəni, bə́ leki gbaaŋ. 4 Bə́ biŋ gəŋ bwii ə Jelushalɛŋ, kimbumə ki bəne bə kimbemi bə bəne bə faŋnə bə Jisho maa bəche bimbumə bə mə tɨŋ jə bə́. Bə́ yɔɔ tɔ fieŋ finhliŋ bə bə́ ye Chu nɨŋ ə bə́ kwáŋ. 5 Kwaalə, bəne bə kimbemi bədi bbəŋ bə́ mà duŋ dəŋ ə kintu ki Bəfalashii kie mə, ja fa yɔɔ lə, “Bə́ kənə bənyieŋ jó yí bəne bbəŋ bə́ dùŋ kə duŋ nə Bəjuu, yɔɔ lə yee bə́ chī bəŋkɨnə bə Mushe.”

6 Ye bə́ yɔɔlə nəni, bəne bə faŋnə bə Jisho bə bəche kimbumə baa shii bənlɛɛ mə ə diɛɛnə kie mə. 7 Bə́ shi yɔɔ gəŋ fwi gbaaŋ, Pita ja lemi fa yɔɔ lə, “Bəŋgwoŋ, bə kələ lə ə mà duŋ bwɔɔ nnu fwii Chu bwa mi ə bəŋ mə lə ə kijə kɨŋŋ mə kkɨŋ bəne bbəŋ bə́ dùŋ kə duŋ nə Bəjuu yáa bə́ wō hlɨŋ nwaa ni, bə́ bèmi yi. 8 Chu nnu i kə̀lə tɔ́ŋ ŋə bəne bənhliŋ, i mà nyiila lə i tɨŋna jə bəne bbəŋ bə́ dùŋ kə duŋ nə Bəjuu, nə bə́ Fiana Wɛɛŋ yəəŋ ye i mà nə lə be. 9 I mà kə nyii lə kichili ə be mə bə bəne bie kə. I fə tɔ́ŋ ŋəbə ŋə chàa yulahalə ə mà duŋ bə́ hə yiila tɔ́ŋ ə Jisho mə. 10 Ye fi duŋ lə nəni, bə jaa ləhəŋ maa yee bə kīɛɛ lə bə nɛhiŋ tɔŋ li Chu, bə jə̀ bəntiɛ bəndili bə tòo ə kintu ki bəne bə kimbemi bəŋ, ə duŋ bəntiɛ bəndili bəŋ mà kaah be maa bə bəche tah biaa lə? 11 Fi kə duŋ nə yəəŋ kə. Kkə bema lə Chu fwoo be ə duŋ nfə tɔŋ linwaa llɨŋ Baba Jisho nyiila bə be. Ə dəŋ yəəŋ ye i fwòo bəne bbəŋ bə́ dùŋ kə duŋ nə Bəjuu.”

12 Ye Pita yɔɔ lə kaa nəni, bəne bənhliŋ də shiiiŋ, yee bə́ wə̄lə ye Banaba bə Pwɔɔ nachɛ ye bə́ màa bə́ jāa ə bəne bbəŋ bə́ dùŋ kə duŋ nə Bəjuu kwuŋ, Chu nə̀ bə́ muŋgeni lə yee bə́ fə̄ bieŋ bbɨŋ bi nyìi muŋgeni mu Chu bə bieŋ biŋkpee gbo. 13 Lə bə́ yɔɔ kaa nəni, Jɛŋ hlə yɔɔ lə, “Bəŋgwoŋ, bə wələ wo fieŋ ffɨŋ nlə n'yɔɔ. 14 Shaamuŋ hə yɔɔla be ye Chu mà nyii dəŋ kinhle kiih bə bəne bbəŋ bə́ dùŋ kə duŋ nə Bəjuu, shaa bədi ə bə́ mə lə bə́ duŋ bəne biih. 15 Fieŋ ffɨŋ bəne bə hlɨŋ Chu mà bieŋ fie fi jaa gbu mwe bə fieŋ ffɨŋ Chu mà fə. Bə́ mà bieŋ lə,

16 ‘Bwɔɔ yu bwō nnu nlə nfiimə bwo,

bwɛɛ chəŋ Daafi nni i gbee ye.

Nlə wɛɛ chuu bichili bie,

ə yi baa lemi fa.

17 Nəni, ə bədi bie bəne hlə yee bə́ kīɛɛ Baba,

bəne bəŋ bənhliŋ lə bbəŋ bə́ dùŋ kə duŋ nə Bəjuu bbəŋ nshaala

lə ə bəne bəŋŋ.

18 Fɨhŋ nini lə n'yɔɔ Chu,

I mà fəə bəne kələ ə kaani foo tɔɔŋ.’

19 N'yee ŋŋə̄ŋ ŋkwo ŋgwəŋ lə kkə kə nəə ŋgə bə bəne bbəŋ bə́ dùŋ kə duŋ nə Bəjuu bbəŋ bə́ yiila tɔŋ ə Chu mə kə. 20 Kkə bieŋ kwaa ə duŋ kiŋwaati bə bə́, yɔɔ lə bə́ kə yee bə́ dī bieŋ bbɨŋ bə́ tofa bəcheh mu kə, yulahalə bi duŋ bieŋ bi nyɛninə. Bə́ kə yee bə́ fə̂ kiwaali kə. Bə́ kə yee bə́ dînyaŋ nni bə́ kaani kə nyieenə lə ŋgɔŋ fu ə yi go kə. Bə́ kə yee bə́ dî ŋgɔŋ mə nyaŋ kə. 21 Bə́ bieŋ nəni, yulahalə bəŋkɨnə bə Mushe bəhŋ duŋ bbəŋ bə́ màa bə kēeh bəne ə kaani foo tɔɔŋ ə bibalaki binhliŋ mə bəne wò, ə baa duŋ dəŋ bi bbɨŋ bə́ chēe ə chə́ŋ yí cheenə Chu mə ə bunte mə bunhliŋ.”

Bə́ bieŋ kiŋwaati bə bəne bə kimbemi bbəŋ bə́ dùŋ kə duŋ nə Bəjuu

22 Nəni, bəne bə faŋnə bə Jisho bə bəche kimbumə maa kimbumə ki bəne bə kimbemi kiɛkiɛ bemi fimbini fie, hlə ŋəŋ lə fi nwaala lə bə́ bwa bəne ə bə́ mə faŋ bə́ bə Balaba maa Pwɔɔ lə bə́ gəŋ ə Antiyɔk. Bə́ hlə bwa Juda nnu yii liih lidi mà duŋ lə Bashaba, baa bwa dəŋ Shila. Bəne bə bəfwe bəŋ mà duŋ bikuu ə bəne bə kimbemi mə. 23 Bə́ bieŋ kiŋwaati kɨhŋ faŋ bə bə́ ki duŋ lə, “Be bəmwaa bbəŋ kkə dùŋ bəne bə faŋnə bə Jisho bə bəche kimbumə kkə bie kkə chēe bəŋ bəne bənhliŋ bə kimbemi bbəŋ bə́ dùŋ kə duŋ nə Bəjuu, bbəŋ bə́ dùŋ ə kibalaki ki Antiyɔk mə bə bbəŋ bə́ dùŋ ə wɛɛ wi Shilia maa bbəŋ bə́ dùŋ ə wɛɛ wi Shilishia mə. 24 Kkə woo lə bəne bədi ma fwoo ə be mə bwo yee bə́ nə̄ bəŋ ŋgə, fə bufe bweeŋ nyɔkɔ bə keehnə kidi ə kə duŋ nə be bbəŋ kkə ma faŋ bə́. 25 Nəni, kkə hlə shii be bənhliŋ bemi lə kkə bwa bəne bədi faŋ bə bə́, bə́ bwo bə Banaba maa Pwɔɔ bishiŋ biaa bi tɔ́ŋ. 26 Bəne bəhŋ taala kinduŋh kibə yu nimi li Baba ya Jisho Kleto. 27 Kkə hlə faŋ Judash bə Shila lə bə́ baa bwo yɔɔ dəŋ bə kijə fieŋ ffɨŋ fi dùŋ ə kiŋwaati kɨhŋ mə. 28 Be bə Fiana Wɛɛŋ ŋəŋna lə fi kə nwaa lə bən'yiilə bəŋ bə bəntiɛ bəndili bədi kahiŋ bəŋkɨnə bishaŋ bbəŋ bə́ dùŋ bie lə: 29 Bə kə yee bə dî biləə bbɨŋ bə́ tofa bəcheh mu kə. Bə kə yee bə dî ŋgɔŋ mə nyaŋ kə. Bə kə yee bə dî nyaŋ nni bə́ kaani kə nyieenə lə ŋgɔŋ fu ə yi go kə. Bə kə yee bə fə̂ kiwaali kə. Ə bə lɔ bieŋ bɨhŋ, kəə bə bie bə fə̄ yəəŋ. Bə she kinwaa.”

30 Bə́ bieŋ nəni hlə faŋ bəne bie bwɔ gəŋ bə ki ə Antiyɔk. Bə́ gəŋ buhuŋ kimbumə ki bəne bə kimbemi ki həmə kie kiɛkiɛ, nə kiŋwaati kie bə bə́. 31 Bə́ chee kiŋwaati kie, hlɨŋ ye diɛɛ tɔ́ŋ ŋəbə, bə́ wo njənjə gbaaŋ. 32 Judash bə Shila bbəŋ bə́ mà duŋ bəne bbəŋ bə́ yɔ̀ɔ bieŋ bbɨŋ bə́ wò ye Chu yɔ̀ɔ, nə keehnə gbaaŋ bə bəne bə kimbemi kie, fə bə́ kənə muŋga ə tɔ́ŋ ŋəbə mə. 33 Bə́ dùŋ həmə ə bwɔɔ ju bəŋ. Bəne bə kimbemi ja chii bə́ bə kindunshiiŋ, bə́ chu dɨŋ ə bəne bbəŋ bə́ hə faŋ bie bə́ go. 34 ^ª 35 Pwɔɔ bə Banaba she həmə Antiyɔk, bə́ bəə bəne bədi kêeh bə́ dôntə die Baba.

Pwɔɔ bəə Banaba ga

36 Ə chulə bwɔɔ gəŋna chɛɛ, Pwɔɔ yɔɔ bə Banaba lə, “Kkə fiimə chu dɨŋ kkə jaa ə bibalaki bbɨŋ bee wə ma dontə bie die Baba ə bi mə, ŋəŋ ləə bəne bə kimbemi bə mə bie bie bə́ fə̄ ləhəŋ lə.” 37 Banaba hlə yee i kīɛɛ bənjə Jɔɔŋ Maak lə bəə bə́ jaa. 38 Kwaalə, Pwɔɔ nakə leki lə bə́ jə wu, yulahalə i mà shee bə́ ə Panfilia nakə kaanə nimi llɨŋ bəə bə́ mà kənə le kə. 39 Pwɔɔ bə Banaba she kənə noonə gbaaŋ, hlə ga. Banaba jə Maak, bəə wu lɛɛ ə chəŋ nni njɔ mə, gəŋ ə Shayplu. 40 Kwaalə Pwɔɔ shaa wu fiih ə duŋ Shila. Bwɔɔ nnu bəə wu màa bə́ nō, bəne bə kimbemi nə bə́ ə kwáŋ ŋə kinchɨnə ki Baba mə. 41 Bə́ gəŋ ə wɛ́ɛ ŋə Shilia bə ŋə Shilishia mə, bə́ jàa bə́ shìi go ŋə bimbumə bi bəne bə kimbemi.