Nimi 14

Pwɔɔ bə Banaba dontə hlɨŋ nwaa Jisho ə Ikɔniyuŋ

Ye Pwɔɔ bəə Banaba gəŋ lə ə Ikɔniyuŋ, bə́ baa fə dəŋ yəəŋ ye bə́ mà fə lə ə Antiyɔk, bənlɛɛ ə chəŋ cheenə Chu Bəjuu ni həmə, dontə hlɨŋ nwaa mu. Bə́ shi dontə, Bəjuu maa bəne bbəŋ bə́ dùŋ kə duŋ nə Bəjuu bemi kiŋaaŋkə. 2 Kwaalə, Bəjuu bbəŋ bə́ mà nɨhŋ bie bəmbemi yee bə́ hlūku bwii bə bəne bədi bbəŋ bə́ mà duŋ kə duŋ nə Bəjuu, bihi tɔ́ŋ ŋəbə lə bə́ fwoo lo bə bəne bə kimbemi. 3 Pwɔɔ bə Banaba duŋ həmə gbaaŋ, bə́ dòntə ki Baba kə lɔɔ kə. Baba nə bə́ muŋgeni bənfə bieŋ bbɨŋ bi nyìi muŋgeni mu Chu bə bieŋ bi ŋɨŋ gəə bbɨŋ bi nyìi lə fieŋ ffɨŋ bə́ dòntə fie ki Baba ye i nyìi tɔŋ liih linwaa bə bəne duŋ chɛɛŋ. 4 Bəne bə kibalaki kie mə ga. Bədi chu ə wɛɛ wi Bəjuu bbəŋ bə́ mà nɨhŋ bie bəmbemi, bədi chu ə wɛɛ wi bəne bə faŋnə bə Jisho mə.

5 Bəjuu bie bə bəne bbəŋ bə́ dùŋ kə duŋ nə Bəjuu maa bəŋkafwi bə kitɨŋ kie bumə, kaachi bənfə kinchwa bə bəne bə faŋnə bə Jisho, tɨŋ bə́ bə tə́ fo bə́ lə kpe. 6 Bə́ wo ki nchúŋ yé, hlə lɔ gəŋ ə kitɨŋ ki Likoniaŋ mə, bə́ jaa ə bibalaki bi Lishta bə bi Delbi maa ŋəŋkwili ŋŋəŋ ŋə duŋ baha həmə, 7 yee bə́ dōntə hlɨŋ nwaa ni mə.

Pwɔɔ bə Banaba ŋwuhuŋ kiŋkəŋkpe ə Lishta

8 Mbɛɛ ju mà duŋ ə Lishta, nnu i màa i shīi ba kwaa həkwe, i dùŋ kə jaa lə kə, yulahalə bə́ mà bwee wu i dùŋ kiŋkəŋkpe. Ə bwo duŋ butuu budi, 9 i shiila i wə̄lə fieŋ ffɨŋ Pwɔɔ màa i kēeh. Pwɔɔ bɛŋ díi ə wu go, ŋəŋ lə mbɛɛ yo yo bə kimbemi lə Chu duŋ ə i ŋwuhuŋ wu, 10 hlə yɔɔ bə die ntaabə lə, “Ja lemi fa.” I hlə jiŋ hə buh, chɔɔ yee i jāa.

11 Bimɔ bi bəne ŋəŋ fieŋ ffɨŋ Pwɔɔ fəə, hlə yee bə́ kpēe liwili, bə́ yɔ̄ɔ ə díe yí Likoniaŋ mə lə, “Bəche choo bəne hlili bwo ə be mə.” 12 Bə́ hlə yee bə́ chēe Banaba lə Jiyu, bə́ chēe Pwɔɔ lə Helmi^ª ye ə màa ə ba lə wu bən'yɔɔ. 13 Ə mà duŋ chəŋ ntofi chu nnu bə́ chèe lə Jiyu duŋ baha ə kibalaki kie tɨŋ. Ŋwuŋ ntofi nu həmə hlə jə bənaŋ bəniɛ maa bichɔɔ bwo həmə ə fwiih wi mbaŋ tɨŋ lə wu bəə bəne fə ntofi mu nə bə Banaba bə Pwɔɔ.

14 Bəne bə faŋnə bə Jisho bəhŋ kələ fieŋ ffɨŋ bəne bie kīɛɛ fie lə bə́ fə, shwaŋ bindu ə bə́ go,^ª lələ lɛɛ ə bəne bie mə, yee bə́ gɛ̄ɛmə lə, 15 “Bəne bəhŋ, fɨhŋ lə laha ffɨŋ bə fə̄lə? Kkə duŋ bəne dəŋ yəəŋ ye bəŋ lə, kkə bwo fəŋ bən'yɔɔ hlɨŋ nwaa Chu ni bə bəŋ lə bə́ tukwaŋ ə bəche bə nya go, yee bə bə̄lə ə duŋ Chu nnu i dùŋ yo Chu ŋkee. Chu nu dùŋ nnu i mà fə yo buuli bə shishɔ maa nɔ bə bieŋ binhliŋ bbɨŋ bi dùŋ ə bidɔhɔ bɨhŋ mə. 16 Ə mà duŋ fwii, i tukwaŋ ə bəne bə bitɨŋ binhliŋ go, lə yee bə́ fə̄ ye bə́ lèki lə. 17 Kwaalə, i fə̀ dəŋ ə duŋ bieŋ binwaa bə bəne bənyii lə i yo həmə. i nə̀ bə́ jaŋ, bə́ kə̀nə biləə ə bwɔɔ bəŋ yəəŋ, bə́ dì bə́ wò njənjə.” 18 Maa ye bə Banaba bəə Pwɔɔ yɔɔlə bieŋ bɨhŋ kiɛkiɛ bə bə́ nəni, bə́ fə nəni chɔ, bə́ hlə wii ə duŋ bə́ kaani kə fəə ntofi yo bə bə́ kə.

19 Bəjuu bədi hlə ja bwo həmə, bə́ no Antiyɔk bə Ikɔniyuŋ, bweemə bəne kiŋaaŋkə lə bə́ tɨŋ Pwɔɔ bə tə́. Ye bə́ mà tɨŋ lə, bə́ hlə kpa fu bə wu ə kibalaki kie mə bə́ hlē lə i kpee. 20 Kwaalə, kintu ki bəne bə kimbemi hlə bwo bumə ə wu bəŋ, i ja fa, chu ə kibalaki kie mə. Butuu fu wu, wu bəə Banaba hlə no həmə, yee bə́ gə̄ŋ ə kibalaki ki Delbi mə.

21 Ye Pwɔɔ bə Banaba lɛɛlə ə Delbi, dontə hlɨŋ nwaa ki Jisho, bə́ bənə bəne bə kimbemi həmə kiŋaaŋkə. Lə bə́ ja həmə fiimə chu dɨŋ, bə́ kah ə bibalaki bi Lishta bə Ikɔniyuŋ maa Antiyɔk nu Pishidia. 22 Lə yee bə́ kāh nəni, bə́ shīi go ŋə bəne bə kimbemi bie, keeh bə́ lə bə́ ba yee bə́ lēmi ntakə ə kimbemi kibə mə, bə́ kələ lə bəə bə́ kənə bəmbwo ŋəŋ ə bəŋgə go kiŋaaŋkə hlə lɛɛ ə muŋkɨŋ mu Chu mə. 23 Bə́ hlə yee bə́ bwā dəŋ bəche bimbumə bi bəne bə kimbemi, bə́ chì bə́ ə bimbumə bi bəne bə kimbemi mə binhliŋ. Ə chulə yee bə́ chī bə́, bə́ shì biləə bə́ chèe Chu bə́ nə̀ bə́ ə kwáŋ ŋə Baba Jisho nnu bə́ bèmi yo bə wu.

Pwɔɔ bə Banaba chu dɨŋ ə Antiyɔk nnu Shilia mə

24 Pwɔɔ bə Banaba gəŋ kah ə kitɨŋ ki Pishidia mə, le gəŋ ə Panfilia, 25 dontə die Chu ə kibalaki ki Pelga mə, hlə bwɔ gəŋ ə kibalaki ki Atalia mə. 26 Ye bə́ bwɔ lə həmə, lɛɛ ə chəŋ nni njɔ mə, hlə fiimə yee bə́ chū dɨŋ ə Antiyɔk. Antiyɔk nu duŋ dɔhɔ kkɨŋ bə́ mà nə bə́ ə Chu kwáŋ i hləmə bə́ bə kinchɨnə bə́ hlə yee bə́ jāa bə́ nɨ̀ŋ nimi llɨŋ bə́ mà kaanə lɨhŋ. 27 Ye bə́ bwii lə həmə, bə́ buhuŋ kimbumə ki bəne bə kimbemi, yɔɔ tɔ fieŋ finhliŋ bə bə́ ye Chu ma nɨŋ bə bə́, maa ye i ma wɛ tɔ́ŋ ŋə bəne bbəŋ bə́ dùŋ kə duŋ nə Bəjuu, bə́ yii tɔŋ ə Jisho mə. 28 Pwɔɔ bə Banaba duŋ bə kintu ki bəne bə kimbemi bie ə bwɔɔ bəŋ gbaaŋ.