Bə Pwɔɔ bwii ə Malta
28
Ye kkə mà fu lə həmə həkpa nyɛkii nəni, kkə wo lə bə́ chēe dɔhɔ kie lə Malta, ə màa ə kitɨŋ ki njɔ mə kintekinte. 2 Bəne bə kitɨŋ kie nyii kinleki bə be ə kə duŋ nə ki chɛɛ kə, tɨŋ jə be, fə bwii kkə wūu, yulahalə jaŋ mà gbee bəmbwo, fuu duŋ. 3 Pwɔɔ buhuŋ muŋgwaa, gəŋ lə i yii hətaŋ, fɛɛ duŋ ə muŋgwaa mwe mə, bwii shii fə ki hlə fu, nɨŋ kənə kwaŋ wiih yee ki hlɨ̄ŋkə ə wi go. 4 Lə bəne bə kitɨŋ kie ŋəŋ ye ki hlɨ̄ŋkə lə ə kwaŋ wiih we go, bə́ hlə yee bə́ yɔ̄ɔ bə́ bə́ lə, “Mbɛɛ nu mà hlaala jii mbɛɛ. Mə hə fwoo kwoo ə nɔ mə, kwaalə chu ya fwoo bə wu mə lə kpe.” 5 Kwaalə, Pwɔɔ bu shaali kwaŋ wiih ə nshaali mə fɛɛ kie gbe ə bwii we mə, fieŋ nakə fəə wu kə. 6 Bəne bie yee bə́ kē bə́ hlē lə Pwɔɔ lə chɔɔ bəmweli gbo, ləkə lə mə lə bu gbe kpe. Bə́ ke hləŋ hləŋ nakə ŋəŋ nə fieŋ kə, ə chulə bə́ ŋəŋna lə fieŋ kə fəə wu kə, bə́ gaanə kinhle kibə yee bə́ yɔ̄ɔ lə, “Mbɛɛ nu lə chu ju.”7 Mbɛɛ hlaahnə nu həmə yo mà kənə biwɛŋ biih baha həmə chəkə chəkə ye kkə mà duŋ lə. Yii li mbɛɛ yo mà duŋ lə Publiu. I tɨŋ jə be, kkə duŋ həmə joo tɔh i chù be kinwaakə. 8 Fi bwo duŋ lə che Publiu mà duŋ i nə̀nə bə jəŋ i wo ŋgə bə kinji ki ŋgɔŋ. Pwɔɔ gəŋ ə dɔhɔ kkɨŋ i màa i nɔ̄ŋ kie, chee Chu, chi kwáŋ ə wu bəŋ, ŋwuhuŋ wu. 9 Ye fi mà kah'lə nəni, bəne bə kitɨŋ kie bənhliŋ bbəŋ bə́ mà kənə jə́ŋ hlə ja yee bə́ bwō ŋə̀ŋ Pwɔɔ i ŋwùhuŋ dəŋ bə́. 10 Bə́ hlə yee bə́ nə̄ be bieŋ kiŋaaŋkə. Ə chulə yee kkə kīɛɛ lə kkə no həmə, bə́ baa bwo bə bieŋ binhliŋ bbɨŋ kkə mà kiɛɛ bwo yii ə chəŋ nni njɔ ye mə.
Bə Pwɔɔ no ə Malta gəŋ ə Luŋ
11 Kkə lɛɛ ə chəŋ nni njɔ mə gəŋ ə duŋ kkə hə duŋna ə Malta ə kitɨŋ ki njɔ kie mə kintekinte kii tɔh. Chəŋ nni njɔ ye mà duŋ nni Aleshandia bə́ chèe lə Bəcheh bbəŋ bə́ dùŋ Maŋ,ª i mà duŋ həmə ə kitɨŋ kie mə i kè bwɔɔ nnu kifwuŋ kie lə kah. 12 Kkə ja gəŋ bwii ə ŋgwiŋ mə kibalaki ki Shaylaku həkpa, nɔŋ həmə joo tɔh, 13 kkə no həmə, gəŋ bwii ə ŋgwiŋ mə kibalaki ki Ligiyuŋ həkpa nɔŋ həmə. Lə butuu fu wu, fwee chɔɔ yee ki bīŋ ə je munhlili, kkə hlə yee kkə gə̄ŋ, lə yee ə dūŋ ə joo bəŋ fwe, kkə bwii ə ŋgwiŋ mə Pɔtioli həkpa. 14 Ye kkə bwiilə mə, kkə ŋəŋ bəne bə kimbemi bə həmə, bə́ kɔnɔ be lə kkə chɔɔ gəŋ duŋ bə bə́ həmə joo fumanyaaŋ. Kkə duŋ bə bə́, kkə hlə gəŋ bwii ə Luŋ.
15 Ye kkə màa kkə gə̄ŋ lə, bəne bə kimbemi bə Luŋ wo lə kkə bie kkə bwō, bə́ fu yee bə́ jāa bə́ bwō fo bee bə́ lə bənə. Bə́ bwo hləŋ hləŋ bwii ə Shi yi Apiyu bəŋ, bə ə Chə́ŋ Shɔ yí Bəne bə Kpuuni bəŋ. Pwɔɔ ŋəŋ bə́ lə, tɔŋ liih də, i nə kimbaafɛɛ bə Chu. 16 Lə kkə bwii ə Luŋ, bə́ tukwaŋ ə Pwɔɔ go lə yee i dūŋ wu fiih wuu mboŋ, ŋwuŋ kicha fwòŋ wu.
Pwɔɔ duŋ ŋwuŋ nnu chəŋ munfwa mə ə Luŋ i yɔ̀ɔ die Chu
17 Joo kah tɔh, Pwɔɔ chee bikuu bi Bəjuu bi həmə. Lə bə́ bwo, i yɔɔ bə bə́ lə, “Bəŋgwoŋ bəŋŋ, ndùŋ ə chəŋ munfwa mə nəni bə́ mà kwo mi ə Jelushalɛŋ, nə ə kwáŋ ŋə bəne bə Luŋ mə, ə duŋ ŋkə fəə fieŋ fidi fiwaha bə bəne biaa ləkə too wi bəche tah biaa kə. 18 Bwɔɔ nnu bəne bə Luŋ bie mà chiini nhlaa ŋgwəŋ, nakə ŋəŋ nə fieŋ ffɨŋ duŋ ə bə́ jii mi ə fi bəŋ kə. Bə́ hlə yee bə́ kīɛɛ lə bə́ tukwaŋ ə mi go, 19 kwaalə, Bəjuu nɨhŋ. Nhlə n'yee ŋkɔ̄nɔ lə nhlaa ŋgwəŋ gəŋ fwi ə Ŋkɨŋ nnu Luŋ kwuŋ. Mmà ŋkə nfəə nəni lə ŋkənə fieŋ bənchaa ə bəne bəŋŋ go. 20 Fiee fieŋ ffɨŋ fi fə fie lə nchee bəŋ lə kkə yɔɔ. Nduŋ ə fíaŋ yɨhŋ mə nəni ə duŋ yu mbɛɛ nnu be bəne Bəishlael maa kkə kē.”
21 Bəne bie chuu bə wu lə, “Kkə kə jəə kiŋwaati kkɨŋ ki fù ə Judia yu wə kə, mbɛɛ ju ə bəŋgwoŋ biaa bbəŋ bə́ màa bə́ nō bie mə bə́ bwò yaŋ kə hlɔmɔ wə ləkə yɔɔ fieŋ fiwaha ko kə. 22 Kwaalə, kkə lə leki bəŋ'wo kinhle ko. Fɨhŋ kkə kələ duŋ kwaa lə kintu kkɨŋ wə duŋ kɨhŋ ə ki mə bəne bie bə́ hlāŋ bu hlaŋnə ə bidɔhɔ mə binhliŋ.”
23 Bə́ hlə chi butuu bbuŋ bə́ yá bwo ə Pwɔɔ yɔɔ bə bə́. Ə bwo duŋ bumbini bwe, bəne kiŋaaŋkə bumə ə dɔhɔ kkɨŋ i màa i dūŋ kie mə, i chɔɔ jə fili fili gəŋ bwii hə kitaŋ, i nāchɛ bieŋ binhliŋ bə bə́, dontə bə́ ki muŋkɨŋ mu Chu. I baa nyii bə́ bieŋ bbɨŋ bi dùŋ ə Kiŋwaati ki bəŋkɨnə bə Mushe mə bə bbɨŋ bi dùŋ ə Biŋwaati bi bəne bə hlɨŋ Chu mə ki Jisho, i jù bənfə lə bə́ bemi lə fieŋ ffɨŋ i yɔ̀ɔ duŋ chɛɛŋ. 24 Bəne bədi bemi fieŋ ffɨŋ i màa i yɔ̄ɔ, bədi nakə bemi kə. 25 Bə́ ja hlaamə bə́ bə́, bə́ fu ye Pwɔɔ lɛɛ lə die lə, “Fieŋ ffɨŋ Fiana Wɛɛŋ mà yɔɔ bə bəche chwa bieeŋ ə biwu bi mbɛɛ hlɨŋ Chu Ejaya mə mà duŋna ba chɛɛŋ. 26 Fiana yo mà yɔɔlə,
‘Gəŋ yɔɔ bə bəne bie lə,
bə yáa bə wə̄lə bieŋ kinwaa kwaalə bə kə woo bi kə,
bə yáa bə kēe bieŋ kinwaa kwaalə bə kə ŋəŋ nə kə.
27 Yee fi dûŋ lə yulahalə tɔ́ŋ ŋə bəne bie
kpee.
Bituŋ bibə bie binchiinchi,
díi ŋəbə ŋie kimaalə.
Bə́ fə̀ lə fo díi ŋəbə lə nakə yee ŋə ŋə̄ŋ ə bieŋ go,
bituŋ bibə wò bieŋ,
tɔ́ŋ ŋəbə shì,
ə bə́ hlə fiimə bwo chu dɨŋ ə mi go, ə ŋwuhuŋ bə́.’”
28 Pwɔɔ hlə kaanə lə, “Yee bə kə̂lə lə hlɨŋ nih ki ye Chu fwoo bəne duŋ nni i faŋ bə bəne bbəŋ bə́ dùŋ kə duŋ nə Bəjuu, ə bə́ wo.” 29 ª [Ye i yɔɔlə nəni, Bəjuu bie hlə no bənhliŋ, yee bə́ kwə̄lə bə́ kə̄nə noonə ə kə duŋ nə ki chɛɛ kə.]