Eebru 6

1 An puee tí jītímaan tibɔpeepeekaal tin unil yaa fōō Kriisitoo ki kíí mpɔm bi dàkà-uee pu, kí nyàab̀ kí kpántí binicikitikaabi. An kaa máaǹ tí gbíntíǹ tibɔpeepeekaal tin un fōō ki kíí mpɔmee nyée pu, tin sá unil ń fá atuun ŋin kaa cáá ipaatee nì unil ń fōō Unimbɔti kí kííyee, 2 nì bi nín dàkà Unimbɔti nyiŋfàltam bɔti puee, nì bi nín pāantí iŋal binib pu ki mèé ki tìì-bee, nì bitaŋkpiibi fìkititam, nì ditafadaaldi din kaa cáá dikúntilee nín dɔ̄ ki cí binikpitib puee. 3 An puee tí yàntīmaan tíǹ, Unimbɔti yaa lèe, tí póotí tipɔn.

4 Di sá bin fōō Tibɔmɔntiil ki kíí ki wál̀ ibaamɔn, ki dáká diyimɔɔl din bí yilpuee mɔŋŋu, ki fōō Unimbɔti Fam, 5 ki gbìl̄ Tibɔmɔntiilee taapu ki béè Unimbɔti pɔŋyi in bí ki dòońee, 6 ní boonee bidambi lítèe, baa ti ŋūǹ kí fàtīí gíiǹní-bi nsammɔnti poon. Di sá yii bidambi fātìi bí ki kpáà Unimbɔti Jipɔɔn ndɔpuntikaa pu nliliitiim, ki bí ki bíiĺ-u kunipaau kansikin dee^a.

7 Kitiŋ yaa bí ní ki fòol̄ ntaanyim múlmul ní ki lòoǹ tijin tin bi kùn̄ ki-puee, Unimbɔti bìintí ki-pu ní. 8 Ama kitiŋ gbanti yaa nyēē ikuŋkum nì abɔjanaakunee, mimmee bi ká-kì yii kàa bí tiban dee. Mbusu kaa pɔ̄ɔ̄ an tiŋkee dikɔl, kun puee ŋŋmi di dāa dòoń kí wà-kì^b.

9 Nnabineeŋkaamu, nì min kɔkɔ ti bí ki sòoǹ nì ni míǹ nee, ti cáá ni-pu dimákal yii naa bí míǹ, ni tɔ́kɔ́ difiil saŋŋu pu. 10 Di sá yii Unimbɔti sá deedeedaan ní. Waa làá súntí dineendi din ni dàkà binib u-puee nì atummɔnti ŋin ni túń nì ŋin ni gbíntì ki nìkì ki tūǹ ki tìì bin sá u-yabee pu. 11 Tin ti nyàab̀ee di sá báà ŋma ń dàkà difaŋgiil míǹ kí tin kátí-ku, án nín làá ŋá pu ní dāá fōō kun pu ni máká ki tūǹ an tuuŋŋee. 12 An puee ní taa bàtī ni-faŋgiil pu, ama ní táá bin dū bi-fookiiu nì bi-mɔtiiki ki fōō tin Unimbɔti pōoǹee tabɔbiliŋ.

Unimbɔti nín nìn pōoǹ Abraam puee bɔti

13 Ŋyunti ŋun Unimbɔti làá nìn pòon̄ Abraam dipoondee, kí dàkà-u yii u làá lafun ŋá min u pōoǹ-uee, Unimbɔti nìn pūtì ní. Tiba kaa nìn bí ki jítiǹ-u ú yíiń kudɔŋu yindi kí pùtēe puee, ní Unimbɔti dūu pūtì u-ba. 14 U bí Abraam yii: «M pūtì m-ba yii m làá bìin̄ a-boon kí bùtī a-maaliŋu^c.» 15 Abraam nín gbìl̄ mimmee, u jíń kimɔtii ní ki cíitì áli ŋyunti dāa bāań ní u fōō tin Unimbɔti pūtì ki pōoǹ yii u làá tīī-uee. 16 Binib bili yaa kpákèe, un jítiǹ-bi bi fàŋkée ní bi pùtī. Bi nín pūtì mimmee ní bi-nikpɔŋkpɔkɔkuee ń kúntí. 17 Míǹ mbaantiim ní Unimbɔti nín là kí dàkà u-yab yii u-poondee kaa bí kí kpántí jaanjaanee pu ní u pūtì. 18 U tīī-ti tiwan tili tí ŋmā kí nīn máká ti-pu, dipoondi nì dipùtil. Tiwan tili gbanti puee, Unimbɔti kpá kí kpántí u-nyɔkɔ. U kpá kí mɔ̄ntì-ti^d, an puee timbi bin sáǹ ki dɔ́miń ki kɔ́-uee, tí kámaan kunyannyaau kí mɔ̀tīí dū ti-mákal kí báań tin u pōoǹ-tee pu tiŋan. 19 Dimákal din ti cáá yii ti làá dāá ká tin Unimbɔti pōoǹee di yì-tì ti bá ki yú ki ŋúb́ an pɔ̄ɔ̄. Dimákalee di jītí yilpu punyɔkɔki kí kɔ́ circir páaa laŋki^e. 20 Niin ní Yeesu līntì ti-nyɔkɔpu ki dī ki kɔ́ ki kpántì usaraaŋakpil kii Meelkiiseedeekee, ki gbàam̄ ti-pu kí nīn cá jaanjaan.