Eebru 5

1 Binib kansikin ní bi lèekī ubɔ ú nīn sá usaraaŋakpil kí nīn ŋáań bin kɔkɔ kíǹee yil pu saraabi Unimbɔti nimbiin, ní u ŋáań saraabi binib kpitii pu. 2 Usaraaŋakpil gbanti nyí kí jī bin kaa nyí tibee nì bin yīntèe pu kimɔtii, kun puee úǹ u-ba sá unil ní ki cáá u-wɔfii. 3 Kii u mun nín cáá u-wɔfiiyee puee, an sá yii ú ŋá u-kpitii pu saraa ní kí nín ŋá bin kíǹee kpitii pu saraau^a. 4 Ubɔ kaa ŋūǹ kí gāā u-bindi yii u làá ŋá disaraaŋatundi. Unimbɔti di lèekī kii u nín nìn lēē Aarɔn puee.

5 Míǹ mbaantiim an kaa sá Kriisitoo u-ba di gāā u-bindi ki là jilma ní ki kpántì usaraaŋakpil. Un tīī-uee di sá un bí-u yii:

«Sii di sá man Jipɔɔn,

báà ŋma ń béé díǹ yii

man di sá a-Baa.»

6 An gíti lī laaba mun yii:

«Bi lēē-si á nīn sá usaraaŋakpil

kii Meelkiiseedeeki nín nìn sá puee

kí nīn cá jaanjaan^b.»

7 Yeesu nín nìn dáá bí duulinyanee, u nìn mēē Unimbɔti un ŋūǹ kí fīī-u ŋkúminee ki gbāam̀-u nì ikuŋkuunti nì nnyinnyim^c. Unimbɔti nìn pílifiǹ-u, kun puee u nìn sīntiǹ u-ba taapu. 8 Nì min kɔkɔ Yeesu sá Unimbɔti Jipɔɔnee, u bífì kí nīn tɔ́ Unimbɔti falaabi bin kɔkɔ u jíńee poon. 9 An pu ní u sá uniŋman umɔnti un pu baa kāntí tikpitil tibee, ki kpántì un tìì difiil din kaa cáá dikúntilee ki tīī bin kɔkɔ tɔ́-uee. 10 Unimbɔti di lēē-u ú nīn sá usaraaŋakpil kii Meelkiiseedeeki nín nìn sá puee.

Nín̄ nyíǹ a-ba kí taa fá fookii

11 Ti bàà cáá tibɔti tikpil kí sòoǹ nì ni an pu, ama ní an pɔ̄ɔ̄ tí bɔ́bití taapu kí tùkù-ni, kun puee ni sá binib bin sɔ̀m̀ kí gbìl̄ tibɔti taapu malaayee ní. 12 Ni bàà máaǹ ki kpántì doooo nee bin dàkà bin kíǹee Unimbɔti bɔtee, ama nimbi di gíti bí ki nyàab̀ bí dàkà-ni Unimbɔti bɔti tin bi péetí kí dàkà bin fōō ki kíí mpɔmee. An nín bàà sá ní nīn jīǹ binicikitikaabi jintee, ní ni dū mbiim ki ŋá ni-jinti kii mbiyaamu mun ŋáaḿee. 13 Un ní mbiim sá-u tijinee, udaan dáá sá kii kibiki kin ŋáaḿee dee, waa ŋūǹ kí béé min ŋān̄ Unimbɔti nimbiinee^d. 14 Ama tijin tin nyìm̀ee sá ki tīī binicikitikaabi bin cáá nlandɔkɔ ki dàkafī ki nyí ki gàntī tin sá tiŋanee nì tin sá tikpitilee ní.