2 Kɔranti 5

1 Ti nyí yii tiwun tin poon ti kóò duulinya nee poonee yaa kpíìyaaa, Unimbɔti kpáafì-ti tiwumpɔn tiba yilpu. Tiwun gbanti tíǹ sá kii kudii kun úǹ u-ba máńee ní tí nīn kóò poon jaanjaan. 2 Ama kɔŋkɔnnee ti bí ki yáliŋkí^a ki bàà nyàab̀ kí fōō yilpu wunti tin sá kii kudii kun Unimbɔti u-ba máńee. 3 Kun puee taa làá tin nín̄ bí yilpu kaa cáá tiwun. 4 Tiŋman timbi bin dáá kóò tiwun nee poonee, ti bí digìńdi nì falaabi poon ní. Ama taa là kí nyā tiwun tin sá taapu doo yatee poon. Ti là kí dū yilpu wunti ní kí dūú bìin̄ tin béeyee pu, án nín làá ŋá pu ní tiwun tin kúùyee ń nīn fúuń tin kaa kúùyee poon kí ká dimaŋfalee. 5 Unimbɔti u-ba di bí yii ti-wunti ń dāá kpántí míǹ. U-Fam min u tīī-tee di dàkà yii u kpáafì tiwammɔntiil ki yóoǹ-ti ti làá dāá fōō.

6 An puee ní ti cáá kunyannyaau baabadal. Ti nyí yii ti nín dáá kóò tiwun tin poonee, ti kóò ki dátiǹ ti-Dindaan. 7 Ti fōō Unimbɔti nín lī puee ní ki kíí, taa láá ká nì ti-nimbiliŋ. 8 Ti cáá kunyannyaau an júkufí-ti ti bàà là kí yīkì ti-wunti tin bí nee poon kí cù kí nīn bí ti-Dindaan cee. 9 Ama tin ti nyàab̀ee di sá báà ti yaa bí tiwun nee poonaaa, ti yaa nyáń ti-naaa, tí fáatí-u. 10 Kun puee an sá yii ti-kɔkɔ ń dāá kpāfì Kriisitoo nimbiin ní ú sòoǹ ti-bɔti ti nín kāl̀ duulinya poon ki dū ti-yuntiŋu ki ŋá diŋyee. An yaa sá ikpitaaa, an yaa tí sá tiŋanaaa, ní ú dāá pà báà ŋma u nín máaǹ tipaal tiŋyee^b.

Kriisitoo puee ti nì Unimbɔti kansikin mɔ́ɔkì

11 Ti nín fàŋkí Unimbɔti puee ní ti bí ki nyàab̀ binib ń fōō-u kí kíí. Unimbɔti wāĺ-ti míǹ pílpil, m nyí yii ni mun nyí ti-pu míǹ ni-pɔbiliŋ poon. 12 Kaa sá ti là kí fàtīí tí pàkà ti-ba ni-cee, ti là kí pɔ̄-ni nsan ní nīn mɔ̀ɔǹ ti-pu ní. Míǹ ní ni ŋūǹ kí ká tiba kí kíí bin di bí ki sòoǹ bi-nyɔmmu poon tibɔti fám ki kāntí tinyool, ama ní bi-pɔbiliŋ poon kūńee. 13 Bi yaa yíì-ti biwaatiibaaa, an sá Unimbɔti pu ní bi yíì-ti míǹ. Bi yaa tí yíì-ti binimɔntiibaaa, an sá nimbi paatii ní. 14 Kriisitoo neendi di jíń mpaan timbi pu, timbi bin nyí yii unibaanti di kpíì ti-kɔkɔ puee, mimmee ti-kɔkɔ mun kpíì deeyee. 15 Úǹ di kpíì ti-kɔkɔ pu, án nín làá ŋá pu bin bí dimaŋfalinee ń taa nín̄ bí ki tīī bi-ba, ama bí nīn bí ki tīī un kpíì ki fīkitì bi-puee.

16 An puee taa ti kpèé ubɔ nniyaamin. Ki kpáaǹ dooooyee ti yaa nìn kpèé Kriisitoo nniyaaminaaa, kɔŋkɔnnee taa ti kpèé-u míǹ. 17 Un nì Kriisitoo ŋá ubaantee kpántì unipɔɔn dee, tin sá tikpikilee jítì, tipɔn di kíǹ ki bí. 18 Unimbɔti di ŋá míǹ kɔkɔ. U dī Kriisitoo pu ki yāntì ti nì u mɔ́ɔkì ní ki dū ditundi nee ki ŋá ti-ŋaan yii tí cáań binib u nì bi ń mɔ̄ɔkì. 19 Di sá yii Kriisitoo pu ní Unimbɔti dī ki cáań binib ní u nì bi mɔ́ɔkì, kaa fātìi tɔ́ bi-kpitii in bi ŋée pu. U dū dimɔɔkil gbanti tundi ki ŋúbiǹ-ti tí sòoǹ nì binib.

20 An puee Kriisitoo nyɔkɔpu ní ti làá sòoǹee, a lì kii Unimbɔti u-ba di dī timbi pu ki yíì-nee. Ti dū Kriisitoo ki gbāam̀-ni, ní kíí kí yàntī ni nì Unimbɔti ń mɔ̄ɔkì. 21 Timbi kɔkɔ puee, Unimbɔti yāntì Kriisitoo un kaa ŋá ikpiti ki kée fōō timbi kpitii, án nín làá ŋá pu u-puee, tí kpántí deedeedambi Unimbɔti nimbiinee.