2 Kɔranti 4

Tigaajawan tin kā aboonnee

1 An sá tiŋan ní Unimbɔti ŋá-ti ní ki dū ditundi nee ki ŋúbiǹ-ti. An pu ní ti-wunti kaa yɔ̀tī di-pu. 2 Ti fá dibɔmbɔndi nì icoo tuuŋŋi. Taa ŋmàtíǹ binib, kaa kpántí Unimbɔti bɔti, ama Unimbɔti nimbiin ní ti sòoǹ ibaamɔn ki cántí ki tùkù binib ki nyàab̀ báà ŋma ń béé yii tin ti sòoǹee sá ibaamɔn. 3 An puee bin wáŋkèe ceeyee, Unimbɔti bɔti tin ti sòoǹ nee sá dibɔmbɔndi ní ki tīī-bi. 4 Kun pu baa fōō-tì ki kííyee di sá Sitaan un sá duulinya nee bɔtiuee^a jɔ̀b̄-bi ki yāntì baa wāĺ Tibɔmɔntiilee nín ŋmíntí ki dàkà-bi Kriisitoo un sá Unimbɔti naŋkuee nyooti. 5 Di sá yii taa bíi sòoǹ nì ni timbi ti-ba bɔti, Yeesu Kriisitoo bɔti ní ti sòoǹ nì ni yii úǹ di sá ti-Dindaan. Úǹ pu ní timbi sá ni-tɔntɔnliibi. 6 Di sá Unimbɔti un bí yii: «Ŋwalifi ń ŋmíntí dibɔmbɔndinee^b,» úǹ u-ba di ŋmíntì ti-pɔbiliŋ poon ki yāntì ti ká Kriisitoo nimbiin Unimbɔti nyooti nín jìl̀ miŋyee.

7 Ama timbi bin u dū Tibɔmɔntiil tin sá tigaajawanee ki ŋúbiǹee, ti sá kii aboonee ní. Taa pɔ̄ɔ̄, ní tigaajawan kā ti-ni, án nín làá ŋá pu binib ń béé yii mpɔŋkpaan ŋun bí ti-ni ki tūǹ ditundee nyánní Unimbɔti ceeyee, an kaa nyánní timbi cee. 8 Falaabi kɔkɔ nì bi-nyɔkɔm nyìitī-ti, ama ti mun kaa wìil̄. Tiwan tikpil bàkantí-ti, ama ti mun kaa páatí ti-mákal Unimbɔti pu. 9 Bi jì-ti, ama Unimbɔti kaa yàntī bí cúú-ti. Bi líikí-ti kitiŋ, ama ti mun kaa kúù. 10 Baabadalee bi dī-ti kí kpɔ̀-ti kii bi nín nìn dī Yeesu puee, án nín làá ŋá pu bí ká dimaŋfal din Yeesu cááyee ti mun nee. 11 Yeesu puee, ŋyunti kamaayee ŋkúm pée kpàkaǹ-ti ní. Báà ti yaa jíń falaa ní ki dāa kpíì, binib làá béé yii Yeesu bí ti-ni. 12 Timbi bí ŋkúmin, ama ní ki cāabìń nimbi dimaŋfal.

13 A lì kii Unimbɔti gbɔŋku poon nín lī puee yii: «M fōō ki kíí, an pu ní m sòon̄^c.» Nlandɔkɔ gbanti mbaanti ní ti mun cáá, ti mun fōō Unimbɔti ki kíí, an pu ní ti sòoǹ. 14 Ti nyí un fīkitì ti-Dindaan Yeesu ditaŋkpiilinee làá dāá fìkitī ti mun kii u nín fīkitì Yeesu puee, ní kí dāá cáá ti nì ni-kɔkɔ kí kàan̄ u-cee. 15 Nimbi pu ní ti jīǹ falaa gbanti, án nín làá ŋá pu Unimbɔti nín tīī diyimɔɔl diŋyee ń bà báà ŋma, bí kpāfì kunipaau kí jāam̀ Unimbɔti tinyooldaan u-ŋanti puee.

Fookii ń nīn kpòotī-ti

16 An pu ní ti-wunti kaa yɔ̀tī. Báà an yaa sá yii ti-wunti tin poon ti bí nee yaa bíi nàantí ki sìntāaa, dimaŋfapɔndi din bí ti-nee làá nīn pée pɔ̀ntī ní ki cá. 17 Kɔŋkɔnnee ti nín bíi jīǹ falaa un fiii nee di bíi bɔ́ntí tinyookpaandi tin kaa cáá dikúntil taa ŋūǹ kí dūú ŋmàntīǹ tibee ki yōontí-ti. 18 An puee timbi nimbikpeeŋu bá tin baa wāĺee pu ní, kaa sá tin bi wāĺ nee pu. Di sá tin bi wāĺee kaa yúntí, ama tin baa wāĺee, tíǹ làá nīn pée bí ní kí nīn cá jaanjaan.