Room 6

Ti kpíì ki fīkitì nì Yeesu Kriisitoo

1 Mimmee, tí lì yii ba? Tí nīn gbíntìi ŋáań ikpiti ní Unimbɔti ŋanti ń wíiǹaaa? 2 Aayee, kpataaa! Timbi bin kpíì ikpiti jandi púee, mana ní ti gíti ŋūǹ kí nīn bí ki ŋáań ikpiti? 3 Naa nyí yii, timbi bin kɔkɔ bi fùl̄ Unimbɔti nyim ti ŋá ubaanti nì Yeesu Kriisitooyee, ti kpáfì ki kpíì u-kúm min u kpíìyee níii? 4 Kii bi nín fùl̄-ti Unimbɔti nyim puee, bi síb́-ti tí nīn bí ŋkúmin nì Yeesu dee, ní kii ti-Baa Unimbɔti nín dū u-pɔŋkpaaŋŋu ki fīkitì Yeesu Kriisitoo ditaŋkpiilin ki fātìi gíiǹní-u dimaŋfalin puee, mimmee, ti nì u kɔkɔ di kíǹ ki bí dimaŋfapɔndin.

5 Di sá yii timbi nì u yaa kpáfì ki kpíì u-kúmee, míǹ mbaantiim ní ti nì u kpáfì ki fīkitì difìkitibaantiil. 6 Tí béémaan yii, ti nín nìn bí min min dooooyee, ti-bimbim gbanti kpíì nì Yeesu ndɔpuntikaa pu. Mimmee ti-bimbikpitim kpíì dee. Tí taa ti nín̄ sá ikpiti yumbui. 7 Di sá yii un yaa kpíìyee, úǹ nyáń ikpiti ŋaan dee. 8 Ti nì Kriisitoo yaa kpáfì ki kpíì, ti nyí yii ti nì u làá kpāfì kí nīn tí bí dimaŋfalin. 9 Ti nyí yii, Kriisitoo nín kpíì ki fātìi fīkitèe, waa ti bí kí kpú ŋwindal, ŋkúm kaa ti cáá u-pu mpɔn. 10 U nín kpíìyee, u kpíì diba pu ki kúntì ikpiti, ní kaa ti làá kpú jaanjaan. Kɔŋkɔnnee, u nín bí dimaŋfalinee, u bí ki tīī Unimbɔti ní. 11 Míǹ mbaantiim, ni nì Yeesu Kriisitoo nín ŋá ubaanti puee, ni mun ń nīn nyí yii ni kpíì ikpiti jandi pú, ki kíǹ ki bí ki tīī Unimbɔti.

12 Mimmee, ikpiti ń taa ti jī ni-wunti tin bí ki làá dāá kpúee ni mpaan, ní taa nín̄ nóó ni-landɔkɔkpitii nín là puee. 13 Ní taa ti dū ni-wunti jaŋŋi kí tīī ikpiti ń nīn cáá-ŋi ki ŋáań min kaa bí deedeeyee. Dūmaan ni-ba kɔkɔ kí tīī Unimbɔti, kii binib bin kpíì ki fīkitèe, ú nīn cáá ni-wunti jaŋŋi ki tūǹ atuun ŋin bí deedeeyee. 14 Di sá yii ikpiti kaa ti máaǹ kí nīn jīǹ ni-pu mpaan, kun puee marab kaa ti cí-ni, Unimbɔti ŋanti di kíǹ ki cí-ni.

Tí dū ti-ba kí tīī deedee tundi

15 Mimmee, tí lì yii ba? Tí nīn gbíntìi ŋáań ikpiti kun puee marab kaa ti cí-ti, Unimbɔti ŋanti di kíǹ ki cí-tee puɔɔɔ? Aayee, kpataaa! 16 Naa nyí yii a yaa sīntiǹ a-ba taapu ki tīī unil ki tūǹ u-tundee, a kpántì uyumbu ní ki tīī udaan un a sīntiǹ a-ba ki tīīyeeee? A ŋūǹ kí sìntīǹ a-ba kí tīī ikpiti in làá cáá-si ŋkúminee^a, ki tí ŋūǹ kí sìntīǹ a-ba kí nīn tɔ́ Unimbɔti kí kpántí deedeedaan. 17 Ama tí jāam̀maan Unimbɔti kun puee ni nìn sá ikpiti yumbui dooooyee, ní kɔŋkɔnnee ni sīntiǹ ni-pɔbiliŋ kɔkɔ ki tīī ibaamɔn in bi dàkā-ni kii bi nín dàkà an kɔkɔ puee. 18 Ni nyáń ikpiti yuŋkun ki kɔ́ deedee tuuŋŋi yuŋkun dee. 19 Ni nín kaa gbìl̀ tibɔti taapu malaayee pu ní m dū kuyuŋu bɔti tin tin binib nyée ki dūu ŋá tibɔŋmantikaal. Di sá yii, dooooyee, ni nìn dū ni-wunti jaŋŋi ní ki tīī tijɔkɔndi, ki ŋáań min kaa kítèe ní ki mɔ̄tìi kɔ́ diyìntilin. Kɔŋkɔnnee, ní fàtīí dūmaan ni-wunti jaŋŋi kí tīī deedee tuuŋŋi kí kpántí circir nib.

20 Dooooyee, ŋyunti ŋun ni nìn sá ikpiti yumbuyee, ni nìn tɔ́ ni-ba tiba kaa páb́-ni ní ŋá min Unimbɔti lèe. 21 Ba biliŋ ní ni nìn lòoǹ ní? Atuun ŋin ni nìn tūǹee, díǹ pu nee ŋi cáá-ni icoo, atuunee di cāabìń ŋkúm. 22 Kɔŋkɔnnee, ni nyánní ikpitin ki kpántì Unimbɔti yumbui. Abil ŋin ni lòoǹ niinee di sá circir tuuŋŋi, ní boonee, dimaŋfal din kaa cáá dikúntilee dɔ̄ ki cí-ni. 23 Tipaal tin ikpiti pèe di sá ŋkúm, ama tin tin Unimbɔti pūǹ faalaayee di sá á ŋá ubaanti nì ti-Dindaan Yeesu Kriisitoo kí ká dimaŋfal din kaa cáá dikúntilee.