Room 5

Kriisitoo yab cáá ŋgbansɔŋfi nì Unimbɔti

1 Mimmee, ti ká yii ti nín fōō-u ki kííyee pu ní ti kpántì deedeedambi Unimbɔti nimbiin, ní ti nì Unimbɔti kansikin ŋáŋkì ti-Dindaan Yeesu Kriisitoo pu. 2 Yeesu Kriisitoo puee ní ti ŋúń ki jéetì diyimɔɔl din poon ti bí nee, ti nín fōō-u ki kííyee pu. Ní kun mɔ̄ǹ-tee di sá ti cɔ́tí yii ti làá kɔ́ Unimbɔti nyootin. 3 Áli gba, ti nín jīǹ falaa puee, an mɔ̄ǹ-ti, kun puee ti nyí yii falaa di yàntī unil ń pɔ́ɔǹ u-ba, 4 ní dipɔ́ɔǹdi ń yàntī unil ń ŋmā kí já kí nyā dinimbinaamandin, ní ki kíǹ ki kā ki cɔ́tí yii Unimbɔti nín lī puee, u làá ŋá míǹ. 5 Taa cɔ́tí fám, kun puee Unimbɔti pú-ti Circir Fam min di gbēentí ti-pɔbiliŋ u-neendee.

6 Ti nín nìn dáá bí iwɔfineee, ní ŋyunti ŋun Unimbɔti yóoǹee bāań, ní Kriisitoo kpíì binikpitib pu. 7 An pɔ̄ɔ̄ unil ń kíí kí kpú deedeedaan pu. An yaa yíì ní ni kāntí ubɔ ń kíí kí kpú unimɔnti pu. 8 Ama Unimbɔti dàkà-ti u nín néeń-ti min bulifee di sá yii, ŋyunti ŋun ti dáá sá binikpitibee, Kriisitoo kpíì ti-pu. 9 U nín kpíìyee, ní u-fatikuu yāntì ti kpántì deedeedambi Unimbɔti nimbiin. Kin, an làá ŋá mana ní kɔŋkɔnnee waa làá ŋmā kí fīī-ti tí taa kɔ́ Unimbɔti ŋuulin? 10 Dooooyee, ti nìn dáá sá Unimbɔti nannanliibi ní. U-Jipɔɔn kúm di ŋáŋkì ti-kansikin, ní ti mɔ́ɔkì. Kɔŋkɔnnee, ti-kansikin mɔ́ɔkì ki dóò, ní u-Jipɔɔn bí dimaŋfalin, kin, án làá gíti ŋá mana ní taa làá ká difiil? 11 Tiba mun gíti sɔ̀: ti-Dindaan Yeesu Kriisitoo yāntì ti nì Unimbɔti kansikin ŋáŋkèe, ní ti bí ki fàal̀ Unimbɔti pu.

Adam nì Yeesu bɔŋmantikaati

12 Unibaanti Adam pu ní ikpiti dī ki kɔ́nní duulinyan, ní ikpitee cáań ŋkúm, ní báà ŋma kúù, kun puee báà ŋma ŋá ikpiti^a. 13 Dooooyee, kí wàatī Unimbɔti ń nìn tīī Mooyiisi marabee, ikpiti nìn pée bí kitiŋ pu dee. Míǹ ní marab yaa kpá, baa ŋūǹ kí lì yii unil ŋá ikpiti. 14 Nì míǹ kɔkɔee, kí yòon̄ Adam yuntiŋu kí dāá sāā Mooyiisi yuntiŋuee, ŋkúm di nìn jíń báà ŋma, ki kpáaǹ binib bin kaa ŋá ikpiti kii Adam nín ŋá puee.

Adam nìn sá Yeesu un dāa dɔ́miń boonee naŋku ní. 15 Ama Adam yìntitam nín cáań-ti tiŋyee kaa pēē nì tin Unimbɔti pūǹ-ti faalaayee. Tiŋman, binib kupaau kpíì unibaanti Adam yìntitam pu, ama Unimbɔti nín ŋáań binib tiŋan puee, ní u dū diyimɔɔl bulifi ki pú binib kupaau unibaanti Yeesu Kriisitoo pu. 16 Unimbɔti pɔl nín tūǹ ditundi diŋyee nyáń di-ba nì unibaantee kpitii tundi. Unibaantee kpitii nín cáań-ti kun kuŋyee di sá ŋkúm. Unimbɔti ŋanti tin u pú-ti faalaayee nín cáań-ti kuŋyee di sá, a-kpitii yaa yāntì ki wīikí min kamaa, u làá dūú pɔ̄-si. 17 Tiŋman, unibaanti yìntitam pu ní ŋkúm jíń báà ŋma. Ama Yeesu Kriisitoo ubaanti pu ní binib fōō tiŋan tin bulifi Unimbɔti ŋée. U pú-bi bí nīn bí deedee u-nimbiin, bidambi ń nīn cáá dimaŋfal kí jī dibeel.

18 Kii Adam baba kpitii nín cáań nnibiyaamu kɔkɔ ŋkúm puee, Yeesu Kriisitoo tundi din u túń nì deedeeyee yāntì nnibiyaamu kɔkɔ ŋūǹ kí kpántí deedeedambi kí ká dimaŋfal. 19 Kii unibaanti yìntitam nín kɔ́ǹ binib tikpil ikpitin puee, míǹ ní unibaanti nín tɔ́ Unimbɔti puee di cāntì binib tikpil làá kpántí deedeedambi.

20 Mara úǹ dɔ́miń ikpiti ń wíiǹ ní. Ama ikpiti yaa yāntì ki wīikí min kamaa, Unimbɔti ŋanti wīikí ki jítiǹ-i. 21 An di yì-tì ní, kii ikpiti nín nìn jíń báà ŋma ki cáań ŋkúm puee, Unimbɔti ŋanti kíǹ ki jīǹ mpaan binib ń kpántí deedeedambi kí fōō dimaŋfal din kaa cáá dikúntilee ti-Dindaan Yeesu Kriisitoo pu.