Moowaab yab
2
1 Ti-Dindaan nín lī puee sèé:«Moowaab yab ŋá ikpiti tikpil,
bi gíti ŋá an jítì mara pu.
An puee m nín pée síiǹ kí ŋá puee,
míǹ ní m làá ŋá.
Bi wùn̄ Eedoom bɔtiu kpabiŋ
an kpántì ŋfantam.
2 M làá sēē Moowaab tiŋki ŋŋmi,
ní Keeriyooti beeciŋŋi ń wà kí lítí.
Moowaab yab làá kpú
kuwookpaaŋŋu nì ijanjakuŋkuunti
nì iyin dibúndi poon.
3 M làá kpɔ̀ bi-bɔtiu,
kí kpáaǹ u-kàliŋkpilib dicilpu.»
Ti-Dindaan di lī míǹ.
Juuda yab
4 Ti-Dindaan nín lī puee sèé:
«Juuda yab ŋá ikpiti tikpil,
bi gíti ŋá an jítì mara pu.
An puee m nín pée síiǹ kí ŋá puee,
míǹ ní m làá ŋá.
Bi fá m-marab,
kaa nóó m-koobiliŋ.
Kii bi-naanjab nín nìn nóó awaa
ŋi kíil̀-bi puee,
míǹ ní bi yāntì awaa gbanti mun kíil̀-bi.
5 M làá sēē Juuda tiŋki ŋŋmi,
Jeerusaleem beeciŋŋi làá wà kí lítí.»
Isirayeel yab
6 Ti-Dindaan nín lī puee sèé:
«Isirayeel yab ŋá ikpiti tikpil,
bi gíti ŋá an jítì mara pu.
An puee m nín pée síiǹ kí ŋá puee,
míǹ ní m làá ŋá.
Bi nyáfí deedeedaan kí ká animbil,
ki nyáfí usoodaan kalaa nimbiliŋa
7 Bi nyìitī uwɔfi yil ki gùl̀ ntamin,
kaa sòoǹ unandaan bɔti deedee.
Unil nì u-jipɔɔn kpáfí usapɔɔn pu,
ki ŋáań míǹ ki bíiĺ man circir yindib.
8 Ipaan in kɔkɔ pu bi jáaḿ Unimbɔtee,
abɔkuti ŋin bi fōol̀ toolima
bisoodambi ceeyee pu ní bi dɔ̀c,
ki nyù ndaam min bi fìkēe
bi-Nimbɔtiu diikun.
9 Ama bi-puee m nìn kúntì Amɔɔr yab.
Binib gbanti nìn kpílifì ní ki yáà
kii seedir nì seeni sufiiyee.
M kúntì bi-kɔkɔ pílpil.
10 Man di nyántìń-ni Eejipiti tiŋkin,
ki kpōotì-ni abin imuŋku ili kuteeun
ní ŋmā kí fōō Amɔɔr yab tiŋki.
11 M lēē ni-jipɔmbi biba bí nīn sá m-bɔnaatiliibi,
ki lēē ni-naacimpɔmbi biba bí dū bi-ba kí sú-mi.
An kaa sá mimmaaa, Isirayeel yab?»
Ti-Dindaan di sòon̄ míǹ.
12 Ama ni nyūntì bin dū bi-ba ki sú-mee ndaam,
ki pīiǹ m-bɔnaatiliibi nsan yii
bí taa ti nàatī m-bɔti.
13 «An puee m làá tāā kí mátí-ni,
kii tɔrɔku un tú tiwan tikpilee
nín tà ki mátí tin kɔkɔ dɔ̄ u-saŋŋu pu puee ní.
14 Binib bin yáb̀ee
kaa làá dāá ŋmā kí sāǹ kí ŋmátí,
bipɔɔbi pɔŋŋu kaa làá kèetī-bi,
bijanjamɔntiibi kaa làá dāá ŋmā kí fīī bi-maŋfal.
15 Upintɔl kaa làá dāá ŋmā kí yūĺ kí tɔ̄.
Un ŋūǹ ki sáńee kaa làá dāá ŋmā
kí sāǹ kí ŋmátí.
Utanjakal kaa làá dāá ŋmā kí fīī u-maŋfal.
16 Ujanjal un cáá dibaatandee
làá dāá dū u-janjawanti kí fá,
kí sāǹ kí kátí ŋwiin gbanti».
Ti-Dindaan di lī míǹ.