Kugbɔŋu kun sòoǹ
Amoosi
gbɔŋku
1
1 Tibɔti tin Amoosi upikpaal un sá Teekoowa tiŋkinee sòon̄ee sɔ̀. Abin ali kí wàatī kitiŋ ń cìŋkèe, ti-Dindaan nìn lēē tin u làá sòoǹ Isirayeel beel puee bɔti ki dàkā-u. Ŋyunti gbantee, Oosiyasi di nìn sá Juuda tiŋki bɔtiu ní Joowaasi jipɔɔn Jeerooboowaam nìn sá Isirayeel tiŋki bɔtiu. 2 Amoosi nìn lī yii:«Ti-Dindaan téeń mpɔn doooo Siiyɔn jool pu,
u yāntì bi gbìl̄ u-nyɔkɔ pu doooo Jeerusaleem.
Niinee kupikpaau mooti fáaḿ,
ní Kaarmeel jool pu mooti kūń.»
Ti-Dindaan wòon̄ Isirayeel yab nì abee ŋin pìlīǹ-bee
Siirii yab
3 Ti-Dindaan nín lī puee sèé:
«Damaasi yab ŋá ikpiti tikpil,
bi gíti ŋá an jítì mara pu.
An puee m nín pée síiǹ kí ŋá puee,
míǹ ní m làá ŋá.
Bi dū apinjal ŋin inaa dátí ki kpátí atannaapikee
ki nàn̄ Galaadi yab.
4 An puee m làá sēē Asayeel beecindi ŋŋmi,
Been-Adaadi beecindi làá wà kí lítía.
5 M làá wīī Damaasi tiŋki punyɔkɔki kpàlkaati.
M làá kúntí ikpiti tantakal tiŋki bɔtiu,
nì un kā mmɔn tiŋki pu dibeelee,
ní kí yàntī bí cúú Aram yab
kí cùnnì Kiiri tiŋkin kuyuŋu.»
Ti-Dindaan di lī míǹ.
Fiiliistii yab
6 Ti-Dindaan nín lī puee sèé:
«Gaasaa yab ŋá ikpiti tikpil,
bi gíti ŋá an jítì mara pu.
An puee m nín pée síiǹ kí ŋá puee, míǹ ní m làá ŋá.
Bi cáá ditimbummɔndi nib
ki nyáfiǹ Eedoom tiŋkin yab.
7 M làá sēē Gaasaa tiŋki gundi ŋŋmi,
ní ki-beeciŋŋi ń wà kí lítí.
8 M làá kúntí Asidoodi tiŋki bɔtiu,
nì un sá Asikeelɔn tiŋki bɔtiuee.
M làá dū m-ba kí bíití Eekrɔn yab,
kí yàntī Fiiliistii yab ń kúntí.»
Ti-Dindaan Unimbɔti di lī míǹ.
Tiir yab
9 Ti-Dindaan nín lī puee sèé:
«Tiir yab ŋá ikpiti tikpil,
bi gíti ŋá an jítì mara pu.
An puee m nín pée síiǹ kí ŋá puee,
míǹ ní m làá ŋá.
Bi cáá ditimbummɔndi nib
ki nyáfiǹ Eedoom tiŋki yab,
kun puee baa dū kunabitiiu
poondi ki yíiń tiba.
10 M làá sēē Tiir tiŋki ŋŋmi,
ní ki-beeciŋŋi ń wà kí lítí.»
Eedoom yab
11 Ti-Dindaan nín lī puee sèé:
«Eedoom yab ŋá ikpiti tikpil,
bi gíti ŋá an jítì mara pu.
An puee m nín pée síiǹ kí ŋá puee,
míǹ ní m làá ŋá.
Bi kùl̄ ki bīiǹ bi-nabiyaamu
Isirayeel yab boon nì ntàataajimu.
Baa pée súń bi-saai báà fiii.
Bi fōō mbum an kaa kúntí,
bi-ŋuul kaa cáá yii an sɔ̄ŋkì.
12 M làá sēē Teeman tiŋki ŋŋmi,
ní Bɔsiraa beeciŋŋi ń wà kí lítí.»
Amɔn yab
13 Ti-Dindaan nín lī puee sèé:
«Amɔn yab ŋá ikpiti tikpil,
bi gíti ŋá an jítì mara pu.
An puee m nín pée síiǹ kí ŋá puee,
míǹ ní m làá ŋá.
Kun puee bi pūtì Galaadi tiŋkin pɔdambi
kí ŋmā kí wàan̄ bi-tiŋki.
14 M làá sēē Raaba tiŋki gundi ŋŋmi,
ní ki-beeciŋŋi ń wà kí lítí.
An dāa sá ikuŋkuunti nì kujaau wiiŋŋu dal,
utaa nì kubuŋkpaaŋŋu kun pɔ̄ɔ̄yee wiiŋŋu ní.
15 Bi làá dāá cúú bi-bɔtiu,
kí kpáaǹ u-kàliŋkpilib kí cùnnì kuyuŋu.»
Ti-Dindaan di lī míǹ.