Amoosi 3

Unimbɔti làá dáaĺ u-nibul tafal

1 Isirayeel yab, nimbi bin di sá kudicaŋu kun ti-Dindaan nyántìń Eejipiti tiŋkinee, pīlifìmaan tin ti-Dindaan cáá kí sòoǹ ni-puee.

2 «Kitiŋ pu dicaŋŋi kɔkɔ poonee,

nimbi baba ní m lēē ki kpèé.

An pu ní m làá dáaĺ ni-tafal

ikpiti in kɔkɔ ni ŋáaǹee pu.»

Unimbɔti yaa sòon̄ee, u-bɔnaatiliu kaa ŋūǹ kí nīn ŋmí

3 Binib bili cá nsan

kaa kpáfì ki sòon̄ ki bɔ́ntàaa?

4 Gbikinti yaa kaa ká upeel kí cúú,

u làá nīn sūǹ kupɔɔun fámaaa?

Kigbikintibiki yaa kaa cúú tiba,

kì làá nīn bí ki-kɔŋkooŋŋun ki mùuǹaaa?

5 Kutaliŋŋu sàtī unoon fám

baa dū tiba kí píĺaaa?

Kutaliŋŋu mun tòó fám

kaa pée sàl̄ báà tibaaa?

6 Bi búǹ dibaŋwul kitiŋin

tifaandi kaa cútí binibaaa?

Dinimbinaamandi kóòń kitiŋin

kaa nyánní ti-Dindaan ceeee?

7 Míǹ mbaantiim ní ti-Dindaan kaa ŋáań tiba kaa lēē ki dàkā u-tɔntɔnliibi bibɔnaatiliibi.

8 Gbikinti yaa téeńee,

ŋma sá-u ní kaa làá fàŋkì?

Ti-Dindaan Unimbɔti yaa sòon̄ee,

ŋma làá yíí kaa làá nàatī?

Samaarii bɔsooŋyi

9 Asidoodi tiŋki beeciŋŋi yilpu

nì Eejipiti tiŋki beeciŋŋi yilpuee,

ní bāakìmaan kí lì yii:

«Kóoǹ kí kpāfìmaan Samaarii jooŋŋi pu

kí kpèè fìkil fikil un bí kitiŋ gbantinee,

nì tipɔmbɔti tin ŋáań ki-nee!»

10 Ti-Dindaan di lī yii:

«Samaarii yab kaa nyí kí tɔ̄ ditummɔntiil.

Tiwaŋfìkikaal nì tinaayuwan

ní bi kùl̄ ki gbéeǹ bi-dimɔntiŋ poon.»

11 An pu ní ti-Dindaan Unimbɔti

sòon̄ sii Samaarii tiŋki pu ki lī yii:

«Unannanli làá dāá màntīí tū a-tiŋki,

kí gbākal̀ a-pɔŋŋu

ní kí fūkul̀ a-dimɔntiŋ wanti.»

Difiil nín bí la dee?

12 Ti-Dindaan nín lī puee sèé:

«Gbikinti yaa cúú upiiyee,

upikpaal dátí ayaka ali nì kitafakatii^a

ní kí fōō u-nyɔkɔn.

Míǹ mbaantiim ní bi làá dāá fīī

Isirayeel yab bin kóò Samaarii tiŋkin,

ki dɔ̄ dijal pu àá ndoo puee.»

Ti-Dindaan kpáafì Isirayeel yab

13 Ti-Dindaan Unimbɔti,

Unimbɔti Mpɔŋkɔdaan nín sòon̄ puee sèé:

«Ní pīlifìmaan kí dū tibɔkpaafikaal nee

kí nàatī Jaakɔb naantiibi.

14 Ŋwiin ŋun m làá dāá dáaĺ

Isirayeel yab tafal bi-kpitii puee,

m làá dāá gbá kí wìil̀ isaraafan

in bí Beeteel tiŋkinee kɔkɔ.

M làá dāá gbá kí kéetí nsaraafan yiŋyi

ní í nīn kíǹ ki dɔ̄ kitiŋ.

15 M làá dāá wìil̀ bi-dikpaaŋŋi,

nì bi-diwaammu.

M làá dāá wìil̀ adiin ŋin pu bi nákáǹ akuntinyin

ki nyáantì-ŋee,

adikpaan kɔkɔ làá dāá lítí.»

Ti-Dindaan di lī míǹ!