Daniel Gbɔŋku 6

1 Daariyusi un sá umeedijee^a di nìn fōō dibeel. U nìn cáá abin imuŋku ita nì ali ní ki fōō dibeel.

Daniyeel nannanliibi píĺ-u kutaliŋŋu

2 Daariyusi nìn ká yii an kítì ú kàan̄ ntiŋgbamu kpilib binib dilaataal nì mmuŋku bí nīn kpòotī kitiŋ kɔkɔ. 3 U nìn gíti lēē bikàliŋkpilib bita bí nīn kpèé ntiŋgbamu kpilib nín kpòotī kitiŋ puee, án nín làá ŋá pu ubɔti tuuŋŋi ń nīn còom̄ tiŋanee. Daniyeel nìn sá bikàliŋkpilib bita gbanti kansikin ubɔ. 4 Ama Daniyeel gbantee nìn jítiǹ bikàliŋkpilib bili bin kíǹee nì ntiŋgbamu kpilib kɔkɔ. Di sá yii ŋfam min nìn bí u-nee nyáń mi-ba, an pu ní ubɔti nìn bíi màkafī kí dū-u kí kàan̄ u-beel kɔkɔ pu ukpil. 5 Niinee ní bikàliŋkpilibee nì ntiŋgbamu kpilib kíĺ ki bíi kpèé Daniyeel nín kpòotī kitiŋ puee, bi yaa bàà kāntí tikpitil tiba u-pu kí sòoǹ. Ama baa nìn ŋúń ki ká tikpitil tiba u-puɔɔɔ, kaa ti ká diyìntil diba mun u-pu kí sòoǹ. Di sá yii Daniyeel nìn bí deedee ní, an puee baa nìn pée ká báà tiba nì tiba u-pu kí kɔ̄kɔl̀-u. 6 Niinee ní binibee dāa lī yii: «Tí dāá ká Daniyeel nee pu tiba kí sòoǹee, án làá nīn pɔ̄ɔ̄. Ti yaa pée là kí ká tiba u-pu kí sòoǹee, see tí dūú dī u-Nimbɔtiu marau pu.»

7 Niinee ní bikàliŋkpilibee nì ntiŋgbamu kpilibee yíkì malaa ki nín cá ubɔti cee ki bí-u yii: «Ubɔti Daariyusi, Unimbɔti ń tīī-si mmaŋfafɔkɔn. 8 Kitiŋ kàliŋkpilib kɔkɔ nì Kɔmandambi nì ntiŋgbamu kpilib nì akpambal nì gɔminab kpáfì ki ká yii ubɔti ń yóoń mara kí nyīī ŋŋal mara gbanti pu yii: <Kí yòon̄ díǹ kí cáá sāā iwiin mmuŋku nì saalaayee, ubɔ yaa gbāaǹ ki mēē diwaal àá unil ubɔ tiba ŋwimmeem poon ní an kaa sá sii ubɔtee, bí cáá udaan kí tɔ̄ mbòó ŋun poon bi kpàá gbikintibee. 9 Míǹ puee, ubɔti, á ŋmà tibɔti nee kí nyīī ŋŋal bí taa ŋmā kí kpántí tiba nì tiba tibɔti gbanti poon, kii Meedeesi yab nì Peeriisi yab marab nín kaa ŋūǹ kí kpántí puee.» 10 Niinee ní ubɔti Daariyusi nyīī maree pu ŋŋal.

Bi dū Daniyeel ki tɔ́ gbikinti bookun

11 Ŋyunti ŋun Daniyeel béè yii bi nyīī maree pu ŋŋalee ní u nín kóò u-diikun. U-diiku gbanti nìn sá aditɔntɔkɔ ní ki tɔ́kɔ́ yilpu, ki nìn cáá tɔkɔlab bin wāā ki bíitì Jeerusaleemee. Niin ní u nìn gbàantí u-tabiŋyiliŋ pu ki mèé ki nyɔ́ŋkí u-Nimbɔtiu ŋwiin kamaa ŋfunyɔm mita, kii u nín nìn pée kpààa ŋáań puee. 12 Niinee ní binibee nóó dikitil ki bìl̄ ki kɔ́ Daniyeel pu ní ki ká-u u gbāā ki mèé ki gbàam̄ u-Nimbɔtiu. 13 Bi ká mimmee ní ki nín cá ubɔti cee ki bí-u yii: «Ubɔti, an kaa sá sii di nyīī mara nee pu ŋŋal yii kí yòon̄ kí cáá sāā iwiin mmuŋku nì saalaayee, un yaa mēē diwaal àá unil ubɔ tiba ŋwimmeem poon ní an kaa sá siiyee, bí cáá udaan kí tɔ̄ mbòó ŋun poon bi kpàá gbikintibeeee?» Ní ubɔti kíí yii: «Míǹ deedee ní an sá, kii Meedeesi yab nì Peeriisi yab marau nín kaa kpántí puee.» 14 Ní binibee fātìi bí ubɔti yii: «Toooo! Daniyeel un sá bin ti cáań Juuda tiŋkin kuyuŋuee kansikin ubɔee kaa fātìi tɔ́-si, ki dāa nín kàaǹ mara un pu a nyīī ŋŋalee. Kpèè, u pée mèé ní ŋfunyɔm mita ŋwiin.»

15 Ubɔti nín gbìl̄ tibɔti gbantee ní an kɔ́ǹ-u kunimbaau ní u lēē u-pɔbilin kí fīī Daniyeel. U pée mɔ̀n̄ míǹ ní áli ŋwìiń dāa jéetì ki pée bíi nyàab̀ nsan ŋun pu u làá dī kí fīī-uee. 16 Ama ní binibee fātìi gítìń malaa ubɔti cee ki bí-u yii: «Ubɔti, a pée nyí yii Meedeesi yab nì Peeriisi yab marau poonee, ubɔti yaa ŋmàn̄ mara ki nyīī ŋŋalee, baa ti ŋūǹ kí kpántí-u.» 17 Niinee ní ubɔti tīī mara yii bí cáań Daniyeel kí dū-u kí tɔ̄ mbòó ŋun poon bi kpàá gbikintibee. Ní ubɔti bí Daniyeel yii: «See a-Nimbɔtiu un a jáaḿ kaa gbèentée baba di ŋūǹ kí fīī-si.»

18 Bi nìn cáań ditaŋkpakpaandi diba ki pīiǹ mbòóyee nyɔkɔ pu ní ubɔti yōoǹ úǹ u-ba jaliiki nì u-kàliŋkpilib jaliiki ki nyīī ditaŋkpalee pu, án nín làá ŋá pu ubɔ ń taa ŋmā kí kpántí Daniyeel pu tibee. 19 Ubɔti ŋá míǹ ki dóòyee ní ki nín kóò u-beecindin. Kunyeeu gbantee waa gèeǹaaa, kaa jíń tibaaa, kaa yāntì u-bɔmbi báà ubɔ mun kɔ́nní u-cee.

Tiba kaa ŋá Daniyeel gbikintib bookun

20 Ntaafaabɔmbɔminee ní ubɔti yíkì malaa ki nín cá mbòó ŋun poon bi kpàá gbikintibee. 21 Ŋyunti ŋun u tóob́ kí bà mbòó laŋkee ní u yíiń Daniyeel nì kunimbaau poon yii: «Daniyeel, Unimbɔti un bí dimaŋfalinee tɔntɔnliu, a-Nimbɔtiu un ní a jáaḿ kaa gbèentée ŋúń ki fīī-si gbikintib ŋaanaaa?» 22 Ní Daniyeel kíí-u yii: «Ubɔti, Unimbɔti ń tīī-si mmaŋfafɔkɔn! 23 M-Nimbɔtiu túnní u-tuuŋŋu ní ŋu dɔ́miń ki pīiǹ gbikintib nyɔmmu ní baa ŋá-mi tiba. Di sá Unimbɔti ká yii m síl̀ nì u deedee kaa yīntiǹ-u tiba, ní kaa yīntiǹ sii, ubɔti mun tiba.» 24 Niinee ní an mɔ́ɔkiǹ ubɔti ní u tīī mara yii bí nyāntí Daniyeel mbòóyee poon. Ní bi nyántì Daniyeel mbòó poon, ama baa nìn ká u-pu báà tiweendi, di sá yii u nìn máká u-Nimbɔtiu pu. 25 Ní ubɔti yāntì bi cáań bin nìn kúŋfì Daniyeel boonee ki tɔ́ mbòó ŋun poon bi kpàá gbikintibee, ki kpáaǹ bi-biyaamu nì bi-nimpoobi. Bi tin pée lì yii bi dù-bi kí tɔ̄ee, baa bàn̄ kitiŋ ní gbikintib kíntì-bi ki tɔ̄ntì ki wīil̀ bi-kpabiŋ kɔkɔ.

26 Míǹ boonee ní ubɔti Daariyusi ŋmàn̄ kugbɔŋu ki tīī anibul nì atimbun nì isoon kɔkɔ nib bin kóò u-tiŋki kɔkɔ puee yii:

«Ŋgbansɔŋfi ń nīn bí ni-cee.

27 «M tīī mara m-beel kɔkɔ poon yii báà ŋma ń nīn fàŋkí Daniyeel Nimbɔtiu ki nīn tɔ́-u.

Di sá yii úǹ di sá Unimbɔti un bí dimaŋfalinee,

ní ki bí talku.

U-beel kaa bí kí bīil̀ dalba dalba,

ní u-pɔŋŋu mun kpá kí kúntí jaanjaan.

28 Úǹ di jòoń unil ki fìil̄-u,

u ŋáań maamaaci tuŋkpaaŋŋi yilpu nì kitiŋ pu.

Úǹ di fīī Daniyeel ki nyántì gbikintib ŋaan.»

29 Míǹ boonee ní bi kāaǹ Daniyeel mpaaŋkpaan pu ŋyunti ŋun Daariyusi nìn kā dibeelee, ki kpáaǹ ŋyunti ŋun Peeriisi yab bɔtiu Siirusi mun dāa kāl̀ dibeelee^b.