Daniel Gbɔŋku 5

Tiŋmaŋmabiti tin bi ŋmàn̄ digundi puee

1 Dalbee, ubɔti Baltasaar ŋá jiŋaakpaan ubɔ ki yíiń u-kàliŋkpaambi binib kutuku, ní u kíĺ ki bíi nyù ndaam bi-nimbiin. 2 Ŋyunti ŋun Baltasaar nyùn̄ ndaam an nyāatì-uee ní u tīī mara yii bí cù kí yòon̄ sindaariya nì animbil kúti kɔŋkɔnnyɔkaabi bin u-baa Neebukadineesaar nìn yōoǹní Jeerusaleem kunimbɔtidiinee kí cáań^a. U nìn là u nì u-kàliŋkpaambi nì u-nimpoobi nì u-bɔmbi ń nīn bàtī ndaam ki ŋáań poon ki nyù. 3 Niinee ní bi cūtìi cáań sindaariya kɔŋkɔnnyɔkaabi bin bi nìn yōoǹní kunimbɔtidiin Jeerusaleemee u nì u-kàliŋkpaambi nì u-nimpoobi nì u-bɔmbi bātì ndaam ki ŋá poon ki nyùn̄. 4 Bi nyùn̄ ndaam míǹ ki dóòyee ní ki nyɔ́ŋkì awaa ŋin sá sindaariya nì animbil kúti nì tasa kúti nì tikúti nì idɔ nì ataŋkpeeyee.

5 Bi bíi ŋáań míǹ kpalaayee, unil ŋaliŋu ŋubɔ nyáń ki kíĺ ki bíi ŋmà dibeecindi gundi pu laakin fitila nìn tɔ́kɔ́ ki ŋmíntée. Ubɔti nìn ká ŋŋalee nín nìn bíi ŋmà puee. 6 Niinee ní ubɔti nimbiin cúu kpántì ní u-pɔbil bíil̀ ŋkpitim pu ní u-wunti kɔkɔ fōō dijinjikil ní u-tabiŋyiliŋ kíǹ ki gbáà tɔb kpàkpa. 7 Ní ubɔti téeń mpɔn yii bí cáań bikpaŋkpantiibi nì bibɔɔbi nì bin kpèé iŋmalbijaa kí béé tin dòońee. Ŋyunti ŋun Babiloon ciŋfitiibi gbanti kɔkɔ kpáfèe ní ubɔti bí-bi yii: «Un yaa ŋúń ki kàan̄ tiŋmaŋmabiti nee ki lēē ti-taapu ki tùkū-mee, m làá yàntī bí dū dibeebɔkutil din máǹ cínciŋee kí pèen̄-u, kí dū sindaariya léeŋkaati kí léeń-u, ní udaan ń kūtì bikàliŋkpaambi pu bí nīn kpòotī dibeel.» 8 Ubɔti ciŋfitiibi kɔkɔ kɔ́, ama baa ŋúń ki kàan̄ tiŋmaŋmabitee kpaŋkpan ki dāa nín lèekī ti-taapu ki tùkù ubɔti. 9 An ŋá mimmee ní ubɔti Baltasaar pɔbil mɔ̄tìi bíil̀ ní u-nimbiin gíti cúu kpántì, ní an bākatì u-kàliŋkpilib sèeee, ní bi mun kaa ti nyí tin poon bi bée.

Daniyeel lēē maamaaci ŋmaŋmabitee taapu

10 Ubɔti na gbìl̄ ubɔti nì u-kàliŋkpilib biilii puee ní u kɔ́ kudii kun poon bi kā ki jīǹ jiŋaalee ki lī yii: «Ubɔti, Unimbɔti ń tīī-si mmaŋfafɔkɔn! Taa yàntī a-landɔkɔi ń bīil̀ a-pɔbil míǹ kí taa yàntī a-nimbiin ń cúú kpántí míǹ. 11 A-beel poonee, uninja ubɔ bí inimbɔti in bí circiree fam bí u-ni. A-baa yuntiŋuee, bi nìn dáań ki ká yii u wāĺ ki cáá dinyil nì iciin in náań nì awaa ciiŋyee. An puee ní a-baa, ubɔti Neebukadineesaar nìn dū-u ki kpántì bibɔɔbi nì bikpaŋkpantiibi nì bikpaŋkpalib nì bin kpèé iŋmalbijaa kí béé tin dòońee kɔkɔ kpiliu. 12 Di sá yii Daniyeel gbanti un ní ubɔti nìn páaǹ diyindi yii Baltasaaree nìn cáá ŋfam min nyáń mi-bee nì dinyil nì iciin ní ki nìn ŋūǹ kí lēē tidamintiil taapu, ki nìn nyí ipɔɔn kɔkɔ taapu kí tùkù unil, ní ki nìn tí ŋūǹ kí lēē tibɔti tin pɔ̄ɔ̄yee taapu. Míǹ puee tɔ̄ bí yíiń Daniyeel gbanti, u làá tùkù-si tiŋmaŋmabiti nee taapu.»

13 Niinee ní bi cūtìi cáań Daniyeel ubɔti nimbiin ní ubɔti bālifì-u yii: «Sii di lafun sá Daniyeel, Juuda yab yumbui in m-baa ubɔti nìn cáań Juuda tiŋkinee ubɔeeee? 14 Di sá yii m gbìl̄ a-pu yii inimbɔti fam bí a-ni ní a wāĺ ki cáá dinyil nì iciin in nyáń i-bee. 15 Bi dáá pée cáań-mi biciŋfitiibi nì bikpaŋkpantiibi bí bàà kàaǹ tiŋmaŋmabiti nee kí tùkù-mi taapu dee, ama baa ŋúń. 16 Ní m gbìl̄ yii a ŋūǹ kí lēē ipɔɔn nì tibɔti tin pɔ̄ɔ̄yee taapu. Too, kɔŋkɔnnee, a yaa ŋúń ki kàan̄ tiŋmaŋmabiti nee ki lēē taapu ki tùkū-mee, m làá yàntī bí dū dibeebɔkutil din máǹ cínciŋee kí pèen̄-si, ní kí dū sindaariya léeŋkaati kí léeń-si, ní á kūtì bikàliŋkpaambi pu ní nīn kpòotī dibeel.»

17 Niinee ní Daniyeel kíí ubɔti yii: «Ubɔti, yòon̄ a-wampɔkaati kí dū tipaal tin a bàà làá pà-mee kí tīī ubɔ. Nì míǹ kɔkɔee, m làá kàaǹ tiŋmaŋmabitee kí lēē taapu kí tùkù-si. 18 Ti-baa ubɔti, Yilpu Fɔ́ŋŋŋ Nimbɔtiu nìn yāntì a-baa Neebukadineesaar kpántì ubɔtikpaan. U nìn cáá tinyool nì mpɔŋkpaan. 19 Unimbɔti nín nìn yāntì u kpántì ukpaan miŋyee, anibul nì atimbun nì isoon kɔkɔ nib nìn fàŋkí ní yɔ́kɔ́ yɔkɔ u-nimbiin. Ubɔti yaa nìn là kí kpɔ̀ uŋyee u kù ní, ní un u yaa nìn tí là ú nīn bí dimaŋfalinee, ní ú yàntī udaan. U nìn yòontí un u yaa nìn là kí yòon̄ yilpuee, ní ki nìn sìntī un u yaa nìn là kí sìntī taapuee. 20 Ama ŋyunti ŋun u yōoǹ u-ba yilpu ki kɔ́ dilambilinee, bi nìn kpákatì-u u-beejal pu ní u fá u-nyooti. 21 Bi jìn̄-u binib kansikin ní u kpántì kii upeelee. U nìn bí kumooun mammu kansikin, ní ki nìn ŋmóò timool kii unaayee. U nìn fùul̀ dimalindi ki cáa sāā ŋyunti ŋun u béè yii Yilpu Fɔ́ŋŋŋ Nimbɔtiu di cáá binib beeŋi kɔkɔ pu mpɔn, ní un u yaa lèe, u kàantí dibeelee. 22 Ní sii, u-jipɔɔn Baltasaar, min kamaa a nyí tíǹ gbanti kɔkɔee, aa sīntiǹ a-ba taapu, 23 ní ki yíkì kí já nì ti-Dindaan un bí yilpuee. A yāntì bi cūtìi cáań u-diiku poon kɔŋkɔnnyɔkaabi ní sii nì a-kàliŋkpaambi nì a-nimpoobi nì a-bɔmbi bātì ndaam ki ŋá poon ki nyùn̄. Míǹ boonee, a nyɔ́ŋkì awaa ŋin sá animbil kúti nì sindaariya nì tasa kúti nì tikúti nì idɔ nì ataŋkpeeyee, awaa ŋin kaa wāĺaaa, kaa gbìl̀aaa, kaa nyí tiba muee. A ŋá míǹ kaa nyɔ́ŋkì Unimbɔti un ŋaan ní a-maŋfal nì tin kɔkɔ ŋūǹ kí bàń-see kēe. 24 An pu ní Unimbɔti túnní ŋŋal nee ŋú dāan̄ kí ŋmà tiŋmaŋmabiti nee. 25 Tiŋmaŋmabiti tin bi ŋmàn̄ee sɔ̄: MEENEE, MEENEE, TEEKEEL nì PEEREESI. 26 Anyɔɔbun gbanti taapu sɔ̀: MEENEE, taapu di sá yii bi kàan̄ : Unimbɔti kàan̄ a-beel wiiŋyi ní ki kúntì-i. 27 TEEKEEL, taapu di sá yii bi ŋmāntì : Bi ŋmāntì-si saniya pu ní ki ká yii aa nyìm̀. 28 PEEREESI, taapu di sá yii bi yākatì : Unimbɔti cúú a-beel ki yākatì ki tīī Meedeesi nì Peeriisi yab.»

29 Niinee ní Baltasaar tīī mara yii bí dū dibeebɔkutil din máǹ cínciŋee kí pèen̄ Daniyeel, kí dū sindaariya léeŋkaati kí léeń-u ní kí bāakì yii Daniyeel làá kūtì bikàliŋkpaambi pu bí nīn kpòotī dibeel.

30 Kunyeeu gbanti ní bi kūū Baltasaar, Babiloon bɔtiu.