Eeseekiyeel 33

Unimbɔti dū Eeseekiyeel ki kāaǹ uciitil

(Kpèè 3.16-21)

1 Ti-Dindaan bí-mi yii: 2 «Nisaaleen, sòoǹ nì Isirayeel yab kí tùkù-bi yii: M yaa dū kujaau ki tɔ́ kitiŋ kiba puee, kitiŋ gbanti yab lèekī bi-kansikin ubɔ ní ú nīn sá bi-ciitiliu. 3 Uciitilee yaa wál̀ bijanjaliibi dòoń kí jáǹ-bee, u búǹ ŋyin ní kí kpāafì samaa. 4 Ubɔ yaa gbìl̄ ŋyin pu ní kaa fātìi tɔ́ ní bi yaa dɔ́miń ki kūū-uee, udaan kúm kpuulool làá lítí úǹ u-ba pu ní. 5 U gbìl̄ bi nín búń ŋyinee ní kaa fātìi tɔ́. U-kúm kpuulool làá fàtīí gítí úǹ u-ba pu ní. U yaa bàà dūu túń ditundee, u bàà fìil̄ u-ba ní. 6 Ama uciitilee yaa wál̀ bijanjaliibi dòoń kí jáǹ-bi ní waa búń ŋyinee, samaa kaa làá béé yii tiba bí ki dòoń. Unannanli yaa dūu túuǹ ubɔ ki kūū-uee, uciitilee bɔti dee. M làá dāá bàlifì uciitil un bi kūūyee fatikuu pu.

7 «Nisaaleen, sii ní m dūu síiǹ á nīn sá Isirayeel nibul pu uciitil. Á pīlifì m-nyɔɔbuŋŋi kí dūú nàatī Isirayeel yab kí kpāafì-bi. 8 M yaa tùkū unikpiti yii: <Unikpiti, a làá pée kpú ní>, ama ní sii kaa kpáafì-u ú kpántí u-bimbimee, unikpiti gbanti làá kpú u-kpitii pu, ama sii ní m làá dāá bàlifì u-fatikuu pu. 9 Ama a yaa kpáafì unikpiti ú bàà kpántí u-bimbim ní waa kpántèe, u làá kpú u-kpitii pu ní sii ń fīī a-ba.»

Unikpiti un gítìń Unimbɔti ceeyee kāntí dimaŋfal

10 «Sii nisaaleen, tùkù Isirayeel yab bi nín bí ki lì yii: <Ti-yìntitam nì ti-kpitii nyìm̀ ti-pu. I-puee, taa ti cáá mpɔn báà fiii. Ti làá ŋá mana ní kí ŋmátí nan?> 11 Tùkù-bi yii m bí dimaŋfalin! Man ni-Dindaan Unimbɔti nín sòon̄ yii, unikpiti kúm bɔti kaa mɔ̄ǹ-mi. Kun m pée nyàab̀ee di sá ú kpántí u-bimbim kí nīn bí dimaŋfalin. Isirayeel yab, m gbàam̄-ni ní, fámaan ni-bimbikpitim. Ba pu ní ni là kí kpú ní?

12 «Sii nisaaleen, tùkù a-nibul yab yii: <Deedeedaan yaa kíĺ ki bíi ŋáań tin kaa ŋān̄ee, deedee tuuŋŋi ŋin u ŋá an jítèe kaa làá fīī-u. Ama unikpiti yaa fá u-bimbikpitim, ikpiti in u ŋá an jítèe kaa làá yàntī ú wāŋkì. An puee deedeedaan yaa kíĺ ki bíi ŋáań ikpitee, deedee tuuŋŋi ŋin u nìn ŋá dooooyee kaa làá ŋmā kí fīī-u. 13 M yaa pōoǹ kí tīī deedeedaan dimaŋfal ní u dākafì yii deedee tuuŋŋi ŋin u ŋá an jítèe wíiǹ ní u kíĺ ki bíi ŋáań ikpitee, bi làá súntí u-deedee tuuŋŋee kɔkɔ pu ní ú kpú ikpiti in ní u ŋée pu. 14 Ama m yaa kpáafì unikpiti yii u máaǹ ŋkúm ní u fá u-bimbikpitim ki kíĺ ki kíǹ ki bíi ŋáań tin kítèe nì tin bí deedeeyee, waa làá kpú. 15 U yaa gíiǹ toolima un ubɔ cáań ki yóoǹ u-ceeyee ki tīī-u, àá u gíiǹ tin u yùn̄ee ki tīī uwandaan ki kíĺ ki kíǹ ki tɔ́ marab bin tìì dimaŋfalee, ní kaa ti bíi ŋáań ikpitee, udaan làá pée ŋmátí ní, waa làá kpú. 16 Bi làá súntí u-tuŋkpitiŋ ŋin ní u ŋée kɔkɔ pu ní ú ŋmátí, di sá yii u kíĺ ki bíi ŋáań tin kítèe nì tin bí deedeeyee.

17 «A-tiŋkin nib lì yii man ni-Dindaan nín ŋáań puee kaa kítì. Ama an sá bíǹ nín ŋáań puee di kaa kítì! 18 Deedeedaan yaa gbēeǹ kaa ti bíi ŋáań deedee tuuŋŋi ní ki bíi ŋáań tikpitilee, see ú kpú. 19 Ama unikpiti yaa fá u-bimbikpitim ní ki kíĺ ki bíi ŋáań deedee tuuŋŋi nì tin kítèe, u làá ŋmátí an pu.

20 «Ama ní nimbi Isirayeel yab lì yii man nín ŋáań puee kaa kítì! Too, ní béé yii m làá sòoǹ báà ŋma bɔti kí nóó nì tin u ŋée ní!>»

Isirayeel tiŋki kpántì adigbuŋkati ŋma

21 Bi nín cúú Isirayeel yab ki cūnnì kuyuŋu abin saalaa nì ali boon, uŋmal usaalaati wiŋŋmooŋmootiŋu dalee, uninja ubɔ nìn sáǹ ki nyáń bin jáń ki fōō Jeerusaleem tiŋkee ŋaan ní u bí-mi yii: «Bi jáń ki fōō Jeerusaleem tiŋki!» 22 Kí wàatī ú bàń m-cee kujoouee ní ti-Dindaan yāntì m gbìl̄ u-pɔŋŋu m-ni ní m kíǹ ki ŋūǹ kí sòoǹ. Kutaa wúntì ŋyunti ŋun un sáǹ ki ŋmátèe bāań m-ceeyee, maa nìn gíti sá umuun, m nìn kíǹ ki ŋūǹ kí sòoǹ. 23 Ní ti-Dindaan bí-mi yii: 24 «Nisaaleen, binib bin kíǹ ki kóò Isirayeel timmu mun kpántì adigbuŋkatee lì yii: <Abraam nìn bí u-baba ní, ama ní ki nìn yì kitiŋ nee kɔkɔ. Kin ataa aŋa pu ní baa làá dū kitiŋ nee kí tīī timbi bin wīikí nee tí nīn yì.> 25 Too, tùkù-bi tin man ni-Dindaan Unimbɔti cáá kí sòoǹ nì bee yii: <Ni ŋmóò tinan tin poon ní fatiku kēe, ki tòotī awaa, ki kù binib, kin mana ní ni ŋūǹ kí lì yii nimbi di yì kitiŋ nee>. 26 Ni-janjawanti ŋmaniŋma pu ní ni máká. Ni ŋáań ntimbiil tuuŋŋi, ki fòol̄ ni-jutiibi nimpoobi, kin mana ní ni ŋūǹ kí lì yii nimbi di yì kitiŋ nee?

27 «Tùkù-bi yii man bi-Dindaan Unimbɔti nín sòon̄ puee sèé: <M bí dimaŋfalin! M bíi tùkù-ni yii bin kíǹ ki bí ntimu mun kpántì adigbuŋkatee poonee, bi làá dū ntàataajimu kí kpɔ̀-bi, ní ipeecuncuti ń tɔ̀ntī bin bí tisatinee ní bìlbil kúm ń kpɔ̀ bin sáǹ ki bál̀ ajoon pu nì itaŋkpalɔkɔnee. 28 M làá nàan̄ kitiŋ nee ní kí yàntī kí kpántí kuteeu. Mpɔn ŋun di nìn yàntī bin kóò kinee cáá dilambilee làá kúntí. Isirayeel jooŋŋi làá kpántí kii kuteeuee ní, ubɔ kaa làá ti dī niin kí cù laaba.> 29 M làá yàntī kitiŋ nee ń kpántí kii kuteeuee ntimbiil tuuŋŋi ŋin Isirayeel yab ŋáaǹee pu. Ŋyunti gbantee, bi làá béé yii man di sá bi-Dindaan.

30 «Nisaaleen, pīlifì, a-tiŋkin nib kpáfí digundi din bi máń ki tú kitiŋee caŋin àá bi-diiŋŋi nyɔkɔpu ki sòoǹ a-bɔti. Bi sòoǹ nì tɔb yii: <Tí cùú pīlifì tin ti-Dindaan cáá kí tùkù-tee>. 31 Niinee ní a-tiŋkin yab ń kóoǹ kí kpāfì ki kā a-nimbiin kí pīlifì tin a cáá kí sòoǹee, ama baa tɔ́ tin a sòoǹee. Bi nín là puee ní bi ŋáań ní ki nyàab̀ bíǹ bi-ba paatii. 32 Tiŋmanee, a bí kii ulaŋgaanyaan un neen mɔ̄ bi bɔ̀ɔ́ tibɔɔkaal ki kìntēe ní. Bi pílifí a-bɔti, ama ní kaa cáa tūǹ nì ditundi. 33 Tin a sòon̄ nee kɔkɔ yaa láa bāań, ní an lafun dòoń mun, bi làá dāá béé yii ubɔnaatil ubɔ nìn kāl̀ bi-kansikin.»